Luka 19 - Ala Ya Salatikan Kula Kitabu

Isa ni Zakiya

¹ Wo kɔ, Isa ka don Jɛliko ka so lɔtimin.

² Kɛ́ dɔ tɛɛ je, min tɔɔ tɛɛ ko Zakiya. Niisɔɔnminabalu ya kuntii le tɛɛ a le, ani nafolotii.

³ A lɔɔ tɛɛ a la k'a ɲa la Isa kan ani k'a lɔn. Kɛɛ a tɛɛ tɛ se ka bɛn aa sulunya ma ani jama wala jate.

⁴ A do vɛ bɔlila ka taa jama ɲa ka jɛlɛ toloju la fɔsa a yi Isa ye, kamasɔlɔn wo tɛɛ timinna siya wo le kɔkan.

⁵ Isa senin toloju kɔlɔ, a k'a ɲa lajɛlɛ k'a fɔ Zakiya yɛ, a vɛɛ: «Zakiya, i i lateleja, i yi jii. Fɔ ǹ'i jiya i fɛ le lɔ bi.»

⁶ Wo fɔ, Zakiya k'i jii telemanin ka Isa labɛn sawa boloma.

⁷ Wo ye mɔɔlu bolo, ai bɛ vɛ Isa mafɔla, ai vɛɛ: «A diɲanin ka julumbutɔ kɛ a jetii le.»

⁸ Kɛɛ Zakiya k'i lɔ k'a fɔ mɔ Kuntii yɛ, a vɛɛ: «Ǹ Kuntii, i tolomalɔ! Ǹ'i m̀ bolofennu lɔtalala k'a fan kelen di bolokolonnu ma. Ni a k'a talan ǹ na mɔɔ dɔ tɔɲɔla k'a bolofen mina a la, ǹ kɛtɔ wo ɲɔɔzii naani laseila wo tii ma.»

⁹ Wo fɔ Zakiya bolo, Isa vɛɛ a yɛ: «Bi kisiko vɛ se bon min na, kamasɔlɔn kɛ́ min fana yi Nabi Ibulahima bɔzɔn dɔ le le.

¹⁰ Kamasɔlɔn Mɔɔnivin Tanin nanin fɔsa a yi mɔɔ filininnu ɲinin k'ai lakisi.»

Bɔiden sawa ma sana

¹¹ Mɔɔlu ka to ai tolomalɔla kuma wolu la, Isa ka sana dɔ la ai yɛ kamasɔlɔn ai ma tɛɛ vɛ sulunya Jelusalɛmu so la, ado mɔɔlu tɛɛ ai milila ko Ala ya masaya lankɛnɛmayatɔ wo waate gbugbu le lɔ.

¹² Wo le k'a kɛ, Isa vɛɛ: «A ka kɛ faamaden dɔ le le, min tɛɛ taama boloma jamana majaannin dɔ lɔ, fɔsa a yi masaya sɔlɔn ka na k'i sii aa jamanamɔɔlu kunna.

¹³ A do ka aa bɔiden mɔɔ tan kili ka wɔligbɛ gbana tan lɔtala ai wotɛ. A do vɛɛ ai yɛ: ‹Ài yi julaya kɛ a lɔ ka sii ǹ kɔsei la.›

¹⁴ «Kɛɛ aa jamanakɔnɔmɔɔlu k'a lagbeyaɲɛ. Wo lɔ, ai ka keladennu lataa a kɔ ko ai t'a fɛ a yi masaya kɛ ai kunna.

¹⁵ «A wɔlinin masaya sɔlɔnna ka seikɔ, a ka aa bɔidennu kili, a na wɔli dila minu ma, fɔsa a a lɔn ai na tɔnɔ mindɛ sɔlɔnna julaya lɔ.

¹⁶ Bɔiden kunfɔlɔ ka na k'a fɔ a yɛ, a vɛɛ: ‹Ǹ kuntii, i na wɔligbɛ gbana kelen min tola m̀ bolo, m̀'ɛ wɔligbɛ gbana tan tɔnɔ sɔlɔn wo kɔkan.›

¹⁷ Masakɛ do vɛɛ a yɛ: ‹I gbu n'a kɛ yi la kobɛn, bɔiden ɲuma! Komi i na kɛla lanande le ko fitinin nɔ, wo le y'a ma, ǹ kɛtɔ i lasiila so tan ne kunna.›

¹⁸ Wo kɔ, bɔiden filana ka na k'a fɔ a yɛ: ‹Ǹ kuntii, i na wɔligbɛ gbana kelen min tola m̀ bolo, m̀'ɛ wɔligbɛ gbana loolu tɔnɔ sɔlɔn wo kɔkan.›

¹⁹ Masakɛ do vɛɛ a yɛ: ‹Ile fana kɛtɔ i siila so loolu le kunna.›

²⁰ Wo kɔ, a dɔgbɛlɛ ka na k'a fɔ a yɛ, a vɛɛ: ‹Ǹ kuntii, a ye. Iya wɔligbɛ gbana le ne. A ladalonin tɛɛ m̀ bolo faani lɔ.

²¹ Ǹ tɛɛ siyanna i ɲa, kamasɔlɔn iya ko gbeleyayine. I yi fen ne tala, i ma min bila je. I do yi malo kalila, i ma min sɛnɛ.›

²² Masakɛ do vɛɛ a yɛ: ‹Ile bɔiden kɛwon! Ǹ kɛtɔ i jobaliyala ka bɛn i jɛlɛkanu dalakan ne ma. I tɛɛ k'a lɔn ǹa ko gbeleyayine, ani ko ǹ'i fen ne tala, m̀ ma min bila je, ani ko ǹ'i malo kalila, m̀ ma min sɛnɛ.

²³ Wo lɔ saa, mindɛ kɛnin i ma taa ǹa wɔli bila wɔlilamalabon na, fɔsa ǹ tɛɛ tɔnɔ sɔlɔn a la ǹ nanin min tɛ yi ne?›

²⁴ «Wo fɔ masakɛ bolo, a vɛɛ a dafɛmɔɔlu yɛ: ‹Ài yi wɔli wo mina a la, k'a di wɔligbɛ gbana tan tii ma.›

²⁵ Kɛɛ ai do vɛɛ a yɛ: ‹Masakɛ, wɔligbɛ gbana tan ne yi wo bolo butu!›

²⁶ Kɛɛ masakɛ do vɛɛ ai yɛ: ‹Ǹ'a fɔ ài yɛ, ni fen ka kɛ mɔɔ min bolo, a dɔ latɔ wo tii ma ta kɔkan ka siyaya. Kɛɛ ni fen ma kɛ mɔɔ min bolo, hali minni y'a bolo, wo minatɔle a la.

²⁷ Ǹ juulu koni, minu tɛɛ tɛ a fɛ ǹ'i masaya kɛ ai kunna, ài yi na ai bɛ le jan k'ai faa ǹ ɲakɔlɔ.› »

Isa ka don Jelusalɛmu sofalini kɔkan teme

²⁸ Isa wɔlinin sana wo lala, a vɛ bilala jama ɲa ka taa Jelusalɛmu.

²⁹ A masulunyanin Betifase ni Betani sonilu la, a ka se tini dɔ ma, ai y'a fɔla min ma ko Zeituna tini. Wo lɔ, a ka aa keladen mɔɔ fila lataa ai ɲa,

³⁰ k'a fɔ ai yɛ, a vɛɛ: «Soni min yi mɔ ɲa ve, ài yi taa je. Ài vɛ donna so kɔnɔ, ài kɛtɔ sofalini bolan dɔ silinin yena, mɔɔ m'i sii ba min kɔkan bene. Ài y'a fɔlin ka na a le jan.

³¹ Ni mɔɔ dɔ k'ài maɲininga ko: ‹Mindɛ lɔ ài y'a fɔlinna?›, ài vɛɛ wo tii yɛ: ‹Mɔ Kuntii le mako y'a la.› »

³² Keladen fila wolu ka bɔ je ka taa a talan iwo Isa k'a fɔ ai yɛ teme.

³³ Ai tɛɛ sofalini bolan fɔlinna waate min nɔ, a tiilu ka na k'a fɔ ai yɛ, ai vɛɛ: «Ài yi sofalini fɔlinna mindɛ lɔ?»

³⁴ Ai do ka wolu javi, ai vɛɛ: «Mɔ Kuntii mako y'a la.»

³⁵ Wo fɔ, ai ka sofalini bolan ta ka taa a le Isa fɛ. Ai do k'aiya faanilu lala sofalini kɔkan, ka ban ka Isa lajɛlɛ a kɔkan.

³⁶ A taatɔla, mɔɔlu vɛ aiya faanilu lɔfɛzɛnna siya kɔkan a ɲa.

³⁷ Isa k'i masulunya Jelusalɛmu la ka se Zeituna tini lajii lɔ mingɛ, a kɔbiladen jama ba vɛ sawala ka kɛ Ala tanule kan ba lɔ ka bɛn kawanankolu bɛ ma, ai na minu yena.

³⁸ Ai vɛɛ: «Duwawu yi masakɛ yɛ min yi nala mɔ Tii tɔɔ lɔ! Hɛlɛ yi kɛ haijɛnɛ! Magbiliyali yi kɛ Ala yɛ haijɛnɛ dingila kɔlɔtanin nɔ!»

³⁹ Falisi dɔlu ka to jama tɛma k'a fɔ Isa yɛ, ai vɛɛ: «Kalanmɔɔ, a fɔ i kɔbiladennu yɛ ko ai yi jeden.»

⁴⁰ Isa do k'ai javi, a vɛɛ: «Ǹ'a fɔ ài yɛ, ni ai ka jeden, hali kawakulunnu gbu gbanɔtɔ.»

Isa ka kasi teme ka bɛn Jelusalɛmu ma

⁴¹ Isa masulunyanin Jelusalɛmu la ka so ye, a vɛ kasila ka bɛn a ma, a vɛɛ:

⁴² «Ni i tɛɛ vɛ hɛlɛ sɔlɔnɲa lɔnna bi lon min nɔ, wo tɛɛ bɛnne i ma. Kɛɛ wo doonnin i ma yi ne.

⁴³ Lon dɔ sentɔ, i juulu natɔ i lamininna fan bɛ lɔ, k'iya siya bɛ tɛɛ fɔɔ k'i bila jiin nɔ.

⁴⁴ Ai kɛtɔ ile ni iya mɔɔlu halakila, hali iya kawakulun fila gbu tɛnala tola i ɲɔɔ kɔkan, kamasɔlɔn Ala nanin bɔla i ma waate min nɔ, i ma wo lon jate ko le!»

Isa ka julalu gbɛn ka bɔ lɔhɔlɔmabonba luu kɔnɔ teme

⁴⁵ Wo kɔ, Isa ka don lɔhɔlɔmabonba luu kɔnɔ, ka julalu gbɛn damina k'ai labɔ je.

⁴⁶ A do vɛɛ ai yɛ: «A sɛvɛnin kitabu kɔnɔ, ko: ‹Ǹa bon kɛtɔ Aladalibon ne le.› Kɛɛ ài do vɛ je kɛ sonnu doonya le.»

⁴⁷ Isa tɛɛ mɔɔlu kalanna lon bɛ lɔhɔlɔmabonba luu kɔnɔ. Salakalase kuntiibalu ni seliya kalanmɔɔlu ni jamana ɲamɔɔlu tɛɛ a faako ɲaɲininna,

⁴⁸ kɛɛ ai tɛɛ tɛ se, kamasɔlɔn Isa ya ko tɛɛ vɛ mɔɔ bɛ kun mina. Ai bɛ tɛɛ ai tolomalɔla a la kobɛn.