Lɔmukalu 11 - Ala Ya Salatikan Kula Kitabu

Ala ya henandeya Bani Isilankalu yɛ

¹ Wo lɔ saa, ǹ'i ɲiningali kɛla, ǹ ko: Jalasa Ala v'i ban aa mɔɔlu lɔ? Wo tɛ dɛ! Kamasɔlɔn ǹe gbu taanin kɛla Bani Isilanka le le, bema Ibulahima bɔzɔn koni, ado Bɛnjamin kabiladen ne ǹ ne.

² Ala m'i ban aa mɔɔlu lɔ, minu lɔnnin tɛɛ a bolo ka ta a damina ma. Ài m'a lɔn min sɛvɛnin kitabu kɔnɔ ka bɛn Nabi Iliya ma, a k'i makasi Ala yɛ teme Bani Isilankalu kanma?

³ A vɛɛ: «Ǹ Tii, ai n'iya kelalu faala, k'iya salakagbalannu tete. Ǹe kelenpesa le tonin. Ai do yi ǹ faako ɲaɲininna.»

⁴ Kɛɛ Ala k'a javi di? A vɛɛ: «M̀'ɛ kɛ́ waa wolowulan (7 000) ladalo ǹ jɛlɛ yɛ, minu kumɛlɛni ma suudi ben Baalan yɛ.»

⁵ Wo boloɲa kelen ma, hali bi, mɔɔ dana yi je Bani Isilankalu tɛma, Ala na minu tala ka bɛn aa nɛɛma ma.

⁶ Ni Ala ya mɔɔtako yi kɛla ka bɛn aa nɛɛma le ma, wo vɛ kɛla, mɔɔ kɛkolu sabu tɛ butu. Niwotɛ, aa nɛɛma tɛnala kɛla nɛɛma bɛlɛbɛlɛ le butu.

⁷ A yi di wo lɔ? Bani Isilankalu tɛɛ ko min ɲininna, ai ma wo sɔlɔn. Ai lɔ mɔɔ taninnu le n'a sɔlɔnna, kɛɛ a tɔ bɛ le na kɛla mɔɔ kataigbɛlɛn ne.

⁸ A sɛvɛnin tan ne kitabu kɔnɔ, ko: «Ala vɛ ai hangili magbasi. Haan ka na sii bi la, ai tɛ se yeni kɛla ai ɲa la, ai do tɛ se ko mɛnna ai tolo la.»

⁹ Nabi Dawuda n'a fɔla kɔtunun, a vɛɛ: «Ala a kɛ, aiya feetikɛyalu yi kɛ sɔɔ ni jɔ le ai ɲa, ka kɛ ai labenko sabu le ani aiya koyon sala.

¹⁰ Ala a kɛ, ai ɲa yi gbɛ fɔsa ai kana yeni kɛ butu, ai do kɔ kulunin yi to kudein.»

¹¹ Wo ma yi ne, ǹ'i ɲiningali kɛla, ǹ ko: Bani Isilankalu sen ka tuu mingɛ, jalasa ai ma se ai wulila butu? Wo tɛ dɛ! Mafɔ, ai filiko le na kɛla sabu le kisiko vɛ se siboloma gbɛlɛ mɔɔlu ma, fɔsa keleya yi Bani Isilankalu mina.

¹² Bani Isilankalu filiko na kɛla dunuɲa ya nɛɛma sɔlɔnko sabu le, ani ai benko na kɛla siboloma gbɛlɛ mɔɔlu nafako le le. Wo lɔ saa, ni ai dafanin k'ai fannɔsei Ala ma, wo nɛɛma tɛnala walala ka timin a kunfɔlɔ ta la?

Siboloma gbɛlɛ mɔɔlu kisiko

¹³ Ǹ'i kumala àilu siboloma gbɛlɛ mɔɔlu le yɛ butu. Komi Ala na ǹ kɛla keladen ne siboloma gbɛlɛ mɔɔlu yɛ, wo le n'a kɛla, ǹ ɲalɔkɛnɛyayine ǹa baaleko lɔ,

¹⁴ fɔsa keleya yi ǹ jɛlɛkanu mɔɔlu mina, tumadɔ wo yi kɛ ai dɔlu kisiko sabu le.

¹⁵ Ala k'i ban Bani Isilankalu lɔ mingɛ, wo ka kɛ sabu le ale ni dunuɲamɔɔlu wotɛ ka bɛn. Wo ma, ni Ala k'a bolo sii ai kɔlɔ kɔtunun, wo tɛnala kɛla iwo fuleni v'i wuli ka bɔ saya lɔ?

¹⁶ Ni dɛɛ fan kunfɔlɔ ka di Ala ma, a tɔ bɛ kɛtɔ kɛla a ta le le fana. Ado ni kɔlɔman lilen vɛ kɛla Ala ta le, a bololu fana kɛtɔ kɛla a ta le le.

¹⁷ Bani Isilankalu kɛyine iwo zeitunaju min sɛnɛnin gbele lɔ, Ala na wo bolo dɔlu tɛɛla a la. Àilu siboloma gbɛlɛ mɔɔlu minu kɛnin iwo tuu kɔlɔ zaituna bololu, Ala vɛ ài fasa bolo tɛɛninnu nɔ lɔ. Ado ji min yi bɔla a lilen na ka jɛlɛ, wo le àilu ni dɔ zaituna bololu balola i ɲɔɔ fɛ.

¹⁸ Wo le y'a ma, i kà fannɔbaya kɛ dɔ zaituna bolo tɛɛninnu la. Niwotɛ, i y'a lɔn ko zaituna lilen bolomalanin tɛ ile ma, mafɔ ile le bolomalanin a ma.

¹⁹ Kɛɛ i kɛtɔ a fɔla, i vɛɛ: «Kɔlɔman wo bololu tɛɛnin a la fɔsa ǹe gbu yi fasa a ma.»

²⁰ Tuɲa le wo le. Wolu tɛɛnin a la ka bɛn aiya limaniyabaliya le ma, ile do i nɔ lɔ ka bɛn iya limaniya le ma. Wo ma, i k'i fannɔbuɲa, mafɔ i yi siyan.

²¹ Kamasɔlɔn ni Ala ma kɔlɔman sɛnɛnin bololu to je, ile do?

²² M'i Ala ya ɲumaya ni aa faiya le yena ko min nɔ: A faiyayine aa siyabilabalu ma, kɛɛ a yi ɲumaya jiyala àilu le la, ni ài ka to aa ɲumaya kɔ. Niwotɛ, ile gbu kɛtɔ tɛɛla a la wo boloɲa kelen ne ma.

²³ Ni Bani Isilankalu gbu k'aiya limaniyabaliya dabila, Ala kɛtɔ ai fasala kɔlɔman ma kɔtunun, kamasɔlɔn a see yi Ala yɛ k'ai fasa kɔlɔman ma kɔtunun.

²⁴ Ni ile min tɛɛnin ka bɔ tuukɔlɔ kɔlɔman ma, i vɛ fasa zeitunaju sɛnɛnin ma, k'a talan ile ni wo tɛ suu kelen ne, a lagbɛyine feu ko kɔlɔman sɛnɛnin bolo bɛlɛbɛlɛlu fasako nɔyatɔle ka timin ile ta la.

²⁵ M̀ badenmalu, jani ài y'ài jɛlɛ jate hangilima le, ǹ'a fɛ ài yi kɛ gbonoko min kalama: Bani Isilankalu fan kelen kunnɔ vɛ gbeleya, haan fɔɔ siboloma gbɛlɛ mɔɔlu jate dafanin yi don Ala ya masaya lɔ.

²⁶ Wo boloɲa ma, Bani Isilanka bɛ kɛtɔ kisila, iwo a sɛvɛnin kitabu kɔnɔ teme, ko: «Lakisilikɛba kɛtɔ nala ka bɔ Ziyɔn. A do kɛtɔ Alalɔnbaliya dajoo kolon bɔla Janguba jilijaalu lɔ.

²⁷ Salatikan ne wo le, ǹ kɛtɔ min tala ǹe ni ailu wotɛ, m̀'ɛ aiya julumbulu bɔla ai ma waate min nɔ.»

²⁸ Samakan Kein ta fannɔ, Bani Isilankalu yi Ala juu le le àiya ko lɔ. Kɛɛ Ala ya mɔɔtako ta fannɔ, a diyananmɔɔ le ai le ka bɛn ai bemanu ma.

²⁹ Kamasɔlɔn ni Ala ka mɔɔ min sɔ, a tɛ aa sɔli wo minala wo tii ma la. Ni a do ka mɔɔ kili ko dɔ kanma, a tɛ wo bɔla a ma feu.

³⁰ Waate lɔ, àilu siboloma gbɛlɛ mɔɔlu tɛɛ kolobaliya le kɛla Ala la. Kɛɛ tandainɔ yi ne, àilu vɛ Ala ya henandeya sɔlɔn ka bɛn Jahudiyalu ya kolobaliya ma.

³¹ Wo boloɲa kelen ma, Bani Isilankalu yi kolobaliya le kɛla butu, fɔsa ai yi henandeya sɔlɔn iwo àilu.

³² Kamasɔlɔn Ala vɛ adamaden bɛ to aiya kolobaliya lɔ, fɔsa a yi hena bɛ la.

Ala tanu

³³ Tuɲa le, Ala ya nafolotiiya walayine! Aa hangilimaya ni aa lɔnni dan jate tɛ se lɔnna. Jene yi se aa kolatɛɛninnu ɲayena, kumatɛ ka aa kokɛɲalu lɔn?

³⁴ A sɛvɛnin tan ne kitabu kɔnɔ, ko: «Jene ka mɔ Tii miliya lɔn? Jene yi se kɛla a lailiba le?

³⁵ Jene vɛ fen di Ala ma, k'a fɔ ko a yi wo tii ya julu sala?»

³⁶ Fen bɛ bɔnin ale le lɔ, ani fen bɛ yi je ale le yɛ, a do ta le fen bɛ le. Magbiliyali yi di a ma habadan. Amiina!