Kɛkolu 28 - Ala Ya Salatikan Kula Kitabu

Ko min kɛnin Pɔli la Malita kɔɔtɛmaduu lɔ

¹ Mɔ ka kisi ka bɔ kɔɔji lɔ waate min nɔ, mɔ k'a mɛn ko kɔɔtɛmaduu wo tɔɔ le Malita.

² Je duulennu k'ai bolo sii mɔ kɔlɔ kobɛn. Ai ka taa ba bila ka mɔ bɛ kili je, kamasɔlɔn sanji tɛɛ nala, nɛnɛ vɛ bɔla.

³ Pɔli ka ɲɔɔzɔn dɔlu matɔmɔn mingɛ, wo kɛ waate taa la, fɔnfɔnni dɔ ka bɔ a lɔ ka bɛn taa fundali ma, ka Pɔli kin a bolo ma ka fasa a ma.

⁴ Je duulennu ka sa fasanin ye a bolo ma mingɛ, ai k'a fɔɔ i ɲɔɔ yɛ, ai vɛɛ: «Sika t'a lɔ, kɛ́ min yi mɔɔfaaba le le. Hali a kisinin ka kɛ ka bɔ kɔɔji lɔ, mɔ tii moso min yi koyonkɛbalu salala, wo ma diɲa a yi to a nii la.»

⁵ Kɛɛ Pɔli k'a bolo laseinsein ka sa lafili taa la, ado koyon foi m'a masɔlɔn.

⁶ Mɔɔlu jii tɛɛ a ma ko Pɔli fali kɛtɔ fununna, niwotɛ ka ben ka faa telemanin. Kɛɛ ai ka mɛn makɔnɔlila mingɛ k'a ye ko foi ma kɛ a la, wo le k'a kɛ, ai miliya ma ka falin. Ai vɛɛ ko ai yi tii minu batola, wolu dɔ le Pɔli le.

⁷ Dingila wo majaannin tɛɛ tɛ kɔɔtɛmaduu wo mɔɔba ya duu la, min tɔɔ tɛɛ Pubiliyusi. Wo k'a bolo sii mɔ kɔlɔ kobɛn ka mɔ jiya aa luu ma tele sawa kɔlɔ.

⁸ Wo k'a talan Pubiliyusi fa lanin tɛɛ nɛnɛgbani ni tɔɔtɔɔni bolo. Wo le k'a kɛ, Pɔli ka don a sibon na, ka Ala dali a yɛ, k'a bolo la a kan, k'a lakɛnɛya.

⁹ Wo kɛ, jangalotɔlu vɛ nala ka bɔ duu wo fan bɛ lɔ ka kɛnɛya sɔlɔn Pɔli fɛ.

¹⁰ Ai do tɛɛ nala buɲalifen suu bɛ dɔ le mɔ fɛ. Mɔ taa waate senin, mɔ mako tɛɛ fen fen si la, ai ka na wo bɛ le mɔ fɛ.

Pɔli ka se Lɔmu teme

¹¹ Kalo sawa timin kɔ, mɔ ka don kulunba dɔ kɔnɔ ka taa, ai tɛɛ a fɔla min ma ko Filanin Joolu. Wo bɔnin tɛɛ Alɛzandele so le la, kɛɛ a tɛɛ vɛ nɛnɛbɔ waate bɛ kɛ kɔɔtɛmaduu wo lɔ.

¹² Mɔ ka taa ka mɔ lɔ so dɔ la, min tɔɔ yi ko Silakusi, ka tele sawa kɛ je.

¹³ Mɔ ka bɔ je ka taa si Legiyo so kɔnɔ. Wo kɛnɛbɔlon, fɔɲɛ ba ka bɔ damina bolokini fannɔ ka kɛ mɔ kan. Ado mɔ ka tele fila kɛ jani m'i se Puzɔli so kɔnɔ.

¹⁴ Mɔ do ka limaniyamɔɔ dɔlu ye je, minu ka mɔ madiya ko m'i lɔɔtɛ kelen kɛ ai fɛ. Mɔ ka se Lɔmu wo boloɲa le ma.

¹⁵ Mɔ nako k'a fɔ Lɔmu limaniyamɔɔlu yɛ mingɛ, a dɔlu k'i wuli ka na mɔ labɛn Apiyusi Lɔɔfɛ lɔ. A dɔgbɛlɛlu ka na ka mɔ labɛn dingila dɔ lɔ, ai y'a fɔla tɛɛminja ma ko Lona Jiyabon Sawa. Pɔli ka wolu ye mingɛ, a ka balika bɔ Ala yɛ, a do sɛmɛ ka don.

¹⁶ Mɔ senin Lɔmu, ai ka diɲa ka Pɔli to a jɛlɛ ma bon dɔ la, ka sɔdasi kelen to a fɛ, wo v'a lakanala.

Pɔli ka Samakan Kein lase Lɔmu Jahudiyalu ma teme

¹⁷ Tele sawa timin kɔ, Pɔli ka Jahudiya ɲamɔɔlu kili. Ai ka na k'ai ladɛn mingɛ, a vɛɛ ai yɛ: «M̀ badenmalu, m̀ ma koyon kɛ maa mɔɔlu la, niwotɛ ka mɔ bemanu ya laanalu mafɔ. Wo bɛ n'a kɛ, ai ka m̀ mina Jelusalɛmu ka ǹ don Lɔmukalu bolo.

¹⁸ Ai ban m̀ maɲiningala, ai tɛɛ a fɛ ka m̀ bila, kamasɔlɔn ai ma foi ye ǹ na min yi kɛ ǹ faa kun ne.

¹⁹ Kɛɛ Jahudiya kuntiilu ma diɲa wo ma mingɛ, fɔ ǹ tɛɛ ǹa ko lase masakɛba Sezale le ma, k'a talan ǹ tɛɛ tɛ a fɛ ka ǹa jamanamɔɔlu makojiya.

²⁰ Wo le n'a kɛla, ǹ n'ài kilila ka kuma ài fɛ, kamasɔlɔn ǹ silinin jɔlɔkɔ min na ka bɛn Bani Isilankalu jeisii le ma.»

²¹ Ai ka Pɔli javi, ai vɛɛ: «Judekalu ma sɛvɛ lana mɔ ma ka bɛn i ma. Mɔ badenma dɔ ma na ka bɔ je, k'iya ko lase mɔ ma, niwotɛ ka kuma yon fɔ i ma.

²² Kɛɛ m'a fɛ k'ile gbu lamɛn k'i miliya lɔn, kamasɔlɔn mɔ k'a lɔn i yi diina kula siya min kɔkan, mɔɔlu yi wo tɔɔ yon ne fɔla fan bɛ lɔ.»

²³ Lon min jiyanin tɛɛ ai bolo, ai siyama ka na Pɔli jiyabon na wo lon na. Ka damina sɔɔma ka sii wula la, a ka Ala ya masaya ko ɲafɔ ai yɛ k'a senko kɛ k'ai lakunfa ka bɛn Isa ya ko ma, a vɛ kolu jiyala ai la ka bɔ Nabi Musa ya Taulati ni kela dɔgbɛlɛlu ya kitabulu kɔnɔ.

²⁴ A dɔlu ka la a kumakannu la, kɛɛ a dɔlu ma la a la.

²⁵ Ai ma bɛn kan kelen ma. Ai bɔtɔla, Pɔli ka kuma kelen fɔ ai yɛ, a vɛɛ: «Nii Sɛnɛyanin ka kuma min fɔ ài bemanu yɛ Nabi Ezayi bolo, wo yi tuɲa le le, ko:

²⁶ ‹Taa a fɔ mɔɔ minu yɛ, i vɛɛ: Ài kɛtɔ ài tolomalɔla kosɛvɛ, kɛɛ ài tɛnala foi ɲayena. Ài do kɛtɔ ài ɲa kaana, kɛɛ ài tɛnala foi yena.

²⁷ Kamasɔlɔn mɔɔ minu josokun vɛ ja, ai vɛ ai tolo datuun, k'ai ɲa masili, alako ai ɲa kana yeni kɛ, ai tolo kana ko mɛn, ani ai joso kana koɲaye, ani ai kana ai jɛlɛ lasei m̀ ma, min y'a kɛ, ǹ'ai lakisi.› »

^28-29 Pɔli k'a dɔ la kuma wo kɔkan, a vɛɛ: «Ài y'a lɔn ko Ala ya kisiko la vɛ se siboloma gbɛlɛ mɔɔlu ma. Wolu do kɛtɔ ai tolomalɔla a la!»

³⁰ Pɔli ka san fila dafanin kɛ aa bon na Lɔmu, a tɛɛ min salala koni. Mɔɔ minu tɛɛ nala a fɛlɔ, a tɛɛ a bolo siila wolu bɛ kɔlɔ.

³¹ A do tɛɛ Ala ya masaya ko lasena josolagbeleya boloma, ka mɔɔlu kalan ka bɛn mɔ Tii Masa Tɔɔmasenin Isa ya ko ma, ado mɔɔ foi ma a dansii wo la.