Luka 15 - Ala Ya Salatikan Kula Kitabu

Saa tununnin ma sana

¹ Niisɔɔnminabalu ni julumbutɔ dɔgbɛlɛlu tɛɛ nala k'ai tolomalɔ Isa la.

² Wo lɔ, Falisilu ni seliya kalanmɔɔlu vɛ kunnɔkumala a ma, ai vɛɛ: «Kɛ́ min y'a bolo siila julumbutɔlu kɔlɔ, ani ka dɔnni kɛ ai fɛ.»

³ Wo le k'a kɛ, Isa ka sana min la ai yɛ, a vɛɛ:

⁴ «Kɛ́ mindɛ le ài tɛma, ni aa saa kelen ka tunun aa saa kɛmɛ (100) tɛma, a tɛ a tɔ bikɔnɔ ni kɔnɔ (99) to tuu kɔlɔ, ka taa aa saa tununnin ɲinin haan fɔɔ ka a ye?

⁵ Ni a do k'a ye, a a lale a kanma sawa boloma.

⁶ A vɛ sena luu ma, a a tɔvalu ni a siiɲɔɔlu kilile, a vɛɛ: ‹Ài yi na, ài yi sawa ǹ fɛ, kamasɔlɔn m̀'ɛ ǹa saa tununnin ye.›

⁷ Wo boloɲa kelen ma, ǹ'a fɔ ài yɛ, ni julumbutɔ kelen v'a dajoo mafalinna, sawa min kɛtɔ haijɛnɛ ka bɛn ale kelen ma, wo suu tɛ kɛla hali telenmande bikɔnɔ ni kɔnɔ (99) gbu ya ko lɔ, minu mako tɛ ai dajoo mafalinko la.»

Wɔligbana tununnin ma sana

⁸ «Niwotɛ, moso mindɛ le yi je, ni aa wɔligbana kelen ka tunun aa wɔligbana tan tɛma, a tɛnala fitina lamɛnɛnna ka bon latɛ k'a ɲinin kobɛn haan fɔɔ k'a ye?

⁹ Ni a do ka a ye, a a tɔvalu ni a siiɲɔɔlu kilile, a vɛɛ: ‹Ài yi na, ài yi sawa ǹ fɛ, kamasɔlɔn m̀'ɛ ǹa wɔligbana tununnin ye.›

¹⁰ Wo boloɲa kelen ma, ǹ'a fɔ ài yɛ, ni julumbutɔ kelen k'a dajoo mafalin, Ala ya mɛlɛkalu yi sawale wo lɔ.»

Denkɛ tununnin ma sana

¹¹ Isa vɛɛ kɔtunun: «A ka kɛ kɛ́ dɔ le le, denkɛ fila tɛɛ min bolo.

¹² Lon dɔ, a dɔɔmanda vɛɛ a fa yɛ: ‹Ǹ fa, i i bolofen bɛ lɔtala ka ǹ ta kɛɛ di m̀ ma butu.› Wo fɔ, a fa k'a bolofennu lɔtala ai wotɛ.

¹³ Tele dana timinnin kɔ, dɔɔmanda k'a bolofen bɛ madon a la ka taa jamana majaannin dɔ lɔ, k'a wɔli bɛ lɔtiɲa je jɛlɛdiyabɔkolu le.

¹⁴ «Aa wɔli bɛ ka ban mingɛ, wo waate kelen nɔ, kɔɔn fitina ka don jamana wo lɔ. Foi tɛɛ tɛ a bolo butu.

¹⁵ Wo lɔ, a ka taa a jɛlɛ kalifa jamana wo duulen dɔ la, wo do k'a lasii aa kɔsɛ kuluba kunna aa sɛnɛ lɔ.

¹⁶ A tɛɛ a fɛ mɔɔ dɔ y'a sɔ sɔsɔ fala dɔ la, kɔsɛlu tɛɛ min dɔnna, kɛɛ do, mɔɔ foi ma fen di a ma.

¹⁷ «A ka kɛ a jɛlɛ kalama mingɛ, a do vɛɛ: ‹Ǹ fa aa baaleden bɛ yi dɔnni ba kɛla k'i fa kpekpe. Ǹe do satɔle jan kɔɔn bolo.

¹⁸ To ǹ'i wuli, ǹ'i taa ǹ fa fɛlɔ, ǹ'a fɔ a yɛ: Ǹ fa, m̀'ɛ hakɛ ta Ala la, ani ile fana la.

¹⁹ Hɔlɔ tɛ ǹ ne butu k'a fɔ i y'a fɔ m̀ ma ko i den. Wo le y'a ma, i yi m̀ mina iwo iya baaleden dɔ.›

²⁰ A do k'i wuli ka taa a fa fɛlɔ. «Den fa ka to poon k'a natɔla ye mingɛ, a hena ka wo mina. A do vɛ bɔlila ka taa a den labɛn k'i fili a lɔ, ani k'a sumu a tama lɔ.

²¹ Wo kɛ, a den vɛɛ a yɛ: ‹Ǹ fa, m̀'ɛ hakɛ ta Ala la, ani ile fana la. Hɔlɔ tɛ ǹ ne butu k'a fɔ i y'a fɔ m̀ ma ko i den.›

²² Kɛɛ a fa k'a fɔ aa bɔidennu yɛ, a vɛɛ: ‹Ài yi taa telemanin, ài yi na ǹa faaniba bɛ lɔ kein ne k'a bila a kanna. Ài yi koina bila a bolokɔni la, ani ka samala don a sen na.

²³ Ài yi na nisi bolan nɔɔlɔnin ne k'a kannatɛɛ. Ài m'i tolon ni dɔnni ba kɛ,

²⁴ kamasɔlɔn ǹ den min tɛɛ vɛ sa, kɛɛ a nii vɛ bila a lɔ kɔtunun. A tununnin tɛɛ, kɛɛ a vɛ ye butu.› Wo kɛ, ai ka tolon damina.

²⁵ «Wo waate lɔ, kɔlɔmanda tɛɛ sɛnɛ lɔ. A masulunyatɔla luu ma la, a ka tolon ni dɔnkɛ kan mɛn.

²⁶ Wo kɛ, a ka bɔiden dɔ kili k'a maɲininga, a vɛɛ: ‹Ài yi mindɛ la jannɔ ve?›

²⁷ Wo vɛɛ a yɛ: ‹I dɔɔni vɛ na! I fa na nisi bolan nɔɔlɔnin kannatɛɛla a yɛ, kamasɔlɔn a den kɛnɛyanin vɛ na.›

²⁸ Wo fɔ, kɔlɔmanda josola ka kuna bubale fɔɔ k'i ban nako ma bon na. Wo lɔ, a fa ka bɔ ka taa a madiyaya lɔ.

²⁹ Kɛɛ a do vɛɛ a fa yɛ: ‹I m'a ye? M̀'ɛ san siyama kɛ baalela i yɛ. M̀ m'i sɔsɔ lon kelen gbu. Wo bɛ n'a kɛ, i ma ba denni kelen gbu di m̀ ma, k'a fɔ ǹe ni ǹ tɔvalu yi tolon kɛ.

³⁰ Kɛɛ i den min na i bolofennu lɔtiɲala sungulunbalu la, a kɔseinin mingɛ, i vɛ nisi bolan nɔɔlɔnin kannatɛɛ a yɛ telemanin!›

³¹ Wo fɔ, a fa vɛɛ a yɛ: ‹Ǹ den, i yi ǹ fɛ waate bɛ. Fen suu suu yi m̀ bolo, i ta le wo bɛ le.

³² Kɛɛ a bɛnnin m'i tolon kɛ ka sawa, kamasɔlɔn i dɔɔni tɛɛ vɛ sa, kɛɛ a nii vɛ bila a lɔ kɔtunun. A tununnin tɛɛ, kɛɛ a vɛ ye butu.› »