Matiyu 27 - Ala Ya Salatikan Kula Kitabu

Ai ka taa Isa le Pilati fɛlɔ teme

¹ Wo kɛnɛbɔ sɔɔmadanina, salakalase kuntiibalu ni kɛmɔbalu bɛ ka taa ai kun bilin i ɲɔɔ ma ka bɛn Isa faako ma.

² Ai k'a sili, ka taa a le, k'a don jamanatii Pilati bolo.

Judasi k'a jɛlɛ faa teme

³ Isa janvaba Judasi k'a ye mingɛ ko ai vɛ kiti bila Isa la a faako lɔ, a ka nimisa. Ai tɛɛ vɛ wɔligbɛ gbana bisawa (30) minu di a ma, a ka seikɔ ka wolu lasei salakalase kuntiibalu ni kɛmɔbalu ma.

⁴ A vɛɛ ai yɛ: «M̀'ɛ julumbu ta, kamasɔlɔn ǹ na hakɛtabali le janvala.» Kɛɛ ai do vɛɛ a yɛ: «Mɔ mako pa tɛ wo le! I kunko le wo le feu!»

⁵ Judasi do ka wɔligbɛ gbana wolu lafili lɔhɔlɔmabonba la je, ka taa a jɛlɛ dɛn julu la ka sa.

⁶ Salakalase kuntiibalu ka wɔligbɛ gbana wolu tɔmɔntɔmɔn k'a fɔ, ai vɛɛ: «A ladaannin tɛ mɔ ma ka wɔli min bila niilifenkesu lɔ, kamasɔlɔn mɔɔ jeli wɔli le.»

⁷ Wo kɔ, ai ka bɛn kan kelen ma, ka daaladanba ya gbɛkɛnɛ san wɔli wo la, ka wo kɛ lonalu sudoonya le.

⁸ Wo le k'a kɛ, haan fɔɔ ka sii bi la, ai y'a fɔla woja ma ko Mɔɔ Jeli Gbɛkɛnɛ.

⁹ Wo ka kɛ mingɛ, kuma min fɔnin Nabi Jelemi bolo, wo ma ka fa, ko: «Ai ka wɔligbɛ gbana bisawa (30) ta, Bani Isilankalu ka wo kɔndɛ ka wo kɛ mɔɔ sɔɔn ne.

¹⁰ Ai do ka daaladanba ya gbɛkɛnɛ sɔɔn di iwo mɔ Tii ka ǹ jamali teme.»

Pilati ka Isa maɲininga teme

¹¹ Wo waate, ai ka Isa lalɔ jamanatii Pilati ɲakɔlɔ. Wo k'a maɲininga, a vɛɛ: «Ile le Jahudiyalu ya masakɛ le?» Isa vɛɛ: «Ile gbu vɛ wo fɔ.»

¹² Kɛɛ salakalase kuntiibalu ni kɛmɔbalu ka Isa jalaki ka bɛn ko minu ma, a m'a dɔ fɔ ai fɛ.

¹³ Wo lɔ, Pilati vɛɛ a yɛ: «Ai v'i jalaki ko siyama lɔ. I ma wo mɛn?»

¹⁴ Kɛɛ Isa ma diɲa ka javili suu suu di, hali kuma kelen gbu. Wo do ka Pilati kawakoya bubale.

Jahudiyalu ka Isa faako jatesii teme

¹⁵ Timinkunna Selilon tɛɛ vɛ sena kotan, jamanatii deinin tɛɛ kasoden kelen ne bilala. Jama tɛɛ v'a fɔla a yɛ a yi mɔɔ min bila, a tɛɛ wo tii le bilala.

¹⁶ Wo ka kɛ́ dɔ talan kaso la, min mangutu yon tɛɛ vɛ bɔ, min tɔɔ tɛɛ ko Balabasi.

¹⁷ Jama k'i ladɛn Pilati fɛlɔ mingɛ, a vɛɛ ai yɛ: «Ài y'a fɛ ǹ'i jene bila ài yɛ? Balabasi, baa Isa, ai y'a fɔla min ma ko Masa Tɔɔmasenin?»

¹⁸ Pilati tɛɛ k'a lɔn ko ai na Isa donna a bolo ka bɛn ɲangbeya le ma.

¹⁹ Pilati ka to siinin kititɛɛya lɔ, a moso ka kela lataa a ma, a vɛɛ: «I k'i sen bila mɔɔ telennin wo ya ko lɔ, kamasɔlɔn ǹ na tɔlɔyala su timinnin nɔ bubale siwo lɔ ka bɛn aa ko ma.»

²⁰ Kɛɛ salakalase kuntiibalu ni kɛmɔbalu ka jama lɔsun, ko ai yi Pilati madiya ko a yi Balabasi bila ka Isa faa.

²¹ Jamanatii k'ai maɲininga kɔtunun, a vɛɛ: «Mɔɔ fila minu lɔ, ài y'a fɛ ǹ'i jene bila ài yɛ?» Ai vɛɛ: «Balabasi!»

²² Pilati do vɛɛ ai yɛ: «Ài y'a fɛ ǹ'i mindɛ kɛ Isa la wo lɔ, ai y'a fɔla min ma ko Masa Tɔɔmasenin?» Ai bɛ do vɛɛ: «A gbaan kɔlɔman ma!»

²³ Pilati do vɛɛ: «Mindɛ lɔ? A na koyon mindɛ kɛla?» Ai do k'a dɔ la aiya gbanɔ kɔkan, ai vɛɛ: «A gbaan kɔlɔman ma!»

²⁴ Pilati k'a ye mingɛ ko a kumakan tɛ foi ɲiala, ani jama tɛɛ mulutu bolo le ma, a ka ji ta k'a bolo lako jama ɲakɔlɔ. A do vɛɛ ai yɛ: «Ǹ sen tɛ kɛ́ min faako lɔ. Aa ko y'ài bolo.»

²⁵ Wo fɔ Pilati bolo, jama bɛ vɛɛ: «Ale le wo le. A jeli bɔnko hakɛ yi bila ǹu ni mɔ dennu kɔ.»

²⁶ Wo kɛ, a ka Balabasi bila, ka sɔdasilu lɔ Isa gbasila gbusan na, ka ban ko ai yi taa a le a gbaanya lɔ.

Sɔdasilu ka Isa lafeya teme

²⁷ Wo kɛ, jamanatii ya sɔdasilu ka taa Isa le jamanatii ya bonba la, ado sɔdasi jama ba bɛ k'i ladɛn a ma.

²⁸ Ai ka Isa ya faanilu bɔ a kanna, ka masayafaani wulɛn bila a kanna.

²⁹ Wo kɛ, ai ka wonin julu dɔ milinmilin, ka wo kɛ masayafula sawula le, ka wo bilin a kun na, ka bele dɔ don a bolokini kɔlɔ. Ai do v'i mabilinna duu ma a kɔlɔ k'a lafeya, ai vɛɛ: «Jahudiyalu ya masakɛ, m'i fola!»

³⁰ Ai k'ai daji bɔn a kan, ka bele mina a la, k'a gbasi a kun nɔ siyama le.

³¹ Ai wɔlinin a lafeyala, ai ka masayafaani bɔ a kanna, k'a jɛlɛkanu ya faanilu bila a kanna. Wo kɛ, ai ka taa a le a gbaanya lɔ kɔlɔman ma.

Ai ka Isa gbaan kɔlɔman ma teme

³² Ai taatɔla, ai k'i ɲɔɔmɛn Silɛnika kɛ́ dɔ le, min tɔɔ tɛɛ ko Simɔn. Sɔdasilu k'a lɔ ko a yi Isa gbaankɔlɔman ta diyanigbeya boloma.

³³ Ai ka se dingila dɔ lɔ, ai y'a fɔla min ma ko Gɔligota (wo kɔlɔ le ko Kunkolo Dingila).

³⁴ Ai do ka gbɛ di Isa ma ko a a min, min ɲaaminin tɛɛ basi kunanin na. Kɛɛ a ka wo mafɛlɛn mingɛ, a k'i ban a minko ma.

³⁵ Ai wɔlinin Isa gbaanna kɔlɔman ma, ai ka kalabila kɛ ka bɛn aa faanilu lɔtalako ma i ɲɔɔ wotɛ.

³⁶ Wo kɔ, ai k'i sii je k'ai ɲa bɛn a ma.

³⁷ Ai tɛɛ vɛ wala dɔ bila Isa kunma, a faa dailu sɛvɛnin tɛɛ min ma, ko: «Isa le ne, Jahudiyalu ya masakɛ.»

³⁸ Isa ni benkannikɛba fila ka gbaan kɔlɔmannu ma waate kelen nɔ: a kelen tɛɛ a bolokini fannɔ, a tɔ kelen tɛɛ a bolonunma fannɔ.

³⁹ Timinsennɔmɔɔlu v'a jɛvɛla k'ai kun lafilifili a ma.

⁴⁰ Ai do vɛɛ a yɛ: «Ile min yi lɔhɔlɔmabonba tela k'a lɔ kɔtunun tele sawa kɔlɔ, i i jɛlɛ lakisi vɛ! Ni i le le Ala Denkɛ le, i yi jii vɛ ka bɔ kɔlɔman ma!»

⁴¹ Wo boloɲa kelen ma, salakalase kuntiibalu ni seliya kalanmɔɔlu ni kɛmɔbalu fana tɛɛ a lafeyala, ai vɛɛ:

⁴² «A na dɔlu lakisila, kɛɛ a do tɛ se a jɛlɛ lakisila! Bani Isilankalu ya masakɛ le ve, wo lɔ, a yi jii vɛ ka bɔ kɔlɔman ma! Wo do vɛ kɛla, m'i limaniyale a ma!

⁴³ A lanin Ala la. Ni aa ko diyanin ka kɛ Ala yɛ, Ala gbu y'a lakisi vɛ! Kamasɔlɔn ale le n'a fɔla, a vɛɛ: ‹Ala Denkɛ le ǹ ne.› »

⁴⁴ Benkannikɛba fila minu gbaannin tɛɛ a dafɛ, wolu fana tɛɛ a jɛvɛla ten ne.

Isa ka sa teme

⁴⁵ Telelatelen waate senin, divi ka don jamana fan bɛ lɔ lɛlɛ sawa kɔlɔ.

⁴⁶ Wuladala lɛlɛ sawa waate, Isa ka gbanɔ, a vɛɛ: «Eli, Eli, lama sabakatani?» (Wo kɔlɔ le ko: «Ǹ Tii, ǹ Tii, mindɛ lɔ i vɛ ǹ labila?»)

⁴⁷ Kolɔgbɛnba dɔlu ka wo mɛn mingɛ, ai do vɛɛ: «A yi Nabi Iliya le kilila!»

⁴⁸ Ai lɔ mɔɔ kelen vɛ bɔlila telemanin ka taa fu dɔ ta k'a sun gbɛ kumunnin nɔ. A do ka fu wo sili kɔlɔman ma, k'a lataa Isa ma ko a a min.

⁴⁹ Kɛɛ dɔlu vɛɛ: «A to je. M'a mafɛlɛn ni Nabi Iliya kɛtɔ nala k'a lakisi!»

⁵⁰ Isa ka gbanɔ bakɛ mingɛ kɔtunun, a do k'a nii lasei.

⁵¹ Wo waate kelen nɔ, lɔhɔlɔmabonba daladɛnfaani ka fala fila le ka damina sanma ka jii duuma. Duukolo ka jaajaa, ado falakololu ka tete.

⁵² Kabululu da ka ka, ado muminin minu tɛɛ vɛ sa, wo siyama v'i wulila

⁵³ ka bɔ aiya kabululu lɔ. Isa wuli kɔ ka bɔ saya lɔ, mɔɔ wolu ka don lɔhɔlɔma so kɔnɔ, ado mɔɔ siyama k'ai ye.

⁵⁴ Sɔdasi kuntii ni aa mɔɔ minu ɲa bɛnnin tɛɛ Isa ma, wolu ka duukolo jaajaatɔ ye mingɛ, ani ko minu bɛ kɛnin, ai ka siyan bubale. Ai do vɛɛ: «Tuɲa le, kɛ́ min tɛɛ Ala Denkɛ le le!»

⁵⁵ Moso siyama fana tɛɛ je, minu majaannin tɛɛ poon kolasaala. Wolu ni Isa le nanin tɛɛ kelen ne ka bɔ Galile a madɛmɛnko lɔ.

⁵⁶ Magidalaka Mɔyamu tɛɛ moso wolu lɔ, ani Janguba ni Jusufu ba Mɔyamu, ani Janguba ni Yohana ba, min tɛɛ Zebede moso le.

Ai ka Isa sudoon teme

⁵⁷ Wo k'a talan nafolotii dɔ tɛɛ je min tɔɔ tɛɛ ko Jusufu, ka bɔ Alimate so kɔnɔ. A do tɛɛ Isa kɔbiladen dɔ le le. Wo lon wuladala, a ka taa Pilati fɛlɔ,

⁵⁸ k'a madiya ko a yi Isa fuleni don a bolo. Pilati do ka aa mɔɔlu lɔ fuleni dila Jusufu ma.

⁵⁹ Wo lɔ, Jusufu ka taa Isa fuleni ta k'a kasange faani gbɛ sɛnɛyanin ne.

⁶⁰ A ka taa a lala kawawoo kabulu lɔ, a tɛɛ vɛ mɔɔlu lɔ min senna a jɛlɛ yɛ kula le. Wo kɛ, a ka kawa ba dɔ makulukulu ka kabulu datuun wo le, ka ban ka bɔ je.

⁶¹ Magidalaka Mɔyamu ni a tɔɔma Mɔyamu siinin tɛɛ kabulu ɲatelenma lɔ.

Kabulu lakanako

⁶² Isa ka sa lon min na, wo ka bɛn Nɔningɛlon ɲasiilon ne ma. Wo dusagbɛlon, salakalase kuntiibalu ni Falisilu k'ai ladɛn Pilati ɲakɔlɔ.

⁶³ Ai do vɛɛ a yɛ: «Mɔ kuntii, mɔɔlafiliba wo ka kuma dɔ fɔ a tɛɛ a nii la waate min nɔ, mɔ hangili toyine wo lɔ, ko tele fila a sawana a wulitɔ ka bɔ saya lɔ.

⁶⁴ Wo lɔ, fɔ i yi mɔɔlu jamali kabulu lakanala haan fɔɔ tele sawa, fɔsa a kɔbiladennu kana taa a su suɲa, ka ban k'a fɔ mɔɔlu yɛ ko a v'i wuli ka bɔ saya lɔ. Ni wo ka kɛ, faɲa wo kɛwonyatɔle ka timin a kunfɔlɔ ta la.»

⁶⁵ Wo fɔ, Pilati vɛɛ ai yɛ: «M̀'ɛ diɲa. Ài yi sɔdasi dɔlu lataa kabulu lakanaya lɔ iwo a diyanin ài yɛ teme.»

⁶⁶ Wo fɔ, ai ka taa kabulu dala, k'ai bolonɔ bila kabulu datuun kawa ma, ka sɔdasilu lalɔ je.