Luka 20 - Ala Ya Salatikan Kula Kitabu

Isa yi jene ya seetiiya kɔlɔ?

¹ Lon dɔ, Isa ka to mɔɔlu kalanna ani ka Samakan Kein lase lɔhɔlɔmabonba luu kɔnɔ, salakalase kuntiibalu ni seliya kalanmɔɔlu ni kɛmɔbalu ka na a ma.

² Ai do vɛɛ a yɛ: «A fɔ mɔ yɛ, i yi ko minu kɛla yi ne, jene n'i lɔla wo la? Jene na seetiiya wo dila i ma?»

³ Isa k'ai javi, a vɛɛ: «Ǹe fana y'ài maɲiningala ko kelen ma. Ài yi ǹ javi.

⁴ Jene ka seetiiya di Yaya ma makoliko lɔ? Ala, baa adamadennu?»

⁵ Wo fɔ Isa bolo, ai v'i ɲɔɔ sɔsɔla, ai vɛɛ: «Ni mɔ k'a fɔ ko Ala le, a kɛtɔ a fɔla mɔ yɛ, a vɛɛ: ‹Ni wo le, mindɛ lɔ ài ma la a la?›

⁶ Kɛɛ ni mɔ k'a fɔ adamadennu le, mɔɔ minu bɛ kɛtɔ mɔ bonna kawakulun na ka mɔ faa, kamasɔlɔn ai layine a la ko Yaya tɛɛ kela le le.»

⁷ Wo le k'a kɛ, ai ka Isa javi ko ai m'a lɔn.

⁸ Isa do vɛɛ ai yɛ: «Ni wo le, ǹe fana tɛnala a fɔla ài yɛ min na seetiiya dila m̀ ma ko minu kɛko lɔ.»

Gbelekunnasiiba yonnu ma sana

⁹ Wo kɔ, Isa ka sana dɔ la jama yɛ, a vɛɛ: «A ka kɛ kɛ́ dɔ le le, min ka lɛzɛn gbele kɛ, k'a kalifa gbelekunnasiiba dɔlu la, ka taa taama jaan na ka mɛn.

¹⁰ Lɛzɛn bɔ waate ka se mingɛ, a ka aa bɔiden dɔ lataa gbelekunnasiibalu ma, ko ai y'a ta nii di a ma. Kɛɛ a se je, ai k'a mina k'a gbasi k'a bolokolongbɛ lasei.

¹¹ Wo kɛ, gbeletii ka bɔiden gbɛlɛ lataa kɔtunun. Ai do ka wo fana gbasi k'a lafeya k'a bolokolongbɛ lasei.

¹² Wo kɔ, a ka mɔɔ sawana lataa ai ma. Ai do ka wo fana madimin k'a fɔnfɔn gbele kɔma.

¹³ Wo kɛ, gbeletii vɛɛ a jɛlɛ yɛ: ‹Ǹ'a kɛ di vɛ? Fɔ ǹ'i ǹ diyanan denkɛ lataa ai ma. Tumadɔ ai kɛtɔ wo buɲala.›

¹⁴ Kɛɛ gbelekunnasiibalu ka a denkɛ natɔla ye mingɛ, ai k'a fɔ i ɲɔɔ yɛ, ai vɛɛ: ‹Kɛɛtaba le ve le. Ài m'a faa fɔsa a fa kɛɛ yi kɛ mɔ ta le!›

¹⁵ Ai do k'a fɔnfɔn gbele kɔma k'a faa. «A yi di wo lɔ? Ni gbeletii ka na waate min nɔ, a kɛtɔ mindɛ kɛla ai la?

¹⁶ A kɛtɔ nala ka gbelekunnasiiba wolu halaki, ka ban ka gbele kalifa mɔɔ gbɛlɛlu la.» Wo mɛn mɔɔlu bolo, ai do vɛɛ: «Ala mɔ talan wo ma!»

¹⁷ Isa k'a ɲa kaa jama lɔ k'a fɔ ai yɛ, a vɛɛ: «Ni wo le, kuma min kɔlɔ yi mindɛ le, min sɛvɛnin kitabu kɔnɔ? Ko: ‹Bonlɔbalu n'ai banna kawakulun min nɔ, wo le kɛnin bon tongun kawakulun ne.›

¹⁸ Ni mɔɔ mɔɔ k'i ben kawakulun wo kɔkan, wo tii lɔkalitɔle. Ni do kawakulun wo k'i ben mɔɔ mɔɔ kɔkan, wo tii lɔgbɛnɛngɛtɔle.»

Niisɔɔn salako

¹⁹ Seliya kalanmɔɔlu ni salakalase kuntiibalu tɛɛ Isa minako ɲaɲininna wo waate kelen nɔ, kamasɔlɔn ai n'a ɲayena ko sana wo lanin ailu le ma. Kɛɛ ai tɛɛ siyanna jama ɲa.

²⁰ Wo le n'a kɛla, ai tɛɛ Isa lasaala ka a lakɔlɔsibalu lataa a ma, minu tɛɛ ai jɛlɛ kɛla iwo mɔɔ sɔvɛlu, fɔsa ai y'a mina a jɛlɛkanu dalakan fɛ, ka ban k'a don Lɔmu jamanatii bolo, a see yi min yɛ k'a kiti.

²¹ Wo lɔ, ai k'a maɲininga, ai vɛɛ: «Kalanmɔɔ, mɔ k'a lɔn ne i yi kumala ka mɔɔlu kalan a ɲa gbugbu le ma. I tɛ mɔɔ lɔtɔmɔnna, mafɔ ka mɔɔlu kalan tuɲandeya boloma ka bɛn Ala ya siya ma.

²² Wo lɔ saa, i miliya fɔ mɔ yɛ butu. Ka niisɔɔn sala Lɔmu masakɛba Sezale ma, wo ladaanyine mɔ ma, baa wo ladaannin tɛ?»

²³ Kɛɛ Isa tɛɛ k'a lɔn ko a laɲinin kuma le wo le. Wo ma, a vɛɛ ai yɛ:

²⁴ «Ài yi wɔligbana dɔ jiya ǹ na. Jene sawula ni jene tɔɔ y'a kɔkan?» Ai k'a javi, ai vɛɛ: «Sezale le.»

²⁵ Wo fɔ ai bolo, Isa do vɛɛ ai yɛ: «Ni a yi ten ne, ài yi Sezale ta di Sezale ma, ka Ala ta di Ala ma.»

²⁶ Ai do ma hali kumaden kelen gbu sɔlɔn Isa fɛ jama ɲakɔlɔ min tɛɛ kɛ a minako sabu le. Aa javili k'ai kawakoya fɔɔ k'ai jeden.

Sadusilu ka Isa lɔsuma teme

²⁷ Wo kɔ, Sadusi dɔlu ka na Isa ma, minu y'a fɔla ko fulenilu lawuliko tɛ tuɲa le.

²⁸ Ai do ka Isa maɲininga, ai vɛɛ: «Kalanmɔɔ, Nabi Musa n'a sɛvɛla mɔ yɛ ko ni kɛ́ dɔ ka sa, a ma den to a kɔ, a dɔɔkɛ le ka kan ka kɛsamoso wo fulu, fɔsa a yi den sɔlɔn a kɔlɔkɛ yɛ.

²⁹ Wo lɔ, a ka kɛ badenmakɛ wolowulan ne le. Kɔlɔmanda ka moso dɔ fulu. A do ka sa, a ma den to a kɔ.

³⁰ Wo kɛ, a badenmakɛ filana ka moso wo fulu. Kɛɛ ale fana ka sa, a ma den to a kɔ.

³¹ Wo ɲɔɔzii le ka kɛ badenmakɛ sawana la haan fɔɔ a wolowulanna. Ai bɛ ka sa, ai ma den to ai kɔ.

³² Wo bɛ timinnin kɔ, moso fana ka sa.

³³ Wo lɔ saa, Fulenilu Lawulilon, moso wo kɛtɔ a jene ta le? Kamasɔlɔn a n'i siila badenmakɛ wolowulan wolu bɛ le kun.»

³⁴ Isa k'ai javi, a vɛɛ: «Mɔɔlu yi fulusili ni kɔɲɛmalɔ kɛla dunuɲa min ne lɔ.

³⁵ Kɛɛ Ala vɛ mɔɔ minu jatela telenmandelu le k'ai lawuli Fulenilu Lawulilon, ani ka dunuɲa natɔ niimaya di ai ma, wolu tɛnala fulusili ni kɔɲɛmalɔ kɛla.

³⁶ Ai tɛnala saya masɔlɔnna butu. Ai kɛtɔle iwo mɛlɛkalu, ani Ala den ne ai le, kamasɔlɔn ai v'i wuli ka bɔ saya lɔ.

³⁷ Nabi Musa gbu n'a fɔla k'a lagbɛ ko fulenilu lawulitɔle ka bɔ saya lɔ. Kɔlɔmanjuni taalamaa ya ko sɛvɛnin dingila min nɔ, a k'a fɔ mɔ Tii ma, ko: ‹Ala min yi batola Ibulahima ni Isiyaka ani Janguba bolo.›

³⁸ Wo kɔlɔ le ko niimalu le Ala batola, fulenilu tɛ. Kamasɔlɔn bɛ yi niima le le Ala ɲakɔlɔ.»

³⁹ Wo fɔ Isa bolo, seliya kalanmɔɔ dɔlu vɛɛ a yɛ: «Kalanmɔɔ, i vɛ javili kɛ kobɛn!»

⁴⁰ Ado mɔɔ foi m'a wakali ka Isa maɲininga butu.

Dawuda Tii le Masa Tɔɔmasenin ne

⁴¹ Isa do k'ai maɲininga, a vɛɛ: «Mindɛ lɔ ai y'a fɔla ko Masa Tɔɔmasenin yi Dawuda bɔzɔn ne le?

⁴² Kamasɔlɔn Dawuda gbu n'a sɛvɛla Zabuli kitabu kɔnɔ, ko: ‹Mɔ Tii n'a fɔla ǹ Tii yɛ, a vɛɛ: «Na i sii m̀ bolokini fannɔ,

⁴³ haan fɔɔ m̀'ɛ banna i juulu lala i sen kɔlɔ.» ›

⁴⁴ Ni Dawuda y'a fɔla wo tii ma ko a Tii, wo yi se kɛla a bɔzɔn ne di wo lɔ?»

Isa ka seliya kalanmɔɔlu jobaliya teme

⁴⁵ Jama bɛ ka to ai tolomalɔla Isa la, a do vɛɛ a kɔbiladennu yɛ:

⁴⁶ «Ài y'ài jando ài jɛlɛ lɔ ka bɛn seliya kalanmɔɔlu ma. A diyanin ai yɛ k'ai mataama, faani babalu vɛ ai kanna. Ai vɛ taala bala lɔ, a diyanin ai yɛ ko mɔɔlu y'ai fo buɲali boloma. Ai do vɛ taala Aladalibon na, niwotɛ feetikɛya lɔ, ɲamɔɔ siiyalu le diyanin ai yɛ.

⁴⁷ Ai yi kɛsamosolu bolo latɛla tɛtɛ ka ban k'ai jɛlɛjiya Aladali kunnɔjaannu fɛ. Wo le kɛtɔ a kɛla, aiya kolatɔn gbeleyatɔle ka timin dɔlu ta la.»