Matiyu 26 - Ala Ya Salatikan Kula Kitabu

Isa juulu k'a minako ɲaɲinin teme

¹ Isa wɔlinin kuma wo bɛ fɔla, a vɛɛ a kɔbiladennu yɛ:

² «Ài k'a lɔn, a vɛ to tele fila, Timinkunna Selilon yi se. Wo vɛ kɛla, ai kɛtɔ Mɔɔnivin Tanin minala ka a don a juulu bolo a gbaanko lɔ kɔlɔman ma.»

³ Wo waate, salakalase kuntiibalu ni kɛmɔbalu ka taa ladɛnkɛya lɔ Kayife ya bonba la, min tɛɛ salakalasebalu ya kuntiiba le.

⁴ Ai k'i ɲɔɔ ye ka Isa minako ɲaɲinin doon nɔ, fɔsa ai y'a faa.

⁵ Kɛɛ ai vɛɛ: «Mɔ kà a mina selilon, fɔsa mɔɔlu kana mulutu.»

Moso dɔ ka tulu sumadiyanin kɛ Isa kun nɔ teme

⁶ Isa tɛɛ kunatɔ kɔlɔ Simɔn ya bon na Betani waate min nɔ,

⁷ moso dɔ ka na baabɔlɔn ne, min ladannin kawa kein ne. A lafanin tɛɛ tulu sumadiyanin daagbɛlɛn na. Isa ka to dɔnnikɛya lɔ je, moso do vɛ wo kɛla Isa kun nɔ.

⁸ A kɔbiladennu ka wo ye mingɛ, ai ka mɔnɛ, ai vɛɛ: «Tiɲali min kun yi mindɛ le?

⁹ Tulu min tɛɛ sene felela wɔli ba la, ka wo kɛ bolokolonnu madɛmɛlifen ne.»

¹⁰ Kɛɛ Isa ka kɛ wo kalama mingɛ, a vɛɛ ai yɛ: «Mindɛ lɔ ài yi moso ɲagbala? A na kokein ne kɛla ǹ yɛ.

¹¹ Bolokolonnu totɔ ài tɛma waate bɛ, kɛɛ ǹe do tɛnala tola ài tɛma waate bɛ.

¹² Moso min na tulu sumadiyanin kɛla ǹ fali kan, ka ǹ lɔbɛn ka bɛn ǹ sudoonko ma.

¹³ Ǹ'i tuɲa fɔ ài yɛ, Samakan Kein min la vɛ sena dunuɲa tɛɛ o tɛɛ lɔ, moso na min kɛla, wo yi fɔle je, fɔsa mɔɔlu hangili yi to ale fana lɔ.»

Judasi ka diɲa Isa janvako ma teme

¹⁴ Wo kɔ, Isa ya keladen mɔɔ tan ni fila (12) dɔ, min tɔɔ tɛɛ Judasi Isekaliyɔti, wo ka taa salakalase kuntiibalu fɛlɔ.

¹⁵ A do vɛɛ ai yɛ: «Ni ǹ ka Isa don ài bolo, ài kɛtɔ mindɛ dila m̀ ma?» Ai do ka wɔligbɛ gbana bisawa (30) di a ma.

¹⁶ Ka ta wo waate ma, Judasi tɛɛ Isa donko ɲaɲininna ai bolo.

Isa ni a kɔbiladennu ka Timinkunna Selilon kɛ teme

¹⁷ Bulufununbali Selilon tele kunfɔlɔ, Isa kɔbiladennu ka na a ma k'a maɲininga, ai vɛɛ: «I y'a fɛ m'i Timinkunna Selilon dɔnnifen lɔbɛn i yɛ mineja?»

¹⁸ Isa vɛɛ ai yɛ: «Ài yi taa kɛ́ dɔ fɛlɔ so kɔnɔ, ài y'a fɔ a yɛ, ài vɛɛ: ‹Kalanmɔɔ bolo ko aa waate ma vɛ sulunya. Ko ale ni a kɔbiladennu kɛtɔ Timinkunna Selilon dɔnni kɛla i fɛ le lɔ.› »

¹⁹ Isa kɔbiladennu k'a kɛ iwo a k'a fɔ ai yɛ teme. Ai ka taa Timinkunna Selilon dɔnnifen lɔbɛn je.

²⁰ Teleben waate, ale ni aa keladen mɔɔ tan ni fila (12) k'i sii dɔnnila.

²¹ Ai ka to dɔnnila, Isa k'a fɔ ai yɛ, a vɛɛ: «Ǹ'i tuɲa fɔ ài yɛ, ài lɔ mɔɔ kelen kɛtɔ ǹ janvala.»

²² Ai do niila ka fin kosɛvɛ ka bɛn kuma wo ma. Ai bɛ v'a fɔla a yɛ kelen kelen ne, ai vɛɛ: «Ǹ Kuntii, ǹe le wo le?»

²³ Isa vɛɛ: «Ǹe ni mɔɔ min bolo yi tasa kelen nɔ, wo tii le kɛtɔ ǹ janvala.

²⁴ Ado Mɔɔnivin Tanin faatɔle iwo a sɛvɛnin kitabu kɔnɔ teme ka bɛn a ma. Kɛɛ mɔɔ min kɛtɔ a janvala, gbalo yi wo tii ma yɛ. Hali ni wo tii tɛɛ ma sɔlɔn, wo tɛɛ bɛnne a ma feu.»

²⁵ Judasi, min tɛɛ Isa janvaba le, wo vɛɛ a yɛ: «Kalanmɔɔ, ǹe le wo le?» Isa vɛɛ a yɛ: «Ile gbu vɛ wo fɔ.»

Mɔ Tii ya dɔnni laban

²⁶ Ai ka to dɔnnila, Isa ka bulu ta ka balika bɔ Ala yɛ. A do ka bulu lɔkalikali k'a di a kɔbiladennu ma, k'a fɔ ai yɛ, a vɛɛ: «Ài yi min mina, ài y'a dɔn. Ǹ falikolo le min ne.»

²⁷ Wo kɔ, a ka jiyafɛ ta, lɛzɛnji tɛɛ min nɔ, ka balika bɔ Ala yɛ, ka ban k'a di ai ma. A vɛɛ: «Ài bɛ y'a dɔ min a lɔ.

²⁸ Ǹ jeli le min ne, salatikan jeli, min bɔnnin mɔɔ siyama yɛ aiya julumbulu lɔkotoko lɔ.

²⁹ Ǹ'a fɔ ài yɛ, ǹ tɛnala lɛzɛnji minna butu, haan fɔɔ ǹe ni àilu v'a kula minna ǹ Fa ya masaya lɔ lon min na.»

Isa k'a fɔ ko Piyɛli kɛtɔ i banna a lɔ teme

³⁰ Wo kɔ, ai ka baiti la, ka bɔ je ka taa Zeituna tini kɔkan.

³¹ Wo kɛ, Isa vɛɛ ai yɛ: «Bi su min nɔ, ài bɛ kɛtɔ ài banna ǹ nɔ, kamasɔlɔn a sɛvɛnin kitabu kɔnɔ, ko: ‹Ǹ kɛtɔ saakunnasiiba gbasila, ado aa saa kulu jɛzɛntɔ.›

³² Kɛɛ m̀'ɛ m̀ wulila ka bɔ saya lɔ, ǹ taatɔ ài ɲa Galile koovi lɔ.»

³³ Wo fɔ Isa bolo, Piyɛli do vɛɛ a yɛ: «Hali bɛ k'i ban i lɔ, kɛɛ ǹe tɛnala m̀ banna i lɔ feu!»

³⁴ Kɛɛ Isa vɛɛ a yɛ: «Ǹ'i tuɲa fɔ i yɛ, bi su min nɔ, jani donon yi kumun, i kɛtɔ a fɔla siɲa sawa le ko i ma ǹ lɔn.»

³⁵ Kɛɛ Piyɛli do vɛɛ a yɛ: «Hali a ka sii saya la, ǹ tɛnala m̀ banna i lɔ feu!» Isa kɔbiladen tɔlu bɛ ka wo ɲɔɔzii fɔ.

Isa ka Ala dali Gɛtɛsɛmɛni teme

³⁶ Wo kɔ, Isa ni a kɔbiladennu ka se dingila dɔ lɔ, min tɔɔ yi ko Gɛtɛsɛmɛni. A do vɛɛ ai yɛ: «Ài sii, ài yi m̀ makɔnɔ jan. Ǹ taatɔ Ala dalila jannɔ ve.»

³⁷ A taatɔla, a ka taa Piyɛli ni Zebede denkɛ fila le. Isa niila ka fin, a do joso ka tɔlɔya kosɛvɛ.

³⁸ A vɛɛ ai yɛ: «Ǹ niila vɛ fin bubale k'a kɛ iwo ǹ satɔle. Ài yi to jan ka to ài ɲana ǹ fɛ.»

³⁹ A ka taa ɲafɛ dɔni ne k'a ten bilin duu ma. A do vɛ Ala dalila, a vɛɛ: «Ǹ Fa, ni a yi sene kɛla, i kà ǹ lamin jiyafɛ min nɔ. Kɛɛ ǹe gbu sawo kà kɛ, mafɔ i sawo.»

⁴⁰ Wo kɔ, Isa ka seikɔ a kɔbiladen sawa fɛlɔ k'ai talan sunɔɔ lɔ. A do vɛɛ Piyɛli yɛ: «Ài ma se tola ài ɲana ka lɛlɛ kelen gbu kɛ ǹ fɛ?

⁴¹ Ài yi to ài ɲana ka Ala dali, alako ài ma kana nɛɛ k'ài bila koyon nɔ. Koɲumakɛ miliya yi mɔɔ la, kɛɛ wo see tɛ a falikolo yɛ.»

⁴² Isa ka bɔ ai fɛ a siɲa filana lɔ ka taa Ala dali kɔtunun, a vɛɛ: «Ǹ Fa, ni a ɲa gbɛlɛ tɛ je, fɔ ǹ'i m̀ min jiyafɛ min nɔ, wo vɛ kɛla, i sawo yi kɛ.»

⁴³ Isa seikɔnin a kɔbiladennu fɛlɔ, a k'ai talan sunɔɔ lɔ kɔtunun, kamasɔlɔn sunɔɔ ba le tɛɛ ai ɲa la.

⁴⁴ Wo lɔ, Isa k'ai to je ka taa Ala dali a siɲa sawana lɔ boloɲa kelen wo ma.

⁴⁵ Wo kɛ, a ka seikɔ a kɔbiladennu fɛlɔ k'a fɔ ai yɛ, a vɛɛ: «Hali bi ài yi sunɔɔ lɔ, ani k'ài nɔningɛ? A ye, waate vɛ se. Mɔɔnivin Tanin yi don bolo le ma julumbutɔlu bolo.

⁴⁶ Ài wuli, ài ndaa vɛ! Ǹ janvaba vɛ se.»

Isa minako

⁴⁷ Isa ka to kumala, Judasi ka se je, min tɛɛ aa keladen mɔɔ tan ni fila (12) dɔ le. Jama ba tɛɛ a kɔ siyamifan ni kɔlɔmankulunnu le. Ai kelayanin tɛɛ salakalase kuntiibalu ni kɛmɔbalu le bolo.

⁴⁸ Isa janvaba tɛɛ vɛ tɔɔmase jiya jama la, a vɛɛ: «M̀'ɛ ǹ filila mɔɔ min nɔ k'a sumu a tama lɔ, wo tii le. Ài yi wo tii mina.»

⁴⁹ Judasi k'i madon Isa la telemanin k'a fɔ a yɛ, a vɛɛ: «Kalanmɔɔ, i ni wula!» A do vɛ Isa sumuna a tama lɔ.

⁵⁰ Isa do vɛɛ a yɛ: «Ǹ tɔva, i nanin min kɛko lɔ, wo kɛ.» Wo fɔ Isa bolo, ai k'i kɛ a kan k'a mina.

⁵¹ Mɔɔ minu tɛɛ Isa fɛ je, wolu lɔ mɔɔ kelen ka aa siyamifan labɔ aa ɲaa lɔ ka salakalase kuntiiba ya jɔn gbasi, k'a tolo tɛɛ a la.

⁵² Wo kɛ, Isa vɛɛ a kɔbiladen wo yɛ: «I iya siyamifan don a ɲaa lɔ! Mɔɔ minu vɛ kɛlɛ kɛla siyamifan ne, wolu bɛ yi faale siyamifan ne.

⁵³ A y'i kɔnɔ ko ǹ tɛɛ tɛ se a fɔla ǹ Fa yɛ, a tɛɛ aa mɛlɛka kulu ba tan ni fila (12) lana telemanin m̀ madɛmɛnko lɔ?

⁵⁴ Kɛɛ wo vɛ kɛla, kitabu kɔnɔ kuma minu y'a jiyala ko a ka kan ka kɛ ten, wolu ma tɛɛ se fala di?»

⁵⁵ Wo waate kelen nɔ, Isa vɛɛ jama yɛ: «Mindɛ kɛnin ài nanin m̀ minaya lɔ siyamifan ni kɔlɔmankulunnu le iwo mɔɔlu yi bɔla benkannikɛba kanma teme? Lon bɛ, ǹ siinin tɛɛ mɔɔlu kalanna lɔhɔlɔmabonba luu kɔnɔ, kɛɛ ài do ma m̀ mina je.

⁵⁶ Kɛɛ min bɛ kɛnin fɔsa kelalu na minu sɛvɛla kitabulu kɔnɔ, wolu ma yi fa teme.» Isa kɔbiladennu bɛ ka bɔli ka ale kelen to.

Ai ka taa Isa le kititɛɛya lɔ teme

⁵⁷ Wo kɛnin, Isa minabalu vɛ taala a le salakalase kuntiiba Kayife fɛlɔ, seliya kalanmɔɔlu ni kɛmɔbalu ladɛnnin tɛɛ tɛɛminja.

⁵⁸ Piyɛli tɛɛ jama kɔ poon haan fɔɔ ka se salakalase kuntiiba ya luu ma. A ka don k'i sii lakanalibalu dafɛ k'a ye kolu labantɔ teme.

⁵⁹ Wo waate kelen nɔ, salakalase kuntiibalu ni kititɛɛbalu bɛ tɛɛ faɲafɔ seleyakan ɲininna Isa kanma, min yi se kɛla a faa kun ne.

⁶⁰ Hali mɔɔ siyama tɛɛ ai ɲa labɔla gbɛ la ka tɔɔla a la, wo bɛ n'a kɛ, ai ma foi sɔlɔn. A laban nɔ, mɔɔ fila k'i madon k'a fɔ, ai vɛɛ:

⁶¹ «Kɛ́ min n'a fɔla ko a yi sene lɔhɔlɔmabonba tela, ka ban k'a lɔ kɔtunun tele sawa kɔlɔ.»

⁶² Wo kɛ, salakalase kuntiiba k'i lɔ ka Isa maɲininga, a vɛɛ: «Mɔɔ minu yi min fɔla ka bɛn i ma, i tɛ wo javila?»

⁶³ Kɛɛ Isa ka jeden. Salakalase kuntiiba do vɛɛ a yɛ: «Ǹ'a fɛ i yi kalin Ɲɛnɛmayatii Ala tɔɔ la k'a fɔ mɔ yɛ ni ile le Masa Tɔɔmasenin ne, ani Ala Denkɛ.»

⁶⁴ Isa vɛɛ a yɛ: «Ile gbu vɛ wo fɔ. Kɛɛ ǹ'a fɔ ài yɛ, ǹ ko, ka damina bi ma ka taa, ài kɛtɔ Mɔɔnivin Tanin siinin yena Seebɛtii Ala bolokini fannɔ, ani ka a natɔla ye sanbiliya lɔ ka bɔ sangbolo lɔ.»

⁶⁵ Wo fɔ Isa bolo, salakalase kuntiiba vɛ aa faaniba lɔfalafalala mɔnɛya boloma, a vɛɛ: «A vɛ Alalafeyakan fɔ! Mɔ mako tɛ mɔɔ ya seleya la butu. Àilu gbu vɛ aa Alalafeyakan mɛn.

⁶⁶ M'i mindɛ kɛ wo lɔ?» Jama vɛɛ: «A ka kan ka faa!»

⁶⁷ Wo kɛ, ai k'ai daji bɔn a ɲa lɔ, k'a gbuun ai bololu le. A dɔlu v'a tolo tela.

⁶⁸ Ai vɛɛ: «Ile Masa Tɔɔmasenin, kelaya kɛ vɛ! Mɔɔ min n'i gbasila, i yi wo tii tɔɔ fɔ!»

Piyɛli k'i ban Isa lɔ teme

⁶⁹ Piyɛli siinin ka to luu ma wo waate, bɔidenmoso dɔ k'i madon a la, a vɛɛ a yɛ: «Ile fana tɛɛ Galileka Isa le fɛ.»

⁷⁰ Kɛɛ Piyɛli k'i ban i lɔla a la ai bɛ ɲana, a vɛɛ: «M̀ m'iya kuma ɲaye.»

⁷¹ Piyɛli ka bɔ je ka taa luu da la. Bɔidenmoso gbɛlɛ k'a ye k'a fɔ je mɔɔlu yɛ, a vɛɛ: «Kɛ́ min tɛɛ Nazalɛtika Isa le fɛ.»

⁷² Kɛɛ Piyɛli m'i lɔ a la. A k'i kalin a yɛ, a vɛɛ: «M̀ ma kɛ́ wo lɔn feu!»

⁷³ A lɔ ma mɛn bakɛ, je mɔɔ dɔlu k'i madon Piyɛli la. Ai do vɛɛ a yɛ: «Ile fana fɛ yi mɔɔ wolu la jɔ, kamasɔlɔn i kumaɲa vɛ wo jiya.»

⁷⁴ Wo fɔ ai bolo, Piyɛli k'i kalin fɔɔ k'a jɛlɛ daan, a vɛɛ: «M̀ ma kɛ́ wo lɔn feu!» Wo fɔ, donon ka kumun telemanin.

⁷⁵ Piyɛli hangili ka bila Isa kumakan nɔ, ko: «Jani donon yi kumun, i kɛtɔ a fɔla siɲa sawa le ko i ma ǹ lɔn.» Wo kɛ, Piyɛli ka bɔ luu ma ka kasi josomakasa boloma.