Luka 5 - Ala Ya Salatikan Kula Kitabu

Isa kɔbiladen kunfɔlɔlu

¹ Lon dɔ, Isa lɔnin ka to Genesalɛti kɔɔ kawun na, jama ba k'i madon a la fɔɔ k'a lɔgbalin, fɔsa ai y'ai tolomalɔ Ala kumakan na.

² A do ka kulun fila ye kɔɔ kawun na, kɔɔsɔmɔnilu tɛɛ vɛ minu to je, ai vɛ aiya jɔlu makola.

³ Isa do ka don kulun kelen kɔnɔ, min tɛɛ Simɔn ta le, k'a fɔ a yɛ ko a yi kulun mabɔ gbele la dɔni ne. Wo kɛ, a k'i sii ka mɔɔlu kalan damina.

⁴ A wɔlinin kumala, a vɛɛ Simɔn yɛ: «Kulun lataa duun fanfɛla lɔ, ka àiya jɔlu lajii jɛɛ minako lɔ.»

⁵ Kɛɛ Simɔn do vɛɛ a yɛ: «Kalanmɔɔ, mɔ na su banna jɛɛ ɲininna, kɛɛ mɔ do ma foi mina! Kɛɛ ka bɛn iya kuma ma, ǹ kɛtɔ jɔlu lajiila kɔtunun.»

⁶ Ai ka wo kɛ mingɛ, ai ka jɛɛ siyama mina, haan fɔɔ aiya jɔlu tɛɛ fala bolo le ma.

⁷ Ai do k'ai baaleɲɔɔlu kili, minu tɛɛ dɔ kulun kɔnɔ, ko ai yi na, ai y'ai madɛmɛn. Wolu ka na ka kulun fila bɛ lafa jɛɛ siyama la, haan fɔɔ kulunnu tɛɛ jii bolo le ma kɔɔ kɔlɔ.

⁸ Simɔn Piyɛli ka wo ye mingɛ, a v'i mabilinna Isa sen kɔlɔ k'a fɔ a yɛ, a vɛɛ: «Ǹ Kuntii, i i majaanya ǹ na, kamasɔlɔn julumbutɔ le ǹ ne.»

⁹ A ka wo fɔ kamasɔlɔn ale ni a dafɛmɔɔlu kawakoyanin tɛɛ jɛɛ minako lɔ.

¹⁰ A baalekɛɲɔɔ minu tɛɛ Zebede denkɛlu le, Janguba ni Yohana, wolu fana ka kawakoya. Wo lɔ, Isa vɛɛ Simɔn yɛ: «I kà siyan. Ka ta bi ma, i yi jɛɛ ɲininna teme, ǹ kɛtɔ i kɛla mɔɔɲininba le ten ne.»

¹¹ Wo ma, ai ka se kawun na mingɛ aiya kulunnu le, ai ka ko bɛ to je ka bila Isa kɔ.

Isa ka kunatɔ dɔ lasɛnɛya teme

¹² Lon dɔ, Isa ka to so ba wo dɔ la, kɛ́ dɔ ka na a ma, kuna tɛɛ min fan bɛ ma. A ka Isa ye mingɛ, a v'a ten bilinna a sen kɔlɔ k'a madiya, a vɛɛ: «Ǹ Kuntii, ni i ka diɲa, i yi sene ǹ lasɛnɛyala.»

¹³ Isa k'a bolo lɔsama k'a tuu a la k'a fɔ a yɛ, a vɛɛ: «M̀'ɛ diɲa, i la yi sɛnɛya.» Wo fɔ Isa bolo, kɛ́ ya kuna ka basi telemanin.

¹⁴ Isa do k'a jamali, a vɛɛ: «I kà min ko fɔ mɔɔ suu suu yɛ. Kɛɛ fɔ i yi taa i jɛlɛ jiya salakalaseba la, ka niilifen bɔ iwo Nabi Musa k'a jamali teme. Wo le kɛtɔ a jiyala bɛ la ko i la vɛ sɛnɛya.»

¹⁵ Wo bɛ n'a kɛ, Isa mangutu ka jɛzɛn fan bɛ lɔ ka timin a kunfɔlɔ ta la. Mɔɔ siyama tɛɛ nala k'ai tolomalɔ a la, ani ka kɛnɛya sɔlɔn k'ai bɔ aiya jangalolu lɔ.

¹⁶ Kɛɛ waate dɔlu lɔ, Isa tɛɛ a mabɔla ai la, ka taa Ala daliya lɔ dingila lɔkolonnu lɔ.

Isa ka falifaamatɔ dɔ lakɛnɛya teme

¹⁷ Lon dɔ, Isa ka to mɔɔlu kalanna, Falisi dɔlu ni seliya kalanmɔɔ dɔlu siinin tɛɛ je, minu tɛɛ vɛ bɔ Galile ni Jude koovi solu bɛ la, ani Jelusalɛmu fana. Ado mɔ Tii ya seetiiya tɛɛ Isa fɛ mɔɔlakɛnɛyako lɔ.

¹⁸ Isa ka to mɔɔlu kalanna je, mɔɔ dɔlu ka na falifaamatɔ dɔ le, min lanin tɛɛ dɛvɛ kɔkan. Ai tɛɛ a fɛ k'a ladon bon kɔnɔ k'a lala Isa ɲakɔlɔ,

¹⁹ kɛɛ ai ma donɲa sɔlɔn ka bɛn jama ma. Wo lɔ, ai ka jɛlɛ bon kɔkan ka woo bila je, ka jangalotɔ ni aa dɛvɛ lajii Isa ɲakɔlɔ jama tɛma.

²⁰ Isa k'aiya limaniya ye mingɛ, a vɛɛ jangalotɔ yɛ: «Ile kɛ́, iya julumbulu lɔ vɛ koto.»

²¹ Seliya kalanmɔɔlu ni Falisilu v'a fɔla ai miliya lɔ, ai vɛɛ: «Mɔɔ suu mindɛ le min ne, min yi Alalafeyakan fɔla tan? Jene yi se julumbulu lɔkotola ni Ala tɛ?»

²² Kɛɛ Isa tɛɛ k'ai miliya lɔn. A do vɛɛ ai yɛ wo lɔ: «Mindɛ lɔ miliya suu wo y'ài josokun nɔ?

²³ A yi di? K'a fɔ: ‹Iya julumbulu lɔ vɛ koto,› niwotɛ k'a fɔ: ‹I wuli i yi taama,› wo fila lɔ, mindɛ le fɔ diyanin?

²⁴ Kɛɛ do, fɔ ài y'a lɔn a see yi Mɔɔnivin Tanin yɛ ka julumbulu lɔkoto dunuɲa.» Wo fɔ Isa bolo, a vɛɛ falifaamatɔ yɛ: «I wuli, i iya dɛvɛ ta ka taa iya bon na.»

²⁵ A do v'i wulila telemanin jama bɛ ɲakɔlɔ, ka aa dɛvɛ ta ka taa aa bon na, a vɛ Ala tanula.

²⁶ Mɔɔ bɛ ka kawakoya bubale. Ai do tɛɛ Ala tanula siyan boloma, ai vɛɛ: «Mɔ na ko makawanilu yena bi!»

Isa ka Levi kili teme

²⁷ Wo kɔ, Isa bɔtɔla je, a ka niisɔɔnminaba dɔ siinin ye niisɔɔnminaya lɔ, min tɔɔ tɛɛ ko Levi. Isa vɛɛ a yɛ: «Na, i yi bila ǹ kɔ.»

²⁸ A do k'i wuli, ka ko bɛ to je, ka bila Isa kɔ.

²⁹ Wo kɔ, Levi ka feeti ba kɛ Isa yɛ aa bon na. Niisɔɔnminaba siyama ani mɔɔ gbɛlɛlu ka na k'ai sii Isa ni a kɔbiladennu fɛ dɔnnikɛya lɔ.

³⁰ Kɛɛ Falisilu ni seliya kalanmɔɔlu tɛɛ dakɔlɔkuma fɔla Isa kɔbiladennu yɛ, ai vɛɛ: «Mindɛ lɔ ài yi dɔnni kɛla k'i min niisɔɔnminabalu ni julumbutɔlu fɛ?»

³¹ Isa do k'ai javi, a vɛɛ: «Kɛnɛyabatɔ mako tɛ basibɔba la, mafɔ jangalotɔ.

³² M̀ ma na mɔɔ telenninu kiliko lɔ, mafɔ julumbutɔlu, fɔsa ai y'ai dajoo mafalin.»

Ai ka Isa maɲininga ka bɛn sundonko ma teme

³³ A dɔlu k'a fɔ Isa yɛ, ai vɛɛ: «Yaya kɔbiladennu ani Falisilu kɔbiladennu, wolu deinin sundonna ka Ala dali. Kɛɛ i kɔbiladennu do yi dɔnni kɛla k'i min waate bɛ.»

³⁴ Isa k'ai javi, a vɛɛ: «A yi di? Ka kɔɲɛfa to a tɔvalu dafɛ kɔɲɛmalɔ lɔ, jalasa i yi sene a tɔvalu lɔla sundonna?

³⁵ Kɛɛ lon dɔ natɔ, mɔɔlu kɛtɔ kɔɲɛfa bɔla ai tɛma. Wo lon ne, ai kɛtɔ sundonna.»

³⁶ Isa ka sana gbɛlɛ la ai yɛ kɔtunun, a vɛɛ: «Mɔɔ tɛ faani kula kulunkulun tala ka faani kɔlɔ labalin a le. Niwotɛ, faani kula kɛtɔ faani kɔlɔ masamana k'a fala. A falaɲa kɛwonyatɔle ka timin a kunfɔlɔ ta la, ado faani kula kulunkulun tɛnala bɛnna faani kɔlɔ la.

³⁷ Wo boloɲa kelen ma, mɔɔ tɛ gbɛ kula kɛla gbɛbɔlɔ kɔlɔ lɔ. Niwotɛ, a fununtɔ ka bɔlɔ te, ka gbɛ bɛ bɔn.

³⁸ Gbɛ kula ka kan ka kɛ gbɛbɔlɔ kula le lɔ.

³⁹ Ado ni mɔɔ ka ban gbɛ kɔlɔ minna, a kula lɔɔ tɛ gba a la feu! A a fɔle, ko: ‹Gbɛ kɔlɔ le fisayanin.› »