Malɛkɛ 8 - Ala Ya Salatikan Kula Kitabu

Isa ka mɔɔ waa naani (4 000) balo teme

¹ Wo lonnu lɔ, jama ba ka na k'i ladɛn Isa ma kɔtunun, ado balo foi tɛɛ tɛ ai bolo. Wo le k'a kɛ, Isa k'a kɔbiladennu kili k'a fɔ ai yɛ, a vɛɛ:

² «Jama min hena yi ǹ na, kamasɔlɔn ai vɛ tele sawa kɛ ǹ fɛ jan, ado balo suu suu tɛ ai bolo.

³ Ni ǹ k'ai kɔɔntɔ labila ten, ai kilontɔ siya la, kamasɔlɔn a dɔlu bɔnin dingila majaan ne lɔ.»

⁴ A kɔbiladennu do vɛɛ a yɛ: «M'i se bulu sɔlɔnna di dingila lɔkolon min nɔ, fɔsa mɔɔ minu yi dɔnni kɛ k'ai fa?»

⁵ Wo fɔ, Isa k'ai maɲininga, a vɛɛ: «Bulukala jein ne ài bolo?» Ai do vɛɛ: «Bulukala wolowulan.»

⁶ Isa k'a fɔ jama yɛ ko ai y'ai sii duu ma. Wo kɛ, a ka bulukala wolowulan wolu ta ka balika bɔ Ala yɛ, k'a lɔkalikali, k'a di a kɔbiladennu ma ko ai y'a lɔtala jama wotɛ. Ai do ka wo kɛ.

⁷ Jɛɛni dana fana tɛɛ ai bolo. Isa ka balika bɔ Ala yɛ kɔtunun ka bɛn wolu ma, k'a fɔ a kɔbiladennu yɛ ko ai yi jɛɛ lɔtala jama wotɛ.

⁸ Ai wɔlinin, Isa kɔbiladennu ka bulu ni jɛɛ kulunkulun tɔlu ladɛn, ka gbɔlɔ ɲa wolowulan lafa wolu le.

⁹ Ado mɔɔ waa naani (4 000) jate tɛɛ je. Wo kɔ, Isa ka jama labila.

¹⁰ Ale ni a kɔbiladennu ka don kulun kɔnɔ telemanin ka taa Damanuta koovi lɔ.

Falisilu k'a fɔ ko Isa yi kawananko dɔ kɛ

¹¹ Falisi dɔlu ka na Isa ma, k'a sɔsɔ damina a lɔsumanko lɔ, ko a yi kawananko tɔɔmase dɔ kɛ ai ɲakɔlɔ min bɔnin Ala fɛ.

¹² Wo lɔ, Isa k'a nunakili bakɛ k'a fɔ, a vɛɛ: «Mindɛ lɔ bi mɔɔlu yi kawananko tɔɔmase dɔ ɲininna? Ǹ'i tuɲa fɔ ài yɛ, tɔɔmase foi tɛ jiya bi mɔɔlu la.»

¹³ Wo fɔ Isa bolo, a k'ai to je ka don kulun kɔnɔ kɔtunun ka taa kɔɔ kɔma a kɔbiladennu le.

Falisilu ni Helodi ya bululafununsɛɛ

¹⁴ Isa kɔbiladennu do ka ɲina, ai ma bulu ta fɔ bulukala kelen dein, min tɛɛ ai bolo kulun kɔnɔ.

¹⁵ Ado Isa vɛ ai lalila, a vɛɛ: «Ài y'ài jando ài jɛlɛ lɔ ka bɛn Falisilu ni Masakɛ Helodi ya bululafununsɛɛ ma.»

¹⁶ Wo fɔ Isa bolo, a kɔbiladennu v'a fɔla i ɲɔɔ yɛ, ai vɛɛ: «A yi wo fɔla kamasɔlɔn bulu tɛ mɔ bolo.»

¹⁷ Isa k'ai miliya lɔn mingɛ, a vɛɛ ai yɛ: «Mindɛ y'a kɛla vɛ ài y'a fɔla ko bulu tɛ ài bolo? Ài m'a ɲaye ba bene? Ài josokun jayine?

¹⁸ Ɲa y'ài ma, ài do tɛ yeni kɛla? Tolo y'ài ma, ài do tɛ ko mɛnna? Ài hangili ma to ko minu lɔ?

¹⁹ Ǹ na bulukala loolu tala mingɛ ka kɛ́ mɔɔ waa loolu (5 000) balo, ài na gbɔlɔ ɲa jein lafala bulu kulunkulun tɔ la?» Ai k'a javi, ai vɛɛ: «Gbɔlɔ ɲa tan ni fila (12).»

²⁰ Isa vɛɛ: «Ǹ na bulukala wolowulan tala ka kɛ́ waa naani (4 000) balo mingɛ, ài na gbɔlɔ ɲa jein lafala bulu kulunkulun tɔ la?» Ai vɛɛ: «Gbɔlɔ ɲa wolowulan.»

²¹ Wo fɔ, a do vɛɛ ai yɛ: «A yi di, ài tɛ wo ɲayena?»

Isa ka ɲagbɛ ɲa laka teme

²² Wo kɔ, Isa nu ka se Betisaida so kɔnɔ. Mɔɔ dɔlu ka na ɲagbɛ kɛ́ dɔ le Isa fɛ, k'a madiya ko a a bolo la a kɔkan k'a lakɛnɛya.

²³ Wo lɔ, Isa ka ɲagbɛ mina a bolo ma ka taa a le so kɔma. A do k'a daji kɛ a ɲa ma, k'a bolo la a kɔkan mingɛ, a vɛɛ a yɛ: «I yi fen yena?»

²⁴ Kɛ́ k'a ɲa lawuli k'a fɔ, a vɛɛ: «Ǹ'i mɔɔlu yena, kɛɛ ai kɛyine iwo kɔlɔmanju minu yi taamana.»

²⁵ Isa k'a bolo bilin a ɲa kɔkan kɔtunun. Kɛ́ do ɲa la ka ka. A tɛɛ yeni kɛla kobɛn.

²⁶ Wo lɔ, Isa ka kɛ́ lataa aa bon na k'a lali, a vɛɛ: «I kà seikɔ so wo la.»

Jene gbu yi Isa le?

²⁷ Lon dɔ, Isa ni a kɔbiladennu ka siya mina ka taa Sezale Filipi laminin solu la. Ai ka to siya kɔkan, a k'ai maɲininga, a vɛɛ: «Mɔɔlu yi ǹ jatela jene le?»

²⁸ Ai k'a javi, ai vɛɛ: «A dɔlu y'a fɔla ko Makolikɛba Yaya le i le. A dɔlu fana y'a fɔla ko Nabi Iliya le i le. A dɔgbɛlɛlu y'a fɔla ko kela kɔlɔkɔlɔ dɔ le i le.»

²⁹ Wo fɔ ai bolo, Isa k'ai maɲininga, a vɛɛ: «Àilu do? Ài yi ǹ jatela jene le?» Piyɛli k'a javi, a vɛɛ: «Ile le Masa Tɔɔmasenin ne.»

³⁰ Isa do k'a fɔ ai yɛ k'a magbeleya ko ai kà wo fɔ mɔɔ suu suu yɛ.

Isa ka aa saya ni a wuliko fɔ

³¹ Wo kɔ, Isa k'a kɔbiladennu kalan damina ko ale Mɔɔnivin Tanin ka kan ka tɔlɔya siyama masɔlɔn. Kɛmɔbalu ni salakalase kuntiibalu ni seliya kalanmɔɔlu kɛtɔ ai banna a lɔ, k'a mina, ani k'a faa. Kɛɛ tele fila a sawana, a wulitɔ ka bɔ saya lɔ.

³² Isa ka wo fɔ k'a lagbɛ. Wo lɔ, Piyɛli k'i dɔni mataa Isa le, k'a makuma damina.

³³ Kɛɛ Isa k'i kɔdon mingɛ k'a kɔbiladennu ye, a ka Piyɛli makuma, a vɛɛ: «Ile Soitana, bɔ ǹ kɔ! Kamasɔlɔn i t'i milila Ala sawonankolu ma, mafɔ adamadennu sawonankolu.»

³⁴ Wo kɛ, Isa ka jama ni a kɔbiladennu kili k'a fɔ ai yɛ, a vɛɛ: «Ni mɔɔ min y'a fɛ ka bila ǹ kɔ, fɔ wo tii i ban a jɛlɛ lɔ, ka a gbaankɔlɔman ta ka bila ǹ kɔ.

³⁵ Kamasɔlɔn ni mɔɔ mɔɔ si y'a fɛ ka a nii lakisi, wo tii bɔnɔtɔ a la. Ni do mɔɔ min vɛ bɔnɔla a nii la ka bɛn ǹe ni Samakan Kein ma, wo tii kɛtɔ a nii lakisila.

³⁶ A yi di? Ni mɔɔ ka dunuɲa bɛ sɔlɔn ka bɔnɔ a nii la, nafa mindɛ le yi wo la?

³⁷ Mɔɔ yi se mindɛ dila k'i nii kunmaka?

³⁸ Wo le kɛtɔ a kɛla, ni mɔɔ min vɛ maloyala ǹe ni ǹ kumakannu le bi lanandeyabalilu ni Alalɔnbalilu ɲakɔlɔ, wo vɛ kɛla, Mɔɔnivin Tanin yi maloyale wo tii le, a vɛ nala lon min na a Fa aa magbiliyali lɔ, lɔhɔlɔma mɛlɛkalu v'a fɛ.»