Luka 17 - Ala Ya Salatikan Kula Kitabu

Mɔɔlafilikolu

¹ Wo kɔ, Isa vɛɛ a kɔbiladennu yɛ: «Fɔ kolu yi na minu kɛtɔ mɔɔlu lafilila, kɛɛ gbalo yi mɔɔ wo yɛ min vɛ kɛla ko wolu sabu le!

² A tɛɛ bɛnne wo tii ma ka kawa ba sili a kanna k'a lafili kɔɔ lɔ, jani a yi kɛ sabu le ka denni minu kelen lɔ julumbu tala.

³ Wo lɔ, ài y'ài jando ài jɛlɛ lɔ! «Ni i badenma dɔ ka hakɛ ta i la, i y'a makuma. Ni a do k'a dajoo mafalin, i y'a makoto.

⁴ Ni wo tii ka to hakɛ tala i la haan fɔɔ siɲa wolowulan tele kelen kɔlɔ, ni a ka hakɛ madali i la wo kelenkelenna bɛ lɔ, i y'a makoto.»

Limaniya

⁵ Mɔ Kuntii ya keladennu k'a fɔ a yɛ, ai vɛɛ: «I y'a dɔ la maa limaniya kɔkan.»

⁶ Mɔ Kuntii do k'ai javi, a vɛɛ: «Hali ni àiya limaniya buɲa jate ka kɛ iwo mutaadi kolo yi teme, ài yi sene a fɔla jiliju min yɛ ko a yi bɔ a nɔ lɔ ka taa sɛnɛ kɔɔji lɔ, a do tɛɛ ài kumakan labatole.»

Bɔidennu ka kan ka min kɛ

⁷ «Ni a k'a talan ài dɔ ya bɔiden ka na luu ma ka bɔ sɛnɛ buluwaya lɔ, niwotɛ saa kunnasiiya lɔ, jene kɛtɔ a fɔla bɔiden wo yɛ ko: ‹Na telemanin, i yi dɔnni kɛ›?

⁸ Wo tɛ kɛ! Fɔ a a fɔle a yɛ, a vɛɛ ‹Taa ǹa wulala lɔbɛn ǹ yɛ. I mafalin kobɛn, i yi na ǹa dɔnnifen ne. Fɔ m̀'ɛ banna dɔnnila ka m̀ min, wo vɛ kɛla, i ta dɔn ne vɛ k'i min.›

⁹ A do tɛnala wo balika bɔla ka bɛn baale ma, a na wo lɔla min na, kɛlɛ?

¹⁰ Àilu fana yi wo boloɲa le ma. Ni ài ka àiya baale dafa, ài lɔnin min na, ài y'a fɔ ko: ‹Ǹu yi bɔiden jɛlɛla le le. Mɔ na maa ke le kɛla dein.› »

Isa ka kunatɔ mɔɔ tan lasɛnɛya teme

¹¹ Isa taatɔla Jelusalɛmu, a tɛɛ timinna Samaliya ni Galile dan na.

¹² A dontɔla soni dɔ la, kunatɔ mɔɔ tan ka na a kunkɔlɔbɛn. Ai ka to poon,

¹³ k'ai kan labɔ bakɛ, ai vɛɛ: «Isa! Kalanmɔɔ! Hena mɔ la!»

¹⁴ Isa k'ai ye mingɛ, a vɛɛ ai yɛ: «Ài yi taa ài jɛlɛ jiya salakalasebalu la.» Ai taatɔla, ai bɛ la ka sɛnɛya.

¹⁵ Ai lɔ mɔɔ kelen k'a ye mingɛ ko a la vɛ sɛnɛya, a do ka seikɔ, a vɛ Ala tanula kan ba lɔ.

¹⁶ A k'i kɛ Isa sen kɔlɔ ka balika bɔ a yɛ. Ado Samaliyaka le tɛɛ a le.

¹⁷ Wo kɛ, Isa k'a maɲininga, a vɛɛ: «Mɔɔ tan ne la na sɛnɛyala, kɛlɛ? A tɔ kɔnɔ do?

¹⁸ Jalasa ai dɔ pa ma se seikɔla ka balika bɔ Ala yɛ, fɔ lona min kelenpesa?»

¹⁹ Wo fɔ, Isa do vɛɛ a yɛ: «I wuli, i yi taa, iya limaniya v'i lakɛnɛya!»

Ala ya masaya waate tɔɔmaselu

²⁰ Lon dɔ, Falisi dɔlu ka Isa maɲininga, ai vɛɛ: «Ala ya masaya lankɛnɛmayatɔ waate mindɛ?» Isa k'ai javi, a vɛɛ: «Ala ya masaya la tɛ nkɛnɛmayala tɔɔmase le, mɔɔ yi min yena i ɲa la.

²¹ A tɛnala fɔla ko: ‹A ye, a yi jan ne!› niwotɛ ko: ‹A yi jannɔ ve!›, kamasɔlɔn Ala ya masaya y'ài tɛma le.»

²² Isa do vɛɛ a kɔbiladennu yɛ: «Lon dɔ sentɔ, a lɔɔ kɛtɔ ài la ka lon kelen gbu ye Mɔɔnivin Tanin ya lonnu lɔ, kɛɛ ài tɛnala a yena.

²³ Mɔɔlu kɛtɔ a fɔla ài yɛ ko: ‹A ye, a yi jan ne!› niwotɛ ko: ‹A ye, a yi jan ve!› Àilu koni kà bila wolu kɔ.

²⁴ Kamasɔlɔn sanmɛnɛn yi bɔla teme sangbolo kun dɔ la ka taa a kun dɔgbɛlɛ la, Mɔɔnivin Tanin nalon kɛtɔ ten ne.

²⁵ Kɛɛ fɔ a yi tɔlɔya siyama masɔlɔn kunfɔlɔ le, ani bi mɔɔlu yi ban a lɔ.

²⁶ «Mɔɔnivin Tanin nalon kɛtɔle iwo kolu ka kɛ teme Sedina Nuho tele lɔ.

²⁷ Mɔɔlu tɛɛ dɔnni kɛla k'i min, ani ka fulusili ni kɔɲɛmalɔ kɛ. Ai ka to wo bɛ la haan fɔɔ Sedina Nuho ka don kulunba kɔnɔ lon min na. Ado ji ba ka na k'ai bɛ halaki.

²⁸ «Wo boloɲa kelen ma, Sedina Luti tele lɔ, mɔɔlu tɛɛ dɔnni kɛla k'i min, ka sanni ni fele kɛ, ka sɛnɛ kɛ, ani ka bonnu lɔ.

²⁹ Kɛɛ Sedina Luti ka bɔ Sɔdɔmu so kɔnɔ lon min na, taa ni timiliki kawa ɲɛninninu vɛ benbenna ka bɔ sangbolo lɔ, k'ai bɛ halaki.

³⁰ Mɔɔnivin Tanin vɛ bɔla gbɛ la lon min na, a kɛtɔ wo boloɲa kelen ne ma.

³¹ Ni wo lon ka mɔɔ min talan bon kɔkan, wo tii kà jii bon kɔnɔ a bolofennu tako lɔ. Ni wo do ka mɔɔ min talan sɛnɛ lɔ, wo tii kà a kɔsei.

³² Ko min na kɛla Sedina Luti moso la, ài y'ài hangili to wo lɔ.

³³ Mɔɔ min y'a fɛ ka a nii matanga, wo tii bɔnɔtɔ a la. Ni do mɔɔ min vɛ bɔnɔla a nii la ka bɛn ǹe ma, wo tii nii ma yi tangale.

³⁴ Ǹ'a fɔ ài yɛ, su wo lɔ, mɔɔ fila kɛtɔ lafen kelen nɔ, a kelen minatɔ k'a dɔ to je.

³⁵ Moso fila kɛtɔ kɛla malo tuula i ɲɔɔ fɛ, a kelen minatɔ k'a dɔ to je.»

³⁷ Wo fɔ Isa bolo, a kɔbiladennu k'a maɲininga, ai vɛɛ: «Mɔ Kuntii, wo kɛtɔ min ne?» Isa k'ai javi, a vɛɛ: «Ni soo su ka kɛ tɛɛ o tɛɛ lɔ, duwalu y'ai ladɛnna wo le ja.»