Malɛkɛ 2 - Ala Ya Salatikan Kula Kitabu

Isa ka falifaamatɔ lakɛnɛya teme

¹ Tele dana timinnin kɔ, Isa ka seikɔ Kapɛlɛnamu so kɔnɔ. Mɔɔlu do k'a mɛn mingɛ ko a yi bon na je,

² ai siyama vɛ ai ladɛnna je haan fɔɔ lɔya ma sɔlɔn hali bonnada la. Ado Isa tɛɛ Ala kumakan lasena ai ma.

³ Wo waate kelen nɔ, kɛ́ naani vɛ nala falifaamatɔ dɔ le a fɛ.

⁴ Kɛɛ ai ma se ai madonna Isa la ka bɛn jama wala jate ma. Wo le k'a kɛ, ai ka woo bila bon kɔkan Isa siiya ɲatelenma lɔ, ka ban ka jangalotɔ ni aa dɛvɛ lajii woo wo la.

⁵ Isa k'aiya limaniya ye mingɛ, a vɛɛ jangalotɔ yɛ: «Ǹ den, iya julumbulu lɔ vɛ koto.»

⁶ Wo k'a talan seliya kalanmɔɔ dɔlu siinin tɛɛ je. Ai do v'a fɔla ai miliya lɔ, ai vɛɛ:

⁷ «Mindɛ lɔ kɛ́ min yi Alalafeyakan fɔla yi ne? Jene yi se julumbulu lɔkotola ni Ala tɛ?»

⁸ Isa do k'ai miliya lɔn telemanin. Wo lɔ, a vɛɛ ai yɛ: «Mindɛ y'a kɛla vɛ miliya suu wo y'ài josokun nɔ?

⁹ A yi di? K'a fɔ falifaamatɔ yɛ, ko: ‹Iya julumbulu lɔ vɛ koto›, niwotɛ k'a fɔ: ‹I wuli, iya dɛvɛ ta ka taama,› wo fila lɔ, mindɛ le fɔ diyanin?

¹⁰ Kɛɛ do, fɔ ài y'a lɔn a see yi Mɔɔnivin Tanin yɛ ka julumbulu lɔkoto dunuɲa.» Wo fɔ Isa bolo, a vɛɛ falifaamatɔ yɛ:

¹¹ «I wuli, i iya dɛvɛ ta ka taa iya bon na.»

¹² Kɛ́ do v'i wulila telemanin ka aa dɛvɛ ta ka taa aa bon na mɔɔ bɛ ɲakɔlɔ. Ai bɛ ka kawakoya ka Ala tanu, ai vɛɛ: «Mɔ ma min ɲɔɔzii ye ba bene feu!»

Isa ka Levi kili teme

¹³ Isa ka taa kɔɔ kawun na kɔtunun. Jama ba ka na a ma, a do vɛ ai kalanna.

¹⁴ A timintɔla, a ka Alife denkɛ Levi siinin ye niisɔɔnminaya lɔ. Isa do vɛɛ a yɛ: «Bila ǹ kɔ.» A do k'i wuli ka bila a kɔ.

¹⁵ Wo kɔ, Isa ni a kɔbiladennu siinin ka to dɔnnikɛya lɔ Levi ya bon na, niisɔɔnminaba ni julumbutɔ siyama siinin tɛɛ ai fɛ, kamasɔlɔn wo siyama bilanin tɛɛ a kɔ.

¹⁶ Seliya kalanmɔɔlu minu tɛɛ Falisilu le, wolu k'a ye mingɛ ko Isa ni a kɔbiladennu yi dɔnni kɛla niisɔɔnminaba ni julumbutɔlu fɛ, ai k'a fɔ a kɔbiladennu yɛ, ai vɛɛ: «Mindɛ lɔ àiya kalanmɔɔ yi dɔnni kɛla niisɔɔnminaba ni julumbutɔlu fɛ?»

¹⁷ Isa ka wo mɛn k'ai javi, a vɛɛ: «Kɛnɛyabatɔ mako tɛ basibɔba la, mafɔ jangalotɔ. M̀ ma na mɔɔ telenninu kiliko lɔ, mafɔ julumbutɔlu.»

Ai ka Isa maɲininga ka bɛn sundonko ma teme

¹⁸ Lon dɔ, Yaya kɔbiladennu ni Falisilu kɔbiladennu ka to sundonna, mɔɔ dɔlu ka na Isa ma k'a maɲininga, ai vɛɛ: «Yaya kɔbiladennu ani Falisilu kɔbiladennu, wolu deinin sundonna. Mindɛ lɔ i kɔbiladennu tɛ sundonna?»

¹⁹ Isa k'ai javi, a vɛɛ: «A yi di? Ka kɔɲɛfa to a tɔvalu dafɛ kɔɲɛmalɔ lɔ, jalasa a tɔvalu yi sene sundonna? Damanda kɔɲɛfa y'ai dafɛ, ai tɛ se sundonna.

²⁰ Kɛɛ lon dɔ natɔ, mɔɔlu kɛtɔ kɔɲɛfa bɔla ai tɛma. Wo lon ne, ai kɛtɔ sundonna.

²¹ «Mɔɔ tɛ faani kula kulunkulun tala ka faani kɔlɔ labalin a le. Niwotɛ, faani kula kɛtɔ faani kɔlɔ masamana k'a fala. A do falaɲa kɛwonyatɔle ka timin a kunfɔlɔ ta la.

²² Wo boloɲa kelen ma, mɔɔ tɛ gbɛ kula kɛla gbɛbɔlɔ kɔlɔ lɔ. Niwotɛ, a fununtɔ ka bɔlɔ te ka gbɛ bɛ bɔn. Mɔɔ yi gbɛ kula kɛla gbɛbɔlɔ kula le lɔ.»

Isa le Kuntii le Nɔningɛlon kunna

²³ Nɔningɛlon dɔ, Isa nu timintɔla sɛnɛlu tɛma, a kɔbiladennu vɛ sɛnɛfen tizan dɔ bɔla.

²⁴ Wo lɔ, Falisilu vɛɛ Isa yɛ: «A ye, mindɛ lɔ i kɔbiladennu yi ko kɛla yi ne min ladaannin tɛ Nɔningɛlon?»

²⁵ Isa k'ai javi, a vɛɛ: «A yi di? Masakɛ Dawuda na min kɛla ale ni a taamaɲɔɔlu ya kɔɔn waate lɔ, ài ma wo kalan?

²⁶ Abiyata tɛɛ salakalase kuntiiba le waate min nɔ, Dawuda ka don mingɛ Alabatobon na, a ka bulu dɔlu ta, minu lasenin tɛɛ Ala ma. A ka wo dɔ dɔn, k'a dɔ di a taamaɲɔɔlu ma, k'a talan wolu ladaannin tɛɛ tɛ mɔɔ suu suu yɛ, mafɔ salakalasebalu dein.»

²⁷ Isa k'a fɔ ai yɛ kɔtunun, a vɛɛ: «Ala na Nɔningɛlon ladanna ka bɛn mɔɔlu ya ko le ma. A ma mɔɔlu ladan ka bɛn Nɔningɛlon ya ko ma.

²⁸ Wo le y'a ma, Mɔɔnivin Tanin le Kuntii le hali Nɔningɛlon gbu kunna.»