Kɛkolu 22 - Ala Ya Salatikan Kula Kitabu

¹ A vɛɛ: «M̀ badenmalu ni ǹ fanu, ài y'ài tolomalɔ ǹ na butu, ǹ'i ǹ kumanɔbɔ ài yɛ.»

² Ai do k'a kumakan mɛn mingɛ Hebulukan nɔ, ai ka jeden tue. Wo lɔ, Pɔli vɛɛ:

³ «Jahudiya le ǹ ne, min sɔlɔnnin Talese so kɔnɔ, Silisiya koovi lɔ, kɛɛ m̀ buɲanin Jelusalɛmu jan ne. Ǹ tɛɛ kalanmɔɔ Gamaliyɛli le bolo. Ale le na ǹ kalanna kobɛn mɔ bemanu ya seliya la. Ǹe do tɛsilinin tɛɛ Ala ya ko la kosɛvɛ, iwo àilu gbu tɛsilinin a la teme bi.

⁴ Wo lɔ, ǹ tɛɛ Isa ya siya lataamabalu jangatala bubale haan fɔɔ k'a dɔlu faa. Ǹ tɛɛ kɛ́ ni mosolu minala k'ai bila kaso la.

⁵ Salakalase kuntiiba ni kititɛɛjama kɛmɔbalu bɛ yi ǹ sele le wo lɔ. Ǹ ka sɛvɛ dɔlu sɔlɔn ai la, fɔsa ǹ'i taa wolu le ai badenmalu fɛ Damase so kɔnɔ. Wo boloɲa ma, ǹ ka Damase siya mina, fɔsa ǹ'i mɔɔ wolu mina ka na ai silinin ne Jelusalɛmu ai latɔnko lɔ.»

⁶ «M̀ masulunyatɔla Damase so la telelatelen waate lɔ, nɔɔlɔ ba ka bɔ sanma telemanin ka m̀ makɛ kala.

⁷ Ǹ ka m̀ ben duu ma ka kumakan dɔ mɛn, wo vɛɛ: ‹Sawuli, Sawuli, mindɛ lɔ i yi ǹ jangatala?›

⁸ Ǹe do ka ɲiningali kɛ, ǹ ko: ‹Ǹ Tii, jene i le le?› A do vɛɛ ǹ yɛ: ‹Isa Nazalɛtika le ǹ ne, i yi min jangatala.›

⁹ Ǹ taamaɲɔɔlu ka kɛnɛya wo ye, kɛɛ mɔɔ min tɛɛ kumala ǹ fɛ, ai ma wo tii kan mɛn.

¹⁰ Wo lɔ, ǹ k'a fɔ: ‹Ǹ Tii, ǹ'i mindɛ kɛ?› Ado ǹ Tii ka ǹ javi, a vɛɛ: ‹I wuli, i yi taa Damase. Ko min bɛ latɛɛnin i ma, wo bɛ fɔtɔ i yɛ je.›

¹¹ Komi ǹ ɲa tɛɛ vɛ gbɛ nɔɔlɔ ba bolo, wo le k'a kɛ, ǹ taamaɲɔɔlu ka m̀ bolo mina ka taa ǹ ne Damase.

¹² «Wo k'a talan, Alaɲasiyanɲɛmɔɔ dɔ tɛɛ Damase, min tɔɔ tɛɛ ko Ananiya. A tɛɛ Nabi Musa ya seliya latelenna, ado je Jahudiyalu bɛ tɛɛ a buɲala.

¹³ A ka na k'i lɔ ǹ dafɛ k'a fɔ ǹ yɛ, a vɛɛ: ‹M̀ badenma Sawuli, i ɲa la yi ka.› Wo fɔ, ǹ ɲa la ka ka telemanin, ǹ k'a ye.

¹⁴ A do vɛɛ ǹ yɛ: ‹Mɔ bemanu Tii Ala na i tala, fɔsa i y'a sawo lɔn, ka aa Mɔɔ Telennin ye, ani k'a dalakan mɛn.

¹⁵ I kɛtɔ kɛla aa sele le mɔɔ bɛ yɛ ka bɛn i na min yena, ani i na min mɛnna.

¹⁶ I yi mindɛ makɔnɔna butu? I wuli, i yi madaili kɛ mɔ Tii Isa tɔɔ lɔ, ka ban ka makoli sɔlɔn, fɔsa iya julumbulu yi bɔ i ma.›

¹⁷ «Ǹ seikɔnin Jelusalɛmu, ǹ ka to Ala dalila lɔhɔlɔmabonba la, Ala ka ko dɔ lajɛlɛ ǹ ɲa ma.

¹⁸ Ǹ ka ǹ Tii ye, a v'a fɔla ǹ yɛ: ‹I lateleja ka bɔ Jelusalɛmu ɲagba le, kamasɔlɔn jan mɔɔlu tɛnala ai bolo siila iya seleyakan kɔlɔ ka bɛn m̀ ma.›

¹⁹ Wo lɔ, ǹ ko: ‹Ǹ Tii, ailu gbu k'a lɔn ko ǹ tɛɛ taala Aladalibonnu la k'i malimaniyamɔɔlu mina, ani k'ai gbasi.

²⁰ Ai do tɛɛ iya sele Etiyɛn faala waate min nɔ, ǹe gbu lɔnin tɛɛ je. Ǹ ka diɲa wo bɛ ma, haan fɔɔ k'a faabalu ya faanibalu lamala ai yɛ.›

²¹ A do vɛɛ ǹ yɛ: ‹Taa vɛ! Ǹ kɛtɔ i lataala dingila majaan nɔ siboloma gbɛlɛ mɔɔlu fɛlɔ.› »

²² Jama ka to ai tolomalɔla Pɔli la haan fɔɔ a ka siboloma gbɛlɛ mɔɔlu ya ko fɔ. Wo fɔ a bolo, ai bɛ vɛ gbanɔla, ai vɛɛ: «Kɛ́ min yi bɔ dunuɲa! A man kan ka to a nii la!»

²³ Ai ka to gbanɔla k'aiya faanibalu bɔ ka wolu lafilifili, ani ka gbangban lawuli sanma.

²⁴ Wo lɔ, sɔdasi kuntiiba ka jamali di ko ai yi taa Pɔli le aiya bonba la. A do k'ai lɔ a gbasila gbusan na k'a maɲininga, fɔsa a yi jama gbanɔkan kun fɔ ai yɛ.

²⁵ Ai do ka Pɔli lɔsama a gbasiko lɔ mingɛ, a k'a fɔ sɔdasi kuntii yɛ, min lɔnin tɛɛ je, a vɛɛ: «Ka Lɔmu duulen gbasi gbusan na k'a talan aa kiti ma tɛɛ ba bene, wo ladaanyine?»

²⁶ Wo mɛn sɔdasi kuntii bolo, a ka taa aa kuntiiba fɛlɔ k'a fɔ a yɛ, a vɛɛ: «I kɛtɔ mindɛ kɛla kɛ́ min na yi ne? Lɔmu duulen ne a le!»

²⁷ Wo fɔ, sɔdasi kuntiiba ka taa Pɔli maɲininga, a vɛɛ: «Lɔmu duulen ne i le le?» Pɔli vɛɛ: «Aan.»

²⁸ Wo lɔ, sɔdasi kuntiiba vɛɛ a yɛ: «Ǹ na wɔli ba le salala Lɔmu duulenya sɔlɔnko lɔ.» Pɔli do vɛɛ: «Ǹe do sɔlɔnyine a lɔ!»

²⁹ Wo lɔ, mɔɔ minu nanin tɛɛ a gbasiya lɔ ani k'a maɲininga, wolu k'ai mataa a la telemanin. Ado sɔdasi kuntiiba ka kɛ Pɔli ya Lɔmu duulenya ko kalama mingɛ, a ka siyan, kamasɔlɔn a tɛɛ vɛ ban a silila jɔlɔkɔ le.

Pɔli ka kuma Jahudiya kɛmɔba jama yɛ teme

³⁰ Wo kɛnɛbɔ lon, sɔdasi kuntiiba tɛɛ a fɛ ka dailu gbugbu lɔn Jahudiyalu tɛɛ Pɔli jalakila min nɔ. Wo lɔ, a ka jɔlɔkɔ bɔ Pɔli la, ka salakalase kuntiibalu ni kititɛɛjama bɛ kili ladɛnya lɔ, ka ban ka Pɔli lalɔ ai ɲakɔlɔ.