Luka 23 - Ala Ya Salatikan Kula Kitabu

Ai ka taa Isa le Pilati fɛlɔ teme

¹ Wo kɔ, jama bɛ v'i wulila ka taa Isa le Pilati fɛlɔ.

² Ai do v'a jalakila, ai vɛɛ: «Mɔ na kɛ́ min yena maa mɔɔlu lafilila, k'ai dansii niisɔɔn salako la Lɔmu masakɛba ma. A do y'a fɔla a jɛlɛ ma ko Alimasihu, masakɛ koni.»

³ Wo lɔ, Pilati k'a maɲininga, a vɛɛ: «Ile le Jahudiyalu ya masakɛ le?» Isa k'a javi, a vɛɛ: «Ile gbu vɛ wo fɔ.»

⁴ Wo kɛ, Pilati k'a fɔ salakalase kuntiibalu ni jama bɛ yɛ, a vɛɛ: «M̀ ma ko ko ye kɛ́ min ya ko lɔ min yi kɛ a latɔn kun ne.»

⁵ Kɛɛ ai ka to a mabamala, ai vɛɛ: «A yi mɔɔlu lamulutula aa kalan ne Jude koovi fan bɛ lɔ. A na a daminala Galile ka na se haan fɔɔ jan.»

Ai ka taa Isa le Helodi fɛlɔ teme

⁶ Pilati ka kuma wo mɛn mingɛ, a k'ai maɲininga, a vɛɛ: «Jalasa kɛ́ min yi Galileka le le?»

⁷ Pilati k'a lɔn mingɛ ko Isa bɔnin Helodi ya koovi le lɔ, a k'a lataa Helodi ma, min tɛɛ Jelusalɛmu wo waate lɔ.

⁸ Helodi ka Isa ye mingɛ, a ka sawa kosɛvɛ, kamasɔlɔn a tɛɛ v'a mangutu mɛn, ani ka ta waate jaan ma, a yenlɔɔ tɛɛ a la fɔsa wo tɛɛ kawananko dɔ kɛ a ɲana.

⁹ Wo lɔ, a vɛ ɲiningali siyama kɛla Isa la, kɛɛ wo ma a dɔ javi.

¹⁰ Salakalase kuntiibalu ni seliya kalanmɔɔlu k'i lɔ je ka to a jalakila bakɛ.

¹¹ Hali Helodi gbu ni aa sɔdasilu tɛɛ jɛlɛbɔla a lɔ, k'a lafeya. Ai do ka masayafaani bila Isa kanna ka ban k'a lasei Pilati fɛlɔ.

¹² Pilati ni Helodi gbeyayine tɛɛ i ɲɔɔ yɛ kɔlɔkɔlɔ le, kɛɛ ai ka diya wo lon kelen ne.

Jahudiyalu ka Isa faako jatesii teme

¹³ Wo kɛ, Pilati ka salakalase kuntiibalu ni ɲamɔɔlu ani jama bɛ ladɛn.

¹⁴ A vɛɛ ai yɛ: «Ài nanin kɛ́ min ne ǹ fɛ, k'a fɔ ko a yi mɔɔlu lafilila. Wo ma, ǹ n'a maɲiningala ài ɲakɔlɔ mingɛ, ǹ n'a yena ko ài jo tɛ a jalakiko suu suu lɔ.

¹⁵ Helodi fana ma ko ye min yi kɛ a latɔn kun ne, kamasɔlɔn a v'a laseikɔ mɔ ma. Ài y'a ye, a ma ko kɛ min yi kɛ a faa kun ne.

¹⁶ Wo ma, ǹ kɛtɔ a gbasila k'a bila.»

¹⁸ Kɛɛ jama bɛ vɛ gbanɔla kelen ne, ai vɛɛ: «Kɛ́ min faa, i yi Balabasi bila mɔ yɛ!»

¹⁹ Balabasi tɛɛ vɛ bila kaso la ka bɛn sokɔnɔmɔɔlu lamulutuko ma, ani mɔɔfaako.

²⁰ Pilati tɛɛ a fɛ ka Isa bila. Wo le k'a kɛ, a ka jama madiya kɔtunun.

²¹ Kɛɛ ai ka to gbanɔla, ai vɛɛ: «A gbaan kɔlɔman ma! A gbaan kɔlɔman ma!»

²² Pilati k'ai maɲininga a siɲa sawana lɔ, a vɛɛ: «Ǹ'a faa mindɛ lɔ? A na koyon suu mindɛ le kɛla? M̀ ma faa kun ye a la. Wo ma, ǹ kɛtɔ a gbasila k'a bila.»

²³ Kɛɛ ai k'a mabama ka to gbanɔla ko Isa yi gbaan kɔlɔman ma haan fɔɔ ai ka Pilati nɔ.

²⁴ Wo lɔ, min lɔɔ tɛɛ ai la, Pilati k'a latɛɛ ko a kɛtɔ wo kɛla ai yɛ.

²⁵ Ai tɛɛ mɔɔ min fɛ, min bilanin tɛɛ kaso la ka bɛn mɔɔlamulutuko ni mɔɔfaako ma, Pilati ka wo bila, ka ban ka Isa don ai bolo, fɔsa ai y'ai sawonanko kɛ a la.

Ai ka Isa gbaan kɔlɔman ma teme

²⁶ Ai taatɔla Isa le, ai k'i ɲɔɔmɛn Silɛnika kɛ́ dɔ le, min tɛɛ bɔla sɛnɛ lɔ, min tɔɔ tɛɛ ko Simɔn. Sɔdasilu do ka Simɔn mina ka Isa gbaankɔlɔman la a kanma, ko a yi bila Isa kɔ.

²⁷ Jama ba tɛɛ ai kɔ. Moso dɔlu tɛɛ je, ai vɛ ai sisi magbasila niilafin boloma, ka kasi Isa ya ko lɔ.

²⁸ Isa do k'i kɔdon k'a fɔ ai yɛ, a vɛɛ: «Jelusalɛmu mosolu, ài kà kasi ǹa ko lɔ, mafɔ àilu gbu ni ài dennu ya ko lɔ.

²⁹ Kamasɔlɔn waate dɔ sentɔ, ai kɛtɔ a fɔla ko: ‹Moso malɔninnu, ani minu ma den sɔlɔn ba bene, ani minu ma sin di ba den ma, ko wolu le duwawuden ne.›

³⁰ Wo waate, mɔɔlu kɛtɔ a fɔla tinilu yɛ, ai vɛɛ: ‹Ài yi ben mɔ kɔkan›, ani k'a fɔ kooninnu yɛ, ai vɛɛ: ‹Ài yi mɔ doon!›

³¹ Kamasɔlɔn ni ai yi ko suu min kɛla kɔlɔman kɛnɛ la, kɔlɔman jalan do?»

³² Wo waate lɔ, ai ka taa koyonkɛba fila le fana fɔsa ai yi wolu ni Isa faa kelen ne.

³³ Ai senin dingila dɔ lɔ, ai y'a fɔla min ma ko Kunkolo Dingila, ai ka Isa gbaan kɔlɔman ma, ani koyonkɛba wolu: a kelen tɛɛ a bolokini fannɔ, a tɔ kelen tɛɛ a bolonunma fannɔ.

³⁴ Isa do vɛɛ: «Ǹ Fa, i y'ai makoto, kamasɔlɔn ai m'a lɔn ai yi min kɛla.» Wo kɔ, sɔdasilu ka kalabila kɛ ka bɛn aa faanilu lɔtalako ma i ɲɔɔ wotɛ.

³⁵ Jama lɔnin ka to kolasaala, Jahudiya ɲamɔɔlu tɛɛ jɛlɛbɔla Isa lɔ, ai vɛɛ: «A na dɔlu lakisila. Ni ale le Masa Tɔɔmasenin ne ani Ala ya Mɔɔ Tanin, a a jɛlɛ lakisi vɛ!»

³⁶ Sɔdasilu gbu tɛɛ a lafeyala ka gbɛ kumunnin dɔ telen a la.

³⁷ Ai do vɛɛ a yɛ: «Ni ile le Jahudiyalu ya masakɛ le, i i jɛlɛ lakisi vɛ!»

³⁸ Ai ka sɛvɛli dɔ kɛ Isa kunma wala ma, ko: «Min ne Jahudiyalu ya masakɛ le.»

³⁹ Koyonkɛba fila minu gbaannin tɛɛ Isa dafɛ, ai lɔ kelen tɛɛ a jɛvɛla, a vɛɛ: «Ile le tɛ Masa Tɔɔmasenin ne? I i jɛlɛ lakisi vɛ, ka ǹu fana lakisi!»

⁴⁰ Kɛɛ a tɔ kelen ka dɔ wo makuma, a vɛɛ: «I tɛ siyanna Ala ɲa? I m'a lɔn mɔ bɛ yi kolatɔn kelen ne kɔlɔ?

⁴¹ Ǹu ni kolatɔn min kaanyine ka bɛn mɔ kɛkolu ma, kɛɛ do, kɛ́ min ma koyon foi kɛ.»

⁴² A do vɛɛ: «Isa, i vɛ nala iya masaya lɔ waate min nɔ, i i hangili to ǹ nɔ.»

⁴³ Isa k'a fɔ a yɛ, a vɛɛ: «Ǹ'i tuɲa fɔ i yɛ, bi i kɛtɔ ǹ fɛ Ala ya kunnadiyaso la.»

Isa ka sa teme

⁴⁴ Telelatelen waate senin, divi ka don jamana fan bɛ lɔ lɛlɛ sawa kɔlɔ.

⁴⁵ Tele tɛɛ tɛ mɛnɛnna, ado lɔhɔlɔmabonba daladɛnfaani ka fala a tɛma fila le.

⁴⁶ Isa do k'a kan labɔ bakɛ, a vɛɛ: «Ǹ Fa, ǹ'i ǹ nii laseila i ma yi ne.» Wo fɔ a bolo, a ka sa.

⁴⁷ Sɔdasi kuntii ka ko wolu ye mingɛ, a vɛ Ala tanula k'a fɔ, a vɛɛ: «Kɛ́ min tɛɛ mɔɔ telennin ne le feu!»

⁴⁸ Kolɔgbɛnbalu bɛ ka kokɛnin wolu ye mingɛ, ai ka seikɔ aiya luulu ma, ai vɛ ai sisi magbasigbasila josomakasi boloma.

⁴⁹ Isa lɔnbalu bɛ ka to poon kolasaala, ani moso minu bilanin tɛɛ a kɔ ka bɔ Galile.

Ai ka Isa sudoon teme

^50-51 Wo k'a talan kɛ́ dɔ tɛɛ je, min tɔɔ tɛɛ ko Jusufu, ka bɔ Jahudiyalu ya so dɔ la, ai y'a fɔla min ma ko Alimate. Mɔɔ ɲuma ni telenmande le tɛɛ a le, min tɛɛ Ala ya masaya waate makɔnɔna. A do tɛɛ kititɛɛjama ɲamɔɔ dɔ le le, kɛɛ ai na ko min latɛɛla ka bɛn Isa ma ani min kɛnin a la, a ma diɲa wo suu suu ma.

⁵² A do ka taa Pilati fɛlɔ, ka Isa fuleni madali a sudoonko lɔ.

⁵³ Wo kɔ, a ka fuleni lajii k'a bɔ kɔlɔman ma k'a kasange, ka ban k'a sudoon kawawoo kabulu dɔ lɔ, mɔɔlu na min senna, su tɛɛ ma don ba min kɔnɔ bene.

⁵⁴ Wo lon tɛɛ Nɔningɛlon ɲasiilon ne le, ado Nɔningɛlon tɛɛ damina bolo le ma.

⁵⁵ Moso minu tɛɛ Isa malɔla ka ta a bɔ waate ma Galile, wolu ka taa Jusufu fɛ sudoonya lɔ ka kabulu ye, ani a sudoonɲa.

⁵⁶ Wo lɔ, ai vɛ seikɔla ka tulu sumadiyanin ni latikɔlɔn lɔbɛn Isa fuleni yɛ. Ka bɛn seliya ma, ai ma baale kɛ Nɔningɛlon.