Matiyu 6 - Ala Ya Salatikan Kula Kitabu

Kawanili ka bɛn bolokolon sɔko ma

¹ «Ài kà àiya diinakolu kɛ mɔɔlu ɲakɔlɔ, fɔsa ai yi wolu kɛnin ye ài bolo. Ài vɛ wo kɛla, ài Fa min yi haijɛnɛ, wo tɛnala ài balayila feu.

² «I vɛ bolokolon dɔ sɔla, i k'i waso a la iwo filangafolu y'a kɛla teme Aladalibonnu ni siya dalu la, fɔsa mɔɔlu y'ai matɔɔ. Ǹ'i tuɲa fɔ ài yɛ, wolu vɛ ban ai balayi sɔlɔnna.

³ Ni i ka bolokolon sɔ i bolokini la, i bolonunma kà wo lɔn,

⁴ fɔsa iya sɔli yi to doon nɔ. Wo do vɛ kɛla, i Fa Ala min yi ko doonnin bɛ yena, wo le kɛtɔ i balayila.»

Kawanili ka bɛn Aladaliko ma

⁵ «Ài vɛ kɛla Ala dalila, ài kà a kɛ iwo filangafolu y'a kɛla teme. A diyanin ai yɛ k'ai lɔ Aladalibonnu ni siya dalu la ka Aladali kɛ, fɔsa mɔɔlu y'ai ye. Ǹ'i tuɲa fɔ ài yɛ, wolu vɛ ban ai balayi sɔlɔnna.

⁶ «Ni i ka kɛ Ala dalila, i yi don i sibon na ka da latuun i jɛlɛ ma. I i Fa Ala dali je, kamasɔlɔn a yi dingila doonnin wo lɔ. Min yi kɛla doon nɔ, i Fa Ala yi wo yena, a do kɛtɔ i balayila.

⁷ Ài vɛ kɛla Ala dalila, ài kà kuma lɔsiyaya iwo Alalɔnbalilu y'a kɛla teme. A yi wolu kɔnɔ ko aiya madailikan kɛtɔ mɛnna ka bɛn aiya kuma siyama le ma.

⁸ Ài kà kɛ wolu ɲɔɔzii le, kamasɔlɔn ài mako yi fen fen si la, ài Fa Ala ka wo lɔn jani ài y'a madali.

⁹ «Ài ka kan ka Ala dali teme, wo le ne: ‹Mɔ Fa min yi haijɛnɛ, i tɔɔ sɛnɛyanin yi buɲa.

¹⁰ Iya masaya la yi nkɛnɛmaya. I sawo yi kɛ duukolo kɔkan, iwo a yi kɛla teme haijɛnɛ.

¹¹ I yi bi balo di mɔ ma.

¹² I yi maa koyonnu lɔkoto, iwo ǹu fana vɛ mɔɔlu makoto teme, minu na koyon kɛla mɔ la.

¹³ I do kà diɲa mɔ ma yi nɛɛ ka bila koyon nɔ, kɛɛ mɔ matanga Soitana ma.›

¹⁴ «Ni ài ka dɔlu ya koyonnu lɔkoto, ài Fa min yi haijɛnɛ, wo fana kɛtɔ ài makotola.

¹⁵ Ni do ài ma dɔlu ya koyonnu lɔkoto, ài Fa Ala tɛnala àiya koyonnu lɔkotola.»

Kawanili ka bɛn sundonko ma

¹⁶ «I vɛ sundonna lon min na, i k'i ɲakɔlɔ sili iwo filangafolu y'a kɛla teme. Wolu y'ai ɲakɔlɔ silila fɔsa mɔɔlu y'a lɔn ai yi sun nɔ. Ǹ'i tuɲa fɔ ài yɛ, ai vɛ ban ai balayi sɔlɔnna.

¹⁷ I vɛ sundonna, i ɲa lako ka tulu sisa i kun na,

¹⁸ alako mɔɔlu kana a lɔn i yi sun nɔ. Kɛɛ i Fa Ala min doonnin, wo kɛtɔ a lɔnna. Min yi kɛla doon nɔ, i Fa Ala yi wo yena, a do kɛtɔ i balayila.»

Nafolo ladɛnko

¹⁹ «Ài kà nafolo ladɛn ài jɛlɛ yɛ dunuɲa min nɔ, baabaa ni soon yi tiɲali kɛla tɛɛminja. Son fana yi se da kalila tɛɛminja ka suɲali kɛ.

²⁰ Mafɔ, ài yi nafolo ladɛn ài jɛlɛ yɛ haijɛnɛ le, baabaa ni soon tɛ se tiɲali kɛla tɛɛminja. Son fana tɛ se da kalila ka suɲali kɛ je.

²¹ Kamasɔlɔn iya nafolo yi tɛɛminja, i josokun gbaannin wo le ja la.»

Falikolo ya kɛnɛya

²² «Mɔɔ ɲaden kɛyine a falikolo ma iwo fitina. Ni i ɲaden kɛnɛyanin, kɛnɛya yi kɛle i falikolo fan bɛ lɔ.

²³ Ni do i ɲaden kɛnɛyanin tɛ, i falikolo fan bɛ kɛtɔ divi le lɔ. Wo lɔ, kɛnɛya min ka kan ka sɔlɔn i lɔ, ni kɛnɛya wo vɛ kɛla divi le, divi wo fintɔle mainmain!»

Ala ni wɔliko

²⁴ «Jɔn tɛ se baale kɛla jɔnfa fila yɛ waate kelen nɔ. Ni wo ka kɛ, jɔn kɛtɔ a dɔ lagbeyaɲɛla, k'a dɔ kanu. A do fasatɔ a dɔ ma, k'i ban a dɔ lɔ. Wo lɔ, ài tɛ se kɛla Ala ya jɔn ne k'ài kɛ wɔli fana ya jɔn ne waate kelen nɔ.»

Ài kà hamin

²⁵ «Wo le y'a kɛla, ǹ'a fɔ ài yɛ, ài kà hamin àiya niimaya le k'a fɔ ài kɛtɔ mindɛ dɔnna, niwotɛ ài kɛtɔ mindɛ minna. Ài do kà hamin ài falikolo ya ko le, k'a fɔ ài kɛtɔ mindɛ le bilala ài kanna. Jalasa àiya niimaya kulugbeleyanin tɛ dɔnnifenko le? Jalasa ài falikolo kulugbeleyanin tɛ àiya feeyabɔko le?

²⁶ «Ài y'ài mili kɔnɔnilu ma minu yi ndiinna sanma. Ai tɛ sɛnɛ kɛla, ai do tɛ sɛnɛfen kalila. Ai tɛ malo ladonna kele la. Kɛɛ do, ài Fa min yi haijɛnɛ, wo y'ai balola. A yi di? Àilu kulugbeleyanin tɛ wolu le?

²⁷ Jene y'ài tɛma, min yi se tele kelen kafonna a simaya kɔkan ka bɛn aa hamin ma?

²⁸ «Mindɛ lɔ ài yi haminna àiya feeyabɔko le? Ài y'ài mili tuukɔlɔbinnu yi fɛlɛnna teme. Ai tɛ baale kɛla, ai do tɛ feeyabɔ ladanna.

²⁹ Kɛɛ ǹ'a fɔ ài yɛ, hali Masakɛ Sulimana ni aa banaya bɛ, a m'a jɛlɛ feeyabɔ ka se bin feele minu dɔ lɔ.

³⁰ Àilu minu ya limaniya dɔɔyanin, ni Ala yi tuukɔlɔbinnu feeyabɔla ten, minu yi je bi k'ai ɲɛnin taa lɔ sinin, a tɛnala ài feeyabɔla ka timin wolu la?

³¹ Wo le y'a ma, ài kà hamin k'a fɔ ko: ‹Mɔ kɛtɔ mindɛ dɔnna, mɔ kɛtɔ mindɛ minna, mɔ kɛtɔ feeyabɔ sɔlɔnna di?›

³² Alalɔnbalilu le sɔnjanin ko suu wolu bɛ le. Kɛɛ àilu, ài Fa min yi haijɛnɛ, wo k'a lɔn ài mako yi fen wolu bɛ le la.

³³ Ài yi Ala ya masaya ɲinin kunfɔlɔ le ani aa telenmandeya, wo vɛ kɛla, wo bɛ yi lale wo kɔkan ka di ài ma.

³⁴ Wo lɔ saa, ài kà hamin sinin kolu le. Ài yi sinin kolu to sinin yɛ. Ɲangba min yi sɔlɔnna tele kelen kɔlɔ, wo vɛ tele wo ta bɔ.»