Matiyu 24 - Ala Ya Salatikan Kula Kitabu

Lɔhɔlɔmabonba teko

¹ Isa bɔtɔla lɔhɔlɔmabonba luu kɔnɔ, a kɔbiladennu k'i madon a la k'a fɔ a yɛ ko a yi lɔhɔlɔmabonba jiinkɔnɔ bonnu lasaa.

² Isa k'ai javi, a vɛɛ: «Jalasa ài ɲa yi fen minu bɛ la yi ne, kɛlɛ? Ǹ'i tuɲa fɔ ài yɛ, lon dɔ wolu bɛ tetɔle tɛtɛ, hali kawakulun fila gbu tɛnala tola i ɲɔɔ kɔkan.»

Dunuɲa laban tɔɔmaselu

³ Isa siinin ka to Zeituna tini kɔkan, a kɔbiladennu ka na a ma ai ta fan k'a maɲininga, ai vɛɛ: «A fɔ mɔ yɛ, ko wolu kɛtɔ waate mindɛ? Tɔɔmase mindɛ kɛtɔ i na waate jiyala, ani dunuɲa laban waate?»

⁴ Isa k'ai javi, a vɛɛ: «Ài y'ài jando ài jɛlɛ lɔ fɔsa mɔɔ suu suu kana ài lafili.

⁵ Kamasɔlɔn mɔɔ siyama kɛtɔ nala ǹ tɔɔ lɔ k'a fɔ ko: ‹Ǹe le Masa Tɔɔmasenin ne.› Ai kɛtɔ mɔɔ siyama lafilila wo lɔ.

⁶ Ài vɛ kɛlɛkolu mɛnna, ani kɛlɛ mangan, ài hangili kà ɲaami, kamasɔlɔn wolu ka kan ka kɛ, kɛɛ wo tɛ dunuɲa laban ne.»

⁷ Sibolomalu wulitɔ i ɲɔɔ kanma. Jamanalu fana wulitɔ i ɲɔɔ kanma. Kɔɔn fitina ni duukolojaajaa kɛtɔ dingila siyama lɔ.

⁸ Wo bɛ kɛtɔ tɔlɔya damina le le, iwo tinkɔnɔdimin.

⁹ «Wo timinnin kɔ, mɔɔlu kɛtɔ ài donna mɔɔlu bolo, fɔsa ai y'ài jangata k'ài faa. Ài gbeyatɔ dunuɲa siboloma bɛ yɛ ka bɛn ǹa ko ma.

¹⁰ Mɔɔ siyama kɛtɔ limaniya siya bilala, k'i ɲɔɔ don mɔɔlu bolo, ani k'i ɲɔɔ lagbeyaɲɛ.

¹¹ Faɲafɔ kela siyama wulitɔ ka mɔɔ siyama lafili.

¹² Ado ka bɛn koyon wala jate ma, mɔɔ siyama ya kanundeya dɔɔyatɔ.

¹³ Kɛɛ ni mɔɔ min ka gbeleya mina a ma ka sii tɔlɔya laban na, wo tii yi kisile.

¹⁴ Samakan Kein min ka bɛn haijɛnɛ masaya ma, wo lasentɔ dunuɲa fan bɛ lɔ ka kɛ seleya le siboloma bɛ yɛ. Wo vɛ kɛla, dunuɲa laban yi sene vɛ.

Tiɲalikɛba kɔsɔnin

¹⁵ «Kela Daniyɛli na tiɲalikɛba kɔsɔnin min ya ko fɔla, ài vɛ wo yena lɔnin lɔhɔlɔma dingila lɔ (sɛvɛ min kalanba y'a lɔja ka min ɲaye),

¹⁶ wo vɛ kɛla, mɔɔ minu yi Jude koovi lɔ, wolu yi bɔli ka taa tinima dingilalu lɔ.

¹⁷ Ni waate wo ka mɔɔ min talan bon kɔkan, wo tii kà jii bon kɔnɔ a bolofennu tako lɔ.

¹⁸ Ni wo do ka mɔɔ min talan sɛnɛ lɔ, wo tii kà seikɔ aa faaniba tako lɔ.

¹⁹ Wo lonnu vɛ sena, gbalo kɛtɔ kɔnɔma ni dematiikulalu yɛ.

²⁰ Ài yi Ala dali ko àiya bɔli waate kana bɛn nɛnɛbɔ waate ma, niwotɛ Nɔningɛlon.

²¹ Kamasɔlɔn wo waate tɔlɔya gbeleyatɔle bubale. Wo ɲɔɔzii ma kɛ ba bene ka ta dunuɲa dan waate ma haan fɔɔ ka na sii bi la, ado tɔlɔya wo ɲɔɔzii tɛnala kɛla butu tuun.

²² Ni Ala tɛɛ ma wo tɔlɔya waate lɔsulunya, adamaden foi tɛɛ tɛnala kisila. Kɛɛ ka bɛn Ala ya mɔɔ taninnu ma, a kɛtɔ a dɔ bɔla tele wolu la.

²³ «Wo waate, ni mɔɔ dɔ k'a fɔ ài yɛ, a vɛɛ: ‹A ye, Masa Tɔɔmasenin yi jan ne!›, niwotɛ: ‹A yi jan ve!›, ài kà la wo foi la.

²⁴ Kamasɔlɔn faɲafɔ kelalu wulitɔ, ani mɔɔ minu y'a fɔla ko ailu le Masa Tɔɔmasenin ne. Ai kɛtɔ tɔɔmase ba ni kawanankolu kɛla fɔsa Ala ya mɔɔ taninnu la yi fili, ni wo ka se kɛla.

²⁵ M̀'ɛ wo bɛ fɔ ài yɛ jani a waate yi se.

²⁶ «Wo le y'a kɛla, ni mɔɔlu k'a fɔ ài yɛ ko Masa Tɔɔmasenin yi fuwa lɔ, ài kà taa je. Ni ai k'a fɔ ài yɛ ko a yi dingila madoonnin dɔ lɔ, ài kà la wo la.

²⁷ Kamasɔlɔn Mɔɔnivin Tanin nalon kɛtɔle iwo sanmɛnɛn yi bɔla teme telebɔ fannɔ ka se teleben fannɔ.

²⁸ Ni soo su ka kɛ tɛɛ o tɛɛ lɔ, duwalu y'ai ladɛnna wo le ja.»

Mɔɔnivin Tanin nalon

²⁹ «Wo waate tɔlɔya vɛ timinna feeya, tele fintɔ, ani kalo tɛnala gbɛla butu. Lolonilu benbentɔ ka bɔ sangbolo lɔ, ado sangbololɔ fangatiilu lamaamaatɔ.

³⁰ Wo vɛ kɛla, Mɔɔnivin Tanin ya tɔɔmase kɛtɔ bɔla gbɛ la sangbolo lɔ. Ado dunuɲa siboloma bɛ kɛtɔ ai josomakasila, ai vɛ Mɔɔnivin Tanin natɔla yena sanbiliya lɔ seetiiya ni magbiliyali ba boloma.

³¹ Wo kɔ, a kɛtɔ aa mɛlɛkalu lataala dunuɲa tongun naani bɛ la buulufɛkan ba le. Ka damina dunuɲa kun ma ka taa sii a juu la, aa mɛlɛkalu kɛtɔ aa mɔɔ taninnu ladɛnna.»

Toloju misali

³² «Ài yi hangili sɔlɔn ka bɛn toloju misali ma. Ài v'a bolo kula ni a bulu nɛlennu yena, ài y'a lɔn ko telema ma vɛ sulunya.

³³ Wo boloɲa kelen ma, ni ài ka ko wolu bɛ ye kɛla, ài y'a lɔn ko ǹ na waate ma vɛ sulunya, a do vɛ to dɔni, a yi se.

³⁴ Ǹ'i tuɲa fɔ ài yɛ, bi mɔɔlu bɛ tɛnala banna sala, fɔ ko wolu bɛ vɛ kɛla ka dafa.

³⁵ Sangbolo ni duukolo tununtɔle, kɛɛ ǹ kumakannu tɛnala tununna tuun!»

Mɔɔ ma dunuɲa laban waate lɔn

³⁶ «Ko minu kɛtɔ lon min na ani waate min nɔ, mɔɔ suu suu ma wo lɔn, hali mɛlɛkalu gbu minu yi haijɛnɛ. Hali Denkɛ gbu m'a lɔn, mafɔ mɔ Fa Ala kelenpesa.

³⁷ Mɔɔnivin Tanin nalon kɛtɔle iwo kolu ka kɛ teme Sedina Nuho tele lɔ.

³⁸ Kamasɔlɔn wo lonnu lɔ, jani ji ba tɛɛ na, mɔɔlu tɛɛ dɔnni kɛla k'i min, ani ka fulusili ni kɔɲɛmalɔ kɛ. Ai ka to wo bɛ la haan fɔɔ Sedina Nuho ka don kulunba kɔnɔ lon min na.

³⁹ Ai do ma sovi foi la haan fɔɔ ji ba ka na k'ai bɛ latunun. Mɔɔnivin Tanin nalon fana kɛtɔ ten ne.

⁴⁰ Wo lon, kɛ́ fila kɛtɔ sɛnɛ lɔ, a kelen minatɔ k'a dɔ to je.

⁴¹ Moso fila kɛtɔ kɛla malo tuula, a kelen minatɔ k'a dɔ to je.

⁴² Wo le y'a kɛla, fɔ ài yi to ài ɲana, kamasɔlɔn ài Tii natɔ lon min na, ài m'a lɔn.

⁴³ Ài yi ko min ɲaye: Ni bontii tɛɛ v'a lɔnna ko son natɔ waate min nɔ, a tɛɛ tole a ɲana. A tɛɛ tɛ diɲa son yi don aa bon na.

⁴⁴ Wo lɔ, àilu fana lɔbɛnnin yi to, kamasɔlɔn Mɔɔnivin Tanin natɔ waate dɔ lɔ, ài jii tɛ waate min ma.

⁴⁵ «Jene yi bɔiden sɔvɛ le ani hangilima, aa kuntii kɛtɔ min lasiila bɔiden tɔlu kunna, fɔsa a yi balo di ai ma a waate bɛlɛ lɔ?

⁴⁶ Ni bɔiden wo ya kuntii ka na ka a talan baale la, a kɛtɔ duwawuden ne le.

⁴⁷ Ǹ'i tuɲa fɔ ài yɛ, aa kuntii kɛtɔ ale le kɛla a bolofennu bɛ kunnasiiba le.

⁴⁸ Kɛɛ do, ni wo tii vɛ kɛla mɔɔ yon ne, tumadɔ a kɛtɔ a milila, a vɛɛ: ‹Ǹ kuntii vɛ mɛn, a tɛ nala jona.›

⁴⁹ Wo lɔ, a v'a bɔidenɲɔɔlu gbasila, ka taa a jɛlɛ dadiyabɔ gbɛtɔlu fɛ.

⁵⁰ Kɛɛ bɔiden wo ya kuntii natɔ lon dɔ, a t'i milila lon min ma, a do jii tɛ waate min ma.

⁵¹ Wo do kɛtɔ a lɔtɛɛtɛɛla k'a kafon filangafolu kɔkan, a kasitɔ k'a ɲii sii i ɲɔɔ na dimin bolo je.»