Matiyu 20 - Ala Ya Salatikan Kula Kitabu

Gbeletii ni aa baaledennu ma sana

¹ «Haijɛnɛ masaya ko kɛyine iwo gbeletii dɔ min ka bɔ sɔɔmadala ka taa baaleden ɲininya lɔ.

² Ale ni baaledennu ka bɛn a ma mingɛ ko tele kelen sala yi wɔligbɛ gbana kelen ne le, a k'ai lataa gbele lɔ.

³ Siintele waate, gbeletii ka bɔ kɔtunun ka taa mɔɔ dɔlu lɔnin ye lɔɔfɛ lɔ. Ai do tɛɛ tɛ foi la.

⁴ A do vɛɛ wolu yɛ: ‹Àilu fana yi taa ǹa gbele lɔ. Ǹ kɛtɔ sala bɛlɛ dila ài ma.›

⁵ Mɔɔ wolu ka taa gbele lɔ. Tele latelen waate, gbeletii ka bɔ ka taa wo ɲɔɔzii kɛ. Wuladafɛ, a ka bɔ ka taa wo suu kɛ kɔtunun.

⁶ Wulala, gbeletii ka taa mɔɔ dɔlu lɔnin ye. A vɛɛ ai yɛ: ‹Mindɛ kɛnin ài telennin lɔnin jan, ài tɛ foi la?›

⁷ Ai do vɛɛ a yɛ: ‹Mɔɔ ma mɔ ta baaleko lɔ.› Wo lɔ, gbeletii vɛɛ ai yɛ: ‹Àilu fana yi taa baalekɛya lɔ ǹa gbele lɔ.›

⁸ «Teleben waate, gbeletii k'a fɔ baaleden kuntii yɛ, a vɛɛ: ‹I yi baaledennu kili k'ai sala di ai ma, ka damina mɔɔ labannu ma ka na sii mɔɔ kunfɔlɔlu la.›

⁹ Mɔɔ minu ka na baalekɛya lɔ wulala, wolu ka na ka wɔligbɛ gbana kelen kelen ne sɔlɔn.

¹⁰ Wo lɔ, mɔɔ kunfɔlɔlu ka na mingɛ, ai jii tɛɛ a ma le ko ai sala walatɔ, kɛɛ ai bɛ ka wɔligbɛ gbana kelen kelen ne sɔlɔn.

¹¹ Ai salanin kɔ, ai vɛ gbeletii makumala,

¹² ai vɛɛ: ‹Kɛ́ minu nanin mɔ kɔ, wolu na lɛlɛ kelen baale le kɛla dein. Ǹu do teleyine jan mɔlɔtɔtɔ tele gba kɔlɔ. Mindɛ lɔ i na mɔ bɛ sala lɔkaɲala?›

¹³ Gbeletii k'ai lɔ mɔɔ kelen javi, a vɛɛ: ‹Ǹ tɔva, m̀ m'i tɔɲɔ dɛ! Jalasa mɔ ma bɛn wɔligbɛ gbana kelen ne ma?

¹⁴ I i sala mina, i yi taa. Mɔɔ minu nanin àilu kɔ, ǹ'a fɛ ka wɔligbɛ gbana kelen di wolu ma, iwo ǹ n'a dila i ma teme.

¹⁵ A yi di? Jo tɛ m̀ bolo ka ǹ sawonanko kɛ m̀ bolofen nɔ? Niwotɛ, ǹ na koɲuma min kɛla m̀ bolofen na, wo ɲangbeya le i la?› »

¹⁶ Isa vɛɛ kɔtunun: «Wo le kɛtɔ a kɛla, kɔfɛmɔɔlu kɛtɔ ɲafɛmɔɔlu le le, ani ɲafɛmɔɔlu kɛtɔ kɔfɛmɔɔlu le le.»

Isa ka aa saya ni a wuliko fɔ kɔtunun

¹⁷ Isa jɛlɛtɔla Jelusalɛmu, a ka aa keladen mɔɔ tan ni fila (12) kili ai ta fan. A do vɛɛ ai yɛ:

¹⁸ «Ài y'ài tolomalɔ! Mɔ jɛlɛtɔle ne Jelusalɛmu. Ai kɛtɔ Mɔɔnivin Tanin donna salakalase kuntiibalu ni seliya kalanmɔɔlu bolo. Wolu kɛtɔ kiti bilala a la a faako lɔ,

¹⁹ ani ka a don siboloma gbɛlɛ mɔɔlu bolo fɔsa ai y'a lafeya, k'a gbasi gbusan ne, ani k'a gbaan kɔlɔman ma. Kɛɛ tele fila a sawana, a wulitɔ ka bɔ saya lɔ.»

Zebede moso ka Isa madiya teme

²⁰ Wo kɔ, Zebede moso k'i madon Isa la a denkɛ fila le. A k'i majii a kɔlɔ ka ko dɔ dali a la.

²¹ Isa do vɛɛ a yɛ: «Ài y'a fɛ ǹ'i mindɛ kɛ ài yɛ?» Moso ka Isa javi, a vɛɛ: «I vɛ kɛla iya masaya lɔ lon min na, i yi diɲa ǹ denkɛ fila minu i sii i dafɛ: a kelen y'i sii i bolokini fannɔ, a tɔ kelen y'i sii i bolonunma fannɔ.»

²² Kɛɛ Isa do vɛɛ ai yɛ: «Ài m'a lɔn ài min dalila ǹ na. Ǹe lamintɔ jiyafɛ min nɔ, ài yi sene ài minna wo lɔ?» Ai do k'a javi, ai vɛɛ: «Aan, m'i sene.»

²³ Isa do vɛɛ ai yɛ: «Tuɲa le, ài lamintɔ ǹa jiyafɛ wo lɔ, kɛɛ siiya minu yi m̀ bolokini ni m̀ bolonunma fannɔ, wolu diba tɛ ǹe le. Ǹ Fa na siiya wolu lɔbɛnna mɔɔ minu yɛ, a kɛtɔ ai dila wolu le ma.»

²⁴ Keladen tɔ tan ka ko wo mɛn mingɛ, ai ka mɔnɛ badenma fila wolu ma.

²⁵ Kɛɛ Isa k'ai kili k'a fɔ ai yɛ, a vɛɛ: «Ài k'a lɔn ne siboloma gbɛlɛ masakɛlu yi kuntiiya kɛla aiya jamanadennu kunna diyanigbeya boloma, ani aiya ɲamɔɔlu yi fanga lala ai kɔkan.

²⁶ Kɛɛ a do man kan ka kɛ ten ài tɛma. Mafɔ, mɔɔ min y'a fɛ ka kɛ mɔɔba le ài lɔ, fɔ wo tii yi kɛ àiya bɔiden ne le.

²⁷ Mɔɔ min do a fɛ ka kɛ ɲamɔɔ le ài lɔ, fɔ wo tii yi kɛ àiya jɔn ne le.

²⁸ Wo boloɲa kelen ma, Mɔɔnivin Tanin gbu ma na fɔsa mɔɔlu yi kɛ aa bɔiden ne, mafɔ ale yi kɛ aiya bɔiden ne le, ani ka a nunakili di ka kɛ mɔɔ siyama kunmaka sala le.»

Isa ka ɲagbɛ fila ɲa laka teme

²⁹ Isa nu bɔtɔla Jɛliko so kɔnɔ, jama ba ka bila a kɔ.

³⁰ Wo k'a talan, ɲagbɛ kɛ́ fila siinin tɛɛ siya dala. Ai k'a mɛn mingɛ ko Isa le yi timinna, ai vɛ gbanɔla, ai vɛɛ: «Kuntii! Dawuda Bɔzɔn! Hena mɔ la!»

³¹ Jama k'ai makuma ko ai yi jeden. Kɛɛ ai k'a dɔ la aiya gbanɔ kɔkan, ai vɛɛ: «Kuntii! Dawuda Bɔzɔn! Hena mɔ la!»

³² Isa k'i lɔ k'ai kili. A vɛɛ ai yɛ: «Ài y'a fɛ ǹ'i mindɛ kɛ ài yɛ?»

³³ Ai vɛɛ: «Mɔ Kuntii, m'a fɛ mɔ ɲa la yi ka.»

³⁴ Henandeya boloma, Isa k'a bolo tuu ai ɲalu la, ado ai ɲalu la ka ka telemanin. Wo kɛ, ai vɛ bilala Isa kɔ.