Kɛkolu 21 - Ala Ya Salatikan Kula Kitabu

Pɔli taako Jelusalɛmu

¹ Mɔ wɔlinin ai lasalanala ka don kulunba kɔnɔ, mɔ ka bɔ je ka mɔ telen Kɔsi kɔɔtɛmaduu la. Wo kɛnɛbɔlon, mɔ ka taa se Lode kɔɔtɛmaduu ma, ka bɔ je ka taa se Patala so la.

² Mɔ do ka kulunba dɔ talan je, min tɛɛ taala Fenisi jamana lɔ. Wo lɔ, mɔ ka don wo kɔnɔ ka taa.

³ Mɔ masulunyanin kɔɔtɛmaduu dɔ la, min tɔɔ yi ko Sipele, mɔ ka timin a la bolokini fannɔ. Wo kɔ, mɔ ka se Siliya koovi lɔ k'i lɔ Tili so kɔnɔ, kulunkɔnɔ donilu la tɛɛ ka kan ka jii tɛɛminja.

⁴ Mɔ ka Isa kɔbiladen dɔlu talan je mingɛ, mɔ ka lɔɔtɛ kelen kɛ ai fɛ. Ai do tɛɛ mɔ lalila Nii Sɛnɛyanin fɛ ko Pɔli kà taa Jelusalɛmu.

⁵ Kɛɛ mɔ taa lon senin, mɔ ka bɔ je ka taa. Ailu ni ai mosolu ni ai dennu ka bɔ so kɔnɔ ka taa mɔ lɔsiya kulunba dala. Mɔ bɛ ka mɔ kumɛlɛni bila duu ma kɔɔji kawun na ka Ala dali.

⁶ Mɔ wɔlinin Ala dalila ka mɔ sala i ɲɔɔ na, mɔ ka don kulunba kɔnɔ, ai do ka seikɔ aiya luulu ma.

⁷ Mɔ ka to taala kulun kɔnɔ ka bɔ Tili ka taa se Pitolemai so ma. Mɔ senin je, mɔ ka taa limaniyamɔɔlu foya lɔ ka tele kelen kɛ ai fɛ.

⁸ Wo kɛnɛbɔlon, mɔ ka bɔ je ka taa se Sezale so ma, ka mɔ jiya Filipe ya bon na, min tɛɛ Samakan Kein lasenba le. Jelusalɛmu limaniyamɔɔlu ka kɛ́ wolowulan minu ta k'ai kɛ keladennu madɛmɛnba le, Filipe tɛɛ wolu dɔ le le.

⁹ A denmoso singbili naani tɛɛ je, minu tɛɛ ma kɛ́ ko lɔn ba bene. Wolu tɛɛ kelaya le kɛla.

¹⁰ Mɔ ka tele dana kɛ je waate min nɔ, kela dɔ min tɔɔ tɛɛ Agabusi, wo ka na ka bɔ Jude.

¹¹ A nanin mɔ fɛlɔ, a ka Pɔli ya tɛsililan ta k'a jɛlɛkanu sen ni a bolo sili wo le. A do vɛɛ: «Nii Sɛnɛyanin vɛɛ ko boloɲa kelen min ne ma, Jahudiya kuntiilu kɛtɔ tɛsililan min tii minala Jelusalɛmu, k'a sili k'a don siboloma gbɛlɛ mɔɔlu bolo.»

¹² Mɔ ka wo mɛn mingɛ, mɔ ni je mɔɔlu ka Pɔli madiya kosɛvɛ ko a kà taa Jelusalɛmu.

¹³ Kɛɛ Pɔli ka mɔ javi, a vɛɛ: «Mindɛ lɔ ài yi kasila tan ka ǹ joso tiɲa? Ǹ lɔbɛnyine ka taa kaso la, hali ni ǹ ka sa Jelusalɛmu ka bɛn mɔ Tii Isa tɔɔ ma.»

¹⁴ Mɔ k'a ye mingɛ ko Pɔli tɛnala a miliya mafalinna, mɔ k'a to ten. Mɔ do vɛɛ: «Mɔ Tii sawo yi kɛ.»

¹⁵ Tele dana timinnin, mɔ ka mɔ lɔbɛn ka Jelusalɛmu siya mina.

¹⁶ Isa kɔbiladen dɔlu ka bɔ Sezale, wolu ka mɔ malɔ ka na mɔ jiya kɛ́ dɔ ya bon na, min tɔɔ tɛɛ ko Minasɔn ka bɔ Sipele, min tɛɛ Isa kɔbiladen dɔ le kɔlɔkɔlɔ le.

Pɔli ka taa bɔ Janguba ma

¹⁷ Mɔ senin Jelusalɛmu, limaniyamɔɔlu k'ai bolo sii mɔ kɔlɔ sawa boloma.

¹⁸ Wo kɛnɛbɔlon, ǹu ni Pɔli ka taa bɔ Janguba ma, ado ɲamɔɔlu bɛ ladɛnnin tɛɛ je.

¹⁹ Pɔli k'ai fo ka dandɛɛli kɛ ai yɛ ka bɛn ko bɛ ma, Ala tɛɛ vɛ minu kɛ siboloma gbɛlɛ mɔɔlu tɛma ka bɛn aa baale ma.

²⁰ Wo mɛn ai bolo, ai vɛ Ala tanula. Ai do vɛɛ Pɔli yɛ: «Mɔ badenma, i v'a ye ko Jahudiya mɔɔ waa jilika vɛ limaniya Isa ma jan teme. Ai bɛ tɛsilinin Nabi Musa ya seliya lakanako la.

²¹ Kɛɛ ai n'a mɛnna ko i yi Jahudiyalu bɛ kalanna, minu jɛzɛnnin siboloma gbɛlɛ mɔɔlu tɛma, ko ai yi Nabi Musa ya seliya dabila, k'ai nɔningɛ ai denkɛlu makɛnɛkɛla, ani k'ai ban maa laanalu lɔ.

²² Wo lɔ saa, m'a kɛ di vɛ? Ai kɛtɔ i nako mɛnna jɔ.

²³ M'i min fɔla i yɛ yi ne, i yi wo kɛ. Kɛ́ naani yi mɔ fɛ jan, minu vɛ dalakan ta Ala yɛ.

²⁴ I yi wolu bila i fɛ, ài y'ài jɛlɛ lasɛnɛya kelen ne, i lɔ ai kunli sala la. Wo vɛ kɛla, mɔɔ bɛ kɛtɔ a lɔnna ko ai na ko ko si mɛnna ka bɛn i ma, wo suu suu tɛ tuɲa le, mafɔ ile gbu yi Nabi Musa ya seliya labatola.

²⁵ Siboloma gbɛlɛ mɔɔ minu limaniyanin Isa ma koni, mɔ vɛ ban sɛvɛ lataala ai ma fɔsa ai yi maa kolatɛɛnin lɔn, ko ai kà joosɔsoo dɔn, ai kà jeli dɔn, ai kà jufaasoo dɔn, ani ai kà kanu kɛ.»

²⁶ Wo kɛnɛbɔlon, Pɔli ka mɔɔ naani wolu ta k'a jɛlɛ lasɛnɛya ai fɛ. Wo kɔ, a ka taa lɔhɔlɔmabonba la ka lasɛnɛyali lonnu ban waate jiya, salakalu ka kan ka bɔ ai kelenkelenna bɛ yɛ waate min nɔ.

Ai ka Pɔli mina teme

²⁷ Tele wolowulan wo bantɔla, Jahudiya dɔlu ka bɔ Esiya koovi lɔ, wolu ka Pɔli ye lɔhɔlɔmabonba la ka jama lɔsun a kanma k'a mina.

²⁸ Ai do vɛ gbanɔla, ai vɛɛ: «Bani Isilanka kɛ́lu, ài yi na, ài yi mɔ madɛmɛn! Kɛ́ min ne yi mɔɔlu bɛ kalanna fan bɛ lɔ mɔ siboloma kanma, ani Nabi Musa ya seliya kanma, ani lɔhɔlɔma dingila min kanma. K'a dɔ la wo bɛ kɔkan, a vɛ na siboloma gbɛlɛ mɔɔlu gbu le lɔhɔlɔmabonba la, ka lɔhɔlɔma dingila min kɔsɔ.»

²⁹ Ai ka wo fɔ kamasɔlɔn ai na Ɛfɛsika Tolofimu ni Pɔli yena i ɲɔɔ fɛ so kɔnɔ. Wo lɔ, a tɛɛ ai kɔnɔ ko Pɔli nayine a le lɔhɔlɔmabonba la.

³⁰ Wo kɛ, so fan bɛ la ka maamaa. Jama vɛ bɔlila kelen ne k'i kɛ Pɔli kan k'a fɔnfɔn lɔhɔlɔmabonba kɔɔkan, ado ai ka da bɛ latuun telemanin.

³¹ Ai ka to a faako ɲaɲininna, samakan ka se Lɔmu sɔdasilu ya kuntiiba ma ko Jelusalɛmu so fan bɛ la vɛ maamaa.

³² A do ka sɔdasi kuntii dɔlu ni sɔdasi dɔlu ta telemanin ka bɔli ka taa jama lɔ. Jama ka sɔdasi kuntiiba ni aa sɔdasilu ye mingɛ, ai ka Pɔli gbasi dabila.

³³ Sɔdasi kuntiiba ka na ka Pɔli mina, ka jamali di ko ai yi Pɔli sili jɔlɔkɔ fila le. Wo kɛ, a ka jama maɲininga, a vɛɛ: «Kɛ́ min yi jene le? A na mindɛ kɛla?»

³⁴ Ado jama ka to wɔyɔla, bɛ tɛɛ ai ta fɔla. Sɔdasi kuntiiba k'a ye wo lɔ ko a tɛ se tuɲa gbɛ sɔlɔnna, kamasɔlɔn wɔyɔkan tɛɛ vɛ wala bubale. Wo lɔ, a ka aa sɔdasilu jamali ko ai yi taa Pɔli le aiya bonba la.

³⁵ Ai senin bon sɛnɛɛ ma, sɔdasilu ka Pɔli lajɛlɛ ka taa a le ka bɛn jama ya balawu ma.

³⁶ Kamasɔlɔn ai tɛɛ sɔdasilu kɔ, ai vɛ gbanɔla, ai vɛɛ: «Ài y'a faa!»

Pɔli ka kuma jama yɛ teme

³⁷ Ai dontɔla Pɔli le bonba la, a k'a fɔ sɔdasi kuntiiba yɛ, a vɛɛ: «I hakɛ to, i yi diɲale ǹ'i ko dɔ fɔ i yɛ?» Sɔdasi kuntiiba k'a javi, a vɛɛ: «I yi Gɛlɛkikan mɛnna?

³⁸ Wo lɔ, ile le tɛ Misilanka kɛ́ wo le, min na mɔɔlu lamulutula waate timinnin, ka taa benkannikɛba mɔɔ waa naani (4 000) ne fuwa lɔ?»

³⁹ Pɔli k'a javi, a vɛɛ: «Jahudiya le ǹ ne ka bɔ Talese, Silisiya koovi lɔ. So ba wo duulen ne ǹ ne. I jon jaani, diɲa ǹ'i kuma jama yɛ.»

⁴⁰ A diɲanin wo ma, Pɔli k'i lɔ bon sɛnɛɛ la k'a bolo jate mɔɔlu yɛ. Ai ka jeden tue mingɛ, Pɔli ka kuma damina ai yɛ Hebulukan nɔ.