Ko Lankɛnɛmayanin 3 - Ala Ya Salatikan Kula Kitabu

Kelayakuma limaniyajama yɛ Salidɛsi

¹ «A sɛvɛ k'a lataa limaniyajama ya mɛlɛka ma min yi Salidɛsi so kɔnɔ, i vɛɛ: ‹A ye, Ala ya nii wolowulan ni loloni wolowulan yi min bolo, wo kan ne min ne: « ‹Ǹ k'i kɛkolu lɔn. I do mangutu vɛ bɔ k'a fɔ ko niima le i le, k'a talan i sayine.

² I wuli, i lɔgbeleya, fɔsa minni i bolo, wo kana ban. Kamasɔlɔn m̀ m'i kɛkolu dafanin ye ba bene ǹ Tii Ala ɲakɔlɔ.

³ Wo le y'a ma, i na ko minu kalanna ani k'ai mɛn, i i hangili to wolu lɔ. I i bolo kɛ ko wolu la k'i dajoo mafalin. Ni i do ma kunun, ǹ kɛtɔ balala i lɔ iwo son, ado i tɛnala a lɔnna ǹ natɔ i kanma waate min.

⁴ Kɛɛ wo bɛ n'a kɛ, mɔɔ dɔlu i fɛlɔ Salidɛsi je minu ma aiya faanilu lakɔsɔ. Wolu le kɛtɔ taamana ǹ fɛ, faani gbɛ vɛ ai kanna, kamasɔlɔn ailu ni wo le kaannin.

⁵ Ni mɔɔ min ka see sɔlɔn, wo tii fana kɛtɔ faani gbɛ bilala a kanna iwo dɔ wolu, ado ǹ tɛnala a tɔɔ bɔla niimaya kitabu kɔnɔ tuun, mafɔ k'a tɔɔ fɔ ǹ Fa ni aa mɛlɛkalu ɲakɔlɔ.

⁶ « ‹Tolo yi mɔɔ min kun, wo tii y'a tolomalɔ Nii Sɛnɛyanin kan na, a yi min fɔla limaniyajamalu yɛ.›

Kelayakuma limaniyajama yɛ Filadɛfiya

⁷ «A sɛvɛ k'a lataa limaniyajama ya mɛlɛka ma min yi Filadɛfiya so kɔnɔ, i vɛɛ: ‹A ye, min sɛnɛyanin, min yi tuɲande le, Masakɛ Dawuda ya koɲii yi min bolo, min vɛ da lakala, mɔɔ foi tɛ se a datuunna, ani min vɛ da latuunna, mɔɔ foi tɛ se a lakala, wo kan ne min ne:

⁸ « ‹Ǹ k'i kɛkolu lɔn. A ye, m̀'ɛ da lakanin bila i yɛ, mɔɔ foi tɛ se min datuunna. Ǹ k'a lɔn ne ko i fanga walanin tɛ, kɛɛ i do v'i bolo kɛ ǹ kumakan na, i m'i ban ǹ tɔɔ lɔ.

⁹ Soitana kɔbiladennu minu y'a fɔla ai jɛlɛ ma ko Jahudiya, k'a talan ai tɛ wo le mafɔ faɲafɔbalu, a ye, ǹ kɛtɔ wolu lanala k'ai labilin i sen kɔlɔ. Wo vɛ kɛla, ai kɛtɔ a lɔnna ko ǹ n'i kanula.

¹⁰ Komi i vɛ ǹ kumakan labato ka bɛn sawali ma, wo ma, ǹ kɛtɔ i matangala jangata waate ma, min natɔ dunuɲa muumɛ ma dunuɲamɔɔlu lɔsumanko lɔ.

¹¹ Ǹ natɔ jona. Wo ma, min y'i bolo, i i bolo to wo la fɔsa mɔɔ suu suu kana iya jala mina i la.

¹² Ni mɔɔ min ka see sɔlɔn, ǹ kɛtɔ wo tii kɛla baima le le ǹ Tii Ala ya lɔhɔlɔmabonba kɔnɔ. A do tɛnala bɔla je tuun. Ǹ kɛtɔ ǹ Tii Ala tɔɔ sɛvɛla wo tii ma, ani ǹ Tii Ala ya so tɔɔ, min kɛnin Jelusalɛmu kula le, min jiitɔ ka bɔ ǹ Tii Ala fɛlɔ haijɛnɛ. Ado ǹ kɛtɔ ǹe gbu tɔɔ kula sɛvɛla a ma fana.

¹³ « ‹Tolo yi mɔɔ min kun, wo tii y'a tolomalɔ Nii Sɛnɛyanin kan na, a yi min fɔla limaniyajamalu yɛ.›

Kelayakuma limaniyajama yɛ Layodiseya

¹⁴ «A sɛvɛ k'a lataa limaniyajama ya mɛlɛka ma min yi Layodiseya so kɔnɔ, i vɛɛ: ‹A ye, min yi Amiina le le, min yi sele ɲuma bɛlɛbɛlɛ le, ani Ala ya dannifen bɛ jusii, wo kan ne min ne:

¹⁵ « ‹Ǹ k'i kɛkolu lɔn, k'a lɔn ko i tɛ fen sumayanin ne, niwotɛ fen gbanin. A tɛɛ bɛnne ni i tɛɛ kɛ fen sumayanin ne, niwotɛ fen gbanin.

¹⁶ Kɛɛ komi i kɛyine tapula, i gbanin ba tɛ, niwotɛ k'i sumaya, wo lɔ, ǹ kɛtɔ i bɔnna k'i bɔ ǹ da.

¹⁷ I bolo ko bana le i le, iya ko la vɛ ɲia, i mako tɛ fen fen si la. Kɛɛ i m'a lɔn ko mɔɔ manɔɔnin ne i le le, ani mɔɔ maɲumanin, ani bolokolon, ani ɲagbɛ, i do falimakolon ne.

¹⁸ Ǹ'i lalila yi ne, ǹ ko, i yi sanu san m̀ ma, taa vɛ min lasɛnɛya, fɔsa i yi banaya. I yi faani gbɛ san m̀ ma, fɔsa feeyabɔ yi kɛ i ma, i falimakolon kana bɔ gbɛ la maloya le. I yi ɲadimintulu san m̀ ma ka wo mun i ɲa kɔkan, fɔsa i yi se yeni kɛla teme.

¹⁹ Ǹ'i mɔɔ minu kanula, ǹ'i wolu le lalila k'ai makolo. Wo lɔ, i i sɛmɛdon k'i dajoo mafalin.

²⁰ A ye, ǹ lɔnin da la, ǹ'a makɔnkɔnna. Ni mɔɔ mɔɔ si ka ǹ kan mɛn ka da laka, ǹ kɛtɔ donna wo tii fɛlɔ, m'i dɔnni kɛ i ɲɔɔ fɛ.

²¹ Ni mɔɔ min ka see sɔlɔn, ǹ kɛtɔ wo tii lasiila ǹ dafɛ ǹa masayasiifen nɔ, iwo ǹ na see sɔlɔnna teme ka ǹ sii ǹ Fa dafɛ aa masayasiifen nɔ.

²² « ‹Tolo yi mɔɔ min kun, wo tii y'a tolomalɔ Nii Sɛnɛyanin kan na, a yi min fɔla limaniyajamalu yɛ.› »