Matiyu 10 - Ala Ya Salatikan Kula Kitabu

Isa ka aa keladen mɔɔ tan ni fila (12) ta teme

¹ Wo kɔ, Isa ka aa keladen mɔɔ tan ni fila (12) kili, ka seetiiya di ai ma fɔsa ai yi se jinajuulu gbɛnna mɔɔlu lɔ, ani ka mɔɔlu lakɛnɛya k'ai bɔ aiya jangalo ni tɔlɔya suu bɛ lɔ.

² Keladen mɔɔ tan ni fila (12) wolu tɔɔ le ne: a kunfɔlɔ Simɔn (ai y'a fɔla min ma ko Piyɛli), ani a dɔɔni Andele, ani Zebede denkɛ Janguba ni a dɔɔni Yohana,

³ ani Filipe ni Batolomu, ani Tomasi ni Matiyu min tɛɛ niisɔɔnminaba le, ani Alife denkɛ Janguba, ani Tade,

⁴ ani Simɔn (ai y'a fɔla min ma ko Fasokanuba), ani Judasi Isekaliyɔti, min ka Isa janva.

Isa ka aa keladen mɔɔ tan ni fila (12) kelaya teme

⁵ Isa ka mɔɔ tan ni fila (12) wolu kelaya. A do vɛɛ ai yɛ: «Ài kà taa siboloma gbɛlɛlu fɛlɔ. Ài do kà don Samaliyakalu ya so suu suu la.

⁶ Fɔ ài yi taa Bani Isilankalu le fɛlɔ, minu kɛnin iwo saalu minu bilanin ai jɛlɛ ma.

⁷ Ài vɛ timinna tɛɛ o tɛɛ lɔ, ài yi mɔɔlu kawani k'a fɔ ko haijɛnɛ masaya waate ma vɛ sulunya.

⁸ Ài yi jangalotɔlu lakɛnɛya, ka fulenilu lawuli, ka kunatɔlu lasɛnɛya, ka jinalu gbɛn k'ai bɔ mɔɔlu lɔ. M̀'ɛ seetiiya di ài ma, ài ma min sala. Wo lɔ, ài vɛ ko min kɛla mɔɔlu yɛ, ai kà fen sala.

⁹ Ài kà sanu bila ài kun, niwotɛ wɔli suu suu.

¹⁰ Ài kà bɔlɔ ta, ài kà taamabele ta, ài k'àiya faaniba ni àiya samala kɛ fila le, kamasɔlɔn baalekɛba ka kan k'a balo sɔlɔn.

¹¹ «Ni ài ka don so suu suu la, ài yi mɔɔ ɲinin min yi diɲa k'ài jiya. Ài yi to wo tii fɛlɔ haan fɔɔ ài taa waate.

¹² Ài vɛ kɛla donna bon na, ài yi bonnamɔɔlu fo kunfɔlɔ le, ài vɛɛ: ‹Hɛlɛ yi kɛ ài yɛ.›

¹³ Ni ai k'ài lɔmina kobɛn, àiya duwawu yi minale ai ma. Ni do ai ma ài lɔmina kobɛn, àiya duwawu yi seikɔle ài ma.

¹⁴ Ni mɔɔ suu suu k'i ban ài lɔminako ma, ani k'i ban ai tolomalɔla ài kumakan na, wo vɛ kɛla, ài yi bɔ woja. Ài vɛ kɛla bɔla luu wo ma, niwotɛ so wo la, ài yi je gbangban bɔ ài sen ma, ka wo kɛ ai ban tɔɔmase le.

¹⁵ Ǹ'i tuɲa fɔ ài yɛ, kititɛɛlon, Sɔdɔmu ni Gɔmɔli so yonnu ya kiti kɛtɔ nɔyala ka timin so wo mɔɔlu ta la.»

Tɔlɔya minu kɛtɔ nala

¹⁶ «Ǹ'ài kelayala ka kɛ iwo saa minu bilanin soofalilu tɛma. Wo ma, ài hangili yi sii, iwo sa hangili siinin teme. Ài kɛko ma yi fa, iwo poponi mafanin teme.

¹⁷ Ài y'ài jando ài jɛlɛ lɔ ka bɛn mɔɔlu ma, kamasɔlɔn ai kɛtɔ taala ài le kititɛɛbonnu la, ani k'ài gbasi gbusan na aiya Aladalibonnu la,

¹⁸ ani k'ài lalɔ jamanatiilu ni masakɛlu ɲakɔlɔ ka bɛn ǹa ko ma. Àilu gbu le kɛtɔ ǹe masele le wo lɔ, ka ǹa ko fɔ wolu yɛ ani siboloma gbɛlɛlu.

¹⁹ Ai vɛ kɛla taala ài le kititɛɛbon na, ài ka kan ka kuma min fɔ je ani ài ka kan k'a fɔ teme, ài kà hamin wo le. Ài ka kan ka min fɔ, wo ditɔ ài ma wo waate kelen nɔ.

²⁰ Kamasɔlɔn ài kumakannu tɛnala kɛla ài jɛlɛkanu ta le, mafɔ ài Fa Ala Nii Sɛnɛyanin kumakan.

²¹ «Kɔlɔmamɔɔ kɛtɔ a badenma donna mɔɔlu bolo a faako lɔ. Fa fana kɛtɔ wo suu le kɛla a den na. Dennu wulitɔ ai sɔlɔnbalu kanma k'ai don mɔɔlu bolo ai faako lɔ.

²² Ài gbeyatɔ mɔɔ bɛ yɛ ka bɛn ǹa ko ma. Kɛɛ ni mɔɔ min ka gbeleya mina a ma ka sii tɔlɔya laban na, wo tii yi kisile.

²³ Ni ai k'ài tɔlɔya so dɔ la, ài yi bɔli ka taa so gbɛlɛ la. Ǹ'i tuɲa fɔ ài yɛ, ài tɛnala banna Isilan jamana so bɛ lɔtaamana, ni Mɔɔnivin Tanin m'a kɔsei.

²⁴ «Kalannaden tɛ buɲa sɔlɔnna ka timin aa kalanmɔɔ la. Jɔn fana tɛ buɲa sɔlɔnna ka timin aa jɔnfa la.

²⁵ Ni kalannaden ka se aa kalanmɔɔ lɔ, wo vɛ je bɔ. Ni do jɔn ka se aa jɔnfa lɔ, wo vɛ je bɔ. Ni ai k'a fɔ lutii kɛmɔba ma ko Biyɛzɛbɔ, a lagbɛyine feu ko ai kɛtɔ wo tii ya bonnamɔɔlu mafinna ka timin wo la!

Mɔɔ man kan ka siyan adamadennu ɲa

²⁶ «Wo lɔ, ài kà siyan mɔɔ wolu ɲa. Ko doonnin suu suu tɛ je min la tɛnala nkɛnɛmayala, kumatɛ gbonoko ma min tɛnala lɔnna.

²⁷ Ǹ na min fɔla ài yɛ doon nɔ, ài yi wo fɔ bala lɔ. Ài yi min mɛnna ài tolo kɔlɔ, ài y'ài lɔ bon kɔkan ka wo fɔ gbanɔkan nɔ.

²⁸ Ài kà siyan mɔɔlu ɲa minu yi se mɔɔ falikolo faala dein, kɛɛ ai tɛ se foi kɛla mɔɔ nii la. Mafɔ, ài yi siyan wo ɲa, min yi se mɔɔ nii ni a falikolo bɛ halakila jahanama.

²⁹ Ai yi kɔnɔni fila felela wɔligbanani kelen ne la, kɛlɛ? Wo bɛ n'a kɛ, kɔnɔni wo kelen tɛ ben duu ma ni ài Fa Ala ma diɲa a ma.

³⁰ Àilu koni, hali ài kunsi kaali kɔndɛ lɔnnin Ala bolo.

³¹ Wo ma, ài kà siyan. Àilu kulugbeleyanin vɛ kɔnɔni jilika jaan ne.

³² «Ni mɔɔ min k'i lɔ a la mɔɔlu ɲakɔlɔ ko ǹe le ta yi a le, ǹe fana kɛtɔ ǹ lɔla a la ǹ Fa ɲakɔlɔ min yi haijɛnɛ, ǹ ko, ǹe le ta yi wo tii le.

³³ Ni do mɔɔ min k'i ban ǹ lɔ mɔɔlu ɲakɔlɔ, ǹe fana kɛtɔ m̀ banna wo tii lɔ ǹ Fa ɲakɔlɔ min yi haijɛnɛ.

³⁴ «Ài k'ài mili ko ǹ nanin josolajii le le duukolo kɔkan. M̀ ma na josolajii le, mafɔ kɛlɛ.

³⁵ Ǹ nanin ka kɛ́ ni a fa falan, ka moso ni a ba falan, ka maamoso ni a mama falan.

³⁶ Mɔɔ juu yi bɔla a tii jɛlɛkanu balamɔɔlu le lɔ.

³⁷ «Ni mɔɔ min ka a fa niwotɛ a ba kanu ka timin ǹ na, wo tii ni ǹa kɔbiladenya kaannin tɛ. Ni mɔɔ min ka a denkɛ niwotɛ a denmoso kanu ka timin ǹ na, wo tii ni ǹa kɔbiladenya kaannin tɛ.

³⁸ Ni do mɔɔ min ma diɲa a jɛlɛkanu gbaankɔlɔman tako ma ka bila ǹ kɔ, wo tii ni ǹa kɔbiladenya kaannin tɛ.

³⁹ Kamasɔlɔn ni mɔɔ mɔɔ si y'a fɛ ka a nii lakisi, wo tii bɔnɔtɔ a la. Ni do mɔɔ min ka bɔnɔ a nii la ka bɛn ǹe ma, wo tii kɛtɔ niimaya sɔlɔnna.

Kokein balayi

⁴⁰ «Ni mɔɔ min k'a bolo sii ài kɔlɔ, wo tii v'a bolo sii ǹe gbu kɔlɔ. Ni do mɔɔ min k'a bolo sii ǹ kɔlɔ, wo tii v'a bolo sii ǹ kelaba fana kɔlɔ.

⁴¹ Ni mɔɔ min k'a bolo sii Ala ya keladen dɔ kɔlɔ kamasɔlɔn keladen ne a le, keladen yi balayi min sɔlɔnna, wo tii fana kɛtɔ wo suu le sɔlɔnna. Ni do mɔɔ min k'a bolo sii Alaɲasiyanɲɛmɔɔ dɔ kɔlɔ kamasɔlɔn Alaɲasiyanɲɛmɔɔ le a le, Alaɲasiyanɲɛmɔɔ kɛtɔ balayi min sɔlɔnna, wo tii fana kɛtɔ wo suu le sɔlɔnna.

⁴² Ǹ'i tuɲa fɔ ài yɛ, ni mɔɔ min ka hali jiyafɛ ɲa kelen gbu di ji suma lɔ ǹa denni mɔɔ kelen ma, kamasɔlɔn ǹ kɔbiladen ne a le, wo tii tɛnala bɔnɔla a balayi la feu.»