Matiyu 25 - Ala Ya Salatikan Kula Kitabu

Singbili tan ma sana

¹ «Wo waate lɔ, haijɛnɛ masaya ko kɛtɔle iwo singbili tan minu k'aiya fitinalu ta ka taa kɔɲɛfa labɛnya lɔ.

² Ai lɔ mɔɔ loolu tɛɛ hangilindan ne le. A tɔ loolu tɛɛ hangilima le le.

³ Hangilindannu ka taa aiya fitinalu le, kɛɛ ai do ma fitina tulu ta ai fɛ.

⁴ Hangilimalu do ka taa fitina le ani baabɔlɔn minu lafanin tulu le.

⁵ Kɔɲɛfa ka mɛn mingɛ, sunɔɔ ka singbili tan bɛ mina, ai do ka sunɔɔ.

⁶ «Sutalama, gbanɔkan dɔ ka bɔ, ko: ‹Kɔɲɛfa vɛ na, ài yi bɔ k'a labɛn!›

⁷ Wo kɛ, singbili tan v'i wulila k'aiya fitinalu lɔbɛn.

⁸ Hangilindannu do vɛɛ hangilimalu yɛ: ‹Ài yi mɔ sɔ àiya tulu dɔ sɔ, kamasɔlɔn maa fitinalu satɔle.›

⁹ Kɛɛ hangilimalu k'ai javi, ai vɛɛ: ‹Wo tɛ bɛn. Maa tulu tɛ se mɔ bɛ bɔla. Ài yi taa tulu dɔ san ài jɛlɛ yɛ.›

¹⁰ Ai taa tulu sanya lɔ, kɔɲɛfa ka na. Ado singbili minu lɔbɛnnin tɛɛ, wolu ka don tolonkɛya lɔ kɔɲɛfa fɛ. Wo kɛ, bonda ka tuun.

¹¹ «Kɔfɛ, singbili tɔlu ka na. Ai do k'ai kan labɔ, ai vɛɛ: ‹Mɔ Kuntii! Mɔ Kuntii! Da laka mɔ yɛ!›

¹² Kɔɲɛfa do vɛɛ ai yɛ: ‹Ǹ'i tuɲa fɔ ài yɛ, m̀ ma ài lɔn feu!› »

¹³ Isa ka ban sana lala k'a fɔ ai yɛ, a vɛɛ: «Ài yi to ài ɲana, kamasɔlɔn ài Tii natɔ lon min na, ani waate min nɔ, ài ma wo lɔn.

Bɔiden sawa ma sana

¹⁴ «Wo waate lɔ, haijɛnɛ masaya ko kɛtɔle iwo kɛ́ min tɛɛ taama boloma. A ka aa bɔidennu kili k'a bolofennu kalifa ai la.

¹⁵ A ka sanu gbana kɛmɛ loolu (500) di a dɔ ma, ka kɛmɛ fila (200) di a dɔgbɛlɛ ma, ka kɛmɛ (100) di a sawana ma. A ka kɔndɛ wo di ai ma ka bɛn aiya see jate le ma. Wo kɔ, a k'i wuli ka taa a taama na.

¹⁶ Bɔiden min ka sanu gbana kɛmɛ loolu (500) sɔlɔn, wo vɛ taala k'a lɔjulaya telemanin. A do ka kɛmɛ loolu gbɛlɛ (500) sɔlɔn a tɔnɔ le.

¹⁷ Kɛmɛ fila (200) tii fana k'a kɛ boloɲa kelen wo le ma, ka kɛmɛ fila (200) gbɛlɛ sɔlɔn a tɔnɔ le.

¹⁸ Kɛɛ bɔiden min ka kɛmɛ (100) sɔlɔn, wo vɛ taala ka diɲa sen, ka aa kuntii ya wɔli doon je.

¹⁹ «Waate jaan timinnin, bɔiden wolu ya kuntii ka na, ko a a fɛ ka aa wɔliko ɲabɔ ale ni ailu wotɛ.

²⁰ Bɔiden min ka kɛmɛ loolu (500) sɔlɔn, wo ka na kɛmɛ loolu (500) gbɛlɛ le, k'a la aa wɔli kɔkan, a vɛɛ: ‹Ǹ kuntii, i na sanu gbana kɛmɛ loolu (500) le tola m̀ bolo. A ye, m̀'ɛ kɛmɛ loolu gbɛlɛ (500) tɔnɔ sɔlɔn a kɔkan.›

²¹ Aa kuntii vɛɛ: ‹Bɔiden sɔvɛ le i le ani lanande. I gbu n'a kɛla kobɛn! I na kɛla lanande le ko fitinin nɔ. Tandainɔ yi ne, ǹ kɛtɔ fen siyama kalifala i la. Na, i yi sawa kɛ ǹ fɛ.›

²² Bɔiden min ka sanu gbana kɛmɛ fila (200) sɔlɔn, wo ka na k'a fɔ aa kuntii yɛ, a vɛɛ: ‹Ǹ kuntii, i na sanu gbana kɛmɛ fila (200) le tola m̀ bolo. A ye, m̀'ɛ kɛmɛ fila (200) gbɛlɛ tɔnɔ sɔlɔn a kɔkan.›

²³ Aa kuntii vɛɛ: ‹Bɔiden sɔvɛ le i le ani lanande. I gbu n'a kɛla kobɛn! I na kɛla lanande le ko fitinin nɔ. Tandainɔ yi ne, ǹ kɛtɔ fen siyama kalifala i la. Na, i yi sawa kɛ ǹ fɛ.›

²⁴ Wo kɔ, bɔiden min ka sanu gbana kɛmɛ (100) sɔlɔn, wo ka na k'a fɔ aa kuntii yɛ, a vɛɛ: ‹Ǹ kuntii, ǹ tɛɛ k'a lɔn ko iya ko gbeleyayine. I yi malo kalila, i ma min sɛnɛ. I do ma sɛnɛfensi falin tɛɛminja, i yi sɛnɛfennu ladɛnna wo le ja.

²⁵ Komi ǹ tɛɛ siyanna i ɲa, wo le n'a kɛla, ǹ na taala ka diɲa sen k'iya wɔli doon je. A ye, iya wɔli le ne.›

²⁶ Aa kuntii do vɛɛ a yɛ: ‹Ile bɔiden kɛwon saakɔlɔ! Jalasa i tɛɛ k'a lɔn ǹ'i malo kalila, m̀ ma min sɛnɛ, kɛlɛ?

²⁷ Wo lɔ, i tɛɛ ka kan ka taa ǹa wɔli bila wɔlilamalabon na, fɔsa ǹ tɛɛ tɔnɔ sɔlɔn a la ǹ nanin min tɛ yi ne!›

²⁸ Wo kɛ, kuntii vɛɛ aa mɔɔlu yɛ: ‹Ài yi sanu gbana kɛmɛ (100) wo mina a la, k'a di sanu gbana waa kelen (1 000) tii ma.

²⁹ Kamasɔlɔn ni fen ka kɛ mɔɔ min bolo, a dɔ latɔ wo tii ma ta kɔkan ka siyaya. Kɛɛ ni fen ma kɛ mɔɔ min bolo, hali minni y'a bolo, wo minatɔle a la.

³⁰ Ài yi bɔiden kolon wo lafili divi lɔ banama, a do kasitɔ k'a ɲii sii i ɲɔɔ na dimin bolo je.› »

Kititɛɛlon

³¹ «Mɔɔnivin Tanin vɛ nala aa magbiliyali lɔ lon min na, mɛlɛka bɛ vɛ a fɛ, a siitɔ aa masayasiifen nɔɔlɔnin nɔ.

³² Wo lon, dunuɲamɔɔlu bɛ ladɛntɔ a ɲakɔlɔ. A kɛtɔ ai wotɛbɔla i ɲɔɔ na, iwo kolofenkunnasiiba yi saa ni bani wotɛbɔla teme.

³³ A kɛtɔ saalu bilala a bolokini fannɔ, ani ka banilu bila a bolonunma fannɔ.

³⁴ Wo kɔ, Masakɛ kɛtɔ a fɔla a bolokininɔ talu yɛ, a vɛɛ: ‹Ǹ Fa ya duwawudennu, ài yi na, ài yi don ǹ Fa ya masaya lɔ, min lɔbɛnnin tɛɛ ài yɛ ka ta dunuɲa dan waate ma.

³⁵ Kamasɔlɔn ài na ǹ kɔɔntɔ yena mingɛ, ài ka m̀ balo. Ài na jilɔɔ yena ǹ na mingɛ, ài ka ji di m̀ ma. Ài na ǹ yena mingɛ lonaya lɔ, ài ka ǹ jiya.

³⁶ Ài na ǹ falimakolon yena mingɛ, ài ka ǹ feeyabɔ. Ǹ jangalotɔ tɛɛ mingɛ, ài k'ài jando ǹ nɔ. Ǹ tɛɛ kaso la mingɛ, ài ka na ka ǹ fo.›

³⁷ Wo lɔ, mɔɔ telenninu kɛtɔ a fɔla ǹ yɛ, ai vɛɛ: ‹Mɔ Tii, mɔ n'i kɔɔntɔ yena lon mindɛ k'i balo? Mɔ n'i yena jilɔɔ y'i la lon mindɛ ka ji di i ma?

³⁸ Mɔ n'i yena lonaya lɔ lon mindɛ, k'i jiya? Niwotɛ, mɔ n'i falimakolon yena lon mindɛ, mɔ k'i feeyabɔ?

³⁹ Mɔ n'i jangalotɔ yena lon mindɛ, niwotɛ k'i ye kaso la ka taa i fo?›

⁴⁰ Wo kɔ, Masakɛ kɛtɔ ai javila, a vɛɛ: ‹Ǹ'i tuɲa fɔ ài yɛ, ni ài ka kokein kɛ m̀ badenma bɛ lɔ dɔɔmaninda dɔ yɛ, ài na wo kɛla ǹe gbugbu le yɛ.›

⁴¹ «Wo kɔ, a kɛtɔ a fɔla a bolonunmalɔ talu yɛ, a vɛɛ: ‹Àilu daantɔlu, ài yi bɔ ǹ ɲakɔlɔ ka taa taa banbali lɔ, min lɔbɛnnin Soitana ni aa mɛlɛkalu yɛ.

⁴² Kamasɔlɔn ài na ǹ kɔɔntɔ yena mingɛ, ài ma balo di m̀ ma. Ài na jilɔɔ yena ǹ na mingɛ, ài ma ji di m̀ ma.

⁴³ Ài na ǹ yena mingɛ lonaya lɔ, ài ma ǹ jiya. Ài na ǹ falimakolon yena mingɛ, ài ma ǹ feeyabɔ. Ǹ tɛɛ jangalo lɔ mingɛ, ani kaso la, ài ma na ka ǹ fo.›

⁴⁴ Mɔɔ wolu fana kɛtɔ a fɔla ǹ yɛ, ai vɛɛ: ‹Mɔ Tii, mɔ n'i kɔɔntɔ yena lon mindɛ, niwotɛ i jilɔɔtɔ, niwotɛ i lonayatɔ, niwotɛ i falimakolon, niwotɛ i jangalotɔ, niwotɛ i kasodentɔ, k'a fɔ ko mɔ ma i madɛmɛn?›

⁴⁵ Wo kɔ, ǹ kɛtɔ ai javila, ǹ ko: ‹Ǹ'i tuɲa fɔ ài yɛ, ài ma ko min kɛ ǹa mɔɔ bɛ lɔ dɔɔmaninda dɔ yɛ, ài n'i banna wo kɛla ǹe le yɛ.›

⁴⁶ Mɔɔ wolu do taatɔ jangata banbali lɔ, kɛɛ mɔɔ telenninu taatɔ niimaya banbali le lɔ.»