Matiyu 5 - Ala Ya Salatikan Kula Kitabu

Mɔɔ minu yi duwawudennu le

¹ Isa ka jama ye mingɛ, a ka jɛlɛ tini kɔkan k'i sii. A kɔbiladennu k'i madon a la.

² A do vɛ ai kalanna, a vɛɛ:

³ «Duwawuden ne mɔɔ wolu le, minu k'a lɔn ko ai lɔnin fandanya la Ala ɲakɔlɔ, kamasɔlɔn ai fɛ yi haijɛnɛ masaya la.

⁴ Duwawuden ne mɔɔ josomakasaninnu le, kamasɔlɔn Ala kɛtɔ ai josolajiila.

⁵ Duwawuden ne mɔɔ mafaninnu le, kamasɔlɔn duukolo kɛtɔ ai ta le le.

⁶ Duwawuden ne mɔɔ wolu le, kɔɔn ni minkɛlɔɔ yi minu la ka bɛn telenmandeya lataamanko ma, kamasɔlɔn Ala kɛtɔ ai lawasala.

⁷ Duwawuden ne henandelu le, kamasɔlɔn Ala kɛtɔ henala ai la.

⁸ Duwawuden ne mɔɔ josolɔgbɛninnu le, kamasɔlɔn ai kɛtɔ Ala yena.

⁹ Duwawuden ne mɔɔ wolu le, minu yi josolajii ladonna mɔɔlu wotɛ, kamasɔlɔn Ala kɛtɔ a fɔla ai ma ko a dennu.

¹⁰ Duwawuden ne mɔɔ wolu le, minu yi jangata masɔlɔnna ka bɛn telenmandeya ma, kamasɔlɔn ai fɛ yi haijɛnɛ masaya la.

¹¹ «Duwawuden ne ài le ni mɔɔlu k'ài jɛvɛ, k'ài jangata, ka tɔɔla ài la, ani ka kuma yon suu bɛ fɔ ài ma ǹa ko lɔ.

¹² Ài kɔnɔlɔ yi diya bubale, kamasɔlɔn ài kɛtɔ balayi ba le sɔlɔnna haijɛnɛ, kamasɔlɔn ai ka kela kɔlɔkɔlɔlu jangata ten ne.»

Kɔɔ ani kɛnɛya

¹³ «Àilu yi kɔɔ le le duukolo kɔkan. Kɛɛ ni kɔɔ diyaya vɛ bɔla a la, a yi se diyala di kɔtunun? A tɛ foi ɲia butu, fɔ mɔɔ y'a lafili banama, mɔɔlu timintɔ y'a lɔdɔndɔn.

¹⁴ «Àilu yi kɛnɛya le le duukolo kɔkan. So min yi tini kɔkan, wo tɛ se doonna.

¹⁵ Mɔɔ tɛ fitina lamɛnɛnna k'a sii tasa kɔlɔ. Fɔ i y'a sii fitinasiiya le lɔ, fɔsa a yi kɛnɛya di bonnamɔɔlu bɛ ma.

¹⁶ Àiya kɛnɛya yi bɔ ten mɔɔlu ɲakɔlɔ, fɔsa ai y'ài kɛko keinnu ye k'ài Fa magbiliya min yi haijɛnɛ.»

Kawanili ka bɛn Ala ya seliya ma

¹⁷ «Ài k'ài mili ko ǹ nanin ka seliyalu bɔ ai nɔ lɔ, minu sɛvɛnin Nabi Musa ya Taulati lɔ, niwotɛ kela dɔgbɛlɛlu ya kitabulu lɔ. M̀ ma na ka wolu bɔ ai nɔ lɔ, mafɔ k'ai mafa.

¹⁸ Ǹ'i tuɲa fɔ ài yɛ, haan ka taa sii sangbolo ni duukolo latunun lon na, foi tɛnala tununna seliya kitabu la, hali a tɔmini kelen niwotɛ a sɛvɛliden kelen, haan fɔɔ seliya bɛ ma vɛ fala.

¹⁹ Wo le y'a ma, ni mɔɔ min ka seliya bɛ lɔ dɔɔmaninda dɔ gbu to je, k'a dɔlu kalan ko ai yi wo ɲɔɔzii kɛ, wo vɛ kɛla, wo tii jatetɔ dɔɔmaninda le le haijɛnɛ masaya lɔ. Ni do mɔɔ min ka seliya wolu labato k'a dɔlu kalan a la, wo tii jatetɔ mɔɔba le le haijɛnɛ masaya lɔ.

²⁰ Ǹ'i tuɲa fɔ ài yɛ, ni ài m'ài telen ka timin seliya kalanmɔɔlu ni Falisilu la, ài tɛnala donna haijɛnɛ masaya lɔ feu.

Mɔɔfaako ni mɔnɛko

²¹ «Ài k'a mɛn ko a k'a fɔ mɔ bemanu yɛ, ko: ‹Ài kà mɔɔ faa, ko mɔɔ min vɛ mɔɔ faala, kiti bilatɔ wo tii la.›

²² Kɛɛ ǹ'a fɔ ài yɛ, mɔɔ min vɛ mɔnɛla a badenma ma, kiti bilatɔ wo tii la. Ni do mɔɔ min v'a badenma dɔɔyala, ai yi taa wo tii le kititɛɛbalu ɲakɔlɔ. Ni do mɔɔ min v'a fɔla a badenma ma ko ‹mɔɔ kolon›, wo la yi fili jahanama taa lɔ.

²³ Wo le y'a kɛla, i vɛ kɛla salaka bɔla salakagbalan kɔkan, ni i hangili ka bila k'a fɔ ko dɔ yi ile ni i badenma wotɛ,

²⁴ wo vɛ kɛla, i iya salaka to salakagbalan ɲafɛ je, i yi taa ile ni i badenma wotɛbɛn bene. Wo kɔ, i i kɔsei k'iya salaka bɔ.

²⁵ «Ni i kɛlɛɲɔɔ ka kɛ taala i le kititɛɛya lɔ, ài vɛ kɛla taala, i i lɔja ka kɛlɛ ban jani ài yi se je. Niwotɛ, ni a k'i don kititɛɛba bolo, wo kɛtɔ i donna kasobon lakanaba le bolo. Wo fana kɛtɔ i bilala kaso le la.

²⁶ Ǹ'i tuɲa fɔ ài yɛ, i tɛnala bɔla je, mafɔ i vɛ banna wɔli bɛ salala.»

Kawanili ka bɛn jalonya ma

²⁷ «Ài k'a mɛn a k'a fɔ, ko: ‹Ài kà jalonya kɛ.›

²⁸ Kɛɛ ǹ'a fɔ ài yɛ, ǹ ko, ni i k'i ɲa kaa moso lɔ haan fɔɔ a masɔlɔn lɔɔ y'i mina, i vɛ ban jalonya kɛla wo fɛ i josokun nɔ.

²⁹ Wo lɔ saa, ni i bolokini ɲaden k'i lɔ hakɛ tala, i y'a bɔ a lɔ k'a lafili, kamasɔlɔn i bɔnɔko i falikolo fan kelen na, wo le fisayanin i ma jani i falikolo dafanin la yi fili jahanama.

³⁰ Ni do i bolokini k'i lɔ hakɛ tala, i y'a tɛɛ a la k'a lafili, kamasɔlɔn i bɔnɔko i fali fan kelen na, wo le fisayanin i ma jani i fali dafanin yi taa jahanama.»

Kawanili ka bɛn fulusako ma

³¹ «A fɔnin kɔtunun, ko: ‹Ni kɛ́ min y'a fɛ k'a moso bila, a ka kan ka fulusa sɛvɛ di a ma.›

³² Kɛɛ ǹ'a fɔ ài yɛ, ǹ ko, ni mɔɔ min k'a moso bila k'a talan a ma jalonya kɛ, wo tii v'a lɔ jalonya la. Ado ni mɔɔ min ka moso fulusanin fulu, wo vɛ jalonya kɛ.»

Kawanili ka bɛn kalinko ma

³³ «Ài k'a mɛn ko a k'a fɔ mɔ bemanu yɛ, ko: ‹I k'i kalinnikan tiɲa. I vɛ dalakan min tala Ala yɛ, i yi wo mafa.›

³⁴ Kɛɛ ǹ'a fɔ ài yɛ, ài k'ài kalin tuun. Ài k'ài kalin haijɛnɛ la, kamasɔlɔn wo yi Ala ya masayasiifen ne le.

³⁵ Ài k'ài kalin duukolo la, kamasɔlɔn wo yi Ala senbilaya le le. Ài k'ài kalin Jelusalɛmu la, kamasɔlɔn Masaba ya so le wo le.

³⁶ Ài k'ài kalin ài jɛlɛkanu kun na, kamasɔlɔn ài tɛ se ài kunsi kaali kelen gbu gbɛla niwotɛ k'a fin.

³⁷ Àiya ko lamina yi kɛ kolamina le, ani àiya ban yi kɛ ban ne. Ài vɛ ko ko lala wo kɔkan, wo bɔnin Soitana le lɔ.»

Kawanili ka bɛn tasalali ma

³⁸ «Ài k'a mɛn ko a k'a fɔ, ko: ‹Ɲaden sala le ɲaden ne, ɲii sala le ɲii le.›

³⁹ Kɛɛ ǹ'a fɔ ài yɛ, ài k'ài ta sala koyonkɛba lɔ. Ni mɔɔ k'i bolokini tolo te, i i bolonunma tolo di a ma fana.

⁴⁰ Ni mɔɔ dɔ y'a fɛ ka kiti bila i la iya faaniba kɔlɔbila minako lɔ i la, wo vɛ kɛla, i iya faaniba di a ma fana.

⁴¹ Ni mɔɔ dɔ k'i lɔ diyanigbeya doni tako la, ko i yi kilo kelen taama a le, wo vɛ kɛla, i y'a kɛ kilo fila le.

⁴² Ni mɔɔ dɔ k'i dali fen na, i y'a di a ma. Ni do mɔɔ y'a fɛ ka fen siɲa i ma, i k'i ban.»

Kawanili ka bɛn i juulu kanuko ma

⁴³ «Ài k'a mɛn ko a k'a fɔ, ko: ‹I i siiɲɔɔ kanu, k'i juu lagbeyaɲɛ.›

⁴⁴ Kɛɛ ǹ'a fɔ ài yɛ, ài y'ài juulu kanu, ka Ala dali ài jangatabalu yɛ,

⁴⁵ fɔsa ài yi kɛ ài Fa dennu le min yi haijɛnɛ. Kamasɔlɔn ale le yi tele labɔla mɔɔ yon ni mɔɔ bɛlɛlu yɛ. A do yi san lanala mɔɔ telennin ni mɔɔ telenbalilu yɛ.

⁴⁶ Niwotɛ, ni ài k'ài niilu kanu dein, ài kɛtɔ balayi mindɛ le sɔlɔnna wo lɔ? Hali niisɔɔnminabalu gbu yi wo ɲɔɔzii kɛla.

⁴⁷ Ni ài y'ài badenmalu le fola dein, wo yi ko ba le le? Hali Alalɔnbalilu gbu yi wo ɲɔɔzii le kɛla.

⁴⁸ Ài yi dafa ko bɛ lɔ iwo ài Fa min yi haijɛnɛ, wo dafanin teme.»