Lɔmukalu 1 - Ala Ya Salatikan Kula Kitabu

¹ Ǹe Pɔli, Masa Tɔɔmasenin Isa ya jɔn ne yi lɛtɛlɛ min sɛvɛla, ǹe min kilinin ka ǹ kɛ keladen ne, ani ka m̀ bila ǹ ta fan Ala ya Samakan Kein yɛ.

² Samakan Kein wo le lahedi tanin Ala bolo ka ta waate jaan ma aa kelalu fɛ lɔhɔlɔma kitabulu kɔnɔ.

³ Samakan Kein wo yi kumala ka bɛn a Denkɛ le ma, min taanin kɛla mɔ Tii Masa Tɔɔmasenin Isa le. Mɔɔnivinya ta boloma, Masakɛ Dawuda bɔzɔn ne a le.

⁴ Kɛɛ Nii Sɛnɛyanin na aa ko jiyala fanga le boloma k'a fɔ ko Ala Denkɛ le a le, ka bɛn a wuliko ma ka bɔ saya lɔ.

⁵ Ale le sabu la, Ala ya nɛɛma vɛ kɛ mɔ yɛ ka mɔ lasii keladenya la, min y'a kɛ sibolomalu bɛ yi limaniya Isa ma ka kolo a yɛ a tɔɔ buɲako lɔ.

⁶ Àilu gbu fɛ yi mɔɔ wolu la, àilu minu kilinin k'ài kɛ Masa Tɔɔmasenin Isa ta le.

⁷ Àilu minu yi Lɔmu so kɔnɔ, Ala na minu kanula k'ài kili k'ài kɛ mumininnu le, ǹ'i lɛtɛlɛ min sɛvɛla ài bɛ le ma. Mɔ Fa Ala ni mɔ Tii Masa Tɔɔmasenin Isa ya nɛɛma yi kɛ ài yɛ, k'ài josolajii.

Lɔmukalu yenlɔɔ ka Pɔli mina teme

⁸ Ǹ'i balika bɔla ǹ Tii Ala yɛ kunfɔlɔ le bene ài bɛ ya ko lɔ Masa Tɔɔmasenin Isa fɛ, kamasɔlɔn àiya limaniyako la yi sena dunuɲa fan bɛ lɔ.

⁹ Ǹ'i baalela Ala min yɛ ǹ josokun bɛ le a Denkɛ ya Samakan Kein lasenko lɔ, wo le ǹ sele le k'a fɔ ko ǹ'àiya ko lasena a ma waate bɛ lɔ

¹⁰ ǹa madaililu lɔ. Ǹ'i Ala dalila, ǹ ko, ni a ka diɲa a ma, a yi siya laka ǹ yɛ butu fɔsa ǹ'i taa bɔ ài ma.

¹¹ Tuɲa le, ài yenlɔɔ yi gbala ǹ na bubale, fɔsa ǹ'i Nii Sɛnɛyanin ya sɔli dɔ lase ài ma ka bɛn ài sɛmɛdonko ma.

¹² N'i min fɔla yi ne, wo le k'a fɔ ko ǹe ni àilu kɛtɔ i ɲɔɔ sɛmɛdonna. Ǹ kɛtɔ a dɔ sɔlɔnna àiya limaniya lɔ. Àilu fana kɛtɔ a dɔ sɔlɔnna ǹ ta limaniya lɔ.

¹³ M̀ badenmalu, ǹ'a fɛ ài y'a lɔn ko m̀'ɛ a latɛɛ siɲa siyama le ko ǹ natɔ ài fɛlɔ, kɛɛ m̀ ma siya sɔlɔn ba bene hali bi. Ǹ'a fɛ ǹ'i na fɔsa àilu fana yi ǹa baale nafa dɔ sɔlɔn, iwo siboloma gbɛlɛ mɔɔ tɔlu na a nafa sɔlɔnna teme.

¹⁴ A yi diyanigbeya le le m̀ ma ko ǹ'i Samakan Kein lase mɔɔ bɛ ma, sobakɔnɔmɔɔ ni toodalamɔɔlu bɛ, ani lɔnnila ni kalanbalilu bɛ.

¹⁵ Wo le n'a kɛla, ǹ kunfanin Samakan Kein lasenko lɔ àilu gbu ma, minu siinin Lɔmu so kɔnɔ.

Mɔɔ telennin kɛtɔ niimaya kɛla limaniya le fɛ

¹⁶ Ǹ tɛ maloyala Samakan Kein ya ko lɔ, kamasɔlɔn Ala ya seetiiya le wo le min yi nala kisiko le Isa malimaniyamɔɔlu bɛ yɛ, ka damina Jahudiyalu ma ani siboloma gbɛlɛ mɔɔlu fana.

¹⁷ Kamasɔlɔn Samakan Kein y'a jiyala ko Ala yi mɔɔlu jatela telenmande le a ɲakɔlɔ boloɲa min ne ma. A da yi minala limaniya le ma dein, a do la yi banna limaniya le ma, iwo a sɛvɛnin teme kitabu kɔnɔ, ko: «Mɔɔ telennin kɛtɔ niimaya kɛla limaniya bolo le ma.»

Dunuɲamɔɔlu ya telenbaliya

¹⁸ Ala tonin haijɛnɛ ka aa mɔnɛya jiya ka bɛn adamadennu ya julumbu ni koyon bɛ ma, minu yi tuɲa doonna aiya koyonkɛ sabu la.

¹⁹ Kamasɔlɔn ko minu yi se lɔnna ka bɛn Ala ya ko ma, wolu lankɛnɛmayayine gbesekele, kamasɔlɔn Ala gbu le na wolu lagbɛla ai yɛ.

²⁰ Kamasɔlɔn ka ta dunuɲa dan waate ma, Ala kɛɲa minu tɛ se yena ɲa la: aa foniseleya banbali ni aa Alaya koni, wolu yi yena gbesekele ni mɔ k'i mili aa dannifennu ma. Wo le n'a kɛla, adamadennu tɛ se ai kumanɔbɔla.

²¹ Hali ai yi Ala ya ko kalama, ai ma magbiliyali di a ma iwo Ala, niwotɛ ka balika bɔ a yɛ. Mafɔ, ai hangili la ka gbasi, ado aiya hangilindanya vɛ ai bila divi lɔ.

²² Ai tɛɛ a fɔla ai jɛlɛ ma ko hangilima, k'a talan ai vɛ kɛ hangilindan ne feu.

²³ Ai k'i ban habadan Ala magbiliyala, ka fen kaijakaijalu sawula bato, iwo mɔɔnivin satalu, ani kɔnɔlu, ani kolofennu, ani fɔnfɔnnifennu.

²⁴ Wo le n'a kɛla, Ala k'ai bila ai jɛlɛ ma ko ai y'ai kɔnɔlɔko kɔsɔnin suu bɛ dɔ kɛ, ai do vɛ malobaliyakolu kɛla i ɲɔɔ falikololu la.

²⁵ Ai ka Ala ya tuɲa mafalin faɲa la, ka dannifennu bato ani ka baale kɛ wolu yɛ Dannimasa gbu nɔ lɔ, tanuli yi min yɛ kudein. Amiina!

²⁶ Wo le n'a kɛla, Ala k'ai bila ai jɛlɛ ma ko ai y'ai niikanukolu kɛ malobaliya boloma. Wo lɔ, aiya mosolu ma kafonɲɔɔya kɛ butu a kɛɲa ma, mafɔ ai ka kafonɲɔɔya kɛ i ɲɔɔ le fɛ.

²⁷ Kɛ́lu fana n'a kɛla wo boloɲa kelen ne ma. Ai ka mosoko to ten, ai kɛ́ ɲɔɔlu lɔɔ vɛ gbala ai la. Kɛ́lu ka malobaliyakolu kɛ ai kɛ́ ɲɔɔlu la, ka kolatɔn lase ai jɛlɛ ma iwo a bɛnnin ai ma teme ka bɛn ai filiko ma.

²⁸ Komi ai ma Ala lɔnko ta ko sɔvɛ le, wo le k'a kɛ, Ala k'ai bila ai jɛlɛ ma ai miliya kolonnu kɔ, fɔsa ai yi kolu kɛ minu man kan ka kɛ.

²⁹ Ai josokun lafanin tɛɛ telenbaliyako suu bɛ dɔ la, ani koyon, ani natabaya, ani juuya, ani keleya, ani mɔɔfaako, ani mɔɔwotɛfalanko, ani janvandeya, ani kɔnɔlɔgbeya. Tɔɔfɔlikɛba le ai le,

³⁰ ani mɔɔtɔɔtiɲaba, ani Ala lagbeyaɲɛmɔɔ, ani jɛvɛlikɛba, ani mɔɔ fannɔba, ani wasokɛba. Ai do yi koyon kɛɲa kula le lɔbɛnna. Ai tɛ ai wolobalu kumakan labatola.

³¹ Hangilindan ne ai le, ani lanandeyabali, ani maɲumayenbali, ani henandeyabali.

³² Mɔɔ wolu k'a lɔn feu ko Ala na ko min latɛɛla telenmandeya bolo le ma ko mɔɔ minu yi ko suu wolu kɛla, wolu ni faali le kaannin. Kɛɛ wo bɛ n'a kɛ, ai yi ko wolu kɛla ka ban ka dɔlu fana sɛmɛdon ko suu wolu kɛko lɔ.