Luka 2 - Ala Ya Salatikan Kula Kitabu

Isa sɔlɔnnin teme

¹ Wo waate lɔ, Lɔmu masakɛba Ogusite ka jamali di aa jamana fan bɛ lɔ, ko mɔɔ bɛ yi taa i tɔɔ sɛvɛ.

² Tɔɔsɛvɛli kunfɔlɔ wo ka bɛn Kiliniyɔ ya jamanatiiya ma Siliya jamana kunna.

³ Wo le k'a kɛ, mɔɔ kelenkelenna bɛ ka taa ai sɔlɔnsolu la ka bɛn ai tɔɔ sɛvɛko ma.

⁴ Wo lɔ, Jusufu ka bɔ Nazalɛti so kɔnɔ, Galile koovi lɔ, ka taa Jude koovi so dɔ la min tɔɔ yi Bɛtilɛhɛmu, ai y'a fɔla min ma ko Masakɛ Dawuda ya so, kamasɔlɔn Jusufu tɛɛ Masakɛ Dawuda ya bonnamɔɔ dɔ le le.

⁵ Ai do ka taa ai tɔɔ sɛvɛya lɔ, ale ni aa maminamoso Mɔyamu min kɔnɔma tɛɛ.

⁶ Ai ka to Bɛtilɛhɛmu, Mɔyamu moi waate ka se.

⁷ A do ɲuma ka jii a denkɛ kunfɔlɔ la. A ka wo mamɔlɔmɔlɔ faani lɔ, k'a lala kolofennu ya dɔnnikɛfen kɔnɔ, kamasɔlɔn ai tɛɛ ma jiya sɔlɔn lonajiyabon na.

Mɛlɛka ka Isa sɔlɔnko fɔ saakunnasiibalu yɛ teme

⁸ Wo waate lɔ, saakunnasiiba dɔlu tɛɛ Bɛtilɛhɛmu so laminin nɔ, ai tɛɛ sila ai ɲana gbɛkɛnɛ lɔ k'ai jando aiya saalu lɔ.

⁹ Mɔ Tii ya mɛlɛka ka bɔ gbɛ la ai ɲakɔlɔ, ado mɔ Tii nɔɔlɔ ka mɛnɛn k'ai makɛ kala. Ai do ka siyan bubale.

¹⁰ Kɛɛ mɛlɛka do vɛɛ ai yɛ: «Ài kà siyan! Ǹ nanin samakan kein ne le ài fɛ, min kɛtɔ mɔɔlu bɛ kɔnɔlɔdiyala kosɛvɛ.

¹¹ Bi koni, Masakɛ Dawuda ya so la, Lakisilikɛba vɛ sɔlɔn ài yɛ, min taanin kɛla mɔ Tii Masa Tɔɔmasenin ne.

¹² Ǹ'i tɔɔmase min jiyala ài la, wo le ne: Ài kɛtɔ denɲanin yena, a mamɔlɔmɔlɔnin faani lɔ k'a lala kolofennu ya dɔnnikɛfen kɔnɔ.»

¹³ Telemanin, mɛlɛka kɛlɛkɛjama ba ka na ka bɔ haijɛnɛ, ka kafon mɛlɛka kunfɔlɔ kan, ai bɛ vɛ Ala tanula, ai vɛɛ:

¹⁴ «Magbiliyali yi Ala yɛ sangbolo dingila kɔlɔtanin nɔ, ani josolajii yi kɛ duukolo kɔkan a diyananmɔɔlu yɛ.»

Saakunnasiibalu ka taa denɲanin lasaaya lɔ teme

¹⁵ Mɛlɛkalu seikɔnin haijɛnɛ, saakunnasiibalu k'a fɔ i ɲɔɔ yɛ, ai vɛɛ: «Ài m'i taa Bɛtilɛhɛmu. Mɔ Tii na mɔ lalɔnnila min na, m'i taa wo ye.»

¹⁶ Ai do vɛ taala ɲagba le ka Mɔyamu ni Jusufu talan, ka denɲanin lanin ye kolofennu ya dɔnnikɛfen kɔnɔ.

¹⁷ Ai ka wo ye mingɛ, ai ka ko bɛ ɲafɔ min fɔnin tɛɛ ai yɛ ka bɛn denni ma.

¹⁸ Mɔɔ minu ka saakunnasiibalu ya kuma mɛn, wolu bɛ ka kawakoya.

¹⁹ Mɔyamu koni ka ko wo bɛ ladalo a josokun nɔ, ka to a milila ai ma.

²⁰ Saakunnasiibalu kɔseitɔla, ai vɛ Ala buɲala k'a tanu, kamasɔlɔn ai ka kolu ye k'ai mɛn iwo mɛlɛka k'a fɔ ai yɛ teme.

Isa wolobalu ka taa a le lɔhɔlɔmabonba kɔnɔ teme

²¹ Den sɔlɔn ka tele sein bɔ mingɛ, ai k'a makɛnɛkɛ k'a tɔɔla ko Isa, mɛlɛka ka tɔɔ min fɔ Mɔyamu yɛ, k'a talan a tɛɛ ma kɔnɔ ta ba bene.

²² Densɔlɔn sɛnɛya waate min ya ko sɛvɛnin Nabi Musa ya Taulati lɔ, wo ka dafa mingɛ, Isa wolobalu ka taa a le Jelusalɛmu k'a kalifa mɔ Tii la.

²³ Kamasɔlɔn a sɛvɛnin Taulati kɔnɔ, ko: «Moso denkɛ kunfɔlɔ yi bila a ta fan mɔ Tii yɛ.»

²⁴ Ai ka taa je fana salakabɔko lɔ, iwo a sɛvɛnin mɔ Tii ya seliya kitabu kɔnɔ teme, ko: «Poponi fila, niwotɛ bilini den fila.».

²⁵ Wo waate lɔ, kɛmɔba dɔ tɛɛ Jelusalɛmu, min tɔɔ tɛɛ ko Simiyɔn. Mɔɔ telennin ni Alaɲasiyanɲɛmɔɔ le tɛɛ a le, min tɛɛ Bani Isilankalu masawali waate makɔnɔna Ala bolo. Ado Nii Sɛnɛyanin tɛɛ a kɔkan.

²⁶ Nii Sɛnɛyanin tɛɛ v'a jiya a la ko a tɛnala sala fɔ a ɲa vɛ lala Masa Tɔɔmasenin kɔkan, min ya lahedi tanin mɔ Tii bolo.

²⁷ Nii Sɛnɛyanin ka bila Simiyɔn ɲa ka na a le lɔhɔlɔmabonba luu kɔnɔ, k'a talan Isa wolobalu tɛɛ vɛ na a le je laana ɲabɔko lɔ iwo a sɛvɛnin seliya kitabu kɔnɔ teme.

²⁸ Simiyɔn do ka Isa denɲanin ta a bolo lɔ, a vɛ Ala tanula, a vɛɛ:

²⁹ «Ǹ Tii, diɲa butu ǹe iya jɔn yi sa hɛlɛ lɔ ka bɛn iya lahedi ma.

³⁰ Kamasɔlɔn ǹ ɲa vɛ la iya kisili kɔkan,

³¹ i na min lɔbɛnna adamadennu bɛ yɛ.

³² Kɛnɛya le a le i sawonankolu lankɛnɛmayako lɔ siboloma bɛ yɛ, ani magbiliyali le a le Bani Isilankalu ma.»

³³ Den fa ni a ba ka kawakoya ka bɛn kuma wolu ma den ya ko lɔ.

³⁴ Wo kɔ, Simiyɔn ka duwawu kɛ ai yɛ, ani k'a fɔ Isa ba Mɔyamu yɛ, a vɛɛ: «A latɛɛnin ko den min kɛtɔ mɔɔ siyama ya halaki ni ai kisiko sabu le le Isilan jamana lɔ, ani a kɛtɔ tɔɔmase le le, mɔɔ siyama kɛtɔ min sɔsɔla,

³⁵ fɔsa mɔɔ siyama kɔnɔlɔkolu la yi nkɛnɛmaya. Ile koni, i joso tiɲantɔle iwo a sɔɔnin vɛ siyamifan ne.»

³⁶ Kela mosomanda dɔ tɛɛ je fana, min tɔɔ tɛɛ ko Ana. Fanuwɛlɛ denmoso le tɛɛ a le ka bɔ Asɛli kabila lɔ. A tɛɛ vɛ kɔlɔya bubale. Aa singbiliya waate, a ka san wolowulan kɛ kɛlasiila.

³⁷ Wo kɔ, a ka to kɛsamosoya lɔ haan fɔɔ a sanji bisein ni naani (84). A tɛɛ tɛ a mabɔla lɔhɔlɔmabonba la, fɔ ka to Ala batola su ni tele, a vɛ sundonna ka Ala dali.

³⁸ Wo waate kelen nɔ, a k'i madon denni wolobalu la. A do vɛ balika bɔla Ala yɛ, ani ka to denni ya ko fɔla mɔɔ bɛ yɛ, minu tɛɛ Jelusalɛmu kunmaka waate makɔnɔna.

³⁹ Jusufu ni Mɔyamu ka ko bɛ kɛ mingɛ ka bɛn mɔ Tii ya seliya ma, ai ka seikɔ ai fɛso Nazalɛti, Galile koovi lɔ.

⁴⁰ Denni ka to buɲala, a do vɛ lala a fanga kɔkan, ani aa hangilimaya kɔkan, ado Ala ya nɛɛma tɛɛ a kan.

Isa ka taa lɔhɔlɔmabonba la teme

⁴¹ San o san Isa wolobalu tɛɛ taala Jelusalɛmu ka Timinkunna seli bɔkɛ je.

⁴² Ka bɛn aiya laana ma, ai bɛ ka taa. Wo k'a talan, Isa sɔlɔn tɛɛ vɛ sanji tan ni fila (12) bɔ.

⁴³ Selilonnu timin kɔ, Isa wolobalu ka siya mina ai kɔseiko lɔ, kɛɛ wo k'a talan, Isa ka to Jelusalɛmu ai ɲina ma.

⁴⁴ Komi a tɛɛ ai kɔnɔ ko Isa y'ai taamaɲɔɔlu fɛ, wo le k'a kɛ, ai ka tele wo bɛ kɛ taamana. Wo kɛ, ai k'a ɲinin damina ai badenmalu ni ai lɔnbalu tɛma.

⁴⁵ Ai ma a ye mingɛ, ai ka seikɔ ka taa a ɲininya lɔ Jelusalɛmu.

⁴⁶ A tele sawana lon, ai ka Isa talan lɔhɔlɔmabonba luu kɔnɔ, a siinin vɛ kalanmɔɔlu tɛma. A tolomalɔnin tɛɛ ai la, ani a vɛ ai maɲiningala.

⁴⁷ Aa hangilimaya ni a javililu ka a lamɛnbalu bɛ kawakoya.

⁴⁸ A wolobalu ka a ye mingɛ, ailu fana ka kawakoya. A ba do vɛɛ a yɛ: «Ǹ den, i na min kɛla mɔ la mindɛ lɔ? Ǹe ni i fa tɛɛ i ɲininna fan bɛ lɔ, mɔ sɔnjanin vɛ!»

⁴⁹ Kɛɛ Isa do k'a javi, a vɛɛ: «Mindɛ lɔ ài tɛɛ ǹ ɲininna? Ài m'a lɔn ǹ ka kan ka kɛ ǹ Fa aa bon ne la?»

⁵⁰ Kɛɛ a wolobalu ma aa kuma ɲaye.

⁵¹ Isa ka taa ai fɛ Nazalɛti, a do k'i fanmajii ai yɛ. A ba do tɛɛ ko wo bɛ ladalola a josokun nɔ.

⁵² Isa ka to buɲala, a dɔ vɛ lala aa hangilimaya kɔkan, ani aa ko ka diya Ala ni mɔɔlu yɛ.