Filemɔn 1 - Ala Ya Salatikan Kula Kitabu

¹ Ǹe Pɔli, min yi kasoden ne ka bɛn Masa Tɔɔmasenin Isa ya ko ma, ani mɔ badenma Timote, ǹu mɔɔ fila le yi sɛvɛli min lataala mɔ diyanan baalekɛɲɔɔ Filemɔn ma,

² ani mɔ badenmamoso Apiya, ani Alisipi min yi mɔ madɛmɛnna maa kɛlɛ lɔ Ala yɛ, ani limaniyajama minu y'ai ladɛnna ile Filemɔn ya bon na.

³ Mɔ Fa Ala ani mɔ Tii Masa Tɔɔmasenin Isa ya nɛɛma yi kɛ ài yɛ, k'ài josolajii.

Filemɔn ya kanundeya ni aa limaniya

⁴ M̀ badenma Filemɔn, m̀'ɛ kɛla Ala dalila waate o waate, ǹ'i balika bɔla a yɛ ka bɛn i ma,

⁵ kamasɔlɔn ǹ'iya kanundeya mangutu mɛnna mumininnu bɛ yɛ, ani iya limaniya mɔ Tii Isa ma.

⁶ Ǹ'i Ala dalila fɔsa maa dɛɛn limaniya kelen na, wo yi na koɲaye bɛlɛbɛlɛ le ka bɛn koɲuma suu bɛ ma, minu yi sɔlɔnna Masa Tɔɔmasenin ya kafonɲɔɔya lɔ.

⁷ M̀ badenma, iya kanundeya vɛ ǹ josoladiya kosɛvɛ ka ǹ sɛmɛ don bubale, kamasɔlɔn mumininnu josola vɛ jii ka bɛn i ma.

Pɔli ka Filemɔn madiya ka bɛn Onɛsimu ya ko ma

⁸ Wo le n'a kɛla, hali ǹ tɛɛ sene ka m̀ wakali k'i jamali Masa Tɔɔmasenin tɔɔ lɔ ka bɛn iya kokɛta ma,

⁹ kɛɛ a diyayine ǹ yɛ ǹ'i madiya kanundeya boloma, ǹe Pɔli min yi kɛmɔba le ani kasoden butu ka bɛn Masa Tɔɔmasenin Isa ya ko ma.

¹⁰ Ǹ'i madiyala ka bɛn ǹ denkɛ Onɛsimu ma, m̀'ɛ kɛ min fa le limaniya lɔ kasobon na jan.

¹¹ Waate lɔ, a tɛɛ mɔɔ nafabali le le i yɛ, kɛɛ nafa y'a la butu ǹe ni ile yɛ.

¹² Ǹ'a laseikɔla i ma yi ne, ale min kɛnin ǹ josokun bɛlɛbɛlɛ le.

¹³ A tɛɛ diyale ǹ yɛ a yi to ǹ fɛ ka to m̀ madɛmɛnna i nɔ lɔ kaso la jan, m̀ bilanin min na ka bɛn Samakan Kein ma.

¹⁴ Kɛɛ ǹ tɛɛ t'a fɛ ka ko kɛ, i ma diɲa min ma, alako iya koɲuma kana kɛ diyanigbeyako le i ma, mafɔ a yi bɔ i jɛlɛ lɔ.

¹⁵ Tumadɔ dailu min n'a kɛla, Onɛsimu n'a majaanna i la waateni kɔlɔ, wo le fɔsa a yi seikɔ i ma ka to i fɛ kudein.

¹⁶ A do tɛ jɔn jɛlɛla le butu, kɛɛ a vɛ timin wo la ka kɛ mɔ diyanan badenma le, ǹ ta fannɔ bɛlɛbɛlɛ le, kɛɛ i ta timintɔle ǹ ta la mɔɔnivinya boloma, ani mɔ Tii ya kafonɲɔɔya lɔ fana.

¹⁷ Wo lɔ, ni i yi ǹ jatela i diɲɔɔ le le, i i bolo sii Onɛsimu kɔlɔ kobɛn iwo i tɛɛ na i bolo sii ǹe gbu kɔlɔ teme.

¹⁸ Ni a baanin ka kɛ i ma, niwotɛ iya julu le y'a la, i yi wo bɛ la ǹ kun.

¹⁹ Ǹe Pɔli le yi min sɛvɛla ǹe gbu bolo le, ǹ ko, ǹ kɛtɔ i boloɲɔɔ laseila. Kɛɛ do, ǹ tɛnala i hangili bilala a lɔ k'a fɔ ko ile gbu yi ǹa komamɔɔ le le.

²⁰ Wo lɔ, m̀ badenma, i yi diɲa ǹ'i nafa dɔ sɔlɔn i la mɔ Tii ya ko lɔ. Ǹ josolajii Masa Tɔɔmasenin ya kafonɲɔɔya lɔ.

²¹ Komi ǹ lanin i la k'a fɔ ko i kɛtɔ ǹ kumakan labatola, wo lɔ, ǹ'i min sɛvɛla i ma, ǹ k'a lɔn i kɛtɔ wo kɛla ka timin ǹa madiyalikan na.

²² Wo bɛ kɔ, ǹ'a fɛ i yi jiyabon lɔbɛn ǹ yɛ, kamasɔlɔn ǹ jii y'a ma le ko Ala kɛtɔ àiya madailikannu javila ka ǹ lasei ài ma.

Folikan labannu

²³ Ǹ kasodenɲɔɔ Ɛpafalasi y'i fola, min yi ǹ fɛ jan Masa Tɔɔmasenin Isa ya ko lɔ.

²⁴ M̀ baalekɛɲɔɔ tɔlu, Malɛkɛ, ani Alisitakusi, ani Demasi, ani Luka, wolu fana y'i fola.

²⁵ Mɔ Tii Masa Tɔɔmasenin Isa ya nɛɛma yi kɛ ài bɛ yɛ.