Matiyu 17 - Ala Ya Salatikan Kula Kitabu

Isa kɛɲa ka jɛlɛma teme

¹ Tele wɔɔlɔ timin kɔ, Isa ka Piyɛli ni Janguba ni a dɔɔni Yohana kili ka taa ai le ai ta fan tini jaan dɔ kɔkan.

² Ai ka to je, Isa kɛɲa ka jɛlɛma ai ɲana. A ɲakɔlɔla ka mɛnɛn gbesekele iwo tele, ado aa faanilu ka gbɛ pepe iwo kɛnɛya.

³ Wo kɛ, Nabi Musa ni Nabi Iliya ka bɔ gbɛ la ai ɲakɔlɔ. Wolu ni Isa tɛɛ kumala i ɲɔɔ fɛ.

⁴ Wo ye Piyɛli bolo, a k'a fɔ Isa yɛ, a vɛɛ: «Ǹ Kuntii, a bɛnyine m'i to jan. Ni i ka diɲa, ǹ kɛtɔ gbaa sawa lɔla: i ta kelen, Nabi Musa ta kelen, ani Nabi Iliya ta kelen.»

⁵ Piyɛli ka to kumala, sanbiliya mɛnɛnnin ka na ka bilin ai kunna. Kumakan dɔ ka bɔ sanbiliya lɔ, a vɛɛ: «Ǹ diyanan Denkɛ le ne, min yi ǹ kɔnɔlɔdiyala bubale. Ài y'ài tolomalɔ a la.»

⁶ Wo mɛn Isa kɔbiladennu bolo, ai k'ai ben duu ma k'ai kun mabilin siyan boloma.

⁷ Kɛɛ Isa k'i madon ai la k'a bolo tuu ai la. A vɛɛ ai yɛ: «Ài wuli, ài kà siyan.»

⁸ Ai k'ai ɲa lawuli mingɛ, ai ma mɔɔ ye fɔ Isa kelen.

⁹ Isa nu jiitɔla tini la, a k'ai jamali, a vɛɛ: «Ài na min yena, ài kà wo fɔ mɔɔ suu suu yɛ bene, fɔ Mɔɔnivin Tanin v'i wulila ka bɔ saya lɔ.»

¹⁰ Isa kɔbiladennu k'a maɲininga, ai vɛɛ: «Mindɛ lɔ seliya kalanmɔɔlu y'a fɔla ko Nabi Iliya le ka kan ka na kunfɔlɔ le?»

¹¹ Isa k'ai javi, a vɛɛ: «Tuɲa le, Nabi Iliya ka kan ka na ka ko bɛ lɔbɛn.

¹² Ǹ'a fɔ ài yɛ, Nabi Iliya vɛ ban nala, kɛɛ mɔɔlu tɛɛ m'a lɔn, mafɔ ai k'ai sawonanko bɛ kɛ a la. Wo boloɲa kelen ma, Mɔɔnivin Tanin fana tɔlɔyatɔle ai bolo.»

¹³ A kɔbiladennu k'a ɲaye wo le lɔ ko a tɛɛ kumala ai yɛ ka bɛn Makolikɛba Yaya ya ko le ma.

Isa ka den dɔ lakɛnɛya teme, fɔlifɔli jangalo tɛɛ min na

¹⁴ Isa nu seikɔnin jama ma, kɛ́ dɔ ka na k'i majii Isa kɔlɔ, a vɛɛ:

¹⁵ «Ǹ Kuntii, hena ǹ denkɛ la, kamasɔlɔn a vɛ tɔlɔya bubale fɔlifɔli jangalo bolo. A v'a minala kotan, waate siyama lɔ a yi benna taa la, niwotɛ ji lɔ.

¹⁶ Ǹ nanin a le i kɔbiladennu fɛ, kɛɛ ai do ma se a lakɛnɛyala.»

¹⁷ Isa vɛɛ ai yɛ: «Àilu limaniyabalilu ni mɔɔ filininnu! Ǹ'i to ài tɛma k'àiya ko mina m̀ ma haan fɔɔ waate mindɛ? Na denni le ǹ fɛ jan.»

¹⁸ Isa ka jina majaman mingɛ, jina ka bɔ denni lɔ. A do ka kɛnɛya telemanin.

¹⁹ Wo kɔ, Isa kɔbiladennu ka na k'a maɲininga ai ta fan, ai vɛɛ: «Mindɛ lɔ ǹu ma se jina wo gbɛnna?»

²⁰ Isa vɛɛ ai yɛ: «Ài ma se kamasɔlɔn àiya limaniya le dɔɔyanin. Ǹ'i tuɲa fɔ ài yɛ, hali ni àiya limaniya buɲa jate ka kɛ iwo mutaadi kolo, ài yi sene a fɔla tini min yɛ ko a yi bɔ a nɔ lɔ ka taa, a do yi taale. Ài tɛnala kolila ko ko la.

²¹ [Kɛɛ jina min suu tɛ se bɔla mɔɔ lɔ, ni ài ma sun don ka Ala dali.]»

Isa ka aa saya ni a wuliko fɔ kɔtunun

²² Isa kɔbiladennu bɛ k'ai ladɛn mingɛ Galile koovi lɔ, a k'a fɔ ai yɛ, a vɛɛ: «Mɔɔnivin Tanin yi don bolo le ma mɔɔlu bolo,

²³ minu kɛtɔ a faala. Kɛɛ tele fila a sawana, a wulitɔ ka bɔ saya lɔ.» Kuma wo k'a kɔbiladennu niilafin bubale.

Lɔhɔlɔmabonba kɔnzɔn salako

²⁴ Isa ni a kɔbiladennu ka se Kapɛlɛnamu so kɔnɔ mingɛ, lɔhɔlɔmabonba kɔnzɔnminabalu k'i madon Piyɛli la k'a maɲininga, ai vɛɛ: «Jalasa àiya kalanmɔɔ tɛ lɔhɔlɔmabonba kɔnzɔn salala?»

²⁵ Piyɛli vɛɛ ai yɛ: «Aan, a a salala.» Piyɛli ka don bon na mingɛ, Isa vɛɛ a yɛ kunfɔlɔ le: «Simɔn, i miliya lɔ, dunuɲa masakɛlu yi kɔnzɔn minala jene la? Aiya jamanadennu, baa lonalu?»

²⁶ Piyɛli k'a javi, a vɛɛ: «Lonalu.» Isa vɛɛ a yɛ: «Wo lɔ saa, aiya jamanadennu sen tɛ wo lɔ.

²⁷ Kɛɛ mɔ kà mɔɔ minu ɲagba. Wo lɔ, i yi taa loifiliya lɔ kɔɔ lɔ. I vɛ jɛɛ kunfɔlɔ min minala, i yi wo da laka k'a lɔfɛlɛn. I kɛtɔ wɔligbana dɔ yena a da. Wo vɛ kɛla, i yi taa wo di ai ma, ka wo kɛ ǹu mɔɔ fila ya kɔnzɔn ne.»