Tite 1 - Ala Ya Salatikan Kula Kitabu

¹ Ǹe Pɔli le yi lɛtɛlɛ min sɛvɛla, ǹe min yi Ala ya bɔiden ne ani Masa Tɔɔmasenin Isa ya keladen. Ǹ tayine ka ǹ kelaya ko ǹ'i Ala ya mɔɔ taninnu madɛmɛn aiya limaniya lɔ, k'ai lalɔnni tuɲa la min y'ai taamaɲa bɛn Ala ɲakɔlɔ,

² fɔsa niimaya banbali jeisii yi kɛ ai bolo, tuɲande Ala na min lahedi tala jani dunuɲa tɛɛ dan.

³ Kɛɛ tandainɔ, Ala ya waate latɛɛnin nɔ, a v'a kumakan lankɛnɛmaya ǹa kawanili fɛ, min kalifanin ǹ na ka bɛn mɔ Lakisiba Ala ya jamali ma.

⁴ Ǹ'i min sɛvɛla ile Tite le ma, ǹ denkɛ bɛlɛbɛlɛ ka bɛn mɔ dɛɛn ma limaniya kelen na. Mɔ Fa Ala ni mɔ Lakisiba Masa Tɔɔmasenin Isa ya nɛɛma yi kɛ i yɛ, k'i josolajii.

Limaniyajama kunmafɛlɛnbalu taamaɲa

⁵ Ǹ na i tola Kɛlɛti kɔɔtɛmaduu lɔ fɔsa i yi ko tɔlu ɲabɔ, ani i yi ɲamɔɔlu lasii limaniyajamalu kunna so kelenkelenna bɛ la, iwo ǹ n'i lɔla a la teme.

⁶ Fɔ limaniyajama ɲamɔɔ yi kɛ jalakibali le, ani moso kelen tii, ani min dennu limaniyanin, ado jɛlɛlɔminabaliya ni kolobaliya mangutu kà kɛ ai kɔ.

⁷ Komi Ala ya baale kalifanin a la, wo lɔ, fɔ limaniyajama kunmafɛlɛnba yi kɛ jalakibali le. A kà kɛ mɔɔ kafanin ne, niwotɛ josobatii, niwotɛ gbɛtɔ, niwotɛ mɔɔ faiyanin, niwotɛ nataba.

⁸ Kɛɛ fɔ a yi kɛ jetii ɲuma le le, ani koɲuma ladiyaɲɛba, ani hangilima, ani telenmande, ani mɔɔ sɛnɛyanin, ani jɛlɛlɔminamɔɔ.

⁹ A a bolo kɛ lanaya kuma la kpekpe iwo a kalannin a la teme, fɔsa a yi se mɔɔlu sɛmɛdonna kalan bɛlɛ la teme, ani ka mɔɔlu jobaliya minu y'a sɔsɔla.

¹⁰ Kamasɔlɔn kolobalilu walayine minu yi dɔlu lafilila aiya kuma kundannu le. Wolu walayine bɛlɛbɛlɛ kɛ Jahudiya wolu tɛma minu fasanin kɛnɛkɛko ma.

¹¹ Fɔ wolu la yi jeden, kamasɔlɔn ai yi bonkelennamɔɔlu bɛ le kunnɔtɛɛla kelen ne aiya kalan bɛnbali le, fɔsa ai yi tɔnɔ sɔlɔn malobaliya boloma.

¹² Ai jɛlɛkanu kela dɔ n'a fɔla, a vɛɛ: «Kɛlɛtɛkalu yi faɲafɔ le la kudein, Soofali le ai le, minu saakɔlɔyanin, k'ai noo wala.»

¹³ Seleyakan wo yi tuɲa le le. Wo ma, i y'ai makuma bɛlɛbɛlɛ kɛ, fɔsa ai yi limaniya sɔvɛ sɔlɔn,

¹⁴ ka falan ai tolomalɔla Jahudiyalu ya faɲafɔ talikulu la, ani jamali minu dinin mɔɔlu bolo minu vɛ ai kɔdon tuɲa la.

¹⁵ Fen bɛ sɛnɛyanin mɔɔ sɛnɛyaninnu bolo, kɛɛ foi sɛnɛyanin tɛ mɔɔ kɔsɔnin limaniyabalilu bolo, kamasɔlɔn ai hangili ni ai miliya bɛ le lakɔsɔnin.

¹⁶ Ai y'a fɔla ko ai ka Ala lɔn, kɛɛ ai kɛkolu y'ai jobaliyala ka bɛn wo ma. Mɔɔ magbeyanin ne ài le, ani kolobali, minu tɛ se koɲuma suu suu kɛla.