Matiyu 9 - Ala Ya Salatikan Kula Kitabu

Isa ka falifaamatɔ dɔ lakɛnɛya teme

¹ Isa ka don kulun kɔnɔ ka kɔɔ tɛɛ ka taa se a fɛso.

² Wo waate kelen nɔ, mɔɔ dɔlu ka na falifaamatɔ dɔ le a fɛ, min lanin tɛɛ dɛvɛ kan. Isa k'aiya limaniya ye mingɛ, a k'a fɔ jangalotɔ yɛ, a vɛɛ: «Ǹ den, i jei kà tɛɛ. Iya julumbulu lɔ vɛ koto.»

³ Seliya kalanmɔɔ dɔlu v'a fɔla ai jɛlɛ ma, ai vɛɛ: «Kɛ́ min yi Alalafeyakan ne fɔla!»

⁴ Isa tɛɛ k'ai miliya lɔn. A do vɛɛ ai yɛ: «Mindɛ lɔ miliya yon wo suu y'ài josokun nɔ?

⁵ A yi di? K'a fɔ: ‹Iya julumbulu lɔ vɛ koto,› niwotɛ k'a fɔ: ‹I wuli i yi taama,› wo fila lɔ, mindɛ le fɔ diyanin?

⁶ Kɛɛ do, fɔ ài y'a lɔn a see yi Mɔɔnivin Tanin yɛ ka julumbulu lɔkoto dunuɲa.» Wo fɔ Isa bolo, a vɛɛ falifaamatɔ yɛ: «I wuli, i iya dɛvɛ ta ka taa iya bon na.»

⁷ Kɛ́ do k'i wuli ka taa aa bon na.

⁸ Jama ka wo ye mingɛ, ai ka siyan. Ai do ka Ala tanu, kamasɔlɔn ale le na seetiiya min suu dila adamadennu ma.

Isa ka Matiyu kili teme

⁹ Isa ka bɔ je ka taa. A timintɔla, a ka niisɔɔnminaba dɔ siinin ye niisɔɔnminaya lɔ, min tɔɔ tɛɛ ko Matiyu. Isa do vɛɛ a yɛ: «Bila ǹ kɔ.» Matiyu do k'i wuli ka bila a kɔ.

¹⁰ Wo kɔ, Isa ka to dɔnnikɛya lɔ Matiyu ya bon na, niisɔɔnminaba ni julumbutɔ siyama ka na dɔnnikɛya lɔ Isa ni a kɔbiladennu fɛ.

¹¹ Wo ye Falisilu bolo, ai k'a fɔ Isa kɔbiladennu yɛ, ai vɛɛ: «Mindɛ lɔ àiya kalanmɔɔ yi dɔnni kɛla niisɔɔnminabalu ni julumbutɔlu fɛ?»

¹² Isa ka wo mɛn mingɛ, a k'ai javi, a vɛɛ: «Kɛnɛyabatɔ mako tɛ basibɔba la, mafɔ jangalotɔ.

¹³ Kuma min sɛvɛnin kitabu kɔnɔ, ài yi taa ài mili wo kɔlɔ ma, ko: ‹Henandeya diyanin vɛ ǹ yɛ ka timin kolofen salaka la.› Kamasɔlɔn m̀ ma na mɔɔ telenninu kiliko lɔ, mafɔ julumbutɔlu.»

Ai ka Isa maɲininga sundonko ma teme

¹⁴ Wo kɔ, Yaya kɔbiladen dɔlu k'i madon Isa la k'a maɲininga, ai vɛɛ: «Ǹu ni Falisilu deinin sundonna. Mindɛ lɔ i kɔbiladennu tɛ sundonna?»

¹⁵ Isa k'ai javi, a vɛɛ: «A yi di? Ka kɔɲɛfa to a tɔvalu dafɛ kɔɲɛmalɔ lɔ, jalasa a tɔvalu yi sene ai ɲakɔlɔ silila? Kɛɛ lon dɔ natɔ, mɔɔlu kɛtɔ kɔɲɛfa bɔla ai tɛma. Wo lon ne, ai kɛtɔ sundonna.

¹⁶ «Mɔɔ tɛ faani kula kulunkulun tala ka faani kɔlɔ labalin a le, niwotɛ faani kula kɛtɔ faani kɔlɔ masamana k'a fala. A do falaɲa kɛwonyatɔle ka timin a kunfɔlɔ ta la.

¹⁷ Wo boloɲa kelen ma, mɔɔ tɛ gbɛ kula kɛla gbɛbɔlɔ kɔlɔ lɔ. Niwotɛ, a fununtɔ ka bɔlɔ te ka gbɛ bɛ bɔn. Mɔɔ yi gbɛ kula kɛla gbɛbɔlɔ kula le lɔ. Wo vɛ kɛla, fen fen tɛnala tiɲala wo lɔ.»

Moso jangalotɔ ni ɲamɔɔ denmoso

¹⁸ Isa ka to wo fɔla, Jahudiyalu ya ɲamɔɔ dɔ ka na k'i majii a kɔlɔ, a vɛɛ: «Ǹ denmoso vɛ sa yi ne. Kɛɛ i vɛ nala k'i bolo la a kan, a yi wulile.»

¹⁹ Wo fɔ, Isa ni a kɔbiladennu k'i wuli ka bila a kɔ.

²⁰ Wo k'a talan, moso jangalotɔ dɔ tɛɛ je, min tɛɛ vɛ san tan ni fila (12) kɛ maa jangalo lɔ. Moso wo ka na Isa kɔma, k'a bolo tuu aa faaniba dagbolo la.

²¹ A tɛɛ a fɔla a kɔnɔ, a vɛɛ: «Hali ni ǹ ka se m̀ bolo tuula aa faaniba la gbu, ǹ'i kɛnɛyale.»

²² Isa k'i ɲa tilimin mingɛ ka moso ye a kɔma, a vɛɛ a yɛ: «Ǹ denmoso, i jei kà tɛɛ. Iya limaniya v'i lakɛnɛya.» Moso do ka kɛnɛya telemanin.

²³ Isa senin ɲamɔɔ ya bon na, a ka fulefɔbalu ye je, ani jama min mangan ba tɛɛ bɔla.

²⁴ A do vɛɛ ai yɛ: «Ài y'ài mataa. Singbilini sanin tɛ, a yi sunɔɔ le lɔ.» Wo fɔ Isa bolo, ai ka jɛlɛbɔ a lɔ.

²⁵ Ai ka jama labɔ mingɛ luu ma, Isa ka don bon na, ka singbilini su mina a bolo ma. Singbilini do k'i wuli.

²⁶ Ko wo mangan ka jɛzɛn koovi wo fan bɛ lɔ.

Isa ka ɲagbɛ fila ɲa laka teme

²⁷ Isa bɔtɔla je, ɲagbɛ kɛ́ fila v'i wulila ka bila a kɔ gbanɔ le, ai vɛɛ: «Dawuda Bɔzɔn! Hena mɔ la!»

²⁸ Isa ka don mingɛ bon na, ɲagbɛ fila wolu k'i madon a la. Wo lɔ, Isa vɛɛ ai yɛ: «Ài limaniyanin k'a fɔ ǹ'i sene ài ɲa lakala?» Ai do vɛɛ: «Aan, Kuntii, mɔ limaniyayine wo ma.»

²⁹ Wo fɔ ai bolo, Isa k'a bolo tuu ai ɲa la, a vɛɛ: «Ka bɛn àiya limaniya ma, wo yi kɛle ài yɛ.»

³⁰ Wo kɛ, ai ɲa la ka ka. Isa k'a fɔ ai yɛ k'a magbeleya, a vɛɛ: «Ài kà ko min fɔ mɔɔ suu suu yɛ.»

³¹ Kɛɛ ai do ka bɔ ka Isa mangan lajɛzɛn koovi wo fan bɛ lɔ.

Isa ka bobo dɔ lakɛnɛya teme

³² Kɛ́ fila wolu bɔtɔla, mɔɔlu ka na kɛ́ dɔ le Isa fɛ, jina tɛɛ vɛ min kɛ bobo le.

³³ Isa ka jina gbɛn mingɛ, bobo wo vɛ kumala. Jama ka kawakoya, ai vɛɛ: «Wo ɲɔɔzii tɛɛ ma kɛ ba Isilan jamana lɔ feu!»

³⁴ Kɛɛ Falisilu vɛɛ: «Jinalu ya kuntii le na see dila a ma fɔsa a yi jinalu gbɛn k'ai bɔ mɔɔlu lɔ.»

Jama hena ka Isa mina teme

³⁵ Wo waate, Isa tɛɛ timintiminna so ni toodalu bɛ la ka mɔɔlu kalan aiya Aladalibonnu la, ka Samakan Kein lase ka bɛn Ala ya masaya ma, ani ka jangalotɔ suu bɛ lakɛnɛya.

³⁶ A ka jama ye mingɛ, ai hena k'a mina, kamasɔlɔn ai ma tɛɛ vɛ gbolo k'ai fanga ban, iwo saa minu bilanin ai jɛlɛ ma, saakunnasiiba tɛ minu la.

³⁷ Wo lɔ saa, Isa vɛɛ a kɔbiladennu yɛ: «Malo mɔnnin lɔwalanin bubale, kɛɛ do a kaliba ma siya.

³⁸ Wo ma, ài yi Sɛnɛtii madiya ko a yi baaledennu lɔ malo kalila aa sɛnɛ lɔ.»