Matiyu 16 - Ala Ya Salatikan Kula Kitabu

Falisilu ni Sadusilu vɛɛ ko Isa yi kawananko tɔɔmase dɔ kɛ

¹ Falisi ni Sadusi dɔlu ka na Isa ma a lɔsumanko lɔ, ko a yi kawananko tɔɔmase dɔ kɛ ai ɲakɔlɔ min bɔnin Ala fɛ.

² Isa do vɛɛ ai yɛ: «Ài vɛ sangbolo ɲa wulɛnnin yena teleben waate, ài y'a fɔla ko: ‹Bana makatɔle kobɛn sinin›.

³ Sɔɔmadala, ài vɛ sangbolo ɲala finnin yena, ài y'a fɔla ko: ‹Sanji natɔle bi, kamasɔlɔn san finnin›. Ài senin sangbolo lasaala teme k'a kɔlɔ lɔn. A yi di vɛ ài tɛ se waate min tɔɔmaselu lasaala k'ai kɔlɔ lɔn fana?

⁴ Bi mɔɔlu yi limaniyabali le le ani kɔnɔlɔgbeyamɔɔ. Ai yi kawananko tɔɔmase dɔ ɲininna, kɛɛ tɔɔmase foi tɛnala jiyala ai la mafɔ Nabi Yunusa ta.» Wo fɔ a bolo, a k'ai to je ka taa.

Falisilu ni Sadusilu ya bululafununsɛɛ

⁵ Isa kɔbiladennu ka kɔɔ tɛɛ mingɛ, ai hangili ka bila ko ai vɛ ɲina bulu kɔ.

⁶ Wo ma, Isa vɛɛ ai yɛ: «Ài y'ài jando ài jɛlɛ lɔ ka bɛn Falisilu ni Sadusilu ya bululafununsɛɛ ma.»

⁷ A kɔbiladennu do vɛɛ i ɲɔɔ yɛ: «A yi wo fɔla kamasɔlɔn mɔ ma na bulu le.»

⁸ Isa k'ai miliya lɔn mingɛ, a vɛɛ ai yɛ: «Àilu minu ya limaniya dɔɔyanin, mindɛ lɔ ài y'a fɔla i ɲɔɔ yɛ ko bulu tɛ ài bolo?

⁹ Ài m'a ɲaye ba bene? Ǹ na bulukala loolu tala mingɛ ka kɛ́ mɔɔ waa loolu (5 000) balo, ani ài na gbɔlɔ jate min lafala bulu kulunkulun tɔ la, ài hangili ma to wo lɔ?

¹⁰ Niwotɛ, ǹ na bulukala wolowulan tala mingɛ, ka kɛ́ mɔɔ waa naani (4 000) balo, ani ài na gbɔlɔ jate min lafala bulu kulunkulun tɔ la, ài hangili ma to wo lɔ?

¹¹ A kɛnin di vɛ ài m'a ɲaye ba ko ǹ kan tɛɛ tɛ bulu ma? Kɛɛ fɔ ài y'ài jando ài jɛlɛ lɔ ka bɛn Falisilu ni Sadusilu ya bululafununsɛɛ ma.»

¹² Wo kɛ, Isa kɔbiladennu k'a ɲaye ko a tɛɛ m'a fɔ ai yɛ ko ai y'ai jando ai jɛlɛ lɔ ka bɛn bululafununsɛɛ ma, mafɔ Falisilu ni Sadusilu ya kalan.

Jene gbu yi Isa le?

¹³ Isa ni a kɔbiladennu senin Sezale Filipi koovi lɔ, a k'ai maɲininga, a vɛɛ: «Mɔɔlu yi Mɔɔnivin Tanin jatela jene le?»

¹⁴ Ai k'a javi, ai vɛɛ: «A dɔlu y'a fɔla ko Makolikɛba Yaya le. A dɔlu fana y'a fɔla ko Nabi Iliya le. A dɔgbɛlɛlu y'a fɔla ko Nabi Jelemi le, niwotɛ kela kɔlɔkɔlɔ dɔgbɛlɛ.»

¹⁵ A k'ai maɲininga, a vɛɛ: «Àilu do? Ài yi ǹ jatela jene le?»

¹⁶ Simɔn Piyɛli k'a javi, a vɛɛ: «Ile le Masa Tɔɔmasenin ne, ani Ɲɛnɛmayatii Ala Denkɛ.»

¹⁷ Isa do vɛɛ a yɛ: «Yunusa denkɛ Simɔn, i yi duwawuden ne le, kamasɔlɔn i na min fɔla, mɔɔ ma wo lankɛnɛmaya i yɛ, mafɔ ǹ Fa min yi haijɛnɛ.

¹⁸ Ǹ'a fɔla i yɛ fana, ile le Piyɛli le, min kɔlɔ yi ko falakolo. Ǹ kɛtɔ ǹa limaniyajama lɔla falakolo wo le kɔkan. Hali saya tɛnala see sɔlɔnna jama wo ma.

¹⁹ Ǹ kɛtɔ koɲiilu dila i ma ka da laka mɔɔlu yɛ, fɔsa ai yi don haijɛnɛ masaya lɔ. Ni i ka ko ko si lasili duukolo kɔkan, wo lasilitɔle haijɛnɛ. Ni do i ka ko ko si lafɔlin duukolo kɔkan, wo fana lafɔlintɔle haijɛnɛ.»

²⁰ Wo fɔ Isa bolo, a k'a kɔbiladennu jamali, k'a magbeleya ko ai kà a fɔ mɔɔ suu suu yɛ ko ale le Masa Tɔɔmasenin ne.

Isa ka aa saya ni a wuliko fɔ teme

²¹ Ka ta waate wo ma, Isa tɛɛ a fɔla a kɔbiladennu yɛ k'a lagbɛ, ko a ka kan ka taa Jelusalɛmu ka tɔlɔya siyama masɔlɔn kɛmɔbalu ni salakalase kuntiibalu ani seliya kalanmɔɔlu bolo. Ko a faatɔle, kɛɛ tele fila a sawana, a wulitɔle.

²² Wo lɔ, Piyɛli k'i dɔni mataa Isa le k'a makuma damina. A do vɛɛ a yɛ: «Ǹ Kuntii, Ala y'i tanga wo ma. Wo tɛ kɛ tuun!»

²³ Kɛɛ Isa k'i kɔdon k'a fɔ Piyɛli yɛ, a vɛɛ: «Ile Soitana, bɔ ǹ kɔ! Ile ǹ sentuu sabu le le, kamasɔlɔn i t'i milila Ala sawonankolu ma, mafɔ adamadennu sawonankolu.»

²⁴ Wo kɔ, Isa k'a fɔ a kɔbiladennu yɛ, a vɛɛ: «Ni mɔɔ min y'a fɛ ka bila ǹ kɔ, fɔ wo tii i ban a jɛlɛ lɔ, ka a gbaankɔlɔman ta ka bila ǹ kɔ.

²⁵ Kamasɔlɔn ni mɔɔ mɔɔ si y'a fɛ ka a nii lakisi, wo tii bɔnɔtɔ a la. Ni do mɔɔ min ka bɔnɔ a nii la ka bɛn ǹe ma, wo tii kɛtɔ niimaya sɔlɔnna.

²⁶ Ni mɔɔ ka dunuɲa bɛ sɔlɔn ka bɔnɔ a nii la, nafa mindɛ le yi wo la? Mɔɔ yi se mindɛ dila k'i nii kunmaka?

²⁷ Kamasɔlɔn Mɔɔnivin Tanin kɛtɔ nala aa mɛlɛkalu fɛ, a Fa aa magbiliyali lɔ. Wo vɛ kɛla, a kɛtɔ mɔɔ kelenkelenna bɛ salala ka bɛn ai kɛkolu ma.

²⁸ Ǹ'i tuɲa fɔ ài yɛ, a dɔlu y'ài tɛma jan minu tɛnala saya masɔlɔnna, fɔ ai vɛ Mɔɔnivin Tanin natɔla yena aa masaya lɔ.»