Luka 6 - Ala Ya Salatikan Kula Kitabu

Isa le Kuntii le Nɔningɛlon kunna

¹ Nɔningɛlon dɔ, Isa nu timintɔla sɛnɛlu tɛma, a kɔbiladennu vɛ sɛnɛfen tizan dɔlu bɔla, k'ai sisa ai bolo le, k'ai dɔn.

² Wo lɔ, Falisi dɔlu vɛɛ ai yɛ: «Mindɛ y'a kɛla vɛ ài yi ko kɛla min ladaannin tɛ Nɔningɛlon?»

³ Isa k'ai javi, a vɛɛ: «A yi di? Masakɛ Dawuda na min kɛla ale ni a taamaɲɔɔlu ya kɔɔn waate lɔ, ài ma wo kalan?

⁴ A ka don mingɛ Alabatobon na, a ka bulu dɔlu ta, minu lasenin tɛɛ Ala ma. A ka wo dɔ dɔn, k'a dɔ di a taamaɲɔɔlu ma, k'a talan wolu ladaannin tɛɛ tɛ mɔɔ suu suu yɛ, mafɔ salakalasebalu dein.»

⁵ Isa do vɛɛ ai yɛ kɔtunun: «Mɔɔnivin Tanin le Kuntii le Nɔningɛlon kunna.»

Isa ka kɛ́ dɔ lakɛnɛya teme min bolo faanin tɛɛ a ma

⁶ Nɔningɛlon gbɛlɛ, Isa ka taa don Aladalibon na ka mɔɔlu kalan. Kɛ́ dɔ tɛɛ je, min bolokini faanin tɛɛ a ma.

⁷ Seliya kalanmɔɔlu ni Falisilu tɛɛ Isa lakɔlɔsila k'a ye ni a kɛtɔ mɔɔ dɔ lakɛnɛyala Nɔningɛlon, fɔsa ai yi dailu sɔlɔn a jalakiko lɔ.

⁸ A do tɛɛ k'ai miliya lɔn. A do k'a fɔ kɛ́ yɛ, min bolo faanin tɛɛ a ma, a vɛɛ: «I wuli, i lɔ jama tɛma.» Wo do v'i wulila k'i lɔ.

⁹ Isa ka jama maɲininga, a vɛɛ: «A yi di? A ladaanyine ka kokein kɛ Nɔningɛlon, baa koyon? Ka mɔɔ lakisi, baa k'a halaki?»

¹⁰ Wo fɔ Isa bolo, a v'i ɲa kaana jama lɔ k'a fɔ kɛ́ yɛ, a vɛɛ: «I bolo lɔsama.» Kɛ́ k'a bolo lɔsama mingɛ, a bolo ka kɛnɛya.

¹¹ Wo lɔ, Falisilu ni seliya kalanmɔɔlu ka mɔnɛ bubale. Ai do ka taa ai kun bilin i ɲɔɔ ma, k'a lɔn ai yi min kɛ Isa la.

Isa ka aa keladen mɔɔ tan ni fila (12) ta teme

¹² Wo waate lɔ, Isa ka taa Aladaliya lɔ tini dɔ kɔkan. A do ka su bɛ kɛ Ala dalila.

¹³ Kɛnɛ bɔnin, a k'a kɔbiladennu kili ka mɔɔ tan ni fila (12) ta ai lɔ k'a fɔ ai ma ko keladennu:

¹⁴ Simɔn, Isa ka min tɔɔla ko Piyɛli, ani a dɔɔni Andele, Janguba ni Yohana, Filipe ni Batolomu,

¹⁵ Matiyu ni Tomasi, Alife denkɛ Janguba ni Simɔn (ai y'a fɔla min ma ko Fasokanuba),

¹⁶ Janguba denkɛ Judasi, ani Judasi Isekaliyɔti min ka Isa janva.

Isa ka jama ba kalan ani ka jangalotɔlu lakɛnɛya teme

¹⁷ Wo kɔ, Isa nu k'i jii tini la k'i lɔ gbɛkɛnɛ dɔ lɔ. A kɔbiladen siyama tɛɛ je ani jama ba minu bɔnin tɛɛ Jelusalɛmu, Jude koovi lɔ, ani Tili ni Sidɔn fannɔ kɔɔji dala.

¹⁸ Ai bɛ nanin tɛɛ k'ai tolomalɔ Isa la, ani ka kɛnɛya sɔlɔn k'ai bɔ aiya jangalolu lɔ. Mɔɔ minu tɔlɔyanin tɛɛ jinajuulu bolo, wolu fana ka kɛnɛya.

¹⁹ Jama bɛ t'i lɔjala k'ai bolo tuu Isa la, kamasɔlɔn fanga tɛɛ bɔla a lɔ ka jangalotɔ bɛ lakɛnɛya.

Mɔɔ minu yi duwawuden ne

²⁰ Isa k'i ɲa kaa a kɔbiladennu lɔ k'a fɔ ai yɛ, a vɛɛ: «Duwawuden ne àilu fandannilu le, kamasɔlɔn ài fɛ yi Ala ya masaya la.

²¹ Duwawuden ne ài le, kɔɔn yi àilu minu la yi ne, kamasɔlɔn ài kɛtɔ balo sɔlɔnna k'ai wasa. Duwawuden ne ài le, àilu minu yi kasila yi ne, kamasɔlɔn ài kɛtɔ jɛlɛla.

²² «Duwawuden ne ài le, ni mɔɔlu k'ài lagbeyaɲɛ, k'i ban ài lɔ, k'ài nɛnin, ani k'ài tɔɔyon fɔ ka bɛn Mɔɔnivin Tanin ya ko ma.

²³ Wo vɛ kɛla lon min, ài y'ài gban sawa boloma, kamasɔlɔn ài kɛtɔ balayi ba le sɔlɔnna haijɛnɛ. Kamasɔlɔn mɔɔ minu yi koyon wo suu kɛla ài la, wolu bemanu na wo ɲɔɔzii le kɛla kelalu la.

²⁴ Gbalo yi àilu nafolotiilu yɛ, kamasɔlɔn ài vɛ ban àiya josolajii sɔlɔnna.

²⁵ Gbalo yi ài yɛ, àilu minu fanin ne butu, kamasɔlɔn kɔɔn kɛtɔ gbala ài la. Gbalo yi ài yɛ, àilu minu yi jɛlɛla yi ne, kamasɔlɔn ài kasitɔ k'ài ɲaji bɔ.

²⁶ Gbalo yi ài yɛ, ni bɛ y'ài matɔɔla, kamasɔlɔn ai bemanu tɛɛ faɲafɔ kelalu matɔɔla ten ne.»

Ài y'ài juulu kanu

²⁷ «Kɛɛ àilu minu tolo malɔnin ǹ kumakan na yi ne, ǹ'a fɔla ài yɛ, ài y'ài juulu kanu ka kokein kɛ ài lagbeyaɲɛbalu yɛ.

²⁸ Mɔɔ minu y'ài daanna, ài yi duwawu kɛ wolu yɛ, ani ka Ala dali mɔɔlu yɛ minu juuyanin ài la.

²⁹ Ni mɔɔ k'i bolokini tolo te, i bolonunma tolo di a ma fana. Ni do mɔɔ k'iya faaniba mina i la, i kà a dansii, iya faani kɔlɔbila la a kɔkan fana.

³⁰ Ni mɔɔ k'i dali fen na, i y'a di a ma. Ni do mɔɔ k'i bolofen bɔ i bolo, i kà wo makili a la.

³¹ Ni ài y'a fɛ mɔɔlu yi ko min bɛ kɛ ài yɛ, àilu gbu yi wo suu dɔ kɛ ai yɛ.

³² «Ni ài k'ài niilu kanu dein, ài kɛtɔ nafa mindɛ sɔlɔnna wo lɔ? Hali julumbutɔlu y'ai niilu kanula.

³³ Mɔɔ minu yi kokein kɛla ài yɛ, ni ài ka kokein kɛ wolu le yɛ dein, ài kɛtɔ nafa mindɛ sɔlɔnna wo lɔ? Hali julumbutɔlu gbu yi wo ɲɔɔzii kɛla.

³⁴ Ni ài ka julu la mɔɔlu la, ài jii y'a ma k'a fɔ ko minu kɛtɔ a salala, ài kɛtɔ nafa mindɛ sɔlɔnna wo lɔ? Hali julumbutɔlu gbu yi julu lala i ɲɔɔ na, ai jii vɛ wo jate salako ma.

³⁵ Àilu koni, fɔ ài y'ài juulu kanu ka kokein kɛ ai yɛ. Ài yi julu la k'ài jii bɔ a salako kɔ. Wo vɛ kɛla, ài kɛtɔ balayi ba sɔlɔnna ka kɛ Masa Taala dennu le. Kamasɔlɔn ale le yi kokein kɛla mɔɔ bɛ yɛ, hali koɲumalɔnbalilu ni mɔɔ yonnu.

³⁶ Ài yi kɛ henandelu le, iwo ài Fa Ala yi henande le teme.»

Ài k'ài mɔɔɲɔɔlu ya kiti tɛɛ

³⁷ «Ài k'ài mɔɔɲɔɔlu ya kiti tɛɛ, fɔsa Ala kana àilu gbu kiti. Ài do k'ài mɔɔɲɔɔlu jobaliya, fɔsa Ala kana àilu gbu jobaliya. Ài y'ài mɔɔɲɔɔlu makoto, Ala fana kɛtɔ àilu gbu makotola.

³⁸ Ài y'ài mɔɔɲɔɔlu sɔ, Ala fana kɛtɔ àilu gbu sɔla. A do kɛtɔ àiya sumali kɛla kobɛn, ka àiya bɔlɔ lafa kpekpe, k'a lajaajaa, k'a dɔ kafon a kɔkan fɔɔ ka bɔn. Kamasɔlɔn ài yi sumali kɛla ài mɔɔɲɔɔlu yɛ teme, Ala fana kɛtɔ sumali kɛla ài yɛ ten ne.»

³⁹ Isa ka sana gbɛlɛ la ai yɛ kɔtunun, a vɛɛ: «A yi di? Jalasa ɲagbɛ yi kɛle a ɲagbɛ ɲɔɔ ɲabila le? Ai mɔɔ fila t'i ben diɲa lɔ?

⁴⁰ Kalannaden tɛ buɲa sɔlɔnna ka timin aa kalanmɔɔ la. Kɛɛ ni a ka aa kalan dafanin sɔlɔn, a yi kɛle aa kalanmɔɔ ɲɔɔzii le.

⁴¹ «A yi di vɛ i yi jilimuu lasaala i badenma ɲa ma, k'a talan i tɛ jilifɛlɛn yena min ile gbu ɲa ma?

⁴² Ni i tɛ jilifɛlɛn yena i jɛlɛkanu ɲa ma, i yi se a fɔla i badenma yɛ di: ‹I yi lɔ, ǹ'i jilimuu bɔ i ɲa ma›? Ile filangafo! Fɔ i yi jilifɛlɛn bɔ i jɛlɛkanu ɲa ma kunfɔlɔ le. Wo vɛ kɛla, i kɛtɔ yeni kɛla kobɛn ka jilimuu bɔ i badenma ɲa ma.»

Kɔlɔman yi lɔnna a den ne ma

⁴³ «Kɔlɔman kein tɛ se den kɛwon kɛla. Kɔlɔman yon fana tɛ se den kein kɛla.

⁴⁴ Mɔɔlu yi kɔlɔman lɔnna a den ne ma. Kamasɔlɔn mɔɔ tɛ lɛzɛn bɔla tazan na, i do tɛ toloden bɔla bin woninma la.

⁴⁵ Mɔɔ kein yi kokein ne kɛla, kamasɔlɔn wo yi bɔla a josokun kein ne lɔ. Kɛɛ do, mɔɔ yon yi koyon ne kɛla, kamasɔlɔn wo yi bɔla a josokun yon ne lɔ. Kamasɔlɔn mɔɔ josokun lafanin ko min na, a da yi wo le fɔla.»

Bonlɔba fila ma sana

⁴⁶ «Mindɛ y'a kɛla vɛ ài y'a fɔla m̀ ma ko ‹Kuntii, Kuntii,› k'a talan ài tɛ ǹ kumakannu labatola?

⁴⁷ Mɔɔ min yi nala m̀ ma ka ǹ kumakannu labato, ǹ'i se wo tii lala min ma, ǹ kɛtɔ wo le fɔla ài yɛ.

⁴⁸ A kɛyine iwo bonlɔba min na diɲa ba senna, ka aa bonjusii falakolo kɔkan. Kɔɔ ka fa ka se bon wo ma, kɛɛ bon ma jaajaa, kamasɔlɔn a lɔnin tɛɛ kobɛn.

⁴⁹ Kɛɛ mɔɔ min yi ǹ kumakannu mɛnna, a do tɛ ai labatola, wo tii kɛyine iwo bonlɔba min ma diɲa sen aa bonjusii waate. Kɔɔfa ka se bon wo ma mingɛ, a do ka te telemanin tɛtɛ!»