Lɔmukalu 14 - Ala Ya Salatikan Kula Kitabu

Ài k'i ɲɔɔ kiti

¹ Mɔɔ min ya limaniya dɔɔyanin ài tɛma, ài y'ài bolo sii wo tii kɔlɔ. Ài do kà sɔsɔyali bila a la ka bɛn koɲayenkolu ma.

² Mɔɔ dɔ limaniyanin ko a yi sene fen suu bɛ dɔ dɔnna, k'a talan mɔɔ min ya limaniya dɔɔyanin, wo tii yi gbelelɔfennu le dɔnna dein.

³ Mɔɔ min yi fen bɛ dɔ dɔnna, a man kan ka dɔ lafeya min tɛ fen bɛ dɔ dɔnna. Wo fana kà a mɔɔɲɔɔ kiti min yi fen bɛ dɔ dɔnna, kamasɔlɔn Ala bolo siinin wo tii ma fana kɔlɔ.

⁴ I i jɛlɛ yena mɔɔ suu mindɛ le k'a fɔ ko i yi dɔ ya bɔiden kiti? Ni a lɔnin ka to niwotɛ k'a ben, aa kuntii kunko le wo le. A do lɔnin kɛtɔ tola, kamasɔlɔn a see yi mɔ Tii yɛ k'a lalɔnin to.

⁵ Mɔɔ dɔ yi je min yi lon dɔlu lafisayala lon dɔgbɛlɛlu le, k'a talan mɔɔ dɔ yi lon bɛ tala kelen ne le. Wo lɔ, mɔɔ kelenkelenna bɛ y'a jɛlɛkanu miliya ta ka bɛn wo ma, ani ka la wo la feu.

⁶ Mɔɔ min yi lon dɔ buɲala, wo tii y'a buɲala mɔ Tii le yɛ. Mɔɔ min yi fen bɛ dɔ dɔnna, wo tii yi dɔnni kɛla mɔ Tii buɲako le lɔ, kamasɔlɔn a yi balika bɔla Ala yɛ. Dɔ min tɛ fen bɛ dɔ dɔnna, wo tii y'a kɛla mɔ Tii buɲako le lɔ, kamasɔlɔn ale fana yi balika bɔla Ala le yɛ.

⁷ Mɔ suu suu tɛ mɔ nii la mɔ jɛlɛkanu yɛ, ado mɔ suu suu tɛ sala mɔ jɛlɛkanu yɛ.

⁸ Ni mɔ ka kɛ mɔ nii la, m'i mɔ nii la mɔ Tii le yɛ. Ni mɔ do ka sa, mɔ sanin mɔ Tii le yɛ. Wo lɔ, hali ni mɔ ka to mɔ nii la o, mɔ ka sa o, mɔ Tii ta le mɔ le.

⁹ Wo le k'a kɛ, Masa Tɔɔmasenin ka sa ka niimaya kɛ kɔtunun, fɔsa a yi kɛ fuleni ni niimalu bɛ Tii le.

¹⁰ Ile koni, i i badenma kitila mindɛ lɔ? Niwotɛ, a yi di vɛ i jɔnin i badenma ma? Kamasɔlɔn mɔ bɛ lalɔtɔle Ala ɲakɔlɔ kititɛɛko lɔ.

¹¹ Kamasɔlɔn mɔ Tii n'a fɔla kitabu kɔnɔ, ko: «Damanda ǹ'i Ɲɛnɛmayatii Ala le le, adamaden bɛ kɛtɔ ai kumɛlɛni bilala ǹ kɔlɔ, ani ka Ala tanu ai da le.»

¹² Wo boloɲa ma, mɔ kelenkelenna bɛ kɛtɔ mɔ jɛlɛkanu ya dandɛɛli kɛla Ala yɛ.

Ài k'ài badenmalu kunnɔtɛɛ

¹³ Wo lɔ saa, mɔ k'i ɲɔɔ kiti butu. Mafɔ, m'a latɛɛ ko mɔ tɛnala ko ko si kɛla min kɛtɔ mɔ badenma kunnɔtɛɛko sabu le, niwotɛ a lafiliko.

¹⁴ Komi ǹ'i Masa Tɔɔmasenin Isa ya kafonɲɔɔya lɔ, ǹ k'a lɔn ne, ado ǹ layine a la kosɛvɛ ko dɔnnifen suu suu tɛ je k'a fɔ min kɔsɔnin a jɛlɛ ma. Kɛɛ do, ni mɔɔ min k'a mili ko fen dɔ kɔsɔnin, wo vɛ kɛla, a kɔsɔnin wo tii le yɛ.

¹⁵ Ni i k'i badenma josomagba ka bɛn iya dɔnnifen ma, wo vɛ kɛla, i tɛ taamana kanundeya lɔ butu. Iya dɔnnifen kà kɛ i mɔɔɲɔɔ kunnɔtɛɛko sabu le, Masa Tɔɔmasenin na sala min tii yɛ.

¹⁶ Wo lɔ saa, fen min bɛnnin ài ɲakɔlɔ, ài ka kɛ sabu le dɔlu yi kuma yon fɔ wo ma.

¹⁷ Kamasɔlɔn Ala ya masaya tɛ dɔnni ni minni ko le, mafɔ telenmandeya ani josolajii ani josoladiya, Nii Sɛnɛyanin yi minu dila.

¹⁸ Mɔɔ min yi baalela Masa Tɔɔmasenin yɛ boloɲa min ma, wo tii ya ko diyayine Ala yɛ. A do yi tanuli sɔlɔnne mɔɔlu bolo.

¹⁹ Wo le y'a ma, ko minu yi nala josolajii ni ɲɔɔ lasawati le, ài m'i wolu le ɲinin.

²⁰ Ài kà Ala ya baale tiɲa ka bɛn dɔnnifenko ma. Tuɲa le, dɔnnifen suu bɛ ladaanyine, kɛɛ a bɛnnin tɛ i yi fen dɔ dɔn min kɛtɔ i badenma kunnɔtɛɛla.

²¹ A bɛnyine i kà soo dɔn, niwotɛ ka gbɛ min, niwotɛ ka ko ko si kɛ min yi kɛ i badenma lafiliko sabu le.

²² Limaniya min y'i bolo ka bɛn ko minu ma, wo yi to ile ni Ala wotɛ. Ni mɔɔ min ka ko dɔ jate koɲuma le, ni wo tii miliya tɛ a kɛlɛla a kɛko lɔ, wo tii ma yi duwawuden ne le.

²³ Kɛɛ ni mɔɔ min ka sika dɔnnifen dɔ ma, ni wo tii ka wo dɔn, a v'a jɛlɛ jobaliya, kamasɔlɔn a tɛ dɔnni kɛla limaniya boloma. Ni ko ko si ma bɔ limaniya lɔ, wo yi julumbu le le.