Luka 22 - Ala Ya Salatikan Kula Kitabu

Isa juulu k'a minako ɲaɲinin teme

¹ Bulufununbali Selilon ma tɛɛ vɛ sulunya, ai y'a fɔla min ma ko Timinkunna Selibɔ.

² Wo ma, salakalase kuntiibalu ni seliya kalanmɔɔlu tɛɛ Isa faako ɲaɲininna doon nɔ, kamasɔlɔn ai tɛɛ siyanna jama ɲa.

³ Wo waate, Soitana ka don Judasi josokun nɔ, ai y'a fɔla min ma ko Isekaliyɔti, min tɛɛ Isa ya keladen mɔɔ tan ni fila (12) dɔ le.

⁴ Judasi do ka taa salakalase kuntiibalu ma, ani lɔhɔlɔmabonba lakana kuntiibalu, ka kuma ai fɛ ka bɛn Isa donko ma ai bolo.

⁵ Ai do ka sawa wo lɔ, ka lahedi ta a yɛ ko ai kɛtɔ wɔli dila a ma.

⁶ Judasi do ka diɲa wo ma. Ka ta wo waate ma, Judasi tɛɛ Isa donko ɲaɲininna ai bolo jama ɲina ma.

Isa kɔbiladennu ka Timinkunna Selilon dɔnnifen lɔbɛn teme

⁷ Bulufununbali Selilon ka se, Jahudiyalu tɛɛ ka kan ka saa bolan kannatɛɛ lon min na ka Timinkunna Selilon salaka bɔ.

⁸ Wo lɔ, Isa ka Piyɛli ni Yohana kelaya, a vɛɛ: «Ài yi taa Timinkunna Selilon dɔnnifen lɔbɛn mɔ yɛ.»

⁹ Ai do k'a maɲininga, ai vɛɛ: «I y'a fɛ m'a lɔbɛn mineja?»

¹⁰ Isa vɛɛ ai yɛ: «Ài vɛ donna so kɔnɔ, ài kɛtɔ ài ɲɔɔmɛnna kɛ́ dɔ le, jidaa yi min kun. Ài yi bila a kɔ. A vɛ donna bon min na,

¹¹ ài y'a fɔ lutii wo yɛ, ài vɛɛ: ‹Kalanmɔɔ bolo ko a jiyabon yi min ne, ale ni a kɔbiladennu kɛtɔ Timinkunna Selilon dɔnni kɛla tɛɛminja?›

¹² Kɛ́ wo kɛtɔ sangaso sanmabon ba dɔ jiyala ài la min lɔbɛnnin kobɛn. Ài yi dɔnnifen lɔbɛn woja.»

¹³ Wo fɔ, Piyɛli ni Yohana ka bɔ je ka kolu talan iwo Isa k'a fɔ ai yɛ teme. Ai do ka Timinkunna Selilon dɔnnifen lɔbɛn je.

Mɔ Tii ya dɔnni laban

¹⁴ A waate senin, Isa ni aa keladennu k'i sii dɔnnikɛya lɔ.

¹⁵ A do vɛɛ ai yɛ: «A lɔɔ tɛɛ ǹ na bubale ka Timinkunna Selilon dɔnni min kɛ ài fɛ jani ǹ'i tɔlɔya.

¹⁶ Kamasɔlɔn ǹ'a fɔ ài yɛ, ǹ tɛnala dɔnni min suu kɛla butu, haan fɔɔ a kɔlɔ ma vɛ fala Ala ya masaya lɔ.»

¹⁷ Wo fɔ, a ka jiyafɛ ta ka balika bɔ Ala yɛ. A do vɛɛ ai yɛ: «Ài kelenkelenna bɛ y'a ta k'a dɔ min a lɔ.

¹⁸ Kamasɔlɔn ǹ'a fɔ ài yɛ, ǹ tɛnala lɛzɛnji minna butu, haan fɔɔ Ala ya masaya la vɛ nkɛnɛmayala lon min na.»

¹⁹ Wo fɔ Isa bolo, a ka bulu ta ka balika bɔ Ala yɛ, ka ban k'a lɔkalikali k'a di ai ma. A do vɛɛ: «Ǹ falikolo le min ne, min dinin àiya ko lɔ. Ài yi min kɛ k'ài hangili to ǹ nɔ.»

²⁰ Dɔnni ban kɔ, Isa ka jiyafɛ fana ta k'a di ai ma. A do vɛɛ ai yɛ: «Jiyafɛ min yi salatikan kula tɔɔmase le le, ka bɛn ǹ jeli bɔnko ma àiya ko lɔ.

²¹ Kɛɛ do, mɔɔ min kɛtɔ ǹ janvala, wo siinin ǹ dafɛ dɔnnikɛya lɔ jan.

²² Mɔɔnivin Tanin faatɔle iwo a latɛɛnin teme Ala bolo. Kɛɛ do, mɔɔ min kɛtɔ a janvala, gbalo yi wo tii yɛ!»

²³ Ai do v'i ɲɔɔ maɲiningala ko jene y'ai tɛma min yi diɲa ka ko suu wo kɛ.

Jene yi ɲamɔɔ le?

²⁴ Wo waate, sɔsɔyali dɔ k'i wuli ai tɛma ko jene ka kan ka jate ɲamɔɔ le.

²⁵ Wo lɔ, Isa vɛɛ ai yɛ: «Siboloma gbɛlɛ masakɛlu yi kuntiiya kɛla aiya jamanadennu kunna diyanigbeya boloma. Ai do y'a fɔla ai jɛlɛ ma ko koɲumakɛbalu.

²⁶ Kɛɛ a do man kan ka kɛ ten ài tɛma. Mɔɔ min yi ɲamɔɔ le ài tɛma, wo tii y'a jɛlɛ kɛ iwo denni. Mɔɔ min do yi kuntiiya la, wo tii yi kɛ iwo bɔiden.

²⁷ A yi di? Bɔiden min yi gbadonna ani aa kuntii min siinin dɔnnikɛya lɔ, a jene buɲanin a dɔ le? Min siinin dɔnnikɛya lɔ, kɛlɛ? Wo bɛ n'a kɛ, ǹ kɛyine ài tɛma iwo bɔiden.

²⁸ «Àilu le tonin ǹ kɔ ǹa lɔsumani ko bɛ lɔ.

²⁹ Wo lɔ saa, ǹ'i masaya dila ài ma, iwo ǹ Fa na masaya dila m̀ ma teme,

³⁰ fɔsa ài yi dɔnni kɛ ani k'ài min ǹ fɛ ǹa masaya lɔ, ani k'ài sii masayasiifennu lɔ ka Bani Isilankalu ya kabila tan ni fila (12) ya kiti tɛɛ.»

Isa k'a fɔ ko Piyɛli kɛtɔ i banna a lɔ

³¹ Wo kɔ, Isa vɛɛ: «Simɔn, Simɔn, i tolomalɔ. Soitana vɛ see madali ài lɔsumanko lɔ, iwo malo ni a fofo wotɛ yi bɔla teme.

³² Kɛɛ m̀'ɛ Ala dali i yɛ, fɔsa iya limaniya kana koli. Ni ile do ka seikɔ m̀ ma, i i badenmalu sɛmɛdon.»

³³ Wo fɔ Isa bolo, Piyɛli vɛɛ: «Ǹ Kuntii, ǹ lɔbɛnnin ka taa i fɛ kaso la, ani ka faa i fɛ!»

³⁴ Isa do vɛɛ a yɛ: «Piyɛli, ǹ'a fɔ i yɛ, donon tɛnala kumunna bi, ni i m'a fɔ siɲa sawa le ko i ma ǹ lɔn.»

Isa ya keladennu y'ai jɛlɛ lɔbɛn

³⁵ Isa k'a fɔ aa keladennu yɛ kɔtunun, a vɛɛ: «Ǹ n'ài kelayala waate min nɔ k'a fɔ ko ài kà taa wɔlibilabɔlɔ le, niwotɛ taamabɔlɔ, niwotɛ samala, jalasa wo waate, ài ka gbala le fen ko lɔ?» Ai k'a javi, ai vɛɛ: «Ɛnɛn, mɔ ma gbala foi lɔ.»

³⁶ Isa vɛɛ: «Kɛɛ tandainɔ yi ne, ni wɔlibilabɔlɔ ka kɛ mɔɔ min bolo, wo tii y'a ta, ani taamabɔlɔ. Ni do siyamifan tɛ mɔɔ min bolo, wo tii y'aa faaniba fele k'a dɔ san.

³⁷ Kamasɔlɔn ǹ'a fɔ ài yɛ, ko min sɛvɛnin kitabu kɔnɔ ka bɛn m̀ ma, fɔ wo ma yi fa, ko: ‹Ai na a kɔndɛla koyonkɛbalu le tɛma.› Wo ma, wo mafa waate ma vɛ sulunya.»

³⁸ A kɔbiladennu do vɛɛ a yɛ: «Mɔ Kuntii, i ɲa kaa, siyamifan fila le ne.» A do vɛɛ ai yɛ: «Wo vɛ je bɔ.»

Isa ka Ala dali Zeituna tini kɔkan teme

³⁹ Wo kɔ, Isa ka bɔ je ka taa Zeituna tini kɔkan iwo a deinin tɛɛ a kɛla teme. A kɔbiladennu do ka bila a kɔ.

⁴⁰ Ai senin je, a vɛɛ ai yɛ: «Ài yi Ala dali, fɔsa ài ma kana nɛɛ k'ài bila koyon nɔ.»

⁴¹ Wo fɔ, a k'i mataa ai la dɔɔni ka se kawa lafiliya kelen nɔ, k'i majii Aladaliko lɔ.

⁴² A do vɛɛ: «Ǹ Fa, ni i ka diɲa a ma, i kà ǹ lamin jiyafɛ min nɔ. Kɛɛ ǹe gbu sawo kà kɛ, mafɔ i sawo.»

⁴³ Wo waate kelen, mɛlɛka dɔ ka bɔ haijɛnɛ ka na k'a sɛmɛdon.

⁴⁴ Isa ka to josomakasi lɔ, a k'a dɔ la aa madaili kɔkan, a talaji vɛ benbenna duu ma iwo jeli.

⁴⁵ A wɔlinin Ala dalila, a v'i wulila ka taa a kɔbiladennu fɛlɔ k'ai talan sunɔɔ lɔ, kamasɔlɔn ai tɛɛ vɛ sɛyɛ josomakasi boloma.

⁴⁶ A do vɛɛ ai yɛ: «Mindɛ lɔ ài yi sunɔɔ lɔ? Ài wuli, ài yi Ala dali fɔsa ài ma kana nɛɛ k'ài bila koyon nɔ.»

Isa minako

⁴⁷ Isa ka to kumala, jama k'i kun labɔ ai ma. Judasi, min tɛɛ aa keladen mɔɔ tan ni fila (12) dɔ le, wo le tɛɛ jama ɲa. A do v'i madonna Isa la k'a sumu a tama lɔ.

⁴⁸ Kɛɛ Isa do vɛɛ a yɛ: «Judasi, i yi janva donna Mɔɔnivin Tanin ma sumuli le le?»

⁴⁹ A kɔbiladennu k'a ye mingɛ ko jama vɛ na Isa minaya lɔ, ai k'a maɲininga, ai vɛɛ: «Mɔ Kuntii, mɔ tɛ ai kɛlɛ maa siyamifannu le?»

⁵⁰ Ai lɔ kelen ka aa siyamifan fili ka salakalase kuntiiba ya jɔn gbasi, k'a bolokini tolo tɛɛ a la.

⁵¹ Kɛɛ Isa vɛɛ: «Ài y'a to ten!» A do k'a bolo tuu kɛ́ wo tolo la k'a lakɛnɛya.

⁵² Wo kɛ, Isa k'a fɔ salakalase kuntiibalu yɛ, ani lɔhɔlɔmabonba lakana kuntiibalu, ani kɛmɔbalu minu nanin tɛɛ a minaya lɔ, a vɛɛ: «Mindɛ kɛnin ài nanin m̀ minaya lɔ siyamifan ni kɔlɔmankulunnu le iwo mɔɔlu yi bɔla benkannikɛba kanma teme?

⁵³ Lon bɛ, ǹ tɛɛ ài fɛ lɔhɔlɔmabonba la, kɛɛ do, ài m'i lɔja ka m̀ mina je. Kɛɛ àiya waate le ne, ani divi ya seesɔlɔn waate.»

Piyɛli k'i ban Isa lɔ teme

⁵⁴ Wo kɛ, ai ka Isa mina ka taa a le salakalasebalu ya kuntiiba ya bon na, k'a talan Piyɛli tɛɛ ai kɔ poon.

⁵⁵ Ai wɔlinin taa bilala luu tɛma k'i sii a kunna, Piyɛli fana k'i sii ai tɛma.

⁵⁶ Wo kɛ, bɔidenmoso dɔ ka na ka Piyɛli siinin ye taamɛnɛn kɛnɛya la. A do k'a lasaa kobɛn k'a fɔ, a vɛɛ: «Kɛ́ min fana tɛɛ Isa le fɛ jɔ!»

⁵⁷ Kɛɛ Piyɛli k'i ban a ma, a vɛɛ: «Moso, m̀ ma kɛ́ wo lɔn.»

⁵⁸ A lɔ ma mɛn, mɔɔ gbɛlɛ ka Piyɛli ye k'a fɔ a yɛ, a vɛɛ: «Ile fana y'ai dɔ le le.» Kɛɛ Piyɛli do vɛɛ a yɛ: «Kɛ́, ǹ tɛ ai dɔ le dɛ!»

⁵⁹ Lɛlɛ kelen jate timinnin kɔ, mɔɔ gbɛlɛ ka na k'a fɔ k'a magbeleya, a vɛɛ: «Tuɲa le, kɛ́ min tɛɛ Isa le fɛ, kamasɔlɔn ale fana yi Galileka le le.»

⁶⁰ Wo fɔ, Piyɛli vɛɛ a yɛ: «Kɛ́, m̀ m'iya kuma ɲaye.» Piyɛli ka to kumala, donon ka kumun telemanin.

⁶¹ Wo waate kelen nɔ, mɔ Kuntii k'i ɲa tilimin k'i ɲa kaa Piyɛli lɔ. Piyɛli hangili ka bila mɔ Kuntii kumakan nɔ, ko: «Jani donon yi kumun bi, i kɛtɔ a fɔla siɲa sawa le ko i ma ǹ lɔn.»

⁶² Wo kɛ, Piyɛli ka bɔ luu ma ka kasi josomakasa boloma.

Ai ka Isa lafeya k'a gbasi teme

⁶³ Wo waate, Isa minabalu k'a lafeya ni a gbasi damina.

⁶⁴ Ai do k'a ɲa lasili ka to a maɲiningala, ai vɛɛ: «Kelaya kɛ vɛ! Mɔɔ min n'i gbasila, i yi wo tii tɔɔ fɔ.»

⁶⁵ Ai ka to a jɛvɛla ka jɛlɛbɔ a lɔ.

Ai ka taa Isa le kititɛɛya lɔ teme

⁶⁶ Kɛnɛ bɔnin, salakalase kuntiibalu ni seliya kalanmɔɔlu k'aiya kititɛɛjama ladɛn ka na Isa lalɔ ai ɲakɔlɔ.

⁶⁷ Ai do vɛɛ a yɛ: «I y'a fɔ mɔ yɛ ni ile le Masa Tɔɔmasenin ne.» Isa k'ai javi, a vɛɛ: «Ni ǹ k'a fɔ ài yɛ, ài tɛnala lala ǹ na.

⁶⁸ Ni ǹe fana k'ài maɲininga, ài tɛnala ǹ javila.

⁶⁹ Kɛɛ ǹ'a fɔ ài yɛ, ka ta bi ma, Mɔɔnivin Tanin kɛtɔ a siila Seebɛtii Ala bolokini fannɔ.»

⁷⁰ Wo fɔ Isa bolo, ai bɛ vɛɛ a yɛ: «Jalasa Ala Denkɛ le i le le?» Isa k'ai javi, a vɛɛ: «Àilu gbu v'a fɔ ko ǹe le.»

⁷¹ Ai do vɛɛ: «Mɔ mako tɛ mɔɔ ya seleyakan na butu. Ǹu gbu vɛ ban a jɛlɛkanu kumakan mɛnna!»