Luka 18 - Ala Ya Salatikan Kula Kitabu

Kititɛɛba telenbali ma sana

¹ Wo kɔ, Isa ka sana dɔ la a kɔbiladennu yɛ, k'a jiya ko ai ka kan ka Ala dali waate bɛ. Ai do jei kà tɛɛ ka wo boloka.

² A vɛɛ: «A ka kɛ kititɛɛba dɔ le le, min tɛɛ so dɔ la. A tɛɛ tɛ siyanna Ala ɲa, a do tɛɛ tɛ mɔɔ suu suu jatela.

³ Kɛsamoso dɔ fana tɛɛ so kelen wo la, min ka to nala kititɛɛba fɛlɔ k'a fɔ a yɛ, a vɛɛ: ‹I yi ǹa jo di m̀ ma ǹ kɛlɛɲɔɔ ɲakɔlɔ.›

⁴ A lɔ ka mɛn, kititɛɛba k'i ban wo ma. Kɛɛ lon dɔ ka kɛ, a vɛɛ a jɛlɛ ma: ‹Ǹ tɛ siyanna Ala ɲa, ǹe do tɛ mɔɔ suu suu jatela.

⁵ Wo bɛ n'a kɛ, moso min yi ǹ ɲagbala waate bɛ. Wo lɔ, fɔ ǹ'aa jo di a ma, a kana to nala ka ǹ sɛɛ waate bɛ.› »

⁶ Mɔ Kuntii vɛɛ: «Ài y'ài tolomalɔ kititɛɛba telenbali wo kumakan na.

⁷ Ni Ala ya mɔɔ taninnu ka to ai makasila a yɛ su ni tele, a tɛ jo di ai ma? Jalasa ai madɛmɛnko ma yi tamale?

⁸ Ǹ'a fɔ ài yɛ, Ala yi jo dile ai ma jona! Wo bɛ n'a kɛ, Mɔɔnivin Tanin vɛ nala lon min na, jalasa a yi limaniya talanne duukolo kɔkan?»

Falisi ni niisɔɔnminaba ma sana

⁹ A dɔlu tɛɛ je, minu lanin tɛɛ ai jɛlɛkanu ya telenmandeya la, ai vɛ jɔla dɔlu ma. Wo ma, Isa ka sana dɔ la ai yɛ, a vɛɛ:

¹⁰ «A ka kɛ kɛ́ fila le le minu ka taa Aladaliya lɔ lɔhɔlɔmabonba la. Kelen tɛɛ Falisi le le, a tɔ kelen tɛɛ niisɔɔnminaba le le.

¹¹ Falisi kɛ́ k'i lɔ a ta fan, a vɛ Ala madalila, a vɛɛ: ‹Ala, ǹ'i balika bɔla i yɛ kamasɔlɔn ǹe tɛ iwo mɔɔ dɔlu, minu yi gbanayakolu kɛla ani ka telenbaliyakolu kɛ, ani ka jalonya kɛ, ǹe do kɛnin tɛ iwo niisɔɔnminaba min ve.

¹² Ǹ'i sundonna siɲa fila le le lɔɔtɛ kelen kɔlɔ, ani ǹ'i jaa bɔla ǹ sɔlɔnfen bɛ lɔ.›

¹³ Kɛɛ niisɔɔnminaba ka to poon. A do ma diɲa ka hali a ɲa lajɛlɛ sanma, fɔ ka kɛ a sisi magbasile josomakasi boloma, a vɛɛ: ‹Ala, hena ǹ na, ǹe min yi julumbutɔ le.› »

¹⁴ Isa vɛɛ: «Ǹ'a fɔ ài yɛ, niisɔɔnminaba ka taa luu ma, k'a talan Ala v'a jate telenmande le, kɛɛ wo ɲɔɔzii ma kɛ dɔ wo yɛ. Kamasɔlɔn mɔɔ mɔɔ v'a fannɔbuɲala, wo tii ma yi jiile. Kɛɛ ni mɔɔ min k'a fanmajii, wo tii kɔlɔ yi tale.»

Isa ka duwawu kɛ dennilu yɛ teme

¹⁵ Mɔɔ dɔlu tɛɛ nala hali denɲaninnu gbu le Isa fɛ, fɔsa a a bolo la ai kɔkan ka duwawu kɛ ai yɛ. Kɛɛ a kɔbiladennu ka wo ye mingɛ, ai vɛ wolu makumala.

¹⁶ Isa do ka dennilu kili ko ai yi na a ma. A vɛɛ a kɔbiladennu yɛ: «Ài y'a to dennilu yi na m̀ ma. Ài kà ai dansii, kamasɔlɔn mɔɔ minu kɛnin iwo denni, wolu fɛ yi Ala ya masaya la.

¹⁷ Ǹ'i tuɲa fɔ ài yɛ, ni mɔɔ min m'a bolo sii Ala ya masaya kɔlɔ iwo denni, wo tii tɛnala donna a lɔ tuun.»

Isa ni nafolotii dɔ

¹⁸ Jahudiyalu ya ɲamɔɔ dɔ ka Isa maɲininga, a vɛɛ: «Kalanmɔɔ ɲuma, ǹ ka kan ka mindɛ kɛ fɔsa ǹ'i niimaya banbali sɔlɔn?»

¹⁹ Isa k'a javi, a vɛɛ: «Mindɛ y'a kɛla vɛ i y'a fɔla m̀ ma ko ‹kalanmɔɔ ɲuma›? Mɔɔ suu suu ɲumayanin tɛ fɔ Ala kelenpesa.

²⁰ I ka Ala ya seliyalu lɔn, ko: ‹I kà mɔɔ faa, i kà jalonya kɛ, i kà suɲali kɛ, i kà faɲafɔ seleya di, ani i i fa ni i ba buɲa.› »

²¹ Kɛ́ do ka Isa javi, a vɛɛ: «Kalanmɔɔ, m̀'ɛ seliya wolu bɛ labato ka ta ǹ dennintɔ ma.»

²² Isa ka wo mɛn k'a fɔ a yɛ, a vɛɛ: «I dɛsɛnin ko kelen na bene. Taa i bolofen bɛ fele k'a wɔli lɔtala bolokolonnu wotɛ. Wo vɛ kɛla, nafolo kɛtɔ i bolo haijɛnɛ. Wo kɔ, i yi na, i yi bila ǹ kɔ.»

²³ Kɛ́ ka wo mɛn mingɛ, a niila ka fin, kamasɔlɔn nafolobatii le tɛɛ a le.

²⁴ Isa ka kɛ́ wo niilafinnin ye mingɛ, a vɛɛ: «Nafolotii donko gbeleyayine feu haijɛnɛ masaya lɔ!

²⁵ Ka ɲɔɔmɛ latimin sɛɛlan woo la, wo nɔyayine ka timin nafolotii donko la Ala ya masaya lɔ.»

²⁶ Wo fɔ Isa bolo, a lamɛnbalu vɛɛ: «Jene yi se kisila wo lɔ?»

²⁷ Isa k'ai javi, a vɛɛ: «Ko minu tɛ se kɛla adamadennu bolo, wolu yi sene kɛla Ala bolo.»

²⁸ Wo fɔ Isa bolo, Piyɛli do vɛɛ a yɛ: «Ǹu do? Mɔ vɛ mɔ bolofennu bɛ to je ka bila i kɔ.»

²⁹ Isa vɛɛ ai yɛ: «Ǹ'i tuɲa fɔ ài yɛ, mɔɔ mɔɔ vɛ diɲala ka aa bon to a kɔ, niwotɛ a moso, niwotɛ a badenmalu, niwotɛ a wolobalu, niwotɛ a dennu, ka bɛn Ala ya masaya ma,

³⁰ wo tii kɛtɔ fen wo ɲɔɔzii siyama le sɔlɔnna ka timin wo bɛ la dunuɲa min nɔ, ani ka niimaya banbali sɔlɔn dunuɲa natɔ lɔ.»

Isa ka aa saya ni a wuliko fɔ kɔtunun

³¹ Wo kɔ, Isa ka aa keladen mɔɔ tan ni fila (12) kili ai ta fan k'a fɔ ai yɛ, a vɛɛ: «Ài y'ài tolomalɔ! Mɔ jɛlɛtɔle Jelusalɛmu. Kelalu na min bɛ sɛvɛla kitabulu kɔnɔ ka bɛn Mɔɔnivin Tanin ma, wo bɛ mafatɔle.

³² Ai kɛtɔ a donna siboloma gbɛlɛ mɔɔlu bolo, minu kɛtɔ a lafeyala, k'ai daji bɔn a kan,

³³ k'a gbasi gbusan na, ka ban k'a faa. Kɛɛ tele fila a sawana, a wulitɔ ka bɔ saya lɔ.»

³⁴ Kɛɛ a kɔbiladennu do ma foi ɲaye aa kuma wolu lɔ. Wo kɔlɔ doonnin tɛɛ ai ma, ai do tɛɛ m'a lɔn Isa kan tɛɛ min ma.

Isa ka ɲagbɛ dɔ ɲa laka teme

³⁵ Isa masulunyatɔla Jɛliko so la, ɲagbɛ kɛ́ dɔ siinin tɛɛ siya dala je, min tɛɛ dailila.

³⁶ A ka jama timinkan mɛn mingɛ, a ka ɲiningali kɛ, a vɛɛ: «Mindɛ kɛnin?»

³⁷ Ai do vɛɛ a yɛ: «Nazalɛtika Isa le yi timinna.»

³⁸ Wo lɔ, a vɛ gbanɔla, a vɛɛ: «Isa! Dawuda Bɔzɔn! Hena ǹ na!»

³⁹ Mɔɔ minu tɛɛ jama ɲa, wolu k'a makuma ko a yi jeden. Kɛɛ a k'a dɔ la aa gbanɔ kɔkan, a vɛɛ: «Dawuda Bɔzɔn! Hena ǹ na!»

⁴⁰ Wo ma, Isa k'i lɔ ka mɔɔlu jamali ko ai yi na a le. A madonnin a la, Isa k'a maɲininga, a vɛɛ:

⁴¹ «I y'a fɛ ǹ'i mindɛ kɛ i yɛ?» A do ka Isa javi, a vɛɛ: «Ǹ Kuntii, ǹ'a fɛ ǹ ɲa la yi ka kɔtunun.»

⁴² Isa do vɛɛ a yɛ: «I ɲa la yi ka. Ka bɛn iya limaniya ma, i vɛ kɛnɛya.»

⁴³ A do ɲa la ka ka telemanin. Wo lɔ, a ka bila Isa kɔ, a vɛ Ala tanula. Jama ka wo ye mingɛ, ai bɛ vɛ Ala tanula fana.