Matiyu 28 - Ala Ya Salatikan Kula Kitabu

Isa k'i wuli ka bɔ saya lɔ teme

¹ Nɔningɛlon timinnin kɔ, Lailon sɔɔmadanina, Magidalaka Mɔyamu ni a tɔɔma Mɔyamu vɛ taala kabulu mafɛlɛnya lɔ.

² Wo waate kelen, duukolo vɛ jaajaala gbiligbili, ado mɔ Tii ya mɛlɛka ka jii ka bɔ haijɛnɛ, ka kawa makulukulu k'a bɔ kabulu da la, ka ban k'i sii a kɔkan.

³ A ɲakɔlɔla tɛɛ mɛnɛnna gbesekele iwo sanmɛnɛn, ado aa faani gbɛnin tɛɛ pepe iwo sanmabɛlɛni.

⁴ Sɔdasilu ka siyan bubale fɔɔ k'ai lɔjaajaa k'ai kilon iwo ai sanin vɛ.

⁵ Kɛɛ mɛlɛka k'a fɔ mosolu yɛ, a vɛɛ: «Ài kà siyan. Ǹ k'a lɔn ài yi Isa le ɲininna, min gbaannin tɛɛ kɔlɔman ma.

⁶ A tɛ jan butu. A v'i wuli iwo a n'a fɔla teme. A fuleni lanin tɛɛ tɛɛminja, ài yi na vɛ, ài ɲa kaa je.

⁷ Wo kɔ, ài yi taa telemanin k'a fɔ a kɔbiladennu yɛ ko a v'i wuli ka bɔ saya lɔ. Ko a taatɔ ài ɲa Galile. Ài kɛtɔ a yena je. Ǹ nanin min fɔko lɔ ài yɛ, wo le ve.»

⁸ Wo lɔ, mosolu vɛ bɔla kabulu dala telemanin. Ai tɛɛ siyanna, kɛɛ sawa ba tɛɛ ai josokun nɔ. Ai do ka bɔli ka taa wo lase Isa kɔbiladennu ma.

⁹ Ai taatɔla, Isa k'ai kunkɔlɔbɛn siya la k'a fɔ ai yɛ, a vɛɛ: «Ài ni sɔɔma!» Ai k'i madon a la k'a sen mina a batoko lɔ.

¹⁰ Wo kɛ, Isa do vɛɛ ai yɛ: «Ài kà siyan. Ài yi taa a fɔ m̀ badenmalu yɛ ko ai yi taa Galile. Ai do kɛtɔ ǹ yena je.»

Sɔdasilu ka dandɛɛli kɛ teme

¹¹ Mosolu taatɔla, sɔdasi minu tɛɛ kabulu lakanala, wo dɔlu ka seikɔ so kɔnɔ, ka ko timinnin wolu ɲafɔ salakalase kuntiibalu yɛ.

¹² Salakalase kuntiibalu ni kɛmɔbalu k'ai kun bilin i ɲɔɔ ma mingɛ, ai ka wɔli ba di sɔdasilu ma

¹³ k'a fɔ ai yɛ, ai vɛɛ: «Ài y'a fɔ mɔɔlu yɛ, ài vɛɛ: ‹Mɔ tonin sunɔɔ lɔ su lɔ, Isa kɔbiladennu na nala ka a su suɲa.›

¹⁴ Ni ko min mangan ka se jamanatii ma, mɔ kɛtɔ kumala a fɛ ka wo kunko bɔ ài kun.»

¹⁵ Sɔdasilu ka wɔli mina ka kuma wo lataama. Wo kuma le jɛzɛnnin Jahudiyalu tɛma hali bi.

Isa k'a kɔbiladennu kelaya teme

¹⁶ Wo kɔ, keladen mɔɔ tan ni kelen vɛ taala Galile ka se tini dɔ ma min ya ko fɔnin tɛɛ Isa bolo.

¹⁷ Ai ka Isa ye mingɛ, ai v'a batola, kɛɛ a dɔlu ka sika.

¹⁸ Isa k'i madon ai la k'a fɔ ai yɛ, a vɛɛ: «See bɛ vɛ di m̀ ma duukolo kɔkan, ani haijɛnɛ.

¹⁹ Wo lɔ saa, ài yi taa siboloma bɛ kɛ ǹ kɔbiladen ne, k'ai mako ji kɔlɔ Fa Ala, ni a Denkɛ, ani Nii Sɛnɛyanin tɔɔ lɔ,

²⁰ ani k'ai kalan ko bɛ labatoko la, ǹ n'ài jamalila minu la. Ǹe do, ǹ'ài fɛ waate bɛ haan fɔɔ ka taa sii dunuɲa laban na.»