Luka 8 - Ala Ya Salatikan Kula Kitabu

Moso minu ka bila Isa kɔ

¹ Wo timinnin kɔ, Isa tɛɛ timintiminna so ni toodalu la ka mɔɔlu kawani, ani ka Samakan Kein lase ka bɛn Ala ya masaya ma. Ado aa keladen mɔɔ tan ni fila (12) tɛɛ a fɛ.

² Moso dɔlu tɛɛ a fɛ, a na jinajuulu gbɛnna k'ai bɔ minu dɔlu lɔ, ani k'a dɔlu lakɛnɛya. A dɔ tɔɔ tɛɛ ko Mɔyamu Magidalaka, Isa tɛɛ vɛ jina wolowulan gbɛn k'ai bɔ min nɔ.

³ Yohani, min tɛɛ Helodi ya bonkunnasiiba Kuza moso le, wo tɛɛ moso wolu tɛma, ani Susana, ani moso siyama gbɛlɛlu. Wolu tɛɛ Isa ni a kɔbiladennu madɛmɛnna ai bolofennu la.

Malofalinba ma sana

⁴ Lon dɔ, jama ba ka to bɔla so siyama la k'ai ladɛn Isa fɛlɔ, a ka sana min la ai yɛ, a vɛɛ:

⁵ «Sɛnɛkɛba dɔ ka taa malofalinya lɔ. A ka to malo falinna, a dɔlu ka ben siya dala. Timinsennɔmɔɔlu ka wolu lɔdɔndɔn, ado kɔnɔnilu ka na k'a tɔ tɔmɔn.

⁶ Malo dɔlu ka ben fala kɔkan. Wolu ka fɛlɛn, kɛɛ ai ka ja, kamasɔlɔn sumaya tɛɛ tɛ je.

⁷ Malo dɔlu ka ben wonilu tɛma. Malo ni wonilu ka buɲa i ɲɔɔ fɛ, ado wonilu ka malo lɔgbalin.

⁸ Malo dɔlu fana ka ben duu kein kan, ka fɛlɛn ka sawati kosɛvɛ k'ai den kɛmɛ (100) kɛ.» Wo fɔ, Isa k'a kan labɔ k'a fɔ ai yɛ, a vɛɛ: «Tolo yi mɔɔ min kun, wo tii y'a tolomalɔ kuma min ma.»

Isa ka sanalu la dailu min na

⁹ Isa kɔbiladennu k'a maɲininga ka bɛn sana wo kɔlɔ ma.

¹⁰ Wo lɔ, Isa vɛɛ ai yɛ: «Ala ya masaya gbonolu lɔnni vɛ di ài ma, kɛɛ ko bɛ yi fɔla dɔlu yɛ sana le lɔ. Wo le n'a kɛla, ‹Ai y'ai ɲa kaana, kɛɛ ai tɛ foi yena. Ai y'ai tolomalɔla, kɛɛ ai tɛ foi ɲayena.› »

Isa ka malofalinba ma sana kɔlɔ fɔ teme

¹¹ «Sana wo kɔlɔ le min ne: Malo yi Ala kumakan ne le.

¹² Malo minu na benna siya dala, wolu le mɔɔlu le minu yi Ala kumakan mɛnna. Kɛɛ wo kɔ, Soitana yi nala ka kuma wo bɔ ai josokun nɔ, alako ai kana limaniya ka kisi.

¹³ Malo minu na benna fala kɔkan, wolu le mɔɔlu le minu yi Ala kumakan mɛnna, k'ai bolo sii a kɔlɔ telemanin sawa boloma. Kɛɛ kuma wo lilen tɛ donna ka jaanfa ai josokun nɔ. Ai yi waateni le kɛla limaniya lɔ, kɛɛ do lɔsumani waate vɛ senna ai ma, ai yi limaniya siya bilala.

¹⁴ Malo minu na benna wonilu tɛma, wolu le mɔɔlu le minu yi Ala kumakan mɛnna, kɛɛ ai yi haminna dunuɲalɔtɛɛkolu le le, ani nafolokolu, ani jɛlɛdiyabɔkolu. Wo boloɲa ma, Ala kumakan lɔgbalinyine ai josokun nɔ, k'ai kɛ iwo malo fofo.

¹⁵ Malo minu na benna duu kein kan, wolu le mɔɔlu le minu yi Ala kumakan mɛnna, k'ai bolo kɛ a la ai josokun ɲuma lɔ, min telenin. A do yi sawatila ai ma ka bɛn aiya sawali ma.»

Fitina ma sana

¹⁶ «Mɔɔ tɛ fitina lamɛnɛnna k'a sii daa kɔlɔ, niwotɛ lafen kɔlɔ. Fɔ i y'a sii fitinasiiya le lɔ, fɔsa mɔɔ minu yi donna bon na, wolu yi kɛnɛya ye.

¹⁷ Ko doonnin suu suu tɛ je, min la tɛnala nkɛnɛmayala, kumatɛ gbonoko ma min tɛnala bɔla gbɛ la.

¹⁸ «Ài y'ài tolomalɔ kobɛn! Kamasɔlɔn ni fen ka kɛ mɔɔ min bolo, a dɔ latɔ wo tii ma ta kɔkan ka siyaya. Kɛɛ ni fen ma kɛ mɔɔ min bolo, hali a yi min jatela a ta le, wo minatɔle a la.»

Isa ba ni a dɔɔkɛlu

¹⁹ Wo waate lɔ, Isa ba ni a dɔɔkɛlu ka na a ma, kɛɛ ai ma se ai madonna a la ka bɛn jama ma.

²⁰ Wo lɔ, ai vɛɛ Isa yɛ: «I ba ni i dɔɔkɛlu lɔnin luu ma. Ai y'a fɛ k'i ye.»

²¹ A do k'ai javi, a vɛɛ: «Mɔɔ mɔɔ vɛ Ala kumakan mɛnna k'a labato, wolu le m̀ ba ni ǹ dɔɔkɛlu le.»

Isa ka fɔɲɛ ba lɔsumaya teme tue

²² Lon dɔ, Isa ni a kɔbiladennu ka don kulun kɔnɔ. A do vɛɛ ai yɛ: «Ài ndaa kɔɔ kɔma.» Wo lɔ, ai vɛ taala.

²³ Ai ka to kɔɔ kɔkan, sunɔɔ ka Isa mina. Ado sanfɔɲɛ ba ka bɔ ka kɔɔ lajaman. Ji vɛ donna kulun kɔnɔ, k'ai bila masuwa lɔ.

²⁴ Wo kɛ, ai k'i madon Isa la k'a lakunun. Ai do vɛɛ a yɛ: «Kalanmɔɔ! Kalanmɔɔ! Mɔ satɔle!» Isa k'i wuli ka fɔɲɛ ni kɔɔ jamannin jamali, ai do lɔ ka sumaya tue.

²⁵ Wo kɛnin, Isa vɛɛ ai yɛ: «Àiya limaniya yi min ne?» Ai bɛ ka siyan ka kawakoya, k'a kɛ a fɔle i ɲɔɔ yɛ, ai vɛɛ: «Mɔɔ suu mindɛ le min ne? Hali a yi fɔɲɛ ni kɔɔ gbu jamalila, ai do y'a kumakan labatola.»

Isa ka jinatɔ dɔ lakɛnɛya teme

²⁶ Ai do ka kɔɔ tɛɛ ka se Gelasekalu ya duu lɔ, min yi kɔɔ kɔma, a ɲatiliminnin Galile la.

²⁷ Isa jiitɔla ka bɔ kulun kɔnɔ, so wo kɔnɔ kɛ́ dɔ ka na a labɛnya lɔ, jina siyama tɛɛ min nɔ. Ka ta waate jaan ma, a tɛɛ tɛ feeyabɔ bilala a kanna, kumatɛ k'a sii bon na, fɔ kabuluso la.

²⁸ A ka Isa ye mingɛ, a ka gbanɔ k'i kɛ a sen kɔlɔ. A do ka gbanɔ k'a fɔ, a vɛɛ: «Isa, Masa Taala Denkɛ, mindɛ le ile ni ǹe wotɛ? I jon jaani, i kà ǹ jangata.»

²⁹ A ka kuma wo fɔ kamasɔlɔn Isa tɛɛ vɛ jina jamali ko a yi bɔ a lɔ. Jinajuu tɛɛ vɛ bila a lɔ siɲa siyama le, ado sokɔnɔmɔɔlu tɛɛ a gbaanna kulun na, k'a sili jɔlɔkɔ la, k'a lakana. Wo bɛ n'a kɛ, a tɛɛ jɔlɔkɔ tɛɛla ka kulun lɔkali, ado jina tɛɛ taala a le fuwa lɔ.

³⁰ Isa k'a maɲininga, a vɛɛ: «I tɔɔ di?» A k'a javi, a vɛɛ: «Jamaba.» A na wo fɔla kamasɔlɔn jina siyama tɛɛ vɛ don a lɔ.

³¹ Jinalu ka Isa madiya ko a kà ai jamali k'ai lataa diɲa gboon lɔjaannin nɔ.

³² Wo k'a talan kɔsɛ kulu ba dɛgbɛ dɔ tɛɛ dɔnnila tini kɔkan je. Jinalu ka Isa madiya ko a yi diɲa ai yi taa don kɔsɛlu lɔ. A do ka diɲa wo ma.

³³ Wo kɛ, jinalu ka bɔ kɛ́ lɔ ka taa don kɔsɛlu lɔ. Ado kɔsɛ kulu vɛ tini lajiila bɔli le ka taa don kɔɔ kɔlɔ k'ai bɛ faa.

³⁴ Kɔsɛkunnasiibalu ka wo ye mingɛ, a vɛ bɔlila ka taa wo ɲafɔ so ni toodalamɔɔlu bɛ yɛ.

³⁵ Mɔɔlu do vɛ taala wo kolasaaya lɔ. Ai ka se Isa fɛlɔ mingɛ, ai ka jinatɔ kɔlɔ siinin ye Isa sen kɔlɔ, faani tɛɛ a kanna, a do hangili la tɛɛ vɛ sei a ma. Wo lɔ, ai bɛ ka siyan.

³⁶ Jinatɔ la ka kɛnɛya mɔɔ minu ɲana, wolu ka wo ɲafɔ dɔlu yɛ.

³⁷ Gelasekalu bɛ ka siyan bubale, ka Isa madiya ko a yi bɔ aiya duu lɔ. Wo lɔ, Isa ni a kɔbiladennu ka don kulun kɔnɔ ko ai yi seikɔ.

³⁸ Wo kɛ, jinatɔ kɔlɔ vɛ Isa madiyala ko a a fɛ ka to a fɛ, kɛɛ a do ma diɲa, fɔ k'a lasei, a vɛɛ:

³⁹ «Taa i fɛso. Ala na ko ba min kɛla i yɛ, i yi wo lase i balamɔɔlu ma.» Isa tɛɛ vɛ ko ba min kɛ a yɛ, a vɛ taala wo lasena so fan bɛ lɔ.

Moso jangalotɔ ni Jailusi denmoso

⁴⁰ Isa seikɔnin kɔɔ kɔma, jama k'a labɛn, kamasɔlɔn ai bɛ tɛɛ a makɔnɔna.

⁴¹ Wo waate kelen nɔ, Aladalibon ɲamɔɔ dɔ min tɔɔ tɛɛ ko Jailusi, wo ka na Isa ma. A do k'i kɛ a sen kɔlɔ k'a madiya ko a yi taa aa bon na,

⁴² kamasɔlɔn a denmoso kelenpesa min vɛ sanji tan ni fila (12) jate sɔlɔn, wo yi sa bolo le ma. Isa taatɔla je, jama tɛɛ a lɔgbalinna ai tɛma.

⁴³ Wo k'a talan moso dɔ tɛɛ je, min tɛɛ vɛ san tan ni fila (12) kɛ maa jangalo lɔ. Basibɔbalu tɛɛ v'a bolo latɛ tɛtɛ, kɛɛ wolu suu suu ma se a jangalo basila.

⁴⁴ Moso wo ka na Isa kɔma, k'a bolo tuu aa faaniba dagbolo la, ado aa jelibɔ la ka lɔ telemanin.

⁴⁵ Wo lɔ, Isa vɛ ɲiningali kɛla, a vɛɛ: «Jene n'a bolo tuula ǹ na?» Mɔɔ foi m'i lɔ a la mingɛ, Piyɛli do vɛɛ a yɛ: «Kalanmɔɔ, i t'a yena i lɔgbalinnin teme jama bolo?»

⁴⁶ Kɛɛ Isa do vɛɛ a yɛ: «Mɔɔ dɔ na tuula ǹ na, kamasɔlɔn ǹ k'a lɔn fanga dɔ vɛ bɔ ǹ nɔ.»

⁴⁷ Moso k'a ye mingɛ ko a tɛ se tola doon nɔ, a lɔjaajaatɔla ka na, k'i kɛ Isa sen kɔlɔ. A do k'a fɔ jama ɲana min n'a kɛla a n'a bolo tuula Isa la, ani a na kɛnɛya sɔlɔnna teme telemanin.

⁴⁸ Wo fɔ, Isa vɛɛ a yɛ: «Ǹ denmoso, iya limaniya v'i lakɛnɛya. Taa hɛlɛ lɔ.»

⁴⁹ Isa ka to kumala, mɔɔ dɔ ka na ka bɔ Aladalibon ɲamɔɔ ya bon na k'a fɔ a yɛ, a vɛɛ: «I denmoso vɛ sa. I kà kalanmɔɔ ɲagba butu.»

⁵⁰ Wo mɛn Isa bolo, a vɛɛ Jailusi yɛ: «I jei kà tɛɛ. I yi limaniya le kɛ dein, wo vɛ kɛla, i denmoso yi kɛnɛyale.»

⁵¹ A senin Jailusi fɛlɔ, a ma diɲa mɔɔ foi yi don a fɛ bon na, mafɔ Piyɛli ni Yohana ni Janguba, ani den fa ni a ba.

⁵² Mɔɔlu bɛ tɛɛ gbanɔ ni saankasi le la ka bɛn denni sako ma. Kɛɛ Isa do vɛɛ ai yɛ: «Ài kà kasi. Denni sanin tɛ. A yi sunɔɔ le lɔ.»

⁵³ Ai do ka jɛlɛbɔ a lɔ, kamasɔlɔn ai bɛ tɛɛ k'a lɔn feu ko denmosoni vɛ sa.

⁵⁴ Isa do ka taa denni mina a bolo ma k'a kan labɔ, a vɛɛ: «Denni, i wuli!»

⁵⁵ Wo fɔ Isa bolo, denni nii la ka sei a lɔ, a do k'i wuli telemanin. Wo kɛnin, Isa k'ai lɔ ko ai yi dɔnni di denni ma.

⁵⁶ A fa ni a ba ka kawakoya, kɛɛ Isa k'ai jamali ko ai kà wo ko fɔ mɔɔ suu suu yɛ.