Luka 10 - Ala Ya Salatikan Kula Kitabu

Isa ka mɔɔ bi wolowulan ni fila (72) kelaya teme

¹ Wo kɔ, mɔ Kuntii ka mɔɔ biwolowulan ni fila (72) gbɛlɛ ta, k'ai lataa a ɲa fila fila le, ko ai yi taa tooda ni solu bɛ la, ale gbu tɛɛ ka kan ka taa dingila minu lɔ.

² A do vɛɛ ai yɛ: «Malo mɔnnin lɔwalanin bubale, kɛɛ do, a kaliba ma siya. Wo ma, ài yi Sɛnɛtii madiya, a yi baaledennu lɔ malo kalila aa sɛnɛ lɔ.

³ Ài yi taa vɛ! Ǹ'ài lataala iwo saa denni minu bilanin soofalilu tɛma.

⁴ Ài kà taa wɔli le ài kun, niwotɛ taamabɔlɔ, niwotɛ samalalu, ani ài kà mɔɔ fo siya la.

⁵ Ài vɛ donna bon suu suu la, ài y'a fɔ, ài vɛɛ: ‹Hɛlɛ yi kɛ bon min na.›

⁶ Ni hɛlɛden dɔ ka kɛ bon wo la, àiya duwawu yi tole wo tii fɛ. Niwotɛ, àiya duwawu yi kɔseile ài ma.

⁷ Ài yi to bon kelen wo la, ka dɔnni ni minni kɛ je, ai vɛ min dila ài ma, kamasɔlɔn baalekɛba ka kan k'a sala sɔlɔn. Ài k'ài jiya mafalinfalin.

⁸ Ài vɛ donna so suu suu la, ni ai k'ai bolo sii ài kɔlɔ k'ài fana, ài yi wo dɔn.

⁹ Ài do yi jangalotɔlu lakɛnɛya so wo kɔnɔ, k'a fɔ ai yɛ ko: ‹Ala ya masaya waate ma vɛ sulunya ài la.›

¹⁰ Kɛɛ ni ài ka don so suu suu la, ni ai m'ai bolo sii ài kɔlɔ, ài yi taa ài lɔ siyaba kɔkan k'a fɔ ko:

¹¹ ‹Hali àiya so gbangban min gbu yi mɔ sen ma, m'i wo matɛla ka wo kɛ ài ban tɔɔmase le. Kɛɛ fɔ ài y'a lɔn ko Ala ya masaya waate ma vɛ sulunya.›

¹² Ǹ'a fɔ ài yɛ, lɔbalon, Sɔdɔmu mɔɔ yonnu ya kiti kɛtɔ nɔyala ka timin so wo mɔɔlu ta la.»

So limaniyabalilu

¹³ «Kolazinkalu, gbalo yi ài yɛ! Betisaidakalu, gbalo yi àilu fana yɛ! Kamasɔlɔn kawananko minu kɛnin ài fɛlɔ, ni wolu tɛɛ ka kɛ Tili ni Sidɔn solu kɔnɔ, je mɔɔlu tɛɛ ai dajoo mafalinne jona. Ai tɛɛ ai siile buuli lɔ, ka sayakasifaanilu bila ai kanna, ka wo kɛ ai dajoo mafalin tɔɔmase le.

¹⁴ Kɛɛ kititɛɛlon, Tili ni Sidɔnkalu ya kiti kɛtɔ nɔyala ka timin ài ta la.

¹⁵ Kapɛlɛnamukalu, àilu do? Ài y'ài milila ko àiya so jɛlɛtɔle haan fɔɔ ka sii haijɛnɛ la? Wo tɛnala kɛla! Ài jiitɔle haan fɔɔ ka se jahanama!»

¹⁶ Isa k'a fɔ a kɔbiladennu yɛ, a vɛɛ: «Mɔɔ min v'a tolomalɔla ài la, wo tii v'a tolomalɔ ǹ na. Mɔɔ min v'i banna ài lɔ, wo tii v'i ban ǹe fana lɔ. Ado mɔɔ min v'i banna ǹ nɔ, wo tii v'i ban ǹ kelaba lɔ fana.»

Mɔɔ biwolowulan ni fila (72) ka seikɔ teme

¹⁷ Wo kɔ, mɔɔ biwolowulan ni fila (72) wolu ka seikɔ sawa boloma. Ai do vɛɛ Isa yɛ: «Mɔ Kuntii, hali jinalu yi kolola mɔ yɛ, mɔ vɛ ai jamalila i tɔɔ lɔ.»

¹⁸ Isa do vɛɛ ai yɛ: «Ǹ na Soitana bentɔla yena ka bɔ sangbolo lɔ iwo sanmɛnɛn.

¹⁹ Ài tolomalɔ, m̀'ɛ seetiiya di ài ma ka taama salu ni wanzosalu kɔkan, ani ka see sɔlɔn ài juu Soitana ni a fanga bɛ ma. Koyon foi tɛnala ài masɔlɔnna.

²⁰ Wo bɛ n'a kɛ, ài kà sawa ka bɛn jinalu koloko ma ài yɛ. Mafɔ, ài yi sawa kamasɔlɔn ài tɔɔlu sɛvɛnin haijɛnɛ.»

Isa ka sawa teme

²¹ Wo waate kelen nɔ, Isa ka sawa Nii Sɛnɛyanin sabu la, a vɛɛ: «Ǹ Fa, sangbolo ni duukolo Tii, ǹ'i balika bɔla i yɛ, kamasɔlɔn i na ko minu doonna hangilima ni lɔnnilalu ma, i vɛ wolu jiya kalanbalilu la. Tuɲa le ǹ Fa, min kɛko n'i diya le la.»

²² «Ǹ Fa vɛ ko bɛ don m̀ bolo. Mɔɔ ma Denkɛ lɔn ni a Fa tɛ. Ado mɔɔ ma Fa lɔn ni a Denkɛ tɛ, ani a Denkɛ y'a fɛ ka ale lankɛnɛmaya mɔɔ minu yɛ.»

²³ Wo fɔ Isa bolo, a k'i ɲa tilimin ka kuma a kɔbiladennu yɛ ai ta fan, a vɛɛ: «Mɔɔ minu ɲa yi ko minu yena, wolu yi duwawuden ne le,

²⁴ kamasɔlɔn ǹ'a fɔ ài yɛ, ài ɲa yi ko minu yena yi ne, kela ni masakɛ siyama tɛɛ a fɛ ka wolu ye, kɛɛ ai do ma ai ye. Ài do tolo yi ko minu mɛnna yi ne, ai tɛɛ a fɛ ka wolu mɛn, kɛɛ ai do ma ai mɛn.»

Samaliyaka kɛ́ mɔɔ ɲuma ma sana

²⁵ Seliya kalanmɔɔ dɔ k'i wuli Isa lɔsumanko lɔ. A do vɛɛ a yɛ: «Kalanmɔɔ, ǹ'i mindɛ kɛ fɔsa ǹ'i niimaya banbali sɔlɔn?»

²⁶ Isa do vɛɛ a yɛ: «Mindɛ sɛvɛnin Ala ya seliya kitabu kɔnɔ? I yi wo ɲayena di?»

²⁷ A do ka Isa javi, a vɛɛ: «I i Tii Ala kanu i josokun bɛ la, ani i nii bɛ, ani i fanga bɛ, ani i miliya bɛ, ado i i siiɲɔɔ kanu iwo ile gbu.»

²⁸ Isa k'a javi, a vɛɛ: «Iya javili bɛnyine. Wo kɛ, i yi niimaya sɔlɔnne.»

²⁹ Kɛɛ komi seliya kalanmɔɔ tɛɛ a fɛ ka jo di a jɛlɛkanu ma, wo lɔ, a ka Isa maɲininga, a vɛɛ: «Jene gbu yi ǹ siiɲɔɔ le?»

³⁰ Isa k'a javi, a vɛɛ: «A ka kɛ kɛ́ dɔ le le, min tɛɛ jiila Jɛliko ka bɔ Jelusalɛmu. Benkannikɛba dɔlu k'i ben a kan, k'aa faani bɔ a kanna, k'a gbasi, k'a lanin to saya boloma ka taa.

³¹ Wo ka bɛn salakalaseba dɔ timintɔla ma siya kelen wo kɔkan. A ka kɛ́ lanin ye mingɛ, a ka timin siya fan kelen fɛ ka taa.

³² Lɔhɔlɔmabonba baaleden dɔ ka se je mingɛ ka kɛ́ lanin ye, ale fana ka timin siya fan kelen fɛ ka taa wo boloɲa kelen ma.

³³ Kɛɛ Samaliyaka kɛ́ dɔ timintɔla, wo ka kɛ́ lanin ye mingɛ siya la, kɛ́ hena k'a mina.

³⁴ A k'i madon a la, k'aa daalu lako tulu ni gbɛ le, k'ai lasili. Wo kɔ, a ka kɛ́ lala aa sofalini kɔkan ka taa a le lonajiyabon na, k'a jando a lɔ.

³⁵ Wo kɛnɛbɔlon, a ka wɔligbɛ gbana fila labɔ k'ai di bontii ma, k'a fɔ a yɛ, a vɛɛ: ‹I i jando a lɔ. Ni wɔli min ma bɔkɛ, m̀'ɛ ǹ kɔseila, ǹ'a tɔ sala.› »

³⁶ Isa ka ban sana lala ka seliya kalanmɔɔ maɲininga, a vɛɛ: «I ta miliya lɔ, benkannikɛbalu n'i benna kɛ́ min kan, jene gbu kɛnin a siiɲɔɔ le mɔɔ sawa wolu lɔ?»

³⁷ A do ka Isa javi, a vɛɛ: «Mɔɔ min na henandeya jiyala a la.» Isa do vɛɛ a yɛ: «Taa, ile fana yi wo ɲɔɔzii kɛ.»

Isa ka taa bɔ Mɔyamu ni Maata ma teme

³⁸ Isa nu taatɔla Jelusalɛmu, a ka se soni dɔ la. Moso dɔ, min tɔɔ tɛɛ ko Maata, wo ka Isa jiya aa bon na.

³⁹ A dɔɔmoso min tɔɔ tɛɛ ko Mɔyamu, wo tɛɛ siinin mɔ Kuntii sen kɔlɔ, a v'a tolomalɔla aa kalan na.

⁴⁰ Wo k'a talan Maata ɲagbanin tɛɛ gbadonna. A do k'i madon Isa la k'a fɔ a yɛ, a vɛɛ: «Ǹ Kuntii, ǹ dɔɔmoso vɛ ǹe kelen to baale la. Wo tɛ i ɲana ko le? A fɔ a yɛ, a yi na m̀ madɛmɛn!»

⁴¹ Kɛɛ mɔ Kuntii k'a javi, a vɛɛ: «Maata, Maata, i yi haminna k'i jɛlɛ ɲagba ko siyama la.

⁴² Kɛɛ ko kelenpesa le kobɛlɛ le. Mɔyamu do vɛ wo le ta, wo do tɛnala minala a la.»