Kɛkolu 24 - Ala Ya Salatikan Kula Kitabu

Jahudiyalu ka Pɔli jalaki Felisi ɲakɔlɔ teme

¹ Tele loolu timinnin, salakalase kuntiiba Ananiya ni kɛmɔba dɔlu ani aiya lɔɲɛ min tɔɔ tɛɛ Tɛɛtulusi, ai bɛ ka na Sezale ka Pɔli makojiya jamanatii la.

² Pɔli lalɔnin kititɛɛya lɔ, Tɛɛtulusi k'a jalaki damina, a vɛɛ: «Maa jamanatii ɲuma, mɔ siinin hɛlɛ lɔ iya kuntiiya le kɔlɔ. Ka bɛn iya hangilimaya ma, ko siyama vɛ bɛn ka jamana min lataa ɲafɛ.

³ I y'a lɔn waate bɛ ani fan bɛ lɔ, ko m'i koɲuma lɔnna.

⁴ Kɛɛ ǹ t'a fɛ k'i matamala. Wo lɔ, i jon, i i tolomalɔ mɔ la dɔni ne iya ɲumaya boloma.

⁵ Mɔ v'a ye ko kɛ́ min yi tiɲalikɛba le le, min yi Jahudiyalu lamulutula dunuɲa fan bɛ lɔ. Ai y'a fɔla diina kula min ma ko Nazalɛtikalu, wo kuntii dɔ le a le.

^6-8 A do k'i lɔja hali ka maa lɔhɔlɔmabonba lakɔsɔ, kɛɛ mɔ k'a mina. Ni i ka Pɔli maɲininga, m'a jalakila ko minu la, ile gbu kɛtɔ wolu ɲayena.»

⁹ A ka to kumala, Jahudiyalu fana tɛɛ a dɔ lala aa jalakilikan kɔkan, k'a fɔ ko a kɛnin ten ne.

Pɔli k'a kumanɔbɔ jamanatii yɛ teme

¹⁰ Jamanatii ka kuma di Pɔli ma mingɛ, a ka kuma damina, a vɛɛ: «Ǹ k'a lɔn i vɛ san siyama le kɛ kititɛɛla jamana min kunna. Wo lɔ saa, ǹ sawayine ka ǹ kumanɔbɔ i yɛ.

¹¹ I yi sene ɲiningali kɛla k'a lɔn, a ma timin ba tele tan ni fila (12) la bene, ǹ taanin tɛɛ Alabatoya lɔ Jelusalɛmu.

¹² Ai ma ǹ ye mɔɔlu sɔsɔla lɔhɔlɔmabonba la, niwotɛ ka ǹ ye jama lamulutula Aladalibon suu suu la, niwotɛ so fan dɔ.

¹³ Mɔɔ minu yi ǹ jalakila ko minu la yi ne, ai tɛ se a jiyala ko wolu yi tuɲa le le.

¹⁴ Kɛɛ ǹ'i ǹ lɔla min na i ɲana, wo le min ne: Ǹ'i mɔ bemanu Tii Ala batola ka bɛn Isa ya siya le ma. Mɔɔ minu do yi wo jatela diina kula le le. Kɛɛ minu sɛvɛnin Kela Musa ya Taulati ni kela dɔgbɛlɛlu ya kitabulu kɔnɔ, ǹ limaniyayine wo bɛ ma.

¹⁵ Ǹ jei siinin Ala le la, ado wo jeisii kelen ne yi mɔɔ minu bolo, k'a fɔ ko telenmandelu ni mɔɔ telenbalilu bɛ le la kɛtɔ wulila saya kɔ.

¹⁶ Wo ma, ǹ'i ǹ senko le la kudein fɔsa ǹ joso sɛnɛyanin yi to Ala ni mɔɔlu yɛ.

¹⁷ «Ka talan ǹ tɛɛ vɛ fama tala Jelusalɛmu san siyama kɔlɔ, ǹ ka taa je wɔli dɔ le ǹa jamana fandannilu sɔko lɔ, ani ka niilifen bɔ Ala yɛ.

¹⁸ Ǹ ka to wo la, ai ka ǹ lasɛnɛyanin ye lɔhɔlɔmabonba la. Jama tɛɛ tɛ ǹ fɛ, kumatɛ wɔyɔkan ma.

¹⁹ Kɛɛ Jahudiya dɔlu tɛɛ je minu bɔnin tɛɛ Esiya, wolu le tɛɛ ka kan ka kɛ jan ka m̀ makojiya i la, ni ko ka kɛ ǹe ni ailu wotɛ.

²⁰ Niwotɛ, diɲa kɛ́ minu gbu y'a fɔ i yɛ, ai na koyon min yena ǹ na, ǹ tɛɛ lɔnin kititɛɛjama ɲakɔlɔ waate min nɔ.

²¹ Fɔ ni ai josolakunanin ka kɛ m̀ ma ka bɛn ko kelen min ma, ǹ na min fɔla kan ba lɔ ai ɲakɔlɔ, ǹ ko: ‹Kiti bilanin ǹ na bi kamasɔlɔn ǹ jei siinin fulenilu lawuliko le la.› »

²² Komi Felisi tɛɛ ko siyama ɲayena ka bɛn Isa ya siya ma, wo lɔ, a ka jama labila k'a fɔ, a vɛɛ: «Sɔdasi kuntiiba Lisiya vɛ nala, ǹ kɛtɔ àiya kiti tɛɛla.»

²³ A ka sɔdasi kuntii jamali Pɔli lamalala kaso la bene. A vɛɛ ko wo yi Pɔli dɔni lafɛlɛ ka diɲa a tɔvalu yi na, fɔsa ai y'a makolu laɲia.

Pɔli ka kuma jamanatii ni a moso yɛ teme

²⁴ Tele dana timinnin, Felisi ni a moso Dulusila ka na, min tɛɛ Jahudiya le. Felisi do ka Pɔli kili k'a tolomalɔ a la ka bɛn Masa Tɔɔmasenin Isa malimaniyako ma.

²⁵ A do ka to kumala ka bɛn telenmandeyako ni jɛlɛlɔminako ani kititɛɛlon ko ma, haan fɔɔ Felisi ka siyan. A do vɛɛ Pɔli yɛ: «A to ten, taa bene. M̀'ɛ waate sɔlɔnna, ǹ kɛtɔ i kilila kɔtunun.»

²⁶ A jii tɛɛ a ma fana ko Pɔli kɛtɔ divilɔfen dila a ma. Wo lɔ, a tɛɛ Pɔli kilila siɲa siyama le ka balo a fɛ.

²⁷ San fila timinnin, mɔɔ kula k'i sii Felisi nɔ lɔ jamanatiiya la, min tɔɔ tɛɛ ko Pɔlisusi Fɛsitusi. Komi Felisi tɛɛ a fɛ ka Jahudiyalu ladiyananko le kɛ, wo le k'a kɛ, a ka Pɔli to kaso la.