Luka 12 - Ala Ya Salatikan Kula Kitabu

Falisilu ya filangafoya

¹ Wo waate lɔ, mɔɔ waa jilika k'ai ladɛn Isa laminin nɔ haan fɔɔ ai v'i lɔla i ɲɔɔ kɔkan. Isa do ka kuma a kɔbiladennu yɛ kunfɔlɔ le, a vɛɛ ai yɛ: «Ài y'ài jando ài jɛlɛ lɔ ka bɛn Falisilu ya bululafununsɛɛ ma, min yi filangafoya le.

² Ko doonnin suu suu tɛ je, min la tɛnala nkɛnɛmayala, kumatɛ gbonoko ma, min tɛnala lɔnna.

³ Wo lɔ saa, ài na ko ko fɔla doon nɔ, mɔɔlu kɛtɔ wo mɛnna bala lɔ. Ài do na ko min fɔla bon datuunnin kɔnɔ kan majii lɔ, mɔɔlu lɔtɔ bon kɔkan ka wo fɔ gbanɔkan nɔ.

Mɔɔ man kan ka siyan adamadennu ɲa

⁴ «Ǹ tɔvalu, ǹ'a fɔ ài yɛ, ài kà siyan mɔɔlu ɲa minu yi se mɔɔ falikolo faala dein, kɛɛ a see tɛ ai yɛ ka ko gbɛlɛ kɛ wo kɔ.

⁵ Ài ka kan ka siyan min ɲa, ǹ kɛtɔ wo jiyala ài la. See yi min yɛ ka mɔɔ faa, ka ban k'a lafili jahanama, ài ka kan ka siyan wo tii le ɲa. Aan, ǹ'a fɔ ài yɛ, ài yi siyan ale le ɲa feu!

⁶ «Kɔnɔni loolu yi felela wɔligbanani fila le la, kɛlɛ? Wo bɛ n'a kɛ, Ala ɲinannin tɛ hali ai lɔ kelen kɔ.

⁷ Àilu koni, hali ài kunsi kaali kɔndɛ gbu lɔnnin Ala bolo. Wo ma, ài kà siyan. Àilu kulugbeleyanin vɛ kɔnɔni jilika jaan ne.»

Mɔɔ diɲako niwotɛ a banko Masa Tɔɔmasenin lɔ

⁸ «Ǹ'a fɔ ài yɛ, ni mɔɔ min k'i lɔ a la mɔɔlu ɲakɔlɔ ko ǹe le ta y'a le, Mɔɔnivin Tanin fana kɛtɔ a lɔla a la Ala ya mɛlɛkalu ɲakɔlɔ ko ale le ta yi wo tii le.

⁹ Kɛɛ ni mɔɔ min k'i ban ǹ lɔ mɔɔlu ɲakɔlɔ, ǹe fana kɛtɔ m̀ banna wo tii lɔ Ala ya mɛlɛkalu ɲakɔlɔ.

¹⁰ Ni mɔɔ mɔɔ si ka lafeyalikan fɔ Mɔɔnivin Tanin ma, wo tii ma yi sene kotola. Kɛɛ ni mɔɔ min vɛ lafeyalikan fɔla Nii Sɛnɛyanin ma, wo tii ma tɛ koto tuun!

¹¹ «Ai vɛ kɛla taala ài le Aladalibon ɲamɔɔlu ni jamanatiilu ani kititɛɛbalu ɲakɔlɔ, ài kà hamin ài kumanɔbɔko le.

¹² Kamasɔlɔn ài ka kan ka min fɔ, Nii Sɛnɛyanin ne kɛtɔ wo jiyala ài la wo waate kelen nɔ.»

Nafolotii hangilindan ma sana

¹³ Kɛ́ dɔ ka to jama tɛma k'a fɔ Isa yɛ, a vɛɛ: «Kalanmɔɔ, i y'a fɔ ǹ kɔlɔkɛ yɛ a yi mɔ fa kɛɛ lɔtala, a yi ǹ ta fan di m̀ ma.»

¹⁴ Isa do vɛɛ a yɛ: «Ǹ tɔva, jene na ǹ kɛla àiya kititɛɛba le, niwotɛ àiya kɛɛ lɔtalaba le?»

¹⁵ Wo fɔ Isa bolo, a k'a fɔ jama yɛ, a vɛɛ: «Ài y'ài jando ài jɛlɛ lɔ ka bɛn natabaya suu bɛ ma, kamasɔlɔn mɔɔ ya niimaya tɛ bɔla aa nafolo wala jate lɔ.»

¹⁶ Isa ka sana dɔ la ai yɛ, a vɛɛ: «Nafolobatii dɔ tɛɛ je, min ya sɛnɛ ka sawati kosɛvɛ.

¹⁷ A do tɛɛ a milila wo lɔ, a vɛɛ: ‹Ǹ'a kɛ di vɛ? Kamasɔlɔn sɛnɛfen ladaloya gbɛlɛ tɛ m̀ bolo butu.›

¹⁸ A do vɛɛ kɔtunun: ‹Ǹ kɛtɔ ǹa bolonnu tela k'a bubatalu lɔ, ka ǹa sɛnɛfennu ni m̀ bolofennu bɛ ladalo ai kɔnɔ.

¹⁹ Wo vɛ kɛla, ǹ kɛtɔ a fɔla ǹ jɛlɛ yɛ, ǹ ko: Ile min fen siyama ladalonin i bolo min kɛtɔ san siyama kɛla, i yi dɔ nɔningɛ, i yi dɔnni kɛ, i i min, i i kɔnɔlɔdiya.›

²⁰ Kɛɛ Ala do vɛɛ a yɛ: ‹Ile hangilindan. Bi su min nɔ yi ne, i nunakili makilitɔle i la. I na fen minu ladɛnna i jɛlɛ yɛ, wolu kɛtɔ jene ta le wo lɔ?›

²¹ Wo ɲɔɔzii le kɛtɔ wo mɔɔ masɔlɔnna min yi nafolo ladɛnna a jɛlɛ yɛ, a do tɛ nafolotii le Ala ɲakɔlɔ.»

Mɔ kà hamin

²² Wo kɔ, Isa vɛɛ a kɔbiladennu yɛ: «Wo lɔ saa, ǹ'a fɔ ài yɛ, ài kà hamin àiya niimaya le k'a fɔ ài kɛtɔ mindɛ dɔnna, niwotɛ ài falikolo ya ko le, k'a fɔ ài kɛtɔ mindɛ le bilala ài kanna.

²³ Kamasɔlɔn niimaya kulugbeleyayine dɔnnifen ne. Falikolo do kulugbeleyayine feeyabɔ le.

²⁴ Ài y'ài mili ngalawɔnilu ma. Ai tɛ sɛnɛ kɛla, ai do tɛ sɛnɛfen kalila. Balawa ni bolon suu suu tɛ ai bolo. Wo bɛ n'a kɛ, Ala y'ai balola. Àilu do kulugbeleyanin vɛ kɔnɔlu le!

²⁵ Jene y'ài tɛma, min yi se lɛlɛ kelen gbu kafonna aa simaya kɔkan ka bɛn aa hamin ma?

²⁶ Ni ài tɛ se ko fitinin wo suu gbu kɛla, mindɛ lɔ ài yi haminna ko gbɛlɛlu le?

²⁷ Ài y'ài mili tuukɔlɔbinnu yi fɛlɛnna teme. Ai tɛ baale kɛla, ai do tɛ feeyabɔ ladanna. Kɛɛ ǹ'a fɔ ài yɛ, hali Masakɛ Sulimana ni aa banaya bɛ, a m'a jɛlɛ feeyabɔ ka se bin feele minu dɔ lɔ.

²⁸ Ni Ala yi tuukɔlɔbinnu feeyabɔla ten, minu yi je bi k'ai ɲɛnin taa lɔ sinin, a lagbɛyine feu ko a kɛtɔ ài feeyabɔla, àilu minu ya limaniya dɔɔyanin!

²⁹ «Ài sɔn kà ja ka bɛn àiya dɔnnikɛko ni ài minko ma, ài do kɔnɔlɔ kà fili.

³⁰ Kamasɔlɔn Alalɔnbalilu le sɔnjanin ko suu wolu le. Kɛɛ àilu, ài Fa Ala k'a lɔn ài mako yi fen wolu la.

³¹ Wo lɔ, min fisayanin, ài yi Ala ya masaya ɲinin kunfɔlɔ le, wo vɛ kɛla, wo bɛ yi lale wo kɔkan ka di ài ma.»

Nafolo ladaloko haijɛnɛ

³² Isa vɛɛ a kɔbiladennu yɛ: «Ǹa saa kulu dana, ài kà siyan, kamasɔlɔn a diyanin ài Fa Ala yɛ ka masaya di ài ma.

³³ Ài y'ài bolofennu fele ka bolokolonnu sɔ. Ài yi wɔlibilabɔlɔlu ladan ài jɛlɛ yɛ minu tɛ se tiɲala, ani ka nafololu ladɛn ài jɛlɛ yɛ haijɛnɛ minu tɛnala dɛsɛla. Son tɛ se donna woja ka suɲali kɛ, baabaa do tɛ se tiɲali kɛla je.

³⁴ Kamasɔlɔn iya nafolo yi tɛɛminja, i josokun gbaannin wo le ja la.»

Bɔiden minu lɔbɛnnin

³⁵ «Ài y'ài tɛsili baaleko lɔ, k'àiya fitina lamɛnɛnni to waate bɛ.

³⁶ Ài yi kɛ iwo bɔiden minu y'ai kuntii makɔnɔna bon na, fɔsa a vɛ nala ka bɔ fulusiliya lɔ ka da makɔnkɔn, ai yi da laka a yɛ telemanin.

³⁷ Duwawuden ne wolu le, minu ya kuntii kɛtɔ nala k'ai talan ai ɲana. Ǹ'i tuɲa fɔ ài yɛ, aiya kuntii kɛtɔ a tɛsilila baaleko lɔ, ka bɔidennu lasii dɔnnikɛya lɔ, ka dɔnni sii ai kɛɛna.

³⁸ A ka na sutɛma o, niwotɛ subama o, ka bɔiden minu talan ai ɲana, wolu kɛtɔ duwawuden ne le.

³⁹ Kɛɛ ài yi ko min ɲaye: Ni bontii tɛɛ v'a lɔnna ko son natɔ waate min nɔ, a tɛɛ tɛ diɲa son yi don aa bon na.

⁴⁰ Wo lɔ, àilu fana lɔbɛnnin yi to, kamasɔlɔn Mɔɔnivin Tanin natɔ waate dɔ lɔ, ài jii tɛ waate min ma.»

Bɔiden sɔvɛ ni bɔiden kolon ma sana

⁴¹ Piyɛli ka Isa maɲininga, a vɛɛ: «Ǹ Kuntii, i yi sana min lala ǹu le yɛ, baa mɔɔlu bɛ?»

⁴² Mɔ Kuntii k'a javi, a vɛɛ: «Jene yi bɔiden sɔvɛ le ani hangilima, aa kuntii kɛtɔ min lasiila bɔiden tɔlu kunna, fɔsa a yi balo di ai ma a waate bɛlɛ lɔ?

⁴³ Ni bɔiden wo ya kuntii ka na ka a talan baale la, a kɛtɔ duwawuden ne le.

⁴⁴ Ǹ'i tuɲa fɔ ài yɛ, aa kuntii kɛtɔ ale le kɛla a bolofennu bɛ kunnasiiba le.

⁴⁵ Kɛɛ do, ni wo tii k'a fɔ a jɛlɛ yɛ, a vɛɛ: ‹Ǹ kuntii vɛ mɛn, a tɛ nala jona,› ni a do v'a bɔidenɲɔɔlu gbasila, kɛ́ ni mosolu, ka ban ka taa dɔnni kɛ, ani k'i fa gbɛ lɔ,

⁴⁶ wo vɛ kɛla, bɔiden wo ya kuntii kɛtɔ nala lon dɔ, a t'i milila lon min ma, a do jii tɛ waate min ma. Wo do kɛtɔ a lɔtɛɛtɛɛla k'a kafon limaniyabalilu kɔkan.

⁴⁷ «Bɔiden min ka aa kuntii sawo lɔn, kɛɛ a do m'a jɛlɛ lɔbɛn, kumatɛ ka aa kuntii sawo kɛ, wo vɛ kɛla, wo tii gbasitɔle bubale!

⁴⁸ Kɛɛ bɔiden min ma aa kuntii sawo lɔn, ni a ka kobɛnbali dɔ kɛ min ni gbasili kaannin, bɔiden wo gbasitɔle dɔni ne. Kamasɔlɔn fen siyama dinin mɔɔ min ma, fen siyama maɲiningatɔ wo tii le la. Ado fen siyama kalifanin mɔɔ min na, fen siyama makilitɔ wo tii le la.»

Mɔɔwotɛfalanko Isa bolo

⁴⁹ Isa vɛɛ kɔtunun: «Ǹ nanin ka duukolo kɛ taa le la, a do lɔɔ yi ǹ na taa wo yi mɛnɛn butu.

⁵⁰ Kɛɛ makoli dɔ yi je, ǹ ka kan ka min sɔlɔn bene. Wo yi ǹ kan sɔnja le le haan fɔɔ a ma vɛ fala.

⁵¹ A ài kɔnɔ ko ǹ nanin ka josolajii le kɛ duukolo kɔkan? Wo tɛ dɛ, fɔ ka mɔɔlu falan a ma!

⁵² Ka ta bi ma, ni mɔɔ loolu ka kɛ demaya kelen ne, mɔɔ sawa y'ai lɔle mɔɔ fila ɲa, ani mɔɔ fila y'ai lɔle mɔɔ sawa ɲa.

⁵³ Fa y'a lɔle a denkɛ la, denkɛ fana y'a lɔle a fa la. Ba y'a lɔle a denmoso la, denmoso fana y'a lɔle a ba la, ani maamoso y'a lɔle a mama la.»

Mɔɔlu yi waate min kɔlɔ ɲaye

⁵⁴ Isa vɛɛ jama yɛ kɔtunun: «Ài vɛ sanfinnin yena teleben fannɔ, ài y'a fɔla telemanin ko san natɔ. A do yi kɛla ten ne.

⁵⁵ Ado ni ài ka fɔɲɛ bɔtɔla ye bolokini fannɔ, ài vɛɛ: ‹Fundali siitɔle bi.› A do yi kɛla ten ne.

⁵⁶ Àilu filangafolu! Ài senin sangbolo ni duukolo kɛɲa kɔlɔ lɔnna. Kɛɛ ko minu yi kɛla waate min nɔ yi ne, mindɛ lɔ ài tɛ se wolu kɔlɔ lɔnna?»

Ai y'ai jɛlɛ kiti a kɛɲa bɛlɛbɛlɛ ma

⁵⁷ «Mindɛ lɔ ài tɛ se hali ka kotelenninu lɔkiti ài jɛlɛ yɛ?

⁵⁸ Ni i kɛlɛɲɔɔ ka kɛ taala i le kititɛɛya lɔ, ài vɛ kɛla taala, i i lɔja ka kɛlɛ ban jani ài yi se je. Niwotɛ, ni a k'i don kititɛɛba bolo, wo kɛtɔ i donna kasobon lakanaba le bolo. Wo fana kɛtɔ i bilala kaso le la.

⁵⁹ Ǹ'i tuɲa fɔ ài yɛ, i tɛnala bɔla je mafɔ i vɛ banna wɔli bɛ salala.»