Matiyu 14 - Ala Ya Salatikan Kula Kitabu

Ai ka Makolikɛba Yaya faa teme

¹ Jamanakunnasiiba Helodi ka Isa mangutu mɛn mingɛ,

² a k'a fɔ aa bɔidennu yɛ, a vɛɛ: «Makolikɛba Yaya le ve. A v'a wuli ka bɔ saya lɔ. Wo le n'a kɛla, kawananko see y'a yɛ.»

³ Helodi tɛɛ vɛ Yaya mina k'a sili k'a bila kaso la ka bɛn a dɔɔkɛ Filipe moso fuluko ma, min tɔɔ tɛɛ ko Helodiyasi.

⁴ Kamasɔlɔn Yaya tɛɛ a fɔla a yɛ, a vɛɛ: «A ladaannin tɛ moso wo yi sii i kun!»

⁵ Helodi tɛɛ a fɛ ka Yaya faa, kɛɛ a tɛɛ siyanna jama ɲa, kamasɔlɔn ai tɛɛ Yaya jatela kela le le.

⁶ Helodi sɔlɔnlon sanɲɔɔmɛn ka se mingɛ, Helodiyasi denmoso ka dɔn kɛ mɔɔlu tɛma tolonkɛya lɔ je. Wo do ka diya Helodi yɛ kosɛvɛ.

⁷ Wo lɔ, a ka lahedi ta singbilini yɛ k'i kalin ko wo vɛ kɛla fen fen si kɔ, a kɛtɔ wo dila a ma.

⁸ Singbilini ba k'a lɔsun ko a a fɔ masakɛ yɛ, ko: «Ǹ'a fɛ i yi Makolikɛba Yaya kun di m̀ ma yi ne seti lɔ.»

⁹ Kuma wo ka masakɛ niilafin, kɛɛ komi a tɛɛ vɛ ban a kalinna aa mɔɔ kilininnu ɲakɔlɔ, wo le k'a kɛ, a ka jamali di aa mɔɔlu ma ko ai yi Yaya kun di a ma.

¹⁰ A do ka aa bɔiden dɔ lɔ Yaya kun tɛɛla a la kaso la.

¹¹ Ai ka na a kun ne singbilini fɛ seti lɔ, wo do ka taa a di a ba ma.

¹² Wo kɔ, Yaya kɔbiladennu ka na k'a fuleni ta k'a sudoon, ka ban ka taa wo lase Isa ma.

Isa ka mɔɔ waa loolu (5 000) balo teme

¹³ Isa ka Yaya faako mɛn mingɛ, ale kelen ka bɔ je kulun kɔnɔ, ka taa dingila lɔkolon dɔ lɔ. Kɛɛ mɔɔlu ka wo lɔn mingɛ, ai vɛ bɔla aiya solu la ka taa a kɔ ai sen ma.

¹⁴ Isa ka bɔ kulun kɔnɔ ka jama ba ye je mingɛ, ai hena k'a mina, a do ka jangalotɔlu lakɛnɛya ai tɛma.

¹⁵ Wulala, a kɔbiladennu ka na a fɔ a yɛ, ai vɛɛ: «Dingila lɔkolon ne min ne. Su kotɔle. I yi jama labila, fɔsa ai yi taa balo sanya lɔ solu la.»

¹⁶ Isa k'ai javi, a vɛɛ: «Ai mako tɛ ai taako la. Kɛɛ àilu gbu yi balo di ai ma.»

¹⁷ A kɔbiladennu do vɛɛ a yɛ: «Foi tɛ mɔ bolo jan fɔ bulukala loolu ni jɛɛni fila.»

¹⁸ Isa vɛɛ: «Ài yi na wolu le ǹ fɛ.»

¹⁹ Wo kɛ, a ka jama lɔ ai siila bin kan. Ai siinin, a ka bulukala loolu ni jɛɛni fila ta k'a ɲa lajɛlɛ sanma ka balika bɔ Ala yɛ. A ka bulu lɔkalikali, k'a di a kɔbiladennu ma. Ai do k'a lɔtala jama wotɛ.

²⁰ Mɔɔlu bɛ ka dɔnni kɛ k'ai fa kpekpe. Ai wɔlinin, Isa kɔbiladennu ka bulu kulunkulun tɔlu ladɛn, ka gbɔlɔ ɲa tan ni fila (12) lafa.

²¹ Jama min ka dɔnni wo kɛ, kɛ́ mɔɔ waa loolu (5 000) jate tɛɛ ai lɔ. Moso ni dennilu tɛɛ ma kɔndɛ.

Isa ka taama kɔɔ kɔkan teme

²² Telemanin, Isa k'a kɔbiladennu lɔ ko ai yi don kulun kɔnɔ ka kɔɔ tɛɛ a ɲa, a vɛ jama labilala.

²³ A wɔlinin mɔɔlu lasalanala, a ka jɛlɛ tini kɔkan ka Ala dali ale kelen. Ale kelen ka to je, su ka ko.

²⁴ Wo waate ka kulun majaannin talan kɔɔ kawun na, kɔɔ kilinkilin tɛɛ a gbasila, kamasɔlɔn a ɲatiliminnin tɛɛ fɔɲɛ le la.

²⁵ Wo lɔ subama, Isa vɛ taamana kɔɔ kɔkan ka taa ai ma.

²⁶ A kɔbiladennu ka a taamantɔla ye kɔɔ kɔkan mingɛ, ai ka siyan bubale, ai vɛɛ: «Sugboloni le ve!» Ai do vɛ gbanɔla siyan boloma.

²⁷ Kɛɛ Isa ka kuma ai yɛ telemanin, a vɛɛ: «Ài y'ài josolagbeleya! Ǹe le. Ài kà siyan!»

²⁸ Piyɛli do vɛɛ a yɛ: «Ǹ Kuntii, ni i le le, i yi ǹ lɔ taamana kɔɔ kɔkan ka na i fɛlɔ.»

²⁹ Isa do vɛɛ a yɛ: «Na!» Wo fɔ, Piyɛli vɛ jiila ka bɔ kulun kɔnɔ ka taama damina kɔɔ kɔkan ka taa Isa ma.

³⁰ Kɛɛ Piyɛli ka fɔɲɛ bɔtɔla ye fanga la mingɛ, a ka siyan. A do vɛ jiila kɔɔ kɔlɔ ka gbanɔ, a vɛɛ: «Ǹ Kuntii, ǹ lakisi!»

³¹ Isa k'a bolo lɔsama telemanin ka Piyɛli mina, a vɛɛ a yɛ: «Ile min ya limaniya dɔɔyanin, mindɛ y'a kɛla vɛ i yi sikala?»

³² Isa ni Piyɛli ka don mingɛ kulun kɔnɔ, fɔɲɛ lɔ ka sumaya tue.

³³ Mɔɔ minu tɛɛ kulun kɔnɔ, ai k'ai ten bilin Isa kɔlɔ a batoko lɔ, ai vɛɛ: «Tuɲa le, Ala Denkɛ le i le!»

Isa ka jangalotɔlu lakɛnɛya teme Genesalɛti duu kɔnɔ

³⁴ Ai wɔlinin kɔɔ tɛɛla, ai ka se Genesalɛti duu kɔnɔ.

³⁵ Je mɔɔlu k'a ye mingɛ ko Isa le, ai vɛ mɔɔlu lɔla a nako lasena woja laminin nɔ. Mɔɔlu vɛ nala aiya jangalotɔlu bɛ le Isa fɛ,

³⁶ k'a madiya ko a yi diɲa ai y'ai bolo tuu aa faaniba dagbolo gbu la. Mɔɔ minu tɛɛ ai bolo tuula a la, wolu bɛ tɛɛ kɛnɛyala.