Matiyu 19 - Ala Ya Salatikan Kula Kitabu

Kawanili ka bɛn fulusako ma

¹ Isa wɔlinin wo fɔla, a ka bɔ Galile ka taa Jude fan dɔ lɔ min yi Julidɛn kɔɔ kɔma.

² Jama ba ka bila a kɔ, a do ka jangalotɔlu lakɛnɛya je.

³ Falisi dɔlu ka na Isa ma a lɔsumanko lɔ, ai vɛɛ: «A ladaanyine kɛ́ y'a moso bila ko bɛ lɔ?»

⁴ Isa k'ai javi, a vɛɛ: «Min sɛvɛnin kitabu kɔnɔ, ài ma wo kalan? A sɛvɛnin ko dunuɲa dan waate lɔ, Dannimasa ka kɛ́ ni moso dan, ka ban

⁵ k'a fɔ, a vɛɛ: ‹Wo le y'a ma, kɛ́ bɔtɔle a fa ni a ba fɛ, ka ale ni a moso dɛn, fɔsa ai mɔɔ fila yi kɛ falikolo kelen ne.›

⁶ Ai tɛ jatela mɔɔ fila le butu, mafɔ falikolo kelen. Wo ma, Ala na minu ladɛnna k'ai kɛ kelen ne, mɔɔ suu suu kà wolu falan i ɲɔɔ ma.»

⁷ Falisilu vɛɛ Isa yɛ kɔtunun: «Ni wo le, Nabi Musa na jamali dila mindɛ lɔ ko kɛ́ yi fulusa sɛvɛ di a moso ma, jani a a bila?»

⁸ Isa k'ai javi, a vɛɛ: «Nabi Musa na diɲala ko ài y'ài mosolu bila ka bɛn àiya josokunja le ma. Niwotɛ, a damina lɔ a tɛɛ tɛ ten.

⁹ Kɛɛ ǹ'a fɔ ài yɛ, ni mɔɔ min k'a moso bila ka moso gbɛlɛ ta, k'a talan a moso kunfɔlɔ wo tɛɛ ma jalonya kɛ, wo tii vɛ jalonya kɛ.»

¹⁰ Wo fɔ Isa bolo, a kɔbiladennu vɛɛ a yɛ: «Ni a yi ten ne kɛ́ ni a moso wotɛ, fulubaliya fisayanin wo lɔ feu!»

¹¹ Isa k'ai javi, a vɛɛ: «Mɔɔ bɛ tɛ se diɲala kuma wo ma, mafɔ Ala na a see dila minu ma.

¹² Sabu siyama le yi mɔɔlu bilala fulubaliya lɔ: a dɔlu sɔlɔnnin ten ne, a dɔlu fana ta yi adamadennu nɔ le le, a dɔgbɛlɛlu tɛ fulu kɛla ka bɛn haijɛnɛ masaya ko le ma. Ni mɔɔ min yi se diɲala min ma, wo tii yi diɲa a ma.»

Isa ka duwawu kɛ dennilu yɛ teme

¹³ Wo kɔ, mɔɔ dɔlu vɛ nala dennilu le Isa fɛ, fɔsa a a bolo la ai kɔkan ka duwawu kɛ ai yɛ, kɛɛ a kɔbiladennu ka mɔɔ wolu makuma.

¹⁴ Isa do vɛɛ ai yɛ: «Ài y'a to dennilu yi na m̀ ma. Ài kà ai dansii, kamasɔlɔn mɔɔ minu kɛnin iwo denni, wolu fɛ yi haijɛnɛ masaya la.»

¹⁵ Wo fɔ, a k'a bolo la dennilu kɔkan, ka duwawu kɛ ai yɛ, ka ban ka bɔ je.

Kɛ́ nafolotii ya ko

¹⁶ Lon dɔ, kɛ́ dɔ ka na Isa ma k'a maɲininga, a vɛɛ: «Kalanmɔɔ, ǹ ka kan ka koɲuma mindɛ le kɛ fɔsa ǹ'i niimaya banbali sɔlɔn?»

¹⁷ Isa vɛɛ a yɛ: «Mindɛ y'a kɛla vɛ i yi m̀ maɲiningala ka bɛn koɲuma ko ma? Ala kelenpesa le ɲumayanin. Ni i y'a fɛ ka niimaya banbali sɔlɔn, i yi Ala ya seliyalu labato.»

¹⁸ Kɛ́ vɛɛ: «Seliya mindɛlu?» Isa k'a javi, a vɛɛ: «I kà mɔɔ faa, i kà jalonya kɛ, i kà suɲali kɛ, i kà faɲafɔ seleya di,

¹⁹ i i fa ni i ba buɲa, ani i i siiɲɔɔ kanu iwo ile gbu.»

²⁰ Kavelen do vɛɛ a yɛ: «M̀'ɛ seliya wolu bɛ labato. Kɛɛ ǹ dɛsɛnin mindɛ la bene?»

²¹ Isa k'a javi, a vɛɛ: «Ni i y'a fɛ iya ko bɛ da yi fa, i yi taa i bolofennu fele k'a wɔli lɔtala bolokolonnu wotɛ. Wo vɛ kɛla, nafolo ba kɛtɔ i bolo haijɛnɛ. Wo kɔ, i yi na, i yi bila ǹ kɔ.»

²² Kavelen ka kuma wo mɛn mingɛ, a k'i kɔsei niilafin boloma, kamasɔlɔn a bolofennu walanin tɛɛ bubale.

²³ Wo kɛnin, Isa vɛɛ a kɔbiladennu yɛ: «Ǹ'i tuɲa fɔ ài yɛ, nafolotii donko gbeleyayine haijɛnɛ masaya lɔ!

²⁴ Ǹ'a fɔ ài yɛ kɔtunun, ka ɲɔɔmɛ latimin sɛɛlan woo la, wo nɔyayine ka timin nafolotii donko la Ala ya masaya lɔ.»

²⁵ A kɔbiladennu ka wo mɛn mingɛ, ai ka kawakoya kosɛvɛ, ai vɛɛ: «Jene yi se kisila wo lɔ?»

²⁶ Wo lɔ, Isa k'i ɲa kaa ai lɔ, k'a fɔ ai yɛ, a vɛɛ: «Wo ko tɛ se kɛla adamadennu bolo, kɛɛ ko bɛ yi sene kɛla Ala bolo.»

²⁷ Wo fɔ Isa bolo, Piyɛli do vɛɛ a yɛ: «Ǹu do? Mɔ vɛ ko bɛ to je ka bila i kɔ. Mɔ kɛtɔ mindɛ sɔlɔnna wo lɔ?»

²⁸ Isa vɛɛ a yɛ: «Ǹ'i tuɲa fɔ i yɛ, dunuɲa vɛ kɛla a kula le, Mɔɔnivin Tanin siitɔ aa masayasiifen nɔɔlɔnin nɔ. Àilu minu bilanin ǹ kɔ, àilu fana siitɔ masayasiifen tan ni fila (12) lɔ ka Bani Isilankalu ya kabila tan ni fila (12) ya kiti tɛɛ.

²⁹ Ni mɔɔ min ka aa bon to a kɔ, niwotɛ a badenmalu, niwotɛ a fa, niwotɛ a ba, niwotɛ a dennu, ani aa sɛnɛlu ka bɛn ǹa ko ma, wo vɛ kɛla, wo tii kɛtɔ wo ɲɔɔzii kɛmɛ (100) sɔlɔnna, ka niimaya banbali fana sɔlɔn.

³⁰ Kɛɛ ɲafɛmɔɔ siyama kɛtɔ kɔfɛmɔɔ le le, ani kɔfɛmɔɔ siyama kɛtɔ ɲafɛmɔɔ le le.»