Luka 24 - Ala Ya Salatikan Kula Kitabu

Isa k'i wuli ka bɔ saya lɔ teme

¹ Lailon sɔɔmadanina, mosolu vɛ taala kabulu ma tulu sumadiyanin ni latikɔlɔn ne, ai na minu lɔbɛnna.

² Ai do k'a ye ko kawa ba wo ma vɛ kulukulu ka bɔ kabulu da la.

³ Ai ka don a kɔnɔ, kɛɛ ai ma mɔ Kuntii Isa fuleni ye.

⁴ Ai ka to wo kɔnɔlɔfili lɔ, telemanin kɛ́ fila ka bɔ gbɛ la k'i lɔ ai dafɛ, faani gbɛ pepe vɛ ai kanna.

⁵ Mosolu ka siyan bubale, k'ai ten bilin duu ma. Kɛ́ fila wolu k'a fɔ ai yɛ, ai vɛɛ: «Mindɛ lɔ ài yi niima ɲininna fulenilu tɛma?

⁶ A tɛ jan. A v'i wuli! Ài y'ài hangili to a kumakan nɔ, a na min fɔla ài yɛ, a tɛɛ ài tɛma waate min Galile,

⁷ ko ale Mɔɔnivin Tanin ka kan ka don julumbutɔlu bolo fɔsa ai y'a gbaan kɔlɔman ma k'a faa. Kɛɛ tele fila a sawana, a wulitɔ ka bɔ saya lɔ.»

⁸ Wo fɔ, mosolu hangili ka bila Isa kumakan nɔ.

⁹ Ai do vɛ seikɔla ka bɔ kabulu dala ka taa ko wo bɛ ɲafɔ Isa ya keladen mɔɔ tan ni kelen (11) yɛ, ani mɔɔ tɔ bɛ.

¹⁰ Moso minu ka dandɛɛli kɛ Isa ya keladennu yɛ, wolu le tɛɛ Mɔyamu Magidalaka ni Yohani ni Janguba ba Mɔyamu, ani moso dɔgbɛlɛlu.

¹¹ Kɛɛ keladennu k'ai kumakan jate kuma fuun ne le, ai do ma la ai la feu.

¹² Kɛɛ wo bɛ n'a kɛ, Piyɛli v'i wulila ka bɔli ka taa kabulu dala. A do k'i majii ka kabulu lɔfɛlɛn, kɛɛ a ma foi ye a lɔ, fɔ kasange dein. A do ka seikɔ luu ma kawakoya boloma ka bɛn ko min kɛnin.

Isa ni a kɔbiladen fila k'i ɲɔɔmɛn teme Emayusi siya la

¹³ Wo lon kelen, Isa kɔbiladen fila tɛɛ taala soni dɔ la, min tɔɔ yi ko Emayusi. Ka bɔ Jelusalɛmu ka se je, wo yi lɛlɛ fila jate taama ne le.

¹⁴ Ko min bɛ timinnin tele fila wo lɔ, ai tɛɛ balola wo kan.

¹⁵ Ai ka to balo ni sɔsɔyalila, Isa gbu k'i madon ai la ka taama ai fɛ.

¹⁶ Ai ka a ye ai ɲa la, kɛɛ Ala k'a kɛ ai ɲanɔ ma to a ma.

¹⁷ Isa do vɛɛ ai yɛ: «Ài yi mindɛ balola yi ne siya kɔkan?» Ai do k'i lɔ, ai ɲakɔlɔ silinin vɛ.

¹⁸ Ai lɔ kelen, min tɔɔ tɛɛ ko Kilopasi, wo k'a javi, a vɛɛ: «Jalasa ile kelen ne lona le Jelusalɛmu, min m'a lɔn ko minu timinnin tele fila min nɔ?»

¹⁹ A k'ai maɲininga, a vɛɛ: «Ko mindɛlu?» Ai do vɛɛ a yɛ: «Ko minu kɛnin Nazalɛtika Isa la, min tɛɛ kumala ani ka kawanankolu kɛ seetiiya boloma, k'a jiya Ala ni mɔɔlu bɛ ɲakɔlɔ ko kela le tɛɛ a le.

²⁰ Maa salakalase kuntiibalu ni ɲamɔɔlu na a donna Lɔmukalu bolo, ko ai y'a jobaliya k'a faa. Wo le k'a kɛ, ai k'a gbaan kɔlɔman ma.

²¹ Mɔ jei siinin tɛɛ ale le la Bani Isilankalu kunmakako lɔ, kɛɛ ko wolu kɛnin vɛ, a tele sawana le ne.

²² Wo bɛ n'a kɛ, moso dɔlu yi mɔ tɛma minu na mɔ kɔnɔlɔfilila bubale. Ai vɛɛ ko ai taanin kabulu dala bi sɔɔmadanina,

²³ kɛɛ ai ma a fuleni ye je. Ai do k'ai kɔsei k'a fɔ mɔ yɛ ko ai na mɛlɛka dɔlu yena, minu n'a fɔla ai yɛ ko Isa y'a nii la.

²⁴ Wo le n'a kɛla, mɔ taamaɲɔɔ dɔlu fana ka taa kabulu dala ka kolu bɛ ye iwo mosolu n'a fɔla teme. Kɛɛ ai do ma Isa ye.»

²⁵ Wo fɔ ai bolo, Isa do vɛɛ ai yɛ: «Àilu hangilindannu! Ài lasumayine limaniyala kelalu ya kumakan fɔnin bɛ ma!

²⁶ Jalasa kelalu m'a sɛvɛ ko Masa Tɔɔmasenin ka kan ka tɔlɔya minu masɔlɔn kunfɔlɔ le, jani a yi don aa magbiliyali lɔ?»

²⁷ Wo kɔ, kuma minu sɛvɛnin kitabulu kɔnɔ ka bɛn a ma, Isa vɛ wo bɛ ɲafɔla ài yɛ, ka damina Nabi Musa ya Taulati ma ka sii kela dɔgbɛlɛlu ya kitabulu bɛ la.

²⁸ Ai masulunyanin soni wo la, ai tɛɛ taala tɛɛminja, Isa k'a kɛ iwo a timintɔle.

²⁹ Kɛɛ ai k'a fɔ a yɛ k'a magbeleya, ai vɛɛ: «I jaani, i yi si mɔ fɛlɔ. Tele ma vɛ jii. Su kotɔle.» Wo kɛ, Isa ka don bon na ai fɛ ko a yi si je.

³⁰ Ai k'i sii dɔnnikɛya lɔ mingɛ, a ka bulu ta ka balika bɔ Ala yɛ, k'a lɔkalikali k'a di ai ma.

³¹ Wo kɛ, ai ɲa la ka ka, k'a lɔn ko Isa le. Kɛɛ a ka tunun ai ma telemanin.

³² Ai do k'a fɔ i ɲɔɔ yɛ, ai vɛɛ: «A tɛɛ kitabulu kɔlɔ ɲafɔla mɔ yɛ siya la waate min nɔ, mɔ kɔnɔlɔdiyanin tɛɛ, kɛlɛ?»

³³ Ai mɔɔ fila v'i wulila telemanin ka seikɔ Jelusalɛmu, ka keladen mɔɔ tan ni kelen (11) ladɛnnin talan je, ani ai taamaɲɔɔlu.

³⁴ Keladennu k'a fɔ mɔɔ fila wolu yɛ, ai vɛɛ: «Tuɲa le, mɔ Kuntii v'i wuli! A do v'a jɛlɛ jiya Simɔn na.»

³⁵ Wo kɛ, kɛ́ fila wolu k'a ɲafɔ ai yɛ min kɛnin ai la siya la, ani ai ɲanɔ ka to Isa ma teme bulu lɔkali waate.

Isa k'a jɛlɛ jiya a kɔbiladennu la teme

³⁶ Ai ka to ko wolu ɲafɔla, Isa gbu ka na k'i lɔ ai tɛma, k'a fɔ ai yɛ, a vɛɛ: «Hɛlɛ yi kɛ ài yɛ.»

³⁷ Ai bɛ joso ka bɔ ka siyan bubale. A tɛɛ ai kɔnɔ ko sugboloni le.

³⁸ Isa do vɛɛ ai yɛ: «Mindɛ kɛnin ài yi siyanna? A yi di vɛ ài yi sikala ài josokun nɔ?

³⁹ Ài yi m̀ bolo ni ǹ sennu lasaa, fɔsa ài y'a lɔn ko ǹe gbugbu le! Ài y'ài bolo tuu ǹ na ka ǹ lasaa, kamasɔlɔn bu tɛ sugboloni ma ani kolo tɛ a lɔ, iwo ài yi ǹ yena teme.»

⁴⁰ Wo fɔ Isa bolo, a k'a bololu ni a sennu jiya ai la.

⁴¹ Ai ka to sikala sawa boloma k'ai kawakoya, a vɛɛ ai yɛ: «Dɔnnifen dɔ y'ài bolo jan?»

⁴² Wo fɔ, ai ka jɛɛ mɔnnin dɔ di a ma.

⁴³ A do ka wo ta k'a dɔn ai bɛ ɲakɔlɔ.

⁴⁴ Wo kɔ, a vɛɛ ai yɛ: «Ǹ tɛɛ ko minu le fɔla ài yɛ mɔ tɛɛ i ɲɔɔ fɛ waate min nɔ, ǹ ko, kuma minu bɛ sɛvɛnin ka bɛn m̀ ma Nabi Musa ya Taulati ni Zabuli lɔ, ani kela dɔgbɛlɛlu ya kitabulu lɔ, fɔ wolu bɛ ma yi fa.»

⁴⁵ A do k'ai hangili laka, fɔsa ai tɛɛ se kitabulu kɔlɔ ɲayena.

⁴⁶ A k'a fɔ ai yɛ kɔtunun, a vɛɛ: «A sɛvɛnin ten ne ko Masa Tɔɔmasenin kɛtɔ tɔlɔyala, kɛɛ a tele sawana lon, a wulitɔ ka bɔ saya lɔ,

⁴⁷ ani aa samakan ka bɛn mɔɔlu dajoo mafalinko ma aiya julumbulu lɔkotoko lɔ, wo la ka kan ka se siboloma bɛ ma a tɔɔ lɔ, ka damina Jelusalɛmu ma.

⁴⁸ Àilu gbu le ko minu masele le.

⁴⁹ Ǹ Fa na min lahedi tala ài yɛ, ǹ kɛtɔ wo lanala ài ma. Kɛɛ fɔ ài yi to Jelusalɛmu jan haan fɔɔ seetiiya wo la yi jii ài kɔkan ka bɔ haijɛnɛ.»

Isa kɔlɔtako ka taa haijɛnɛ

⁵⁰ Wo kɔ, a ka bɔ so kɔnɔ ai le ka taa se haan fɔɔ Betani fannɔ. A do k'a bolo fila kɔlɔta ka duwawu kɛ ai yɛ.

⁵¹ A ka to duwawu kɛla ai yɛ, a kɔlɔ ka ta ka bɔ ai tɛma ka jɛlɛ sangbolo lɔ.

⁵² Ai do ka a bato ka ban ka seikɔ Jelusalɛmu sawa boloma.

⁵³ Ai do tɛɛ taala lɔhɔlɔmabonba la ka Ala tanu waate bɛ.