Luka 21 - Ala Ya Salatikan Kula Kitabu

Kɛsamoso ya niilifen

¹ Isa k'a ɲa lawuli ka nafolotiilu ye, ai vɛ wɔli bilala niilifenkesu lɔ.

² A do ka kɛsamoso fandanni dɔ ye, min ka wɔligbana mɛsɛnni fila bila kesu wo lɔ.

³ Isa do vɛɛ: «Ǹ'i tuɲa fɔ ài yɛ, kɛsamoso fandanni wo vɛ wɔli min bɔ, wo walanin vɛ ai bɛ ta le.

⁴ Kamasɔlɔn ai bɛ na a dɔni ne bɔla aiya nafolobalu la k'a di. Kɛɛ moso min ni aa bolokolonya bɛ, wɔlini min tɛɛ a bolo a baloko lɔ, a na wo bɛ le dila.»

Lɔhɔlɔmabonba teko

⁵ Wo kɔ, mɔɔ dɔlu tɛɛ kumala ka bɛn lɔhɔlɔmabonba ma, ko a masilinin kobɛn niilifennu ni kawakulun keinkeinnu le la. Isa do vɛɛ ai yɛ:

⁶ «Ài ɲa yi fen minu la yi ne, lon dɔ wolu bɛ tetɔle tɛtɛ, hali kawakulun fila gbu tɛnala tola i ɲɔɔ kɔkan.»

Dunuɲa laban tɔɔmaselu

⁷ Ai k'a maɲininga, ai vɛɛ: «Kalanmɔɔ, ko wolu kɛtɔ waate mindɛ? Tɔɔmase mindɛ kɛtɔ a jiyala ko waate wo vɛ se?»

⁸ A vɛɛ ai yɛ: «Ài y'ài jando ài jɛlɛ lɔ fɔsa mɔɔ kana ài lafili. Kamasɔlɔn mɔɔ siyama kɛtɔ nala ǹ tɔɔ lɔ k'a fɔ ko: ‹Ǹe le Masa Tɔɔmasenin ne!› ani ko: ‹Dunuɲa laban waate ma vɛ sulunya!› Ài kà bila wo suu suu kɔ.

⁹ Ài vɛ kɛlɛ ni mulutuko mangannu mɛnna, ài kà siyan. Kamasɔlɔn wolu ka kan ka kɛ kunfɔlɔ le, kɛɛ dunuɲa laban tɛnala kɛla wo le telemanin.»

¹⁰ A vɛɛ ai yɛ kɔtunun: «Sibolomalu wulitɔ i ɲɔɔ kanma, ani jamanalu fana wulitɔ i ɲɔɔ kanma.

¹¹ Duukolojaajaa babalu lɔwalatɔ, ani kɔɔn fitina ni jangalo yonnu kɛtɔ dingila siyama lɔ, ani ko masiyanninu ni tɔɔmase makawanilu kɛtɔ sangbolo lɔ.

¹² «Kɛɛ jani ko wo bɛ yi kɛ, mɔɔlu kɛtɔ ài minala k'ài jangata, ani k'ài don Aladalibon ɲamɔɔlu bolo, ani k'ài bila kaso la. Ài do lalɔtɔ jamanatiilu ni masakɛlu ɲakɔlɔ ka bɛn ǹa ko ma.

¹³ Wo le kɛtɔ sabu le ài kɛtɔ ǹa ko seleya dila ai ma.

¹⁴ Jani wo lon yi se, ài y'ài hangili latɛɛ ko ài tɛnala haminna ài kumanɔbɔko le.

¹⁵ Kamasɔlɔn ǹe gbu le kɛtɔ ài lalɔnnila hangilimaya kumalu la, haan fɔɔ ài kɛlɛɲɔɔ suu suu tɛnala sena ài la, niwotɛ k'ài kumakannu sɔsɔ.

¹⁶ Hali ài sɔlɔnbalu gbu, ni ài badenmalu, ni ài balamɔɔlu, ani ài tɔvalu, wolu le kɛtɔ ài donna mɔɔlu bolo fɔsa ai y'ài dɔlu faa.

¹⁷ Ài gbeyatɔ mɔɔ bɛ yɛ ka bɛn ǹa ko ma.

¹⁸ Kɛɛ wo bɛ n'a kɛ, hali ài kunsi kaali kelen gbu tɛnala tununna.

¹⁹ Wo le y'a ma, ài y'ài lɔgbeleya, fɔsa ài nii la yi kisi.

Jelusalɛmu halaki waate

²⁰ «Ài vɛ Jelusalɛmu lamininnin yena kɛlɛkɛjamalu le waate min nɔ, ài y'a lɔn ko so halaki waate ma vɛ sulunya.

²¹ Wo vɛ kɛla, mɔɔ minu yi Jude koovi lɔ, wolu yi bɔli ka taa tinima dingilalu lɔ. Mɔɔ minu do vɛ kɛla Jelusalɛmu so kɔnɔ, wolu yi bɔ je. Ado mɔɔ minu vɛ kɛla sɛnɛ lɔ, wolu kà don so kɔnɔ butu,

²² kamasɔlɔn Ala ya jangata lonnu le wolu le, fɔsa kuma minu bɛ sɛvɛnin kitabu kɔnɔ, wolu ma yi fa teme.

²³ Wo lonnu vɛ sena, gbalo kɛtɔ kɔnɔma ni dematiikulalu yɛ, kamasɔlɔn tɔlɔya ba kɛtɔle duu min nɔ, ani Ala ya jangata jiitɔ mɔɔ minu kɔkan.

²⁴ Ai dɔlu faatɔ siyamifan ne, ani a dɔlu fana minatɔ jɔnya boloma ka taa ai le jamana bɛ lɔ. Wo vɛ kɛla, Jelusalɛmu lɔ kɛtɔ tiɲala siboloma gbɛlɛ Alalɔnbalilu bolo haan fɔɔ aiya waate vɛ dafala.

Mɔɔnivin Tanin nalon

²⁵ «Tɔɔmase dɔlu kɛtɔ tele ni kalo ni lolonilu lɔ, ani sibolomalu bɛ kɔnɔlɔ kɛtɔ filila k'ai hamin duukolo kɔkan, ka bɛn kɔɔji ya jaman ni a woyokan kojuuya ma.

²⁶ Mɔɔlu kilontɔ ka bɛn siyan ma, ai vɛ ai milila masuwako ma min natɔ kɛla dunuɲa fan bɛ lɔ, kamasɔlɔn sangbololɔ fangatiilu lamaamaatɔ.

²⁷ Wo waate lɔ, ai kɛtɔ Mɔɔnivin Tanin natɔla yena sanbiliya lɔ, seetiiya ni magbiliyali ba boloma.

²⁸ Ni ài ka ko minu daminatɔ ye waate min nɔ, ài y'ài lɔ k'ài kun lawuli, kamasɔlɔn àiya kunmaka waate ma vɛ sulunya.»

Toloju misali

²⁹ Wo kɔ, Isa ka misali dɔ di ai ma, a vɛɛ: «Ài y'ài mili toloju ma, niwotɛ kɔlɔman gbɛlɛlu.

³⁰ Ài v'a filabulu kulalu yena waate min, ài y'a lɔn ko telema ma vɛ sulunya.

³¹ Wo boloɲa kelen ma, ni ài ka ko wolu ye kɛla, ài y'a lɔn ko Ala ya masaya waate ma vɛ sulunya.

³² Ǹ'i tuɲa fɔ ài yɛ, bi mɔɔlu bɛ tɛnala banna sala, fɔ ko wolu bɛ vɛ kɛla ka dafa.

³³ Sangbolo ni duukolo tununtɔle, kɛɛ ǹ kumakannu tɛnala tununna tuun!»

Ài yi to ài ɲana

³⁴ «Ài y'ài jando ài jɛlɛ lɔ fɔsa ài joso lɔ kana gbalin noomaya le, ani gbɛtɔya, ani dunuɲalɔtɛɛkolu hamin. Niwotɛ, wo lon kɛtɔ balala ài lɔ,

³⁵ iwo sɔɔ yi soo minala teme, kamasɔlɔn wo ko kɛtɔ dunuɲamɔɔ bɛ le masɔlɔnna.

³⁶ Wo lɔ saa, ài yi to ài ɲana ka to Ala dalila waate bɛ, fɔsa ài yi fanga sɔlɔn ko natɔ wolu ma, ani ài yi se ài lɔla Mɔɔnivin Tanin ɲakɔlɔ teme.»

³⁷ Tele o tele, Isa tɛɛ mɔɔlu kalanna lɔhɔlɔmabonba luu kɔnɔ, kɛɛ su lɔ, a tɛɛ taala ka si tini dɔ kɔkan, ai y'a fɔla min ma ko Zeituna tini.

³⁸ Sɔɔmadanina, mɔɔlu bɛ tɛɛ ai ladɛnna lɔhɔlɔmabonba luu kɔnɔ k'ai tolomalɔ a la.