Luka 14 - Ala Ya Salatikan Kula Kitabu

Isa ka kɛ́ dɔ lakɛnɛya Nɔningɛlon teme

¹ Nɔningɛlon dɔ, Falisilu ya ɲamɔɔ dɔ ka Isa kili dɔnniko lɔ aa bon na, ado mɔɔlu tɛɛ a lakɔlɔsila kosɛvɛ.

² Wo k'a talan, kɛ́ dɔ tɛɛ Isa ɲakɔlɔ, falilafaa jangalo tɛɛ min na.

³ Isa ka seliya kalanmɔɔlu ni Falisilu maɲininga, a vɛɛ: «A yi di? Ka mɔɔ lakɛnɛya Nɔningɛlon, wo ladaanyine, baa wo ladaannin tɛ?»

⁴ Ai do ka jeden. Wo kɛ, Isa ka jangalotɔ ta k'a lakɛnɛya, ka ban k'a labila.

⁵ Isa do vɛɛ ai yɛ: «Jene y'ài tɛma, ni min denkɛ niwotɛ aa nisi ka ben kɔlɔn nɔ Nɔningɛlon, a tɛnala a labɔla telemanin?»

⁶ Ai do ma se wo javila.

Fulusiliya ma sana

⁷ Isa k'a ye ko mɔɔ minu kilinin dɔnnikɛya lɔ, wolu tɛɛ ɲamɔɔ siiyalu le tala ai jɛlɛ yɛ. Wo le k'a kɛ, a ka sana dɔ la ai yɛ, a vɛɛ:

⁸ «Ni mɔɔ dɔ k'i kili fulusiliya lɔ, i k'i sii ɲamɔɔ siiya lɔ, kamasɔlɔn ni a k'a talan mɔɔ gbɛlɛ kilinin je min buɲanin i le,

⁹ mɔɔ min n'ài mɔɔ fila kilila, wo natɔ a fɔla i yɛ, a vɛɛ: ‹I wuli, i siiya di min ma.› Wo vɛ kɛla, i kɛtɔ kɔfɛ siiya dɔ ɲininna maloya boloma.

¹⁰ Wo le y'a ma, ni ai k'i kili, i t'i sii kɔfɛ. Wo vɛ kɛla, mɔɔ min n'i kilila, wo natɔ a fɔla i yɛ, a vɛɛ: ‹Ǹ tɔva, i wuli, i t'i sii ɲafɛ.› Ado i kɛtɔ buɲa sɔlɔnna mɔɔ kilinin bɛ ɲakɔlɔ.

¹¹ Kamasɔlɔn mɔɔ mɔɔ v'a fannɔbuɲala, wo tii ma yi jiile. Ni do mɔɔ mɔɔ v'a fanmajiila, wo tii kɔlɔ yi tale.»

¹² Wo kɔ, Isa k'a fɔ a kiliba yɛ, a vɛɛ: «I vɛ telelɔ dɔnni ba lɔbɛnna, niwotɛ wulala dɔnni, i k'i tɔvalu kili, niwotɛ i badenmalu, kumatɛ i siiɲɔɔ banalu ma, fɔsa ailu fana kana wo suu kɛ i yɛ k'iya kokein julu sala.

¹³ Kɛɛ ni i do ka feeti dɔnni lɔbɛn, i yi fandannilu kili, ani namalanilu, ani senkelennilu, ani ɲagbɛlu.

¹⁴ I kɛtɔ balayi sɔlɔnna wo lɔ, kamasɔlɔn wolu tɛ se iya kokein wo suu kɛla i yɛ. Ala gbu le kɛtɔ i salala wo ma, Telenmandelu Lawulilon ka bɔ saya lɔ.»

Feeti ba ma sana

¹⁵ Mɔɔ dɔ tɛɛ siinin Isa dafɛ dɔnnikɛya lɔ, wo ka kuma min mɛn mingɛ, a k'a fɔ Isa yɛ, a vɛɛ: «Mɔɔ minu kɛtɔ feetikɛya lɔ Ala ya masaya lɔ, wolu yi duwawuden ne le.»

¹⁶ Isa do vɛɛ a yɛ: «Lon dɔ, kɛ́ dɔ ka dɔnni ba lɔbɛn ka mɔɔ siyama kili.

¹⁷ Dɔnni kɛ waate ka se mingɛ, a ka aa bɔiden lataa ko a yi taa a fɔ mɔɔ kilininnu yɛ, ko: ‹Ài yi na, fen bɛ lɔ vɛ bɛn.›

¹⁸ Kɛɛ ai kelenkelenna bɛ k'ai kumanɔbɔ a yɛ. Mɔɔ kunfɔlɔ vɛɛ: ‹Ǹ na duu dɔ le sanna. Ǹ'a fɛ n'i taa a lasaa. I jon, i yi diɲa ǹa kumanɔbɔ ma.›

¹⁹ Mɔɔ filana do vɛɛ: ‹Ǹ na sɛnɛkɛ nisi tan ne sanna, ǹ'a fɛ ka taa ai lɔsuma yi ne. I jon, i yi diɲa ǹa kumanɔbɔ ma.›

²⁰ Mɔɔ sawana vɛɛ kɔtunun: ‹Moso fulunin kula le ne m̀ bolo. Wo le y'a ma, ǹ tɛ se taala yi ne.›

²¹ Bɔiden ka taa wo ɲafɔ aa kuntii yɛ mingɛ, wo josola ka kuna bubale. A do vɛɛ bɔiden yɛ: ‹Taa telemanin so kɔnɔ, i ɲa kaa siyaba ni siyanilu bɛ la, i yi na fandannilu le, ani namalanilu, ani ɲagbɛlu, ani senkelennilu.›

²² Bɔiden do vɛɛ: ‹Ǹ kuntii, m̀'ɛ iya jamali wo mafa. Kɛɛ hali bi, iya bonna ma fa ba bene.›

²³ Wo lɔ, aa kuntii vɛɛ a yɛ: ‹Bɔ i yi taa sɛnɛ ni gbelelɔsiyalu la. I vɛ mɔɔ mɔɔ yena je, i yi ǹa kililikan magbeleya ai yɛ, fɔsa ǹa bonna yi fa.

²⁴ Kamasɔlɔn ǹ'a fɔ ài yɛ, mɔɔ minu kilinin kunfɔlɔ le, ai foi tɛnala ǹa feeti dɔnni dɔ mafɛlɛnna!› »

Ài y'ài ban ài jɛlɛ lɔ

²⁵ Jama ba tɛɛ taamana Isa kɔ siya la, a k'i ɲa tilimin ai la k'a fɔ ai yɛ, a vɛɛ:

²⁶ «Ni mɔɔ min y'a fɛ ka na m̀ ma, ni wo tii m'i ban a fa lɔ, niwotɛ a ba, niwotɛ a moso, niwotɛ a dennu, niwotɛ a badenmalu, hali ale gbu ya niimaya, wo tii tɛ se kɛla ǹ kɔbiladen ne.

²⁷ Ni do mɔɔ min ma diɲa a jɛlɛkanu gbaankɔlɔman tako ma ka bila ǹ kɔ, wo tii tɛ se kɛla ǹ kɔbiladen ne.

²⁸ «Jene y'ài tɛma, ni a a fɛ ka sangaso lɔ, a t'i sii kunfɔlɔ le ka kɔndɛbɔ k'a lɔn ni a yi sene a lɔla k'a laban?

²⁹ Niwotɛ, ni a ka aa bon jusii ka koli a labanko ma, wo vɛ kɛla, mɔɔlu kɛtɔ wo yena ka jɛlɛbɔ a lɔ,

³⁰ ai vɛɛ: ‹Kɛ́ min na bonlɔ jusiila, kɛɛ a do ma se a labanna!›

³¹ «Wo boloɲa kelen ma, masakɛ mindɛ kɛtɔ diɲala k'a masakɛɲɔɔ kɛlɛ, ni a m'i sii kunfɔlɔ le ka kɔndɛbɔ k'a lɔn ni aa sɔdasi mɔɔ waa tan (10 000) yi sene a masakɛɲɔɔ ya sɔdasi mɔɔ waa muan (20 000) na?

³² Ni a tɛ se wo la, a kɛtɔ tola poon ka aa samakanlasebalu lataa a masakɛɲɔɔ ma ka bɛn ai wotɛbɛnko ma.

³³ Wo le y'a ma, ài suu suu tɛ se kɛla ǹ kɔbiladen ne, ni ài m'i ban ài jɛlɛ lɔ ka ko bɛ to je.»

Kɔɔ nafandan

³⁴ «Kɔɔ yi fen kein ne le, kɛɛ ni kɔɔ diyaya vɛ bɔla a la, a yi se diyala di kɔtunun?

³⁵ A nafa tɛ kɛ a la duu yɛ, niwotɛ gbuan yɛ, fɔ k'a lafili banama. Tolo yi mɔɔ min kun, wo tii y'a tolomalɔ kuma min ma.»