Lɔmukalu 16 - Ala Ya Salatikan Kula Kitabu

Pɔli ya folikannu

¹ Ǹ'i mɔ badenmamoso Fibi matanula ài yɛ, min taanin kɛla limaniyajama makoɲabɔba le Sengele so kɔnɔ.

² Ài y'ài bolo sii a kɔlɔ mɔ Tii tɔɔ lɔ, iwo mumininnu ka kan ka mɔɔ suu wo buɲa teme. Ni a mako ka kɛ fen fen si la, ài y'a madɛmɛn wo la, kamasɔlɔn a vɛ mɔ badenma siyama madɛmɛn, ani ǹe gbu.

³ Ài yi Pisila ni a kɛ́ Akuila fo ǹ yɛ, m̀ baaledenɲɔɔlu le ve Masa Tɔɔmasenin Isa ya baale lɔ,

⁴ minu n'ai lɔla saya ɲa ǹa ko lɔ. Ǹe kelen tɛ balika bɔla ai yɛ, mafɔ limaniyajama minu bɛ yi siboloma gbɛlɛ mɔɔlu tɛma fana.

⁵ Limaniyajama min yi ladɛn kɛla aiya bon na, ài y'ai bɛ fo. Ài yi ǹ diyananmɔɔ Epainɛti fo, min taanin kɛla mɔɔ kunfɔlɔ le ka limaniya Masa Tɔɔmasenin ma Esiya koovi lɔ.

⁶ Ài yi Mɔyamu fo, min yi baale gbɛlɛn na ài yɛ.

⁷ Ài yi Andolonikusi ni Juniya fo, minu yi ǹ sibolomaɲɔɔ le, ani ai na kɛla ǹ kasodenɲɔɔ le waate lɔ. Ai lɔnnin bɛlɛbɛlɛ kɛ Isa ya keladennu tɛma, ado ai na donna Masa Tɔɔmasenin ya kafonɲɔɔya lɔ ǹe ɲa.

⁸ Ài yi Ampiliyasi fo, ǹ diyananmɔɔ le a le mɔ Tii ya kafonɲɔɔya lɔ.

⁹ Ài yi Ulubɛn fo, m̀ baaledenɲɔɔ le a le Masa Tɔɔmasenin ya baale lɔ, ani ài yi ǹ diyananmɔɔ Sitakisi fo.

¹⁰ Ài yi Apɛlɛsi fo, min ya kankelentiiya vɛ bɔ gbɛ la Masa Tɔɔmasenin ya ko lɔ. Ài yi Alisitobule ya bonnamɔɔlu fo.

¹¹ Ài yi ǹ sibolomaɲɔɔ Helodiyɔn fo. Ài yi Nalisisi ya bonnamɔɔlu fo, minu yi mɔ Tii ya kafonɲɔɔya lɔ.

¹² Ài yi mɔ badenmamoso fila fo ǹ yɛ, Tilifɛna ni Tilifosa, minu yi baale kɛla mɔ Tii yɛ. Ài yi mɔ diyanan badenmamoso Pɛlɛsidi fo, min fana vɛ baale gbɛlɛn kɛ mɔ Tii yɛ.

¹³ Ài yi Lufusi fo, mɔ Tii na min tala, ka a ba fana fo, min na ǹ lɔminala iwo a jɛlɛkanu den.

¹⁴ Ài yi Asinkiliti fo, ani Felegɔn, ani Hɛlimɛsi, ani Patolobasi, ani Hɛlimasi, ani mɔ badenma minu y'ai fɛ.

¹⁵ Ài yi Filologi ni Juliya fo, ani Nelesi ni a badenmamoso, ani Olimpasi ni mumininnu bɛ minu y'ai fɛ je.

¹⁶ Ài i ɲɔɔ fo kanundeya foli sɛnɛyanin ne. Masa Tɔɔmasenin ya limaniyajamalu bɛ y'ài fola.

Pɔli ya laili laban

¹⁷ M̀ badenmalu, ǹ'ài madiyala, ài y'ài jando ài jɛlɛ lɔ mɔɔwotɛfalanbalu ya ko lɔ, minu yi mɔɔlu kunnɔtɛɛla, ani ka kalan bɛlɛ sɔsɔ, ài na min sɔlɔnna. Ài y'ài mataa ai la feu!

¹⁸ Mɔɔ suu wolu tɛ baalela mɔ Tii Masa Tɔɔmasenin yɛ, mafɔ ai kɔnɔgbolo. Ai do yi kuma madiyanin ne fɔla ka mɔɔlu matɔɔ fuun fɔsa ai yi koɲayebalilu manɛɛ.

¹⁹ Kɛɛ àilu koni, bɛ k'a lɔn ài yi Samakan Kein labatola teme. Wo lɔ, ǹ sawanin àiya ko lɔ. Kɛɛ ǹ'a fɛ le ài yi kɛ hangilima le koɲuma lɔ, ani k'ài fɛ bɔ koyon na.

²⁰ Ado Ala min yi josolajii dila, wo kɛtɔ Soitana lɔgbɛnɛngɛla ài sen kɔlɔ jona. Mɔ Tii Masa Tɔɔmasenin Isa ya nɛɛma yi kɛ ài yɛ.

²¹ Ǹ baaledenɲɔɔ Timote y'ài fola, ani Lusiyusi ani Jason ani Sosipata, minu taanin kɛla ǹ sibolomaɲɔɔlu le.

²² Ǹe Tɛlitusi min yi lɛtɛlɛ min sɛvɛla Pɔli yɛ, ǹe fana y'ài fola mɔ Tii tɔɔ lɔ.

²³ Gayusi y'ài fola, min taanin kɛla ǹ jetii le, ani limaniyajama fana jetii. Elasitusi, min yi so wɔlilamalaba le, wo y'ài fola ani mɔ baden Kuwatusi.

Duwawu laban

²⁵ Tanuli yi Ala yɛ, a see yi min yɛ k'ài lasawati limaniya lɔ iwo ǹ na kawanili kɛla teme ǹa Samakan Kein nɔ ka bɛn Masa Tɔɔmasenin Isa ma. Ala ya gbonoko le wo le, a na min doonna waate timinninu kɔlɔ,

²⁶ kɛɛ a vɛ bɔ gbɛ la yi ne kelalu ya kitabulu fɛ. Ado ka bɛn Habadan Ala ya jamali ma, gbonoko min vɛ lɔn siboloma bɛ bolo, fɔsa ai yi kolo a yɛ limaniya boloma.

²⁷ Tanuli yi Ala yɛ, min kelenpesa yi hangilima le. Tanuli y'a yɛ Masa Tɔɔmasenin Isa sabu la habadan! Amiina.