Lɔmukalu 13 - Ala Ya Salatikan Kula Kitabu

Ài m'i kolo jamana kuntiilu yɛ

¹ Mɔɔ kelenkelenna bɛ yi kolo gbafalanama mɔɔlu yɛ, kamasɔlɔn kuntiiya tɛ je ni min ma bɔ Ala bolo. Ado mɔɔ minu siinin ài kunna, wolu lasiinin Ala le bolo.

² Wo ma, ni mɔɔ mɔɔ k'i lɔ kuntii wolu ɲa, wo tii v'i lɔ Ala ya kolatɛɛnin ɲa. Wo tii do kɛtɔ kolatɔn ne makilila a jɛlɛ ma.

³ Kamasɔlɔn kuntiilu tɛ koɲumakɛbalu masiyanna, mafɔ koyonkɛbalu. Jalasa ài y'a fɛ le ài kana siyan kuntiilu ɲa? Ni wo le, ài yi koɲuma le kɛ, ài do yi matɔɔli sɔlɔnne kuntiilu bolo.

⁴ Kamasɔlɔn wolu le yi Ala ya baale la ài madɛmɛnko lɔ. Kɛɛ ni i do ka koyon kɛ, i ka kan ka siyan, baa kuntiilu tɛ siyamifan minala ten gbaanzan. Ai vɛ kolatɔn kɛla, ai yi Ala ya baale le la ka Ala ya mɔnɛya bɔ koyonkɛbalu lɔ.

⁵ Wo ma, fɔ ài y'ài fanmajii kuntiilu yɛ. Ài do kà a kɛ ka bɛn Ala ya mɔnɛ ɲasiyanɲɛ ma dein, mafɔ ài joso sɛnɛyanin yi to fana.

⁶ Wo le y'a kɛla, ài yi niisɔɔn salala fana, kamasɔlɔn kuntii wolu yi Ala ya baale le la, ai vɛ ai jɛlɛ dila baale wo kɛko lɔ.

⁷ Wo ma, ài yi mɔɔ kelenkelenna bɛ sala iwo ai ka kan k'a sɔlɔn teme. Ni a ka kɛ kɔnzɔn ni niisɔɔnsalako le, ài yi wolu sala. Ni a do ka kɛ buɲa ni magbiliyaliko le, ài yi wo tii buɲa k'a magbiliya.

Ɲɔɔkanuko

⁸ Mɔɔ suu suu ya julu kà kɛ ài la, mafɔ kanundeya julu min ka kan ka kɛ ài wotɛ. Kamasɔlɔn mɔɔ min v'a mɔɔɲɔɔ kanula, wo tii vɛ Ala ya seliya lakunnin dafa.

⁹ A do sɛvɛnin Nabi Musa ya Taulati lɔ, ko: «Ài kà jalonya kɛ. Ài kà mɔɔ faa. Ài kà suɲali kɛ. Ài kà ài nata la ài mɔɔɲɔɔ bolofen kɔkan.» Wolu ni jamali suu bɛ lakafonnin yi kuma kelen min ne lɔ, ko: «I i siiɲɔɔ kanu iwo ile gbu.»

¹⁰ Ni i k'i siiɲɔɔ kanu, i tɛnala koyon kɛla a la wo le. Wo ma, mɔɔ min v'a siiɲɔɔ kanula, wo tii vɛ seliya lakunnin dafa.

¹¹ Ài y'a kɛ ten, kamasɔlɔn ài k'a lɔn m'i waate suu min nɔ yi ne. Waate vɛ se ko m'i kunun ka bɔ sunɔɔ lɔ. Kamasɔlɔn mɔ kisi waate ma vɛ sulunya yi ne ka timin maa limaniya damina waate la.

¹² Su vɛ jaanfa, kɛnɛ bɔtɔle. Wo le y'a ma, ài m'i divilɔkolu dabila ka telelɔkolu ta k'ai kɛ maa kɛlɛkɛfennu le.

¹³ Ài m'i taama mɔɔsɔvɛya boloma iwo m'i taamana teme tele gba la. Ài m'i mɔ jɛlɛ matanga dannatimin tolonnu ma, ani gbɛtɔya, ani kanukɛko, ani malobaliya, ani sɔsɔyalilu, ani keleya.

¹⁴ Ài yi mɔ Tii Masa Tɔɔmasenin Isa dajoo ta ài jɛlɛ yɛ. Ài do k'ài sɔnja ài falikolo le butu ka bɛn a niikanukolu ma.