Tite 2 - Ala Ya Salatikan Kula Kitabu

Kalan sɔvɛ ka bɛn limaniyajama ma

¹ Ile koni, i yi mɔɔlu kalan ka bɛn kalan sɔvɛ ma.

² A fɔ kɛmɔbalu yɛ ko ai yi kɛ mɔɔ sɔvɛ le, k'ai jɛlɛ buɲa, ani k'ai jɛlɛ lɔmina, ani ka sawati limaniya ni kanundeya ni sawali lɔ.

³ Wo boloɲa kelen ma, i y'a fɔ mosokɔlɔbalu yɛ ko ai yi Ala buɲa ai kokɛɲalu lɔ. Ai kà kɛ tɔɔtiɲalikɛba le. Ai do kà gbɛ buba min ka kɛ gbɛ ya jɔn ne. Mafɔ, ai yi mɔɔlu kalan koɲuma la,

⁴ fɔsa ai yi singbililu makalan ai kɛ́nu ni ai dennu kanuɲa la,

⁵ ani ka kɛ jɛlɛlɔminamɔɔ ni mɔɔ sɛnɛyanin ne, ka ɲumaya, k'ai jando aiya luma baalelu lɔ, ani k'ai fanmajii ai kɛ́nu yɛ. Wo vɛ kɛla, mɔɔ foi tɛnala Ala kumakan mafinna.

⁶ Wo boloɲa kelen ma, i yi kavelennu lali ko ai yi kɛ jɛlɛlɔminamɔɔlu le.

⁷ Ile gbu yi ko bɛ kɛ kobɛn k'i jɛlɛ kɛ misali le mɔɔlu yɛ koɲuma kɛko bɛ lɔ. I do vɛ kɛla mɔɔlu kalanna, i y'a kɛ mɔɔsɔvɛya ni josolɔgbɛya boloma,

⁸ ka kuma sɔvɛlu fɔ, mɔɔ tɛ se min sɔsɔla, fɔsa mɔ juulu yi maloya, ai kana kuma yon suu suu sɔlɔn k'a fɔ mɔ ma.

⁹ I y'a fɔ jɔnnu yɛ ko ai y'ai fanmajii aiya jɔnfalu yɛ ko bɛ lɔ, k'ai ladiyanankolu kɛ. Ai do kà ai sɔsɔ

¹⁰ niwotɛ ka suɲali kɛ ai ma, mafɔ k'aiya lanandeya ni ɲumaya jiya waate bɛ, min y'a kɛ ai yi mɔ Lakisiba Ala ya kalan dalaya kɔlɔta ko bɛ lɔ.

¹¹ Kamasɔlɔn Ala ya nɛɛma la vɛ nkɛnɛmaya, min yi nala kisiko le adamaden bɛ yɛ.

¹² Nɛɛma wo yi mɔ kalanna le ko, m'i Alabuɲabaliya to je, k'i ban dunuɲa niikanukolu lɔ, fɔsa m'i taama jɛlɛlɔmina ni telenmandeya ani Alaɲasiyanɲɛ boloma dunuɲalɔtɛɛ min nɔ,

¹³ ka mɔ to mɔ jeisii hɛlɛlon makɔnɔna, mɔ Tii Ala makawanin ya magbiliyali lankɛnɛmayatɔ lon min na, min yi mɔ Lakisiba Masa Tɔɔmasenin Isa le.

¹⁴ Ale le n'a jɛlɛ dila maa ko lɔ, fɔsa a yi mɔ kunmaka ka mɔ bɔ maa kɔnɔlɔgbeya bɛ lɔ, ani ka mɔɔlu lasɛnɛya a jɛlɛ yɛ minu sɛmɛdonnin kɛko ɲumalu ma.

¹⁵ I ka kan k'ai kalan ko minu le la, k'ai sɛmɛdon, ani k'ai makuma iya kuntiiya see bɛ le. I do kà diɲa mɔɔ suu suu yi jɔ i ma.