Kɛkolu 23 - Ala Ya Salatikan Kula Kitabu

¹ Wo kɛ, Pɔli k'i ɲa lɔ kititɛɛjama lɔ k'a fɔ ai yɛ, a vɛɛ: «M̀ badenmalu, m̀'ɛ ǹa dunuɲalɔtɛɛ kɛ ǹ joso sɛnɛyanin vɛ Ala ɲakɔlɔ haan fɔɔ ka na sii bi la.»

² Wo fɔ, salakalase kuntiiba Ananiya ka jamali di Pɔli tɔɔfɛ mɔɔlu ma ko ai y'a da te.

³ Pɔli do vɛɛ a yɛ: «Ala kɛtɔ i gbasila, ile min kɛnin iwo bon kein kɔ! I siinin jan ka ǹa kiti tɛɛ ka bɛn Nabi Musa ya seliya le ma, kɛɛ ile gbu vɛ seliya tiɲa, kamasɔlɔn i na jamali dila ko ai yi m̀ gbasi.»

⁴ A tɔɔfɛ mɔɔlu do vɛɛ a yɛ: «I yi salakalase kuntiiba le jɛvɛla tan?»

⁵ Pɔli do vɛɛ ai yɛ: «M̀ badenmalu, ǹ tɛɛ m'a lɔn ko salakalase kuntiiba le a le, kamasɔlɔn a sɛvɛnin kitabu kɔnɔ, ko: ‹I kà kuma yon fɔ iya mɔɔlu kuntii ma.› »

⁶ Pɔli k'a ye ko kititɛɛjama falannin tɛɛ a ma, a dɔlu tɛɛ Sadusi le, a dɔlu tɛɛ Falisi le. Wo lɔ, Pɔli k'a kan labɔ k'a fɔ kititɛɛjama yɛ, a vɛɛ: «M̀ badenmalu, Falisi le ǹ ne. Ǹ fa fana yi Falisi le le. Kiti bilanin ǹ na bi kamasɔlɔn ǹ jei siinin fulenilu lawuliko le la.»

⁷ Wo fɔ Pɔli bolo, sɔsɔyali k'i wuli Falisilu ni Sadusilu tɛma, ado jama lɔ ka tala fila le.

⁸ Kamasɔlɔn Sadusilu y'a fɔla ko fulenilu lawuliko tɛ tuɲa le, ko mɛlɛkalu tɛ je, kumatɛ niilu ma, kɛɛ Falisilu limaniyanin wo bɛ le ma.

⁹ Wo ka kɛ sɔɔnsɔɔn ba le. Seliya kalanmɔɔ minu tɛɛ Falisilu tɛma, wo dɔlu v'i wulila ka sɔsɔyali kɛ kosɛvɛ, ai vɛɛ: «Mɔ ma koyon foi ye kɛ́ min na. Tumadɔ nii niwotɛ mɛlɛka dɔ le na kumala a fɛ.»

¹⁰ Sɔsɔyali ka kɛwonya haan fɔɔ sɔdasi kuntiiba ka siyan ko ai kana ai ben Pɔli kan k'a lɔfalafala. Wo lɔ, a ka jamali di aa sɔdasilu ma ko ai yi Pɔli labɔ jama tɛma fanga la, ka taa a le sɔdasilu ya bonba la.

¹¹ Wo lon su lɔ, mɔ Tii k'i lɔ Pɔli dafɛ k'a fɔ a yɛ, a vɛɛ: «I josolagbeleya. I na seleya dila ka bɛn m̀ ma teme Jelusalɛmu, i ka kan ka a di ten ne Lɔmu fana.»

Jahudiya dɔlu ka janva lasii Pɔli ma teme

¹² Kɛnɛ bɔnin, Jahudiya dɔlu ka janva lasii k'ai sɛ ko ai tɛnala dɔnni kɛla, kumatɛ k'i min, ni ai ma Pɔli faa.

¹³ Mɔɔ binaani (40) ni kɔ le ka janva wo lasii.

¹⁴ Ai do ka taa salakalase kuntiibalu ni kɛmɔbalu fɛlɔ k'a fɔ ai yɛ, ai vɛɛ: «Mɔ na mɔ sɛla k'a fɔ ko mɔ tɛnala dɔnni kɛla fɔ mɔ vɛ banna Pɔli faala.

¹⁵ Wo le y'a ma, fɔ àilu ni kititɛɛjama yi samakan lataa sɔdasi kuntiiba ma k'a dali ko a yi Pɔli lana ài ma, fɔsa ài y'aa ko ɲabɔ kobɛn. Mɔ kɛtɔ mɔ lɔbɛnna a faako lɔ jani a yi se jan.»

¹⁶ Kɛɛ Pɔli bainni dɔ k'aiya janva ko wo mɛn mingɛ, a ka taa sɔdasilu ya bonba la k'a ɲafɔ Pɔli yɛ.

¹⁷ Wo lɔ, Pɔli ka sɔdasi kuntii dɔ kili k'a fɔ a yɛ, a vɛɛ: «I yi taa kavelen min ne sɔdasi kuntiiba fɛlɔ. Kuma dɔ y'a fɛ k'a fɔ a yɛ.»

¹⁸ Wo fɔ a bolo, sɔdasi kuntii ka taa kavelen ne aa kuntiiba fɛlɔ k'a fɔ a yɛ, a vɛɛ: «Kasoden min tɔɔ yi ko Pɔli, wo na ǹ kilila ka ǹ dali ko ǹ'i na kavelen min ne i fɛlɔ, kamasɔlɔn kuma dɔ y'a fɛ k'a fɔ i yɛ.»

¹⁹ Wo kɛ, sɔdasi kuntiiba ka kavelen mina a bolo ma k'i mataa mɔɔlu la k'a maɲininga, a vɛɛ: «Mindɛ le y'i fɛ k'a fɔ ǹ yɛ?»

²⁰ Kavelen do vɛɛ a yɛ: «Jahudiya dɔlu vɛ bɛn kan kelen ma ko ai kɛtɔ i dalila sinin, ko i yi taa Pɔli le kititɛɛjama fɛ fɔsa ai y'aa ko ɲabɔ kobɛn.

²¹ Kɛɛ i kà diɲa wo ma, kamasɔlɔn mɔɔ binaani (40) ni kɔ kɔngɔnin a la siya la, minu vɛ ai sɛ ko ai tɛnala dɔnni kɛla, kumatɛ k'i min, fɔ ai vɛ banna Pɔli faala. Ai lɔbɛnyine, ai i diɲako le makɔnɔna butu.»

²² Sɔdasi kuntiiba ka kavelen labila k'a fɔ a yɛ k'a magbeleya, a vɛɛ: «I kà fɔ mɔɔ suu suu yɛ ko i vɛ min lase m̀ ma.»

Sɔdasi kuntiiba ka Pɔli lataa jamanatii Felisi ma teme

²³ Wo kɛ, kuntiiba wo ka sɔdasi kuntii fila kili k'a fɔ ai yɛ, a vɛɛ: «Ài yi sɔdasi mɔɔ kɛmɛ fila (200) lɔbɛn ani sootii biwolowulan (70) ni tamatii kɛmɛ fila (200). Su vɛ kola, ài bɛ yi taa Sezale so kɔnɔ.

²⁴ Ài yi soo dɔlu lɔbɛn Pɔli yɛ fana ka taa a kɛnɛyanin ne jamanatii Felisi fɛlɔ.»

²⁵ A do ka sɛvɛ lɔbɛn k'a don ai bolo. A na min sɛvɛla, wo le min ne, ko:

²⁶ «Ǹe Kulodi Lisiya le yi sɛvɛ min lataala jamanatii ba Felisi ma. Ǹ'i fola.

²⁷ Jahudiyalu na kɛ́ min minala. Ai tɛɛ a faa boloma mingɛ, ǹ ka taa ǹa sɔdasilu fɛ k'a lakisi, kamasɔlɔn ǹ n'a mɛnna ko Lɔmu duulen ne a le.

²⁸ Jahudiyalu tɛɛ a jalakila kun min na, ǹ tɛɛ a fɛ ka wo lɔn. Wo lɔ, ǹ ka taa a le aiya kititɛɛjama fɛ.

²⁹ Ǹ k'a ye ko a ma ko kɛ min yi kɛ a faa kun ne, niwotɛ aa kasolabila kun ne. Mafɔ, ai tɛɛ a jalakila ka bɛn ai ta seliyakolu le ma dein.

³⁰ Ǹ k'a mɛn mingɛ ko janva le lasiinin a ma, ǹ k'a lataa i fɛlɔ telemanin. Ado ǹ k'a fɔ a jalakibalu yɛ, ǹ ko, ai yi taa a makojiya i fɛlɔ.»

³¹ Wo lɔ, sɔdasilu k'a kɛ iwo aiya kuntiiba k'ai jamali teme. Ai ka taa Pɔli le haan fɔɔ Andipatili so kɔnɔ su wo lɔ.

³² Wo kɛnɛbɔlon, sɔdasi minu tɛɛ ai sen ma, wolu ka seikɔ aiya bonba la. A minu tɛɛ soolu kɔkan, wolu ka siya mina ka taa Pɔli le.

³³ Ai ka se mingɛ Sezale, ai ka sɛvɛ di jamanatii ma ka Pɔli don a bolo.

³⁴ Jamanatii ka sɛvɛ kalan mingɛ, a ka Pɔli maɲininga ka bɛn a bɔya ma. A k'a lɔn mingɛ ko Pɔli yi bɔla Silisiya koovi le lɔ,

³⁵ a k'a fɔ a yɛ, a vɛɛ: «I jalakibalu vɛ nala, ǹ kɛtɔ ǹ tolomalɔla i la.» Jamanatii ka jamali di ko ai yi Pɔli lakana masabonba la, masakɛ kɔlɔ Helodi na min lɔla.