Matiyu 22 - Ala Ya Salatikan Kula Kitabu

Fulusili tolon ma sana

¹ Isa ka sana dɔ la ai yɛ kɔtunun, a vɛɛ:

² «Haijɛnɛ masaya kɛyine iwo masakɛ min na dɔnni ba lɔbɛnna ka bɛn a denkɛ ya fulusili ma.

³ Mɔɔ minu kilinin tɛɛ fulusiliya lɔ, masakɛ ka aa bɔidennu lataa wolu kɔ, kɛɛ ai do k'i ban nako ma.

⁴ Wo kɛ, masakɛ ka bɔiden gbɛlɛlu lataa kɔtunun. A vɛɛ ai yɛ: ‹Ài y'a fɔ mɔɔ kilinilu yɛ ko m̀'ɛ tiili ba kɛ. M̀'ɛ ǹa tolalu faa, ani ǹa nisi bolan nɔɔlɔnilu. Fen bɛ lɔ vɛ bɛn. Wo ma, ai yi na fulusiliya lɔ.›

⁵ Kɛɛ ai suu suu ma masakɛ ya kililikan ta foi le. A dɔ vɛ bɔla ka taa aa sɛnɛ lɔ. A dɔ fana vɛ bɔla ka taa aa julayakɛya lɔ.

⁶ A tɔlu vɛ masakɛ ya bɔidennu minala k'ai tɔlɔya bubale, ka ban k'ai faa.

⁷ Mɔnɛya boloma, masakɛ ka aa sɔdasilu lataa mɔɔfaaba wolu kanma, k'ai bɛ faa, ka ban k'aiya so ɲɛnin.

⁸ Wo kɔ, masakɛ vɛɛ aa bɔidennu yɛ: ‹Fulusili dɔnni lɔ vɛ bɛn, kɛɛ mɔɔ kilininnu ni dɔnni min kaannin tɛɛ tɛ.

⁹ Wo lɔ, ài yi taa mɔɔ ɲininya lɔ siyabalu la. Ài vɛ mɔɔ suu suu yena, ài y'ai bɛ kili ko ai yi na fulusiliya lɔ.›

¹⁰ Wo fɔ, bɔidennu v'i wulila ka taa so kɔnɔ. Ai na mɔɔ minu yena je, ai ka wolu bɛ kili fulusiliya lɔ, mɔɔ yon ni mɔɔ ɲumalu bɛ. Wo le k'a kɛ, fulusilibon la ka fa mɔɔ kilininnu le.

¹¹ «Wo kɛ, masakɛ ka don fulusiliya lɔ, fɔsa a yi mɔɔ kilininnu lakɔlɔsi. A do ka kɛ́ dɔ ye je, kɔɲɛmalɔ faani tɛɛ tɛ a kanna.

¹² Masakɛ do vɛɛ a yɛ: ‹Ǹ tɔva, i donnin jannɔ di, k'a talan kɔɲɛmalɔ faani t'i kanna?› Wo ma foi sɔlɔn k'a fɔ.

¹³ Wo kɛ, masakɛ vɛɛ aa bɔidennu yɛ: ‹Ài y'a sen ni a bolo sili k'a lafili divi lɔ banama, a kasitɔ k'a ɲii sii i ɲɔɔ na dimin bolo je.› »

¹⁴ Isa ka kuma wo laban, a vɛɛ: «Mɔɔ siyama le kilinin, kɛɛ mɔɔ dana le tanin.»

Niisɔɔn salako

¹⁵ Wo kɔ, Falisilu ka bɔ je k'ai kun bilin i ɲɔɔ ma, fɔsa ai yi Isa minako ɲaɲinin a jɛlɛkanu kumakan fɛ.

¹⁶ Wo le k'a kɛ, ai k'aiya kalannaden dɔlu ni Masakɛ Helodi kɔmɔɔ dɔlu lataa a ma. Wolu do vɛɛ a yɛ: «Kalanmɔɔ, mɔ k'a lɔn ne ko tuɲande le i le. I do yi mɔɔlu kalanna ka bɛn Ala ya siya ma tuɲandeya le boloma. Mɔɔ miliya tɛ i masiyanna, kamasɔlɔn i tɛ mɔɔ bɔla mɔɔ lɔ.

¹⁷ Wo ma yi ne, i i miliya fɔ mɔ yɛ butu. Ka niisɔɔn sala Lɔmu masakɛba Sezale ma, wo ladaanyine mɔ ma, baa wo ladaannin tɛ?»

¹⁸ Kɛɛ Isa k'ai miliya yon lɔn. Wo lɔ, a vɛɛ ai yɛ: «Àilu filangafolu, mindɛ lɔ ài yi ǹ lɔsumana?

¹⁹ Niisɔɔn yi salala wɔligbana min na, ài yi wo dɔ jiya ǹ na, ǹ'a lasaa.» Ai ka wɔligbana wo kelen don a bolo mingɛ,

²⁰ a vɛɛ ai yɛ: «Jene sawula ni jene tɔɔ yi wɔligbana min kɔkan?»

²¹ Ai vɛɛ: «Sezale le.» Wo lɔ, Isa k'a fɔ ai yɛ, a vɛɛ: «Ni a yi ten ne, ài yi Sezale ta di Sezale ma, ka Ala ta di Ala ma.»

²² Wo mɛn ai bolo, ai ka kawakoya. Ai do ka Isa to je ka taa.

Sadusilu ka Isa lɔsuma teme

²³ Wo lon kelen, Sadusi dɔlu ka na Isa ma. Wolu le y'a fɔla ko fulenilu lawuliko tɛ tuɲa le. Ai do ka Isa maɲininga, ai vɛɛ:

²⁴ «Kalanmɔɔ, Nabi Musa n'a fɔla ko ni kɛ́ dɔ ka sa, a ma den to a kɔ, a dɔɔkɛ le ka kan ka kɛsamoso wo fulu, fɔsa a yi den sɔlɔn a kɔlɔkɛ yɛ.

²⁵ Wo ma, badenmakɛ wolowulan tɛɛ mɔ fɛlɔ jan. Kɔlɔmanda ka moso dɔ fulu. A do ka sa, a ma den to a kɔ. Wo kɛ, a dɔɔkɛ k'a moso wo ta.

²⁶ Wo suu kelen ka kɛ badenmakɛ filana la, ani a sawana, haan fɔɔ a wolowulanna.

²⁷ Wolu bɛ sa kɔ, moso fana ka sa.

²⁸ A yi di wo lɔ? Fulenilu Lawulilon, moso wo kɛtɔ a jene ta le badenma wolowulan wolu lɔ? Kamasɔlɔn a n'i siila ai kelenkelenna bɛ kun.»

²⁹ Isa k'ai javi, a vɛɛ: «Ài filinin, kamasɔlɔn ài ma kitabulu kɔlɔ ɲaye, kumatɛ Ala ya foniseleya ma.

³⁰ Kamasɔlɔn Fulenilu Lawulilon, kɛ́ tɛnala moso fulula, moso fana tɛnala dila fulu boloma, mafɔ ai bɛ kɛtɔle iwo mɛlɛka minu yi haijɛnɛ.

³¹ Fulenilu lawuliko koni, Ala ka min fɔ ài yɛ kitabu kɔnɔ, jalasa ài ma wo kalan ba?

³² A vɛɛ: ‹Ǹe le Ala le min yi batola Ibulahima ni Isiyaka ani Janguba bolo.› Wo kɔlɔ le ko niimalu le Ala batola, fulenilu tɛ.»

³³ Wo mɛn jama bolo, ai ka kawakoya aa kalan na.

Seliya bɛ lɔ bubata

³⁴ Falisilu k'a mɛn mingɛ ko Isa vɛ Sadusilu lajeden, ai k'ai ladɛn.

³⁵ Ai lɔ mɔɔ kelen min tɛɛ seliya kalanmɔɔ le, wo ka ɲiningali kɛ Isa la a lɔsumanko lɔ. A do vɛɛ:

³⁶ «Kalanmɔɔ, seliyalu bɛ lɔ bubata y'a mindɛ le?»

³⁷ Isa vɛɛ a yɛ: « ‹I i Tii Ala kanu i josokun bɛ la, ani i nii bɛ, ani i miliya bɛ.›

³⁸ Wo le seliya kunfɔlɔ le ani a bɛ lɔ bubata.

³⁹ A filana yi wo ɲɔɔzii le le, ko: ‹I i siiɲɔɔ kanu iwo ile gbu.›

⁴⁰ Nabi Musa ya Taulati ani kela dɔgbɛlɛlu ya kitabulu bɛ jusiinin seliya fila wolu le kɔkan.»

Dawuda Tii le Masa Tɔɔmasenin ne

⁴¹ Falisilu ladɛnnin ka to, Isa ka ɲiningali kɛ ai la,

⁴² a vɛɛ: «Ài miliya yi di ka bɛn Masa Tɔɔmasenin ya ko ma? Jene bɔzɔn y'a le?» Ai ka Isa javi, ai vɛɛ: «Dawuda bɔzɔn ne.»

⁴³ Isa do vɛɛ ai yɛ: «Ni wo le, mindɛ lɔ Dawuda ka kuma Ala Nii sabu la k'a fɔ a ma ko a Tii? Kamasɔlɔn Dawuda k'a fɔ, a vɛɛ:

⁴⁴ ‹Mɔ Tii n'a fɔla ǹ Tii yɛ, a vɛɛ: «Na i sii m̀ bolokini fannɔ, haan fɔɔ m̀'ɛ banna i juulu lala i sen kɔlɔ.» ›

⁴⁵ Ni Dawuda gbu y'a fɔla wo tii ma ko a Tii, wo yi se kɛla a bɔzɔn ne di wo lɔ?»

⁴⁶ Mɔɔ ma se Isa javila kuma kelen gbu le, ado ka ta wo lon ma, mɔɔ foi m'a wakali ka Isa maɲininga butu.