Luka 13 - Ala Ya Salatikan Kula Kitabu

Ài y'ài dajoo mafalin jani ài yi halaki

¹ Wo waate lɔ, mɔɔ dɔlu ka Galileka dɔlu ya ko ɲafɔ Isa yɛ, minu ka faa jamanatii Pilati bolo salakabɔya lɔ, k'ai jeli ni kolofen jeli ɲaami i ɲɔɔ nɔ.

² Wo lɔ, Isa vɛɛ ai yɛ: «A yi di? A ài kɔnɔ ko Galileka wolu ka tɔlɔya wo masɔlɔn kamasɔlɔn aiya julumbulu kɛwonyanin tɛɛ ka timin Galileka tɔ bɛ ta la?

³ Ɛnɛn dɛ! Kɛɛ ni ài do ma ài dajoo mafalin, àilu fana halakitɔle.

⁴ Mɔɔ tan ni sein (18) wolu do, sangaso na benna minu kɔkan k'ai faa Silowe fannɔ? A ài kɔnɔ ko wolu sɔn kɛwonyanin tɛɛ ka timin Jelusalɛmuka tɔ bɛ la?

⁵ Wo tɛ dɛ! Ǹ'a fɔ ài yɛ, ni ài ma ài dajoo mafalin, àilu fana halakitɔle.»

Toloju denbali ma sana

⁶ Wo kɔ, Isa ka sana dɔ la, a vɛɛ: «Kɛ́ dɔ ka toloju sɛnɛ aa gbele lɔ. Lon dɔ, a ka taa toloden ɲininya lɔ, kɛɛ a do ma foi ye a la.

⁷ Wo lɔ, a vɛɛ aa baaleden yɛ: ‹A ye, a vɛ kɛ san sawa le, ǹ'i nala kɔlɔman min den ɲininya lɔ a la. Haan bi, m̀ ma foi ye a la. A tɛɛ, i y'a bɔ je. A nafa foi tɛ a la duu kan jan.›

⁸ Baaleden do vɛɛ a yɛ: ‹Ǹ Kuntii, diɲa i y'a to je ɲinan san min na, ǹ kɛtɔ duu senna a laminin nɔ ka nɔɔ kɛ a ju fɛ.

⁹ Ni a k'a den kɛ numaija, wo yi bɛnne. Niwotɛ, i y'a tɛɛ k'a bɔ je.› »

Isa ka moso dɔ lakɛnɛya Nɔningɛlon teme

¹⁰ Nɔningɛlon dɔ, Isa tɛɛ mɔɔlu kalanna Aladalibon dɔ la.

¹¹ Wo k'a talan moso dɔ tɛɛ je, jina tɛɛ vɛ min lajangalo sanji tan ni sein (18) kɔlɔ, ka daan sii a kɔ lɔ. A tɛɛ tɛ se a latelenna feu.

¹² Isa ka moso wo ye mingɛ, a k'a kili k'a fɔ a yɛ, a vɛɛ: «Moso, i la vɛ fɛlɛ ka bɔ iya jangalo lɔ.»

¹³ A k'a bolo tuu moso la mingɛ, wo k'i latelen telemanin ka Ala tanu.

¹⁴ Kɛɛ Aladalibon wo ɲamɔɔ josoma ka gba, kamasɔlɔn Isa na mɔɔ lakɛnɛyala Nɔningɛlon. A do vɛɛ jama yɛ: «Tele wɔɔlɔ le yi je baalekɛko lɔ. Wo lɔ, ài yi na, ài yi kɛnɛya sɔlɔn tele wolu le kɔlɔ. Kɛɛ ài kà na Nɔningɛlon feu!»

¹⁵ Wo fɔ a bolo, mɔ Kuntii vɛɛ a yɛ: «Àilu filangafolu! Ni nisi niwotɛ sofalini ka kɛ ài bolo, jalasa ài tɛ wolu fɔlinna k'ai labɔ wɛlɛ lɔ ai laminko lɔ Nɔningɛlon?

¹⁶ Moso min do, Nabi Ibulahima bɔzɔn, Soitana na min silila sanji tan ni sein (18) kɔlɔ, jalasa wo man kan ka fɔlin Nɔningɛlon?»

¹⁷ Wo fɔ Isa bolo, a juulu bɛ ka maloya. Ado jama bɛ ka sawa ka bɛn Isa ya kawananko kɛninnu bɛ ma.

Ala ya masaya misalilu

¹⁸ Isa vɛɛ kɔtunun: «Ǹ'i se Ala ya masaya lala mindɛ ma?

¹⁹ A kɛyine iwo mutaadi kolo, kɛ́ dɔ ka min sɛnɛ aa gbele lɔ. A ka fɛlɛn ka kɛ kɔlɔmanju le, ka buɲa fɔɔ kɔnɔnilu k'ai ɲaalu lɔ a bololu la.»

²⁰ Isa vɛɛ kɔtunun: «Ala ya masaya ko kɛnin teme, ǹ'i se a lala mindɛ ma kɔtunun?

²¹ A kɛyine iwo bululafununsɛɛ, moso na min ɲaamina fainimuu tasa ɲa sawa le, haan fɔɔ a bɛ ladɛnnin ka funun.»

Ài yi don da dɔɔyanin fɛ

²² Isa taatɔla Jelusalɛmu, a tɛɛ mɔɔlu kalanna so ni toodalu la.

²³ Mɔɔ dɔ ka Isa maɲininga, a vɛɛ: «Ǹ Kuntii, mɔɔ dana le kisitɔ dein?» Isa do vɛɛ ai yɛ:

²⁴ «Ài lɔja kosɛvɛ ka don da dɔɔyanin fɛ, kamasɔlɔn ǹ'a fɔ ài yɛ, mɔɔ siyama kɛtɔ kaɲala donko ma da wo le la.

²⁵ Ni bontii k'i wuli ka da sɔɔ, ài totɔ kɛnɛ le ma ka to da makɔnkɔnna k'a fɔ, ài vɛɛ: ‹Mɔ Kuntii! Da laka mɔ yɛ!› A do kɛtɔ a fɔla ài yɛ, a vɛɛ: ‹M̀ ma ài bɔya lɔn.›

²⁶ Wo lɔ, ài kɛtɔ a javila, ài vɛɛ: ‹Mɔ Kuntii, mɔ na dɔnni kɛla k'i min i fɛ. I do tɛɛ mɔɔlu kalanna maa so kɔnɔ siyabalu la.›

²⁷ A do kɛtɔ a fɔla ài yɛ kɔtunun, a vɛɛ: ‹Ǹ'a fɔ ài yɛ, m̀ ma ài bɔya lɔn. Àilu koyonkɛbalu, ài y'ài majaanya ǹ na!›

²⁸ «Ài kasitɔ k'ài ɲii sii i ɲɔɔ na dimin bolo, ài vɛ Ibulahima ni Isiyaka ni Janguba ani kela tɔ bɛ yena Ala ya masaya lɔ, k'a talan àilu la vɛ fili banama!

²⁹ Wo waate, mɔɔlu kɛtɔ bɔla dunuɲa tungun naani bɛ lɔ, ka na ai sii feetikɛya lɔ Ala ya masaya lɔ.

³⁰ Kɛɛ ài y'a lɔn ko bi ɲafɛmɔɔ dɔlu kɛtɔ kɔfɛmɔɔ le le, ani kɔfɛmɔɔ dɔlu kɛtɔ ɲafɛmɔɔ le le.»

Jelusalɛmu hena ka Isa mina teme

³¹ Wo waate kelen nɔ, Falisi dɔlu k'i madon Isa la k'a fɔ a yɛ, ai vɛɛ: «Bɔ jan, i yi taa dingila gbɛlɛ lɔ, kamasɔlɔn Helodi y'a fɛ k'i faa.»

³² Kɛɛ Isa do k'ai javi, a vɛɛ: «Ài yi taa a fɔ jɛɛkani wo yɛ ko ǹ'i jinalu gbɛnna mɔɔlu lɔ, ani ka mɔɔlu lakɛnɛya bi ni sinin, ado tele sawana lon, ǹa baale dafatɔ.

³³ Wo bɛ n'a kɛ, fɔ ǹ'i to taamana bi ni sinin ani sininkɛnɛ, kamasɔlɔn a bɛnnin tɛ kela yi faa dingila gbɛlɛ lɔ ni Jelusalɛmu tɛ.»

³⁴ «Ɛɛ Jelusalɛmu! Jelusalɛmu! Ile min ya mɔɔlu yi kelalu faala ka Ala ya kelalasebalu bon kawa la. A lɔɔ tɛɛ ǹ na siɲa siyama le k'ài ladɛn iwo sisɛ y'a dennu ladɛnna teme, k'ai doon a kawa kɔlɔ, kɛɛ ài do ma diɲa a ma.

³⁵ Ài y'a ye, àiya bon labilatɔ Ala bolo. Ǹ'a fɔ ài yɛ, ài ɲa tɛnala lala ǹ kan butu haan fɔɔ ài v'a fɔla lon min na, ko: ‹Duwawu yi wo le yɛ min yi nala mɔ Tii tɔɔ lɔ!› »