Matiyu 18 - Ala Ya Salatikan Kula Kitabu

Jene yi ɲamɔɔ le haijɛnɛ masaya lɔ?

¹ Wo waate lɔ, Isa kɔbiladennu ka na k'a maɲininga, ai vɛɛ: «Jene yi ɲamɔɔ le haijɛnɛ masaya lɔ?»

² Wo lɔ, Isa ka denni dɔ kili k'a lalɔ ai tɛma.

³ A vɛɛ ai yɛ: «Ǹ'i tuɲa fɔ ài yɛ, ni ài ma ài dajoo mafalin ka kɛ iwo denni, ài tɛnala donna haijɛnɛ masaya lɔ.

⁴ Ni mɔɔ mɔɔ k'a fanmajii ka kɛ iwo denni min ne, wo tii le kɛtɔ ɲamɔɔ le haijɛnɛ masaya lɔ.

⁵ Ado ni mɔɔ mɔɔ k'a bolo sii denni min ɲɔɔzii kɔlɔ ka bɛn m̀ ma, wo tii v'a bolo sii ǹe gbu kɔlɔ.»

Mɔɔlafiliko

⁶ «Ni mɔɔ mɔɔ ka kɛ sabu le ka denni minu kelen lɔ julumbu tala, minu limaniyanin m̀ ma, a tɛɛ bɛnne wo tii ma ka kawa ba sili a kanna k'a lafili kɔɔ duunba lɔ.

⁷ Gbalo yi dunuɲamɔɔlu yɛ ka bɛn lafilikolu ma! Fɔ ko wolu yi na, kɛɛ gbalo yi mɔɔ wo yɛ min vɛ kɛla ko wolu sabu le!

⁸ «Ni i bolo niwotɛ i sen k'i lɔ julumbu tala, i y'a tɛɛ a la k'a lafili. Kamasɔlɔn ni i bolokelentɔ niwotɛ i senkelentɔ ka don niimaya banbali lɔ, wo le fisayanin i ma, jani i bolofilatɔ niwotɛ i senfilatɔ la yi fili taa banbali lɔ.

⁹ Ni i ɲaden kelen k'i lɔ julumbu tala, i y'a bɔ a lɔ k'a lafili, kamasɔlɔn ni i ɲakelentɔ ka don niimaya banbali lɔ, wo le fisayanin i ma, jani i ɲafilatɔ la yi fili jahanama taa lɔ.»

Saa tununnin ma sana

¹⁰ «Ài y'alama, ài kà denni minu dɔ dɔɔya, kamasɔlɔn ǹ'a fɔ ài yɛ, aiya mɛlɛkalu lɔnin ǹ Fa ɲakɔlɔ haijɛnɛ waate bɛ.»

¹² «Ài miliya yi di? Ni saa kelen ka tunun saa kɛmɛ (100) tii ma do? A tɛ a tɔ bikɔnɔ ni kɔnɔ (99) to tini kɔkan ka taa saa tununnin ɲininya lɔ?

¹³ Ǹ'i tuɲa fɔ ài yɛ, a v'a yena, a sawatɔ a la ka timin a tɔ bikɔnɔ ni kɔnɔ (99) ya ko la, minu ma tunun a ma.

¹⁴ Wo boloɲa kelen ma, ài Fa min yi haijɛnɛ, wo t'a fɛ denni minu kelen gbu yi halaki.»

Ni i badenma ka hakɛ ta i la

¹⁵ «Ni i badenma ka hakɛ ta i la, i yi taa a ɲafɔ a yɛ, ile ni ale kelen. Ni a ka diɲa iya kuma ma, àiya badenmaya yi tole a ma.

¹⁶ Ni do a ma diɲa iya kuma ma, i yi mɔɔ kelen niwotɛ mɔɔ fila ta ka taa a fɛlɔ, fɔsa ko bɛ ɲa yi bɔ ka bɛn mɔɔ fila niwotɛ mɔɔ sawa ya seleyakan ma.

¹⁷ Ni do a k'i ban a tolomalɔla ai la, i yi wo lase limaniyajama ma. Ni do a k'i ban a tolomalɔla limaniyajama la kɔtunun, i y'a jate iwo Alalɔnbali, niwotɛ niisɔɔnminaba.

¹⁸ «Ǹ'i tuɲa fɔ ài yɛ, ài vɛ ko ko si lasilila duukolo kɔkan, wo lasilitɔle haijɛnɛ. Ài do vɛ ko ko si lafɔlinna duukolo kɔkan, wo fana lafɔlintɔle haijɛnɛ.»

¹⁹ «Ǹ'a fɔ ài yɛ fana, ni ài lɔ mɔɔ fila ka bɛn ko ko si ma ka Ala dali a la duukolo kɔkan, wo yi kɛle ài yɛ ǹ Fa Ala bolo min yi haijɛnɛ.

²⁰ Kamasɔlɔn ni mɔɔ fila niwotɛ mɔɔ sawa k'i ladɛn ǹ tɔɔ lɔ, ǹ kɛtɔ ai tɛma.»

Bɔiden henabali ma sana

²¹ Wo kɔ, Piyɛli ka na ka Isa maɲininga, a vɛɛ: «Ǹ Kuntii, ni m̀ badenma ka to hakɛ tala ǹ na, ǹ'a makoto haan fɔɔ siɲa jein? Siɲa wolowulan?»

²² Isa vɛɛ a yɛ: «Ɛnɛn, i kà dan siɲa wolowulan ma. Kɛɛ ǹ'a fɔ i yɛ, ǹ ko, i yi to wo tii makotola haan fɔɔ siɲa biwolowulan (70) siiyama wolowulan.

²³ «Kamasɔlɔn haijɛnɛ masaya ko kɛyine iwo masakɛ dɔ min tɛɛ a fɛ ka wɔliko ɲabɔ ale ni aa bɔidennu wotɛ.

²⁴ A k'i wuli wo ɲabɔla mingɛ, ai ka aa bɔiden dɔ lana a ma, aa sanu gbana waa tan (10 000) julu tɛɛ min na.

²⁵ Kɛɛ komi julu wo sala see tɛɛ tɛ bɔiden wo yɛ, wo le k'a kɛ, masakɛ k'a fɔ ko k'a fele, k'a moso ni a dennu ani a bolofen bɛ la a kɔkan, fɔsa julu wo yi sala.

²⁶ Wo fɔ masakɛ bolo, bɔiden v'i mabilinna a sen kɔlɔ k'a madiya kosɛvɛ, a vɛɛ: ‹I diɲa, i yi waate di m̀ ma. Ǹ kɛtɔ iya wɔli bɛ salala.›

²⁷ Henandeya boloma, masakɛ ka bɔiden wo bila, ka aa julu bɛ lɔkoto a yɛ.

²⁸ «Bɔiden do vɛ bɔla je ka taa bɛn a bɔidenɲɔɔ dɔ le, aa wɔligbɛ gbana kɛmɛ (100) julu tɛɛ min na. A do vɛ wo minala a kanma k'a lɔja fɔɔ ka wo nunakili matɛɛ. A vɛɛ a yɛ: ‹Ǹa julu sala!›

²⁹ A bɔidenɲɔɔ v'i mabilinna a sen kɔlɔ k'a madiya, a vɛɛ: ‹I yi diɲa, i yi waate di m̀ ma. Ǹ kɛtɔ iya wɔli salala.›

³⁰ Kɛɛ bɔiden ma diɲa feu. A ka kɛ́ mina k'a bila kaso la, ko wo tɛnala bɔla je feu ni wo ma aa julu sala.

³¹ A bɔidenɲɔɔlu ka wo ye mingɛ, ai josoma ka gba kosɛvɛ. Ai do ka taa wo bɛ ɲafɔ aiya masakɛ yɛ.

³² Wo kɛ, masakɛ ka bɔiden wo kili k'a fɔ a yɛ, a vɛɛ: ‹Ile bɔiden kɛwon! Ǹ n'iya julu bɛ lɔkotola i yɛ, kamasɔlɔn i na m̀ madiyala.

³³ Ǹ na henala i la teme, ile fana tɛɛ ka kan ka hena i bɔidenɲɔɔ la ten ne, kɛlɛ?›

³⁴ Mɔnɛ boloma, masakɛ k'a bila kaso la, ko ai y'a tɔlɔya je fɔɔ a vɛ banna aa julu bɛ salala.»

³⁵ Isa vɛɛ: «Ǹ Fa min yi haijɛnɛ, wo fana kɛtɔ wo suu le kɛla ài kelenkelenna bɛ la ni ài ma ài badenmalu makoto ài josokun bɛ la.»