Malɛkɛ 1 - Ala Ya Salatikan Kula Kitabu

Yaya ka kawanili kɛ teme

¹ Samakan Kein damina le min ne ka bɛn Ala Denkɛ Masa Tɔɔmasenin Isa ma.

² Aa ko sɛvɛnin Nabi Ezayi ya kitabu kɔnɔ boloɲa min ne ma, ko: «Ǹe Ala vɛɛ ǹ kɛtɔ ǹa keladen lataala i ɲa, min kɛtɔ siya lɔbɛnna i yɛ.

³ Mɔɔ dɔ gbanɔkan yi bɔla fuwa lɔ, a vɛɛ: ‹Ài yi siya lɔbɛn mɔ Tii yɛ, ka aa senmasiyalu latelen a yɛ.› »

⁴ Makolikɛba Yaya ka bɔ gbɛ la fuwa lɔ, a vɛ mɔɔlu makola ji kɔlɔ, ani ka kawani kɛ ka bɛn ai dajoo mafalinko ma, fɔsa aiya julumbulu lɔ yi koto teme.

⁵ Mɔɔ siyama tɛɛ bɔla Jude koovi lɔ ani Jelusalɛmu so kɔnɔ ka taa Yaya fɛlɔ. Ai tɛɛ vɛ ai dalabɔla aiya julumbulu la, Yaya tɛɛ ai mako Julidɛn kɔɔ kɔlɔ.

⁶ Faani min ladannin ɲɔɔmɛ si le, Yaya ka wo bila a kanna, k'a tɛ sili gbolojulu dɔ le. A tɛɛ kono ni tuukɔlɔli le dɔnna.

⁷ A do tɛɛ mɔɔlu kawanila, a vɛɛ: «Mɔɔ dɔgbɛlɛ natɔ min fanga walanin ǹ ta le. Hali k'i mabilin aa samala julu fɔlinko lɔ, ǹe dɔɔyayine wo ma.

⁸ Ǹ'ài makola yi ne ji le le, kɛɛ ale kɛtɔ ài makola Nii Sɛnɛyanin ne le.»

Yaya ka Isa mako ji kɔlɔ teme

⁹ Wo waate lɔ, Isa ka na ka bɔ Nazalɛti so kɔnɔ, Galile koovi lɔ, ado Yaya k'a mako Julidɛn kɔɔ kɔlɔ.

¹⁰ Isa bɔtɔla ji lɔ, a ka sangbolo da lakanin ye telemanin, ka Nii Sɛnɛyanin jiitɔla ye a kɔkan iwo poponi.

¹¹ Kumakan dɔ ka bɔ sangbolo lɔ, a vɛɛ: «I yi ǹ diyanan Denkɛ le le. I do vɛ ǹ kɔnɔlɔdiya bubale.»

¹² Wo kɛ, Nii Sɛnɛyanin ka Isa lataa fuwa lɔ telemanin.

¹³ A ka tele binaani (40) kɛ fuwa lɔ, soofalilu tɛɛ tɛɛminja. Ado Soitana tɛɛ a lɔsumana, kɛɛ mɛlɛkalu ka na a madɛmɛnko lɔ.

Isa ka kɔɔsɔmɔnin naani kili teme

¹⁴ Yaya bila kɔ kaso la, Isa ka taa Galile koovi lɔ, a vɛ Ala ya Samakan Kein lasena.

¹⁵ A do vɛɛ: «A waate bɛlɛ vɛ se. Ala ya masaya waate ma vɛ sulunya. Wo lɔ saa, ài y'ài dajoo mafalin ka limaniya Samakan Kein ma.»

¹⁶ Lon dɔ, Isa taamantɔla Galile kɔɔ kawun na, a ka Simɔn ni a dɔɔni Andele ye. Wolu tɛɛ jɔ lafilila kɔɔ lɔ, kamasɔlɔn ai tɛɛ kɔɔsɔmɔnin ne le.

¹⁷ Isa do vɛɛ ai yɛ: «Ài yi bila ǹ kɔ. Ài yi jɛɛ le ɲininna, ǹe do kɛtɔ ài kɛla mɔɔɲininba le le.»

¹⁸ Ai do k'aiya jɔlu to je telemanin ka bila a kɔ.

¹⁹ Isa timinnin woja la dɔni ne, a ka Zebede denkɛ fila ye, minu tɛɛ Janguba ni a dɔɔni Yohana le. Ai siinin tɛɛ jɔlu lɔbɛnna aiya kulun kɔnɔ.

²⁰ Isa k'ai kili telemanin. Ai do k'ai fa ni baaledennu to kulun kɔnɔ ka bila a kɔ.

Isa ka jina gbɛn kɛ́ dɔ lɔ teme

²¹ Wo kɔ, Isa nu ka taa Kapɛlɛnamu so kɔnɔ. Nɔningɛlon senin, a ka don Aladalibon na ka mɔɔlu kalan damina.

²² Aa kalan k'ai kawakoya, kamasɔlɔn a tɛɛ ai kalanna seetiiya bolo le ma. A tɛɛ tɛ ai kalanna iwo seliya kalanmɔɔlu tɛɛ a kɛla teme.

²³ Wo waate kelen, kɛ́ jinajuutɔ dɔ k'i wuli aiya Aladalibon kɔnɔ ka gbanɔ, a vɛɛ:

²⁴ «Isa Nazalɛtika! Mindɛ le ile ni ǹu wotɛ? I nanin mɔ halakiko le lɔ? Ǹ k'a lɔn mɔɔ min i le. Ala ya Mɔɔ Sɛnɛyanin ne i le le.»

²⁵ Ado Isa ka jina jamali, a vɛɛ: «Jeden! Bɔ kɛ́ min nɔ!»

²⁶ Jinajuu do ka kɛ́ wo lajaajaa bubale, k'a lagbanɔ, ka ban ka bɔ a lɔ.

²⁷ Mɔɔ bɛ ka kawakoya, ai v'a fɔla i ɲɔɔ yɛ: «Mindɛ le ne? Kalan kula suu mindɛ le ne? See y'a yɛ hali ka jinajuulu jamali. Ai do y'a kumakan labatola.»

²⁸ Ado Isa mangan ka jɛzɛn telemanin Galile fan bɛ lɔ.

Isa ka jangalotɔ siyama lakɛnɛya teme

²⁹ Wo kɔ, ai ka bɔ Aladalibon na ka taa don Simɔn ni Andele ya bon na. Janguba ni Yohana tɛɛ ai fɛ.

³⁰ Wo k'a talan, Simɔn bilanmoso lanin tɛɛ je nɛnɛgbani bolo, ai do ka wo fɔ Isa yɛ telemanin.

³¹ Wo lɔ, Isa ka taa a ma, k'a mina a bolo ma k'a lawuli. Wo kɛ, nɛnɛgbani ka bɔ a fali lɔ. Moso do k'i wuli ka gbadon ai yɛ.

³² Wulala, teleben kɔ, mɔɔlu vɛ nala jangalotɔlu ni jinatɔlu le Isa fɛ.

³³ Sokɔnɔmɔɔlu bɛ k'ai ladɛn bonnada la.

³⁴ Isa ka jangalotɔ suu bɛ lakɛnɛya, ka jinalu gbɛn ka bɔ mɔɔ siyama lɔ. Kɛɛ a do ma diɲa jina wolu yi kuma, kamasɔlɔn ai tɛɛ k'a lɔn Isa yi mɔɔ min ne.

Isa ka mɔɔlu kawani Galile koovi lɔ teme

³⁵ Wo dusagbɛlon subama, Isa k'i wuli ka taa dingila lɔkolon dɔ lɔ Ala daliko lɔ.

³⁶ Wo lɔ, Simɔn ni a bilankɔɲɔɔlu vɛ taala a ɲininya lɔ.

³⁷ Ai k'a ye mingɛ, ai do vɛɛ a yɛ: «Mɔɔ bɛ y'i ɲininna.»

³⁸ Kɛɛ Isa do vɛɛ ai yɛ: «Ài m'i bɔ jan ka taa jan laminin solu la, fɔsa ǹ'i kawanili kɛ je fana, kamasɔlɔn ǹ nanin wo le la.»

³⁹ Wo lɔ, Isa tɛɛ Galile koovi fan bɛ lɔtaamana, a vɛ kawani kɛla Aladalibonnu la, ka jinalu gbɛn k'ai bɔ mɔɔlu lɔ.

Isa ka kunatɔ dɔ lakɛnɛya teme

⁴⁰ Lon dɔ, kunatɔ dɔ ka na k'i majii Isa kɔlɔ k'a fɔ a yɛ, a vɛɛ: «Ni i ka diɲa, i yi sene ǹ lasɛnɛyala.»

⁴¹ A hena ma, Isa k'a bolo lɔsama k'a tuu kɛ́ la k'a fɔ a yɛ, a vɛɛ: «M̀'ɛ diɲa, i la yi sɛnɛya.»

⁴² Kuna ka kɛ́ wo bila telemanin, a do la ka sɛnɛya.

^43-44 Isa k'a fɔ a yɛ k'a magbeleya, a vɛɛ: «I y'alama, i kà min ko fɔ mɔɔ suu suu yɛ. Kɛɛ fɔ i yi taa i jɛlɛ jiya salakalaseba la, ka niilifen bɔ iwo Nabi Musa k'a jamali teme. Wo le kɛtɔ a jiyala bɛ la ko i la vɛ sɛnɛya.» Wo fɔ, a ka kɛ́ labila.

⁴⁵ Kɛɛ kɛ́ bɔ je telemanin, a ka wo ko lajɛzɛn damina fan bɛ lɔ. Wo le k'a kɛ, Isa ma se donna so suu suu kɔnɔ gbɛ la butu, mafɔ ka to dingila lɔkolonnu lɔ. Wo bɛ n'a kɛ, mɔɔlu tɛɛ bɔla fan bɛ lɔ ka taa a kɔ.